1-2. (a) I rundi ma con Yehova ubed utio ku yo ma kani pi niweco i bang’ dhanu? (b) Wabiweco iwi lembang’o i thiwiwec maeni?

YEHOVA umaru niweco i bang’ dhanu. I rundi ma con, egam etio ku jubila, ku jumalaika man etio ku Wode ma Yesu Kristu pi ninyutho paru pare ni dhanu. (Amo. 3:7; Gal. 3:19; Nyu. 1:1) Tin lundo ebed eweco i bang’wa nikadhu kud i Lembe pare ma tie Biblia. Emio iwa Biblia kara wang’ei paru pare man wang’ei yeny pare.

² Saa ma Yesu ubino iwi ng’om, Yehova uweco wang’ adek niai kud i polo. Wakenen wec m’egam eyero wang’ adek maeno. Wanen bende ponji ma wacopo nwang’u niai kud i wecne, man bero ma wec maeno copo mio iwa.

3. Nimakere ku Marko 1:9-11, Yehova uyero ang’o i saa mi batizo pa Yesu, wec maeno unyutho lembe ma kani ma pigi tek?

³ Wec ma Yehova uyero wang’ ma kwong’a niai kud i polo nwang’ere i buku pa Marko 1:9-11. (Som.) Ewacu kumae: “In i Woda ma jamerna, ma mutoro nega i kumi.” M’umbe jiji, Yesu ubino kud anyong’a lee kinde m’ewinjo lembe ma Won uyero, m’unyutho kamaleng’ nia emare man egene. Wec maeno ma Yehova uwacu unyutho lembe adek ma pigi tek. Mi kwong’o, Yesu tie Wode; mir ario, Yehova umaru Wode; man mir adek, mutoro ubino nego Yehova i kum Wode. Wakeng’ii cuu i lembene acel acel.

4. Pirang’o Yehova uyero ni Yesu i saa mi batizo pare nia, “in i Woda”?

⁴ “In i Woda.” Pirang’o Yehova uyero wec maeno? Ma fodi Yesu ubino ngo i ng’om de, nwang’u dong’ etie Wod Mungu. Re i saa mi batizo pare, Mungu uwire ku tipo maleng’. I saa maeno, wec ma Mungu uyero unyutho nia Yesu  m’udaru doko Wode m’ewiro ku tipo utie ku genogen mi dok i polo pi nibedo Rwoth mi Ker pa Mungu man bende Jalam Madit. (Lk 1:31-33; Ebr. 1:8, 9; 2:17) Pieno wabenyang’ kamaleng’ nia pirang’o i saa mi batizo pa Yesu, Won ugam uyero ire nia, “in i Woda ma jamerna.”​—Lk 3:22.

5. Wacopo lubo lapor pa Yehova mi nyutho mer man mi tielo cwiny jumange nenedi?

⁵ “In i . . . jamerna.” Nikadhu kud i wec maeno, Yehova unyutho kamaleng’ nia emaru Yesu man nia mutoro ubenege i kume. Lapor pare ubepoyo wiwa nia wacikara niyenyo yo ceke mi tielo cwiny jumange. (Yoh. 5:20) Ka ng’atu moko ma wamaru unyutho nia en de emaruwa kunoke efoyowa pi gin moko ma ber ma watimo ire, eno mio tego i kumwa. Wan bende wacikara ninyutho mer man nitielo cwiny umego ku nyimego, man wedi mwa de. Ka wabedwoko foyofoc ni umego ku nyimego, wabitielo yioyic migi man wabikonyogi kara gimediri nigwoko bedoleng’ migi ni Yehova. Junyodo lundo gicikiri nidwoko foyofoc ni awiya migi nisagu. Ka junyodo gibefoyo awiya migi ku cwinygi zoo man gibenyutho nia gimarugi, eno bimio amora i kum awiyane.

6. Pirang’o ubekwayu wabed ku genogen iwi Yesu Kristu?

⁶ “Mutoro nega i kumi.” Wec maeni ma Yehova uyero unyutho kamaleng’ nia ebino ku genogen nia Yesu bitimo yeny pare kubang’e kubang’e. Calu ma Yehova ubino ku genogen ma rukeno iwi Yesu, wan de ubekwayu wagen Yesu, pilembe en re m’ebiketho lembang’ola pa Yehova ceke bipong’o kubang’e kubang’e. (2 Kor. 1:20) Ka wabenyamu i lembe ma tung’ tung’ ma Yesu utimo, wabibedo kud ava mi nwang’u ponji i bang’e, man wabiii nilubo batiende. Genogen ma Yehova ubino ko iwi Yesu ubenyutho nia tin de etie ku genogen nia ungu mi jurutic pare  gibimediri ninwang’u ponji i bang’ Wode.​—1 Pet. 2:21.

7. Nimakere ku Matayo 17:1-5, Yehova uweco kendo niai kud i polo i saa ma kani, man eyero ang’o?

⁷ Som Matayo 17:1-5. Wang’ mir arionde ma Yehova uweco niai kud i polo ubino i saa ma ‘kit Yesu ulokere.’ Yesu uting’o Petro, Yakobo man Yohana gicidho kugi iwi got moko ma wiw. Kinde ma gini kuca, gineno ginmawokiwang’ moko mir udu. Wang’ Yesu ucaku rieny man bongu pare ucaku riang’ini. E dhanu ario ugam uwok, ng’atu acel ubino nen ve Musa, ma kucelo ke ubino nen ve Eliya. Gicaku weco ku Yesu pi tho man pi cer pare. Kadok nwang’u ‘nindo ubino nuro’ jukwenda adek maeno de, re kinde ma giceu, gineno ginmawokiwang’ maeno mir udu. (Lk 9:29-32) I ng’eye, afuru m’uberieny uumogi, e giwinjo dwand Mungu ubeweco kud i afurune. Tap calu ma Yehova ugam uyero i saa mi batizo pa Yesu, saa maeni de enyutho kamaleng’ nia mutoro ubenege i kum Wode man nia emare, ewacu kumae: “Meni Woda ma jamerna, ma anyong’a nega i kume.” Re elund emedo kumae: “Wuwinje.”

8. Ginmawokiwang’ ma Yesu ku julub pare gineno ubino kud adwogi ma kani i wigi?

⁸ Ginmawokiwang’ maeno unyutho nyanok kende dwong’ man tego ma Kristu bibedo ko kinde m’ebibimo i Ker pa Mungu. Wec ma Yehova uyero i saa maeno utielo cwiny Yesu lee mandha man umio ire tego mi ciro masendi man tho. Ginmawokiwang’ne utielo yioyic mi julub bende. Emio igi kero mi ciro amulaic ma tung’ tung’ ma ginwang’iri ko i ng’eye, man emio igi kero mi timo tic ma tek m’ubino kurogi. Oro kago 30 i ng’eye, jakwenda Petro uweco pi ginmawokiwang’ maeno; eno unyutho nia wie uwil ungo nyanok de i kume.​—2 Pet. 1:16-18.

9. Yesu ugam umio juk makani ni julub pare?

⁹ “Wuwinje.” Wec maeno ma Yehova uyero ubenyutho kamaleng’ nia ebemito wawinj Wode man wawore. Yesu uyero lembang’o kinde m’ebino i ng’om? Egam eyero lembe dupa ma pigi tek m’ubekwayu wawinji. Ku lapor, eponjo julub pare ku kite m’ukwayu girwei ko lembanyong’a, man ebed epoyo wigi saa ceke nia gimediri nikio. (Mat. 24:42; 28:19, 20) Eng’olo ni julub pare nia gidog giii lee mandha nitimo yeny pa Mungu, man eketho cwinygi nia kud givoci. (Lk 13:24) Yesu ukwayu julub pare nia gimariri i kindgi, gibed i acel, man giwor lembe m’eng’olo igi. (Yoh. 15:10, 12, 13) Juk ma Yesu umio ni julub pare ugam ukonyogi lee dit, man tin de jukne gitie iwa ku kony.

10-11. Wacopo nyutho nenedi nia wabewinjo dwand Yesu?

¹⁰ Yesu uyero kumae: “Ku ba dhanu ceke ma mi lemandha winjo dwanda.” (Yoh. 18:37) Wanyutho nia wabewinjo dwand Yesu nwang’u wabeii ‘nioyo lembe ma kum juwadwa ma ng’atuman ubeoyo lembe ma kum wadi man kum wadi, man wabeweko lembe ma kum juwadwa ma ng’atuman ubeweko lembe ma kum wadi man kum wadi.’ (Kol. 3:13; Lk 17:3, 4) Bende, wanyutho nia wabewinjo Yesu nwang’u waberweyo lembanyong’a kud amora “i saa ma ber man i saa ma rac.”​—2 Tim. 4:2, NWT.

¹¹ Yesu uwacu kumae: “Rombe para winjo dwanda.” (Yoh. 10:27) Pi ninyutho nia gibewinjo dwand Yesu, julub pare gijik kende kende ngo niwinjo ponji pare, ento gitio bende ku ponjine i kwo migi. Giweko ngo “giki mi bedo maeni,” niwacu adieng’a  mi kwo maeni uwing wigi. (Lk 21:34) Ento gin ma pire tek akeca igi, utie niworo cik pa Yesu kadok i saa ma woro cikne utie yot ungo de. Umego ku nyimego mwa ma pol gibeciro peko ma tung’ tung’; pekone uketho i ie ragedo ma judegi migi ubenyayu i kumgi, can ma ngolo ngolo, man peko ma wok rek. Re kadok nwang’u gibekadhu kud i peko ma rukani de, gibemediri asu nigwoko bedoleng’ migi ni Yehova. Yesu utielo cwinygi kumae: “Ng’atu m’ubedo ku cik para, m’uworogi de, en e ng’atu m’umara: ng’atu m’umara de Vwa de bimare.”​—Yoh. 14:21.

12. Wanyutho nia wabewinjo dwand Yesu i ayi ma kani mange?

¹² Ayi mange ma wanyutho ko nia wabewinjo dwand Yesu utie nilubo telowic m’uai i bang’ dhanu m’eng’io nia utel wiwa. (Ebr. 13:7, 17) I kind oro m’ukadhu ceng’ini eni, dilo pa Yehova utimo alokaloka ma dupa. Ku lapor, jucaku nitio ku jamtic ma nyen man bodho ma nyen i lembanyong’a, jutimo alokaloka i program mi coko mwa ma kubang’ yenga, i ayi ma wagiero ko Udi Ker, i kite ma wayiko ko m’unyothere, man i ayi ma wagwoko kogi. Telowic ma wabewotho nwang’u utie pi bero mwa, man ubenyutho nia andha dilo pa Yehova umaruwa. M’umbe jiji, watie ku mutoro ma lee dit pi telowic maeno. Tek wabeii niworogi ceke, Yehova bimio iwa mugisa.

13. Bero ma kani ma wacopo nwang’u tek wabetio ku ponji ceke ma Yesu umio iwa?

¹³ Bero ma kani ma wacopo nwang’u tek wabetio ku ponji ceke ma Yesu umio iwa? Yesu ung’olo ni julubne nia ponji pare bikwio cwinygi. Eyero kumae: “Abimio iwu yom . . . Kum mberembere para e yot, ter para de foka foka.” (Mat. 11:28-30) Lembe pa Mungu, m’uketho i ie Injili ang’wen m’ukoro pi kwo man pi tic pa Yesu, mio kero i kumwa i thenge mi tipo man ketho wadoko riek. (Zab. 19:7; 23:3) Yesu uyero kumae: “Mugisa ni ju m’uwinjo lem pa Mungu, m’uwore de!”​—Lk 11:28.

14-15. (a) Nimakere ku Yohana 12:27, 28, Yehova ugam uweco niai kud i polo wang’ mir adege i saa ma kani? (b) Pirang’o lembe ma Yehova uyero utielo cwiny Yesu man umio kero i kume?

¹⁴ Som Yohana 12:27, 28. Injili pa Yohana ukoro lembe ma Yehova uyero wang’ mir adege niai kud i polo. Nindo moko i wang’ ma Yesu udhingo tho, ecidho i Yerusalem pi nitimo Kadhukuwijo wang’ ma tok cen. I saa maeno eyero kumae:  “Cwinya ng’abre.” I ng’eye erwo, eyero nia, “Vwa, yung nyingi.” E Won udwoko lembe niai kud i polo, eyero kumae: “Adaru yunge, man abiyunge kendo.”

¹⁵ I andha, cwiny Yesu ung’abere dre, pikum ugam ukwayu nia egwok bedoleng’ pare ni Yehova nitundo i tho. Yesu ung’eyo cuu nia ebecikadhu kud i masendi ma lee, man nia jubinege mi tek tek. (Mat. 26:38) Lembe ma pire bino tek akeca i Yesu ubino niyungo nying’ Won. Ento judote nia ecayu Mungu, eno uketho cwinye ubino pido lee dit pilembe ebino paru nia kit tho m’ebecitho tho ko copo kelo acidi iwi nying’ Mungu. M’umbe jiji, wec ma Yehova uwacu umio kero lee dit i kum Yesu! Pieno, cwinye udoko tek nia nying’ Yehova biyungere. Wec ma Mungu uyero ugam utielo cwiny Yesu lee mandha man umio ire kero mi ciro masendi m’edog ekadhu kud i ie. I saa maeno, Yesu unyang’ enikende i lembe ma Won uyero, re Yehova uketho jukiewo lembe m’eyerone piwa ceke.​—Yoh. 12:29, 30.

16. Saa moko lembang’o ma copo dieng’o cwinywa?

¹⁶ Calu Yesu, wan de cwinywa copo dieng’ i kum acidi ma jucopo kelo iwi nying’ Yehova. Saa moko nyo jubesendowa mananu calu ma jugam jusendo ko Yesu. Kunoke nyo cwinywa ubepido pilembe ju ma gijai i kum lemandha gibecwayu ndra iwi Jumulembe pa Yehova. Cwinywa copo ng’abere, pilembe ndra maeno romo kelo acidi iwi nying’ Yehova man iwi dilo pare. I saa maeno, lembe ma Yehova  uyero ma nwang’ere i Yohana 12:27, 28 copo mio iwa kony lee mandha. Ukwayu ngo cwinywa ubed udieng’ nikadhu mukero pi lembe moko ma copo kelo acidi iwi nying’ Yehova man iwi dilo pare. Wacopo bedo ku tegocwiny nia, ‘kwiocwiny pa Mungu, ma sagu ng’eyong’ec ceke, bikuro adundewa ku pidoiwa i Kristu Yesu.’ (Flp 4:6, 7) Wang’ei nia Yehova biweko ngo nyanok de niyungo nyinge. Nikadhu kud i Ker pare, ebidaru acidi ceke ma Sitani ku ng’om pare gikelo iwi jurutic pa Mungu ma gibegwoko bedoleng’ migi.​—Zab. 94:22, 23; Isa. 65:17.

17. Nimakere kud Isaya 30:21, Yehova beweco i bang’wa nikadhu kud i yo ma kani?

¹⁷ Tin eni de Yehova ubemedere asu niweco i bang’wa. (Som Isaya 30:21.) I andha ebed eweco ngo i bang’wa niai kud i polo, ento emio iwa telowic nikadhu kud i Biblia. M’umedo maeno, tipo maleng’ pa Yehova ubetelo wi “jakurpiny mandha” pi nimio cemo mi tipo ni jurutic pare. (Lk 12:42) Wabenwang’u cemone i ayi ma tung’ tung’, calu ve nikadhu kud i buku, girasoma ma wok i kusika mir Internet, video, man girasoma m’awinja ma copo konyowa nidwoko yioyic mwa udok tek.

18. Lembe ma Yehova uyero copo tielo yioyic peri man mio iri tegocwiny nenedi?

¹⁸ Dong’ wagwoku cuu i wiwa wec ma Yehova uyero kinde ma Wode ubino iwi ng’om. Wek wec pa Yehova maeno ma nwang’ere i Biblia, utiel cwinywa nia ebeneno lembe ceke m’ubetimere, man nia ebidaru peko ceke ma Sitani ku ng’om pare ukelo i wiwa. Wek wan ceke watim kero niwinjo dwand Yehova saa ceke. Ka watimo kumeno, wabituc niciro peko moko ci ma wabenwang’ara ko, man ma wabinwang’ara ko i nindo m’ubino. Biblia uyero iwa kumae: “Kum can twiocwiny ubenegowu, kara, wun ma wudaru timo yeny ma Mungu yenyo, wujol lembang’olane.”​—Ebr. 10:36.