1-2. Jukani ma romo konyo japonj Biblia nitimo mediri nitundo i batizo?

NYAMEGO Amy ma kwo i ng’om mi Fiji uyero kumae: “Agam amaru lee dit gin m’abed aponjo i Biblia. Ang’eyo nia ebino lemandha. Ento nitimo mediri ubino ira tek, nitundo saa m’acaku dikara kud umego ku nyimego, kadong’ amedara nitundo i batizo.” Wec pa nyamego Amy ubeponjowa ku lembe ma pire tek nia, japonj Biblia copo timo mediri lee nitundo i batizo nwang’u dhanu mange m’i cokiri de ubekonye.

² Jarweiman copo konyo dhanu ma nyen nidoko bende ng’at’acel m’i cokiri. (Ef. 4:16) Nyamego Leilani, ma tie jayab yo i Vanuatu, uyero nia i bang’gi lembabola moko uyero nia, “nyathin peri utie peri kendi ngo. Aneno nia niketho dhanu udok julub utie lembe ma rom. Kara ng’atini ung’ei lemandha, dhanu m’i cokiri zoo diko cing’gi pi nikonye.” Wedi, jurimo, man juponji mi somo, ceke gikonyo nyathin kara edongi ni ng’atu m’anzilo. Gitielo cwiny nyathin ne man gimio ire ponji ma tung’ tung’ ma pire tek. Kumeno bende, umego ku nyimego m’i cokiri copo mio juk ni juponj Biblia, giketho cwinygi, man ginyutho igi lapor ma ber ma romo konyogi nitimo mediri nitundo i batizo.​—Rie. 15:22.

3. Wec ma Ana, Dorin, man Leilani giyero, ubemio iri ponji ma kani?

³ Pirang’o jarwei lembanyong’a m’ubetelo wi ponji mi Biblia, ucikere nibedo kud anyong’a kinde ma jurwei mange ubemio kony ni japonj Biblia? Ana ma tie jayab yo ma segi i Moldova, uwacu nia, “etie lembe ma tek dit ni ng’atu acel kende  nipong’o yeny ceke ma japonj Biblia utie ko kara etim mediri.” Umego Dorin, ma de utie jayab yo ma segi i ng’om mi Moldova, uwacu kumae: “Wang’ ma pol jurwei lembanyong’a mange giyero lembe ma mulo adunde japonj Biblia, ma nwang’u aparu ngo apara de pi lembene.” Nyamego Leilani unyutho thelembe mange, ewacu kumae: “Mer man jol ma ku yaw yaw ma dhanu mange ubenyutho ni japonj Biblia ketho enyang’ nia andha watie dhanu pa Yehova.”​—Yoh. 13:35.

4. Wabiweco iwi lembang’o i thiwiwec maeni?

⁴ Icopo penjiri nia, ‘dong’ acopo timo ang’o kara akony japonj Biblia utim mediri kadok atie ngo japonji pare?’ Wakewec iwi lembe ma wacopo timo ka jarwei moko ulwong’owa wacidh watel wi ponji pare, man gin ma wacopo timo tek japonj Bibliane ucaku bebino i coko. Wabineno bende gin ma judong cokiri gicopo timo pi nikonyo juponj Biblia gimediri nitundo i batizo.

5. Tic peri tie ang’o tek wucidho ku jarwei lembanyong’a moko pi nicitelo wi ponji mi Biblia?

⁵ I saa mi telo wi ponji mi Biblia, japonji re m’utie ng’atu ma kwong’a ma konyo japonj Biblia ninyang’ cuu i Lembe pa Mungu. Tek japonjine ulwong’i nia wucidh wutel wi ponji wukude, ukwayu ing’ei nia itie jaratic wadi. Tic peri utie nidiko cingi kude. (Ekl. 4:9, 10) Lembang’o dhe m’icopo timo kara idik cingi cuu i saa mi ponjine?

6. Kinde ma wubecitelo wi ponji mi Biblia, icopo tio nenedi ku cik mir ukungu ma nwang’ere i Lembrieko 20:18?

⁶ Yikiri pi ponji mi Biblia. Mi kwong’o, penj japonji ukor iri lembe moko nyanok iwi japonj Biblia. (Som Lembrieko 20:18.) Icopo penje kumae: “Iromo koro ira lembang’o iwi japonj Bibliane? Wubiponjo kude thiwiwec ma kani? Ikeco nia japonj Biblia udong’ ku lembang’o i theng ponji maeni? Nyo lembe moko nuti m’ukwayu ngo atim kunoke ayer i saa mi ponjine? Acopo tielo cwinye nenedi kara etim mediri?” I andha, japonji bikoro ngo iri lembe mir amung’ m’umulo kum kwo pa japonj Biblia, ento lembe m’ekoro iri copo konyi. Jamisioner ma nyinge Joy ubed uweco iwi kit lembe ma kumeno ku dhanu m’ubed ucidho kude pi nitelo wi ponji mi Biblia pare. Ewacu kumae: “Lembe maeno ukonyo ng’atu ma wawotho kude kara enen kite m’ecopo konyo ko japonj Biblia man gin m’umito eyer i saa mi ponji.”

7. In i ng’atu ma julwong’i nia wucidh wutel wi ponji, pirang’o pire tie tek nia in de iyikiri?

⁷ Ka julwong’i nia wucidh wutel wi ponji mi Biblia moko, ecibedo ber nia in de iyik gin ma wubiponjone. (Ezr. 7:10) Umego Dorin ma waweco pire, uwacu kumae: “Amaru dit ka ng’atu ma wacidho kude uyiko ponji. Eno  ketho eyero lembe ma konyo japonj Biblia.” M’umedo maeno, japonj Biblia neno nia wun ario ceke wuyikuru ma ber, man eno bedo ire ni lapor ma ber. Kadok nwang’u ibiyikiri ngo i thuthne de, re timba koy saa m’inwang’ ko lembe ma pire tek m’i gin ma wubiponjo.

8. Icopo timo ang’o kara rwo peri i saa mi ponji mi Biblia ubed ma cuu?

⁸ Rwo utie gin ma pire tek i saa mi ponji mi Biblia. Pieno, tek japonji bikwayu nia irwo, mito ilar ipar cuu pi lembe m’ibiyero. Eno bikonyi ning’eyo gin m’umaku iyer i rwone. (Zab. 141:2) Hanae ma kwo i Japan, ubepoi asu pi rwo pa nyamego moko m’ugam ucidho ku nyamego m’ubed utelo wi ponji pare. Ewacu kumae: “Aneno nia ebino ku winjiri ma ceng’ini mandha ku Yehova, man amito an de abed calu en. Kinde m’awinjo elwong’o nyinga i rwo pare, anwang’u nia andha emara.”

9. Nimakere ku Yakobo 1:19, icopo timo ang’o kara imii kony ma cuu i saa mi ponji mi Biblia?

⁹ Dik cingi ku japonji. Omamuyovbi ma tie jayab yo ma segi i ng’om mi Nigeria, uwacu kumae: “Jarwei lembanyong’a ma cuu winjo lembe kilili kinde ma jawodhe ubetelo wi ponji mi Biblia. Emio paru ma cuu, ento eweco ngo akeca pilembe en ungo re m’ebetelo wi ponji.” Dong’ icopo yero ang’o pi nidiko cingi kude, man ke i saa ma kani? (Rie. 25:11) Kinde ma japonji ku japonj Biblia gibeweco, winjgi kilili. (Som Yakobo 1:19.) Icopo weco kende kende kinde m’ukwayere nia iweci. Ku lapor, mito ngo iwec lee akeca, kud ikath kind wec pa japonji kinde ma fodi ebeweco, kunoke kud iroi thiwiwec mange m’ukoc ku ma wubeponjo. Kan ibeweco, icopo tio ku wec moko ma nyaradundo, lapor, kunoke penji, pi nikoro lembe ma japonj Biblia ubenyang’ ungo i ie. Saa moko icopo nwang’u nia imbe ku lembe dupa m’icopo medo i saa mi ponji; ento tek ibefoyo japonj Biblia, man ibenyutho nia ibedieng’ pire, ibikonye lee nitimo mediri.

10. Lembe m’ikoro m’ikadhu kud i ie, copo konyo japonj Biblia nenedi?

¹⁰ Kor ire lembe m’ikadhu kud i ie. Kan ineno nia pire tek, icopo koro ni japonj Biblia i adundo kite m’ing’eyo ko lemandha, kite m’ivoyo ko peko peri, kunoke kite ma Yehova ugam ukonyi ko. (Zab. 78:4, 7) Lembe m’ibekorone ucikere nibedo tap lembe ma japonj Biblia utie ku yeny mi winjo. Lembene copo tielo yioyic pare man eromo konye nitimo mediri nitundo i batizo. Eno copo ketho eneno kite ma en de eromo voyo ko peko m’ebenwang’ere ko. (1 Pet. 5:9) Gabriel ma tie jayab yo i ng’om mi Brésil, ubepoi i kum lembe m’ugam ukonye saa m’ebino ponjo Biblia. Ewacu kumae: “Kinde m’awinjo lembe m’umego gikoro, anyang’ nia andha Yehova ung’eyo pi peko mwa ma wakadhu kud i ie. Ka  gin de givoyo peko migi, nyutho nia an de acopo voyo para.”

11-12. Pirang’o wacikara nijolo japonj Biblia m’ubino i coko ku yaw yaw?

¹¹ Kara japonj Biblia unwang’ kony pi nitimo mediri nitundo i batizo, ukwayu ebed ecidh i coko nja. (Ebr. 10:24, 25) Saa moko nyo japonji pare bilwong’e ebin i coko wang’ ma kwong’a. Pieno kinde m’ebino, wan ceke wacopo tielo cwinye kara ebed ebin nja i coko. Dong’ wacopo timo ang’o pi nitielo cwinye?

¹² Wajole kud amora. (Rum. 15:7) Tek japonj Biblia unwang’u nia jujole kud amora i coko, eno copo ketho emaru nibino i cokone dong’ nja. M’umbe ninyayu lewic i wie, mothe ku yaw yaw, man nyuthe ni dhanu mange mi cokiri. Wec kude, pilembe saa moko nwang’u japonji pare utie ku lembe mange m’ukwayu etim i Ot Ker. Winje cuu kinde ma wubeweco kude, man nyuth nia ibedieng’ pire. Jol peri ma kud amora, copo konye nenedi? Kewinj lembe ma Dmitrii m’ulimo batizo fodi oro ma nok eni, ma kawoni ubetimo calu jakony tic i cokiri, uyero kinde m’etundo wang’ ma kwong’a i coko. Eyero kumae: “Kinde m’atundo acungo woko i lela ma lworo ubenega, umego moko nena man ekonya wamondo wakude i Ot Ker. Dhanu dupa ubin umotha. Lembene uwang’u ia, uketho amaru nia nang’ dong’ cokone ubed utimere nja kubang’ ceng’. Fodi aneno ngo lembe ma kumeni niai con.”

13. Kura peri copo bedo ku ma toke ma kani iwi japonj Biblia?

¹³ Nyuth lapor ma ber. Kura peri copo konyo japonj Biblia nineno nia watie Jukristu mandha. (Mat. 5:16) Vitalii ma tin utie jayab yo i Moldova, uwacu kumae: “Aneno kite ma dhanu mange i cokiri gikwo ko, timo migi man kite ma giparu ko lembe. Lembe maeno ukonya nineno nia Jumulembe pa Yehova gitie i dini mandha.”

14. Lapor peri copo konyo japonj Biblia nenedi nitimo mediri?

¹⁴ Japonj Biblia ucikere nitio ku gin m’ebeponjo i kwo pare i wang’ nilimo batizo. Eno tie lembe ma yot ungo, re tek ebeneno bero m’ibenwang’u ni kum cik mir ukungu mi Biblia m’ibetio ko i kwo peri, lembene copo ketho emaru nilubo lapor peri. (1 Kor. 11:1) Wakewec iwi lapor pa Hanae ma walar waweco pire. Ekoro kumae: “Umego ku nyimego gibed gitimo lembe m’aponjo i Biblia nia ukwayu jutim. Aneno kite ma an de acopo tielo ko cwiny jumange, m’aromo weko ko lembe, man m’anyutho ko mer. Gibed giweco ma ber pi jumange, man an de amito alub lapor migi.”

15. Nimakere ku Lembrieko 27:17, pirang’o ukwayu wathei mer ku japonj Biblia m’ubemedere nibino i coko?

 ¹⁵ Bed jarimb japonj Biblia. Nyuth nia ibedieng’ ku japonj Biblia kinde m’ebemedere nibino i coko. (Flp. 2:4) Tim kero ing’eye. Iromo foye pir alokaloka m’ebetimo, icopo penje pi ponji pare mi Biblia, pi wedi pare, man pi tic pare. Re bed ku weng’i, kud ipenje penji ma nyayu lewic i wie. Wec maeno ucikere niketho kindwu ubed ceng’ini kude. Kinde m’idoko jarimbe, ibikonye nitimo mediri nitundo i batizo. (Som Lembrieko 27:17.) Hanae ma waweco pire kawoni utie jayab yo ma nja. Eyero kumae kinde m’ecaku cidho i coko: “Saa m’anwang’u jurimba i cokiri, acaku maru magwei dong’ nicidh’i coko, man amito acidhi kadok aol de. Abed abedo kud anyong’a nirombo ku jurimba ma nyen, man lembuno ukonya nilalu mer ku jurimba ma woro ngo Yehova. Amito kindwa ubed ceng’ini ku Yehova man kud umego ku nyimego. Lembene uketho amaku yub nilimo batizo.”

16. Lembang’o mange m’icopo timo pi nikonyo japonj Biblia uwinjere nia en de etie acel m’i cokiri?

¹⁶ Kinde ma japonj Biblia ubetimo mediri man alokaloka, konye enwang’ere nia dong’ en de etie acel m’i cokiri. Pi nikonye, icopo nyutho ire jol. (Ebr. 13:2) Denis ma kwo i Moldova ubepoi pi nindo ma fodi ebino ie japonj Biblia. Ewacu kumae: “Wang’ ma pol, umego gibed gilwong’owa wacidh wanambu i bang’gi ku min ot para. Gibed gikoro iwa kite ma Yehova ubed ukonyo kogi. Lembene ubed uketho cwinywa lee. Lembuno utego cwinywa nia mito watim ni Yehova man tek watimo ire, e wabikwo ma ber.” Kinde ma japonj Biblia udoko jarwei lembanyong’a, icopo kwaye wucidh kude i lembanyong’a. Umego Diego, ma tie jayab yo i ng’om mi Brésil, uwacu kumae: “Umego dupa gibed gilwong’a wacidho kugi i lembanyong’a. Eno ubino yo ma ber m’uketho ang’eyo kogi cuu. Nirweyo lembanyong’a kugi uketho ang’eyo lembe dupa, man eketho kindwa udoko ceng’ini mandha ku Yehova man Yesu.”

17. Judong cokiri copo konyo juponj Biblia nenedi?

¹⁷ Nwang’ saa mi weco ku juponj Biblia. Wujudong cokiri, tek wubenyutho mer ni juponj Biblia man wubedieng’ kugi, wucopo konyogi nitimo mediri nitundo i batizo. Nyo ibed iweco wang’ ma pol ku juponj Biblia tek gibino i coko? Juponj Biblia binwang’u nia ibedieng’ kugi tek ibelwong’ogi ku nying’gi, asagane kinde ma gibedwoko wang’ penji i coko. Nyo iromo yiko i program peri kara inwang’ saa m’ibed icidh ko ku jarwei m’ubecitelo wi ponji mi Biblia pare? Icopo konyo japonj Biblia  lee mandha i ayi ma nwang’u iparu ngo apara de. Jayab yo moko ma nyinge Jackie ma kwo i Nigeria, ukoro kumae: “Juponj Biblia dupa igi wang’ lii nia karaman umego ma wacidho kude i bang’gi pi nitelo wi ponji migi ubino jadit cokiri. Acel m’i kindgi uwacu kumae: ‘Jakwac mwa copo timo lembuni ngo nyanok de. Eliewo ju m’ulony kende, ke nwang’u jumio ire sente!’” Japonj Biblia maeno, kawoni dong’ ecidh’i coko.

18. Judong cokiri copo tio ku lembe ma nwang’ere i Tic mi Jukwenda 20:28 nenedi?

¹⁸ Ponj ju m’ubetelo wi ponji mi Biblia man tiel cwinygi. Wujudong cokiri, wutie ku rwom ma pire tek mi konyo jurwei lembanyong’a nibedo jurwei man juponji ma cuu. (Som Tic mi Jukwenda 20:28.) Tek jarwei lembanyong’a moko lworo telo wi ponji mi Biblia ubenege i vuti, konye nitelo wi ponjine. Nyamego Jackie ma waweco pire, ukoro kumae: “Judong cokiri gibed gipenja thirithiri pi juponj Biblia para. Tek telo wi ponji mi Biblia ubesenda, gimio ira kony.” Judong cokiri gicopo tielo cwiny jurwei lembanyong’a man nikonyogi nibedo juponji ma ber. (1 Tes. 5:11) Nyamego Jackie umedo kumae: “Amaru ka judong cokiri gibeketho cwinya man gibeyero nia tic m’abetimo pire tie tek lee. Kit wec ma kumeno bedo ira ve pii ma ng’ic ma kwiocwinyjo i saa mi lietho. Foyofoc migi ketho cwinya doko tek, man anyong’a para mi telo wi ponji mi Biblia de medere ameda.”​—Rie. 25:25.

19. Wan ceke wacopo bedo kud anyong’a mi timo ang’o?

¹⁹ Kadok kawoni fodi wambe ku ponji mi Biblia ma wabetelo wie de, re wacopo konyo ng’atini nitimo mediri nitundo i batizo. Wacopo yiko wec moko pi nidiko cingwa ku ng’atu m’ubetelo wi ponji mi Biblia, re mito ngo wawec akeca. Wacopo theyo mer ku juponj Biblia m’ubino i coko, man wacopo nyutho igi lapor ma ber. Judong cokiri ke gicopo tielo cwiny juponj Biblia nwang’u gibekoyo saa mi weco kugi, man mi ponjo ju m’ubetelo wi ponji mi Biblia man nifoyogi. Wanwang’u anyong’a lee ka wabetimo lembe moko, kadok ma nyanok, pi nikonyo ng’atini umar Yehova man etim ire!