Jukristu moko gitio ku jamtic mi teknoloji ma kawoni pi niketho kindgi ubed ceng’ini ku wedi migi man kud umego ku nyimego mange. Re ukwayu Jakristu m’uteng’ini i tipo kud uwil ku juk ma e: “Ng’atu ma won pidoic neno lembe ma rac, man epondo; ento ju ma cobo gikadhu, man gisendri pire.”​—Rie. 27:12.

Wang’eyo nia Yehova ubemito egwokwa. Eno uketho wadikara ngo ku dhanu ma ginyayu pokiri i kindjo, ma gitie ju ma jukoyogi kud i cokiri, kunoke ma gicwaku paru ma reco. (Rum. 16:17; 1 Kor. 5:11; 2 Yoh. 10, 11) Ju moko ma wadikara kugi i cokiri de, copo bedo ku timo m’umakere ngo ku cik mi Biblia. (2 Tim. 2:20, 21) Ukwayu wang’ei lembuno kinde ma wabeng’io jurimbwa. Re ecopo bedo tek ninwang’u jurimo ma cuu tek wabeng’iogi nikadhu kud i mesaj ma wabekiewo i kindwa.

Pire tie tek nia wabed ku wang’wa tek wamito mondo i ungu ma dit mi jurimo pi nikiewo mesaj i kindjo. Jukristu moko m’ugam umondo i ungu ma dongo ma kumeno, gidok ginwang’iri kud adwogi ma rac i ng’eye. Dong’ umego kunoke nyamego copo bedo ku wang’e nenedi tek etie i ungu mi jurimo ma kadhu dak acel kunoke elufu swa? Ecopo bedo lembe ma tek ning’eyo thenge mi tipo pa ng’atuman mir ungune. Zaburi 26:4 uwacu kumae: “Abedo karacelo ku dhanu mi ndra ngo; kadok weg abombi de abimondo karacelo kugi ngo.” Nyo eno ubenyutho ngo nia umito wabed wawec ku mesaj kende kende ku dhanu ma wang’eyo cuu?

Kadok nwang’u ebed ungu ma nyanok de, re Jakristu ucikere nibedo ku wang’e pi saa m’ebetimo pi niweco ku dhanu mir ungune, man nia dhanune gibeweco iwi lembang’o. Wacikara ngo niketho nia mito wadwok wang’ mesaj ceke ma jukiewo, kadok nwang’u gikiewo lembang’o, kunoke ebiting’o saa ma rukani de. Paulo upoyo wi Timoteo pi dhanu moko ma ‘gijuyer nying’, [man ma] gimondo i lembe mi dhanu mange.’ (1 Tim. 5:13, NWT) Tin etie yot nitimo lembe ma kumeno nikadhu kud i jamtic mir elektronik.

Jakristu m’uteng’ini ucikere ngo niciko ithe i kum lembe ma rac kunoke mir amung’ ma jubeyero i kum umego kunoke nyamego moko. (Zab. 15:3; Rie. 20:19) Man ecikere ngo nimewo lembe ma rac, nyo ke m’eng’eyo ngo nia tie lemandha. (Ef. 4:25) Watie ku lembe dupa dit ma beco m’ujengere iwi Biblia, rapor ma tung’ tung’ ma wacopo bedo ku gen i wie i kusika mwa mi jw.org, man program ma kubang’ dwi mi televizio JW^®.

Jumulembe moko gibed gitio ku jamtic mir elektronik pi nilworo, ning’iewo, niyawu lembkuloka, kunoke pi nisayu jurutic. Eno gitie lembe mi kuloka ma gimbe ku winjiri ku thier mwa ma watimo ni Yehova. Pieno, Jakristu m’umito bedo “agonya kum mer ma jumaru ko jukupiny” ucikere ngo niketho umego ku nyimego ubed ire ni yo mi nwang’u sente.​—Ebr. 13:5.

Nyo wacopo tio ku yo mi kiewo mesaj pi nikwayu sente kara wamii kony ni umego ku nyimego ma gitie ku yeny mi kony, kunoke ma peko ma rek uwok i wigi? Andha wamaru umego ku nyimego mwa man wadieng’ pigi, uketho wang’ ma pol wamito wamii igi kony man watiel cwinygi. (Yak. 2:15, 16) Ka wabetimo kumeno i ungu mi mesaj ma wend dhanu lee i ie, wacopo ketho lembe doko tek ni biro mi filial kunoke ni cokiri pi nimio kony ni umegonegi. (1 Tim. 5:3, 4, 9, 10, 16) Man ng’atu moko mbe i kindwa ma mito nia en re m’ebed ng’atu ma segi m’utie ku tic mi gwoko rombe pa Mungu.

Wamito watim gin ma mio yung ni Mungu. (1 Kor. 10:31) Pieno, kan imito itii ku yo mi kiewo mesaj, kunoke jamtic mange mi teknoloji, ukwayu inen ariti m’eromo kelo man ibed ku weng’i.