1-2. Nimakere ku Tic mi Jukwenda 8:27-31, 35-38, ang’o m’ucwalu Jaethiopia nilimo batizo?

NYO ibemito ilim batizo kara idok jalub pa Kristu? Dhanu ma dupa gidaru limo batizo pilembe mer man foyofoc ugam ucwalugi nitimo kumeno. Wakenen lapor pa Jaethiopia moko m’ubino jatic p’ubimo ma dhaku mir Ethiopia.

² Kinde ma Jaethiopia maeno unyang’ i kum gin ma Lembagora ubekwayu etim, ndhundhu egam elimo batizo. (Som Tic mi Jukwenda 8:27-31, 35-38.) Girang’o m’ucwale nilimo batizo? Ubenen kamaleng’ nia elar emaru Lembe pa Mungu, pilembe saa m’eloko kud i Yerusalem, ebino somo lembila pa Isaya kud i magali pare. Bende, kinde ma Filipo ukoro ire i lembila m’ebino somo, efoyo akeca gin ma Yesu utimo ire. Re pirang’o Jaethiopia ucidho i Yerusalem? Pilembe nwang’u dong’ edaru maru Yehova. Wang’eyo lembuno nenedi? Girombo ku Filipo nwang’u eai etimo thier ni Yehova i Yerusalem. Jaethiopia maeno uweko dini pare mir anyoli, man ecaku woro Mungu karacelo ku dhanu ma githieriri ire. Mer m’emaru ko Yehova re m’ucwale nitimo ng’iong’ic mange ma pire tek: emaku yub mi limo batizo man edoko jalub pa Kristu.​—Mat. 28:19.

3. Lembang’o ma copo cero ng’atini ku limo batizo? (Nen sanduku ma thiwie tie, “ Adundeni urombo ku kit ng’om ma nenedi?”)

³ Mer m’imaru ko Yehova copo cweli nilimo batizo. Ento mer romo ceri bende ku limo batizo. Nenedi? Kepar pi lembe ma e: ecicopere nia imaru wedi peri man jurimbi ma gitie ngo Jumulembe pa Yehova lee, pieno ibelworo nia kan ilimo batizo, gibidegi. (Mat. 10:37) Kunoke copere nyo imaru timo moko ma Mungu dagu,  man ibenwang’u nia etie tek niweko timone. (Zab. 97:10) Bende, saa moko nyo kinde m’ibedongo, ibed idikiri i foc kunoke i ceng’ ma dit moko ma dini mi ndra ucaku there en. Man kan ibepoi pi lembe ma tung’ tung’ ma wubed wutimo i nindo mi focne, anyong’a negi lee. Pieno, nyo ibenwang’u nia etie tek iri niweko timo foc ma Yehova udagu. (1 Kor. 10:20, 21) Dong’ ukwayu ikepenjiri kumae: “Ng’a kunoke girang’o m’amaru nisagu zoo?”

4. Thelembe mi kwong’o ma bicweli nilimo batizo utie ang’o?

⁴ Lembe ma beco tie dupa m’idaru yio man m’imaru. Ku lapor, copere nia i wang’ niponjo Biblia ku Jumulembe pa Yehova de, ibed ineno Biblia ni gin ma pire tek. Bende, nyo igam imaru Yesu lee. Kawoni ma dong’ ing’eyo Jumulembe pa Yehova, copere ibed imaru nidikiri kugi. Ento mer maeno kende copo cweli ngo nithieriri ni Yehova man nilimo batizo. Thelembe mi kwong’o ma bicweli nilimo batizo utie mer m’imaru ko Yehova Mungu. Kan imaru Yehova nisagu zoo, ibiweko ngo ng’atu moko kunoke gin moko ci uceri nitimo ire. Mer m’imaru ko Yehova bicweli nilimo batizo man bikonyi kara imediri nigwoko bedoleng’ peri ire i ng’ei batizo.

5. Wabing’io i penji ma kani i thiwiwec maeni?

⁵ Yesu uwacu nia wacikara nimaru Yehova kud adunde mwa ceke, ku ng’eyong’ec mwa ceke, ku pidoic mwa ceke man ku tego mwa ceke. (Mk. 12:30) Dong’ icopo timo ang’o kara iponj nimaru Yehova nisagu zoo man niwore? Ukwayu ipar cuu pi mer ma lee ma Yehova maru kowa; kan itimo kumeno, ibimare bende lee. (1 Yoh. 4:19) Kan idaru maru Yehova lee, eno bicweli nitimo ang’o mange? *

6. Nimakere ku Jurumi 1:20, yo ma kani ma copo konyi niponjo lembe iwi Yehova?

⁶ Ponj lembe iwi Yehova nikadhu kud i giracwia pare. (Som Jurumi 1:20; Nyu. 4:11) Kepar kilili iwi ayi lum ma tung’ tung’ man lei ma Yehova ucwio, man kepim nineno kite ma gibenyutho ko rieko pa Yehova. Sai bende ning’eyo lembe moko iwi kite ma Yehova ucwio ko kumi i ayi ma wang’u ijo. (Zab. 139:14) Kepar bende pi tego ma lee ma Yehova uketho i ceng’ ma tie nyakaluku acel kende i kind nyikaluku milioni swa ma Yehova ucwio. * (Isa. 40:26) Kan ibeparu kilili iwi piny ma Yehova ucwio, ibiwore dong’ nisagu. Pire tie tek ning’eyo nia Yehova tie riek man etie ku tego ma lee. Ento kara mer m’imare ko ubed tek man kara kindwu kude ubed ceng’ini, ubekwayu ing’ei lembe dupa i wie.

7. Lembang’o m’ukwayu ing’ei m’umbe jiji kara mer m’imaru ko Yehova ubed tek?

⁷ Ukwayu ing’ei m’umbe jiji nia Yehova ubedieng’ piri in. Nyo etie iri lembe ma tek niyio nia Jacwic mi polo ku ng’om ung’eyi man ebedieng’ piri? Tek kumeno, poi nia Yehova ‘nibor ungo kudwa kubang’wa nzu.’ (Tic. 17:26-28) Yehova “yenyo i adunde ceke,” man eng’olo iri nia ‘tek iyenye, ebiketho inwang’e.’ (1 Kei. 28:9) I andha, ka tin ibeponjo Biblia, utie pilembe Yehova ‘upeyi i bang’e.’ (Yer. 31:3) Kan ibemediri ning’eyo  lembe ceke ma Yehova utimo iri, e mer m’imare ko bidoko tek.

8. Icopo nyutho nenedi nia in de imaru Yehova?

⁸ Yo acel m’icopo nyutho ko nia in de imaru Yehova utie niweco i bang’e nikadhu kud i rwo. Mer m’imaru ko Mungu bimedere kan ibewotho koro ire lembe m’ubedieng’o cwinyi, man ibefoye pi lembe ceke m’etimo iri. Bende, kindwu ku Yehova bidoko ceng’ini kan ibecuku neno kite m’ebedwoko ko wang’ rwo peri. (Zab. 116:1) Ibing’eyo m’umbe jiji nia ebenyang’ kudi. Ento kara icor ceng’ini i vut Yehova, ubekwayu ikeng’ei nia pirang’o emaru lembe moko, man edagu ma kucelo, man pirang’o ebed etimo lembe i ayi moko ma segi. Bende, ubekwayu ing’ei gin m’ebemito itim. Yo utie acel kende m’icopo ng’eyo ko lembe maeno zoo: utie niponjo Biblia ma tie Lembe pare.

9. Iromo nyutho nenedi nia imaru Biblia?

⁹ Ponj nimaru Biblia ma tie Lembe pa Mungu. I Biblia kende re m’ibinwang’u lemandha iwi Yehova man iwi lembakeca pare piri. Iromo nyutho nia imaru Biblia nwang’u ibesome nja kubang’ nindo, ibeyiko ponji peri mi Biblia cuu, man nwang’u ibetio ku lembe m’ibeponjone i kwo peri. (Zab. 119:97, 99; Yoh. 17:17) Nyo itie ku program peri mi somo Biblia? Nyo ibed ilubo programne kubang’ nindo?

10. I kind lembe m’uketho Biblia utie buku ma segi, acel utie ma kani?

¹⁰ I kind lembe m’uketho Biblia utie buku ma segi, acel utie nia i ie, junwang’u lembatuca mi dhanu m’uneno Yesu ku wang’gi. Biblia kende re m’utie buku m’ukoro lembe ma Yesu utimo piri. Kan ibesayu ning’eyo lembe ma Yesu uyero man m’etimo, eno bicweli nitheyo mer kude.

11. Ang’o ma copo konyi nimaru Yehova lee?

¹¹ Ponj nimaru Yesu kara mer m’imaru ko Yehova udok tek. Pirang’o ukwayu iponj nimaru Yesu? Pilembe Yesu ubed unyutho kite pa Won tap tap. (Yoh. 14:9) Pieno kan imediri niponjo lembe iwi Yesu, ibitundo ning’eyo Yehova man ibimare lee mandha. Kepar kite ma Yesu  ubed unyutho ko kisa ni dhanu ma jubed jucayu akeca, calu ve jucan, weg goru man ju ma peko ubenurogi. Kepar bende pi juk moko m’emio, m’ibetio ko i kwo peri ma kubang’ ceng’, man bero m’ibenwang’u pilembe ibetio ku jukne.​—Mat. 5:1-11; 7:24-27.

12. Kan iponjo ning’eyo lembe iwi Yesu, eno bicweli nitimo lembang’o?

¹² Mer m’imaru ko Yesu bidoko tek kan ibemediri niparu akeca iwi lam mi jamgony m’ethiero kara dubo mwa uwekere. (Mat. 20:28) Kan andha idaru nyang’ nia Yesu bino ayika nitho piri, lembuno bicweli niyewo dubo peri man nikwayu kisa i bang’ Yehova. (Tic. 3:19, 20; 1 Yoh. 1:9) Tek ing’eyo Yesu giku Yehova cuu, ibitheyo mer ku dhanu mange bende m’umarugi.

13. Yehova bimio iri ang’o?

¹³ Ponj nimaru dhanu m’umaru Yehova. Wat peri man jurimbi ma gitie ngo Jumulembe pa Yehova gicopo nyang’ ungo i thelembe m’uketho ibemito ithieriri ni Yehova. Saa moko, gicopo nyayu ragedo bende i kumi. Ento Yehova bikonyi; ebimio iri umego ku nyimego i cokiri, ma gibibedo ni wedi peri. Kan itie ku winjiri ma ceng’ini ku jupewu maeno mi tipo, gibimeri lee man gibikonyi. (Mk. 10:29, 30; Ebr. 10:24, 25) Nok nok, wat peri ma gitie ngo Jumulembe gicopo caku timo ni Yehova, man giromo caku woro cik pare i kwo migi.​—1 Pet. 2:12.

14. Calu ma 1 Yohana 5:3 uwacu, inwang’u nia cik pa Yehova tie nenedi?

¹⁴ Ponj nimaru cik pa Yehova man tii kugi i kwo peri. I wang’ ning’eyo Yehova, ecicopere nia ilar ibedo ku cik dupa ma peri giri m’ibed iworo, ento kawono ibeneno nia cik pa Yehova utie ber ma sagu zoo. (Zab. 1:1-3; som 1 Yohana 5:3.) Kepar cuu pi juk ma Biblia umio ni cogmon, ni mon, ni junyodo man ni awiya. (Ef. 5:22–6:4) Saa m’itio ku juk maeno, nyo ineno alokaloka moko i ot peri de? Kinde m’iworo juk ma Yehova umio iwi ng’io jurimbi ku rieko, nyo ineno nia kura peri ulokere? Nyo itie jamutoro? (Rie. 13:20; 1 Kor. 15:33) Copere nia dwokowang’ penji maeno ceke tie eyo.

15. Icopo timo ang’o tek imito itii ku cik mir ukungu mi Biblia?

¹⁵ Saa moko icopo nwang’u nia etie yot ungo iri nitio ku cik mir ukungu m’ibeponjo i Biblia. Pi thelembe maeno re ma Yehova ubetio ku dilo pare pi niwodho iri jamtic ma tung’ tung’ m’ujengere iwi Biblia, ma copo konyi ning’io gin ma ber ku ma rac. (Ebr. 5:13, 14) Kan ibesomo jamtic maeno man ibeponjogi, ibinyang’ nia gitie ku kony lee iri, man ibing’eyo kite m’iromo tio ko ku lembe mi igi i kwo peri; eno biketho ibimaru nibedo i dilo pa Yehova.

16. Yehova upangu dhanu pare nenedi?

¹⁶ Ponj nimaru dilo pa Yehova, man dik cingi ku dilone. Yehova ucoko dhu dhanu pare i cokiri ma tung’ tung’ man Wode ma Yesu re m’ubetelo wi cokirine ceke. (Ef. 1:22; 5:23) Yesu ung’io ungu ma nok mi Jukristu ma juwiro ku tipo kara gitel wi tic m’ebemito jutim tin eni. Yesu ulwong’o ungu mir umego maeno nia ‘jamiru mandha man ma riek.’ Tic migi tie nikonyi kara icor i vut Mungu, man kara imediri nibedo ku mer ma ceng’ini kude. (Mat. 24:45-47) Jamiru mandha ubedieng’ piri lee: emaku yub kara juketh umego ma giromo gidok judong cokiri. Judong cokiri maeno gicopo telo wii man giromo konyi. (Isa. 32:1, 2; Ebr. 13:17; 1 Pet. 5:2, 3)  Gitie ayika niwodhiri piri, nitielo cwinyi man nikonyi kara icor ceng’ini mandha ku Yehova. Ento gin acel ma pire tek ma judong cokiri gibetimo iri utie nikonyi kara iponj jumange bende ging’ei Yehova.​—Ef. 4:11-13.

17. Nimakere ku Jurumi 10:10, 13, 14, pirang’o wabed wanyutho pi Yehova ni jumange?

¹⁷ Kony jumange gimar Yehova. Yesu ung’olo ni julubne nia giponj dhanu ung’ei Yehova. (Mat. 28:19, 20) Ku kwong’a, icopo woro ng’ol maeno pilembe ing’eyo nia etie tic ma Jukristu gicikiri nitimo. Ento kinde ma mer m’imaru ko Yehova ubemedere, ibiwinjiri calu jakwenda Petro giku Yohana ma giwacu kumae: “Wacopo weko yero pi gin ma waneno ku ma wawinjo de ngo.” (Tic. 4:20) Kan ikonyo ng’atu moko utuc nimaru Yehova, anyong’a negi mi tuko ngo. Kepar pi mutoro m’unego Filipo ma jarwei injili kinde m’egam ekonyo Jaethiopia ung’eyo lemandha ma nwang’ere i Lembagora man elimo batizo! Kan ibelubo lapor pa Filipo, niwacu iberweyo lembanyong’a calu ma Yesu ung’olo, nwang’u ibenyutho nia imito ibed Jamulembe pa Yehova. (Som Jurumi 10:10, 13, 14.) I saa maeno, copere iromo penjiri calu Jaethiopia m’upenjo kumae: ‘Ang’o m’ubecera ku limo batizo?’​—Tic. 8:36.

18. I thiwiwec m’ulubo wabiponjo lembang’o?

¹⁸ Ng’ei nia saa m’ibing’io nithieriri ni Yehova man nilimo batizo, nwang’u itimo ng’iong’ic ma pire tek nisagu zoo i kwo peri. Calu batizo utie yub ma jucikiri ngo nineno ku tuko, ubekwayu nilar ng’io i lembene cuu mandha. Dong’ icikiri ning’eyo lembang’o iwi batizo? Ubekwayu itim ang’o i wang’ nilimo batizo man i ng’eye? I thiwiwec m’ulubo, wabinwang’u dwokowang’ penji maeno.