1. Pirang’o Yesu ukwayu Yehova nia ugwok julubne?

I UTHIENO ma tokcen mi kwo pare iwi ng’om, Yesu ubino dieng’ pi julub pare pi peko ma gicopo nwang’iri ko. Mer m’emaru kogi ucwale nikwayu Won nia ‘ugwokgi ni ng’atu ma rac.’ (Yoh. 17:14, 15) Yesu ung’eyo nia kinde m’ebidok i polo, Sitani Wonabali bimedere asu nikiedo i dhu ng’atu moko ci ma bimito etim ni Yehova. Pieno, dhanu pa Yehova gitie ku yeny mi gwok pi lembe maeno.

2. Ang’o m’ubetego cwinywa nia andha Yehova bidwoko wang’ rwo mwa?

² Yehova udwoko wang’ rwo pa Yesu pilembe etie Wode m’emaru. Ka wabetimo kero mwa ceke pi ninyayu anyong’a i Yehova, ebimaru wan bende, ebidwoko wang’ rwo mwa ma wakwaye ko nia ekonywa man egwokwa. Yehova utie Wego ma jamer. Pieno, ebimedere nigwoko nyithindhe, kum kan etimo kumeno ngo, nyinge bicidere!

3. Pirang’o watie ku yeny mi gwok pa Yehova tin?

³ Tin re ma watie ku yeny mi gwok pa Yehova lee nisagu m’i wang’e zoo. Jubayu Sitani kud i polo ma “kwinyo ma dit ni i bang’e.” (Nyu. 12:12) Ewingo wi dhanu moko gipar nia, tek gibenyayu ragedo i kumwa, eca nwang’u gibetimo “[tic ma leng’] ni Mungu.” (Yoh. 16:2) Jumange ma gibetimo ngo ni Mungu ke, gibenyayu ragedo i kumwa pilembe wan watung’ ku dhanu mi ng’om maeni. Kadok ginyai ragedo i kumwa de, re lworo negowa ngo. Pirang’o? Pilembe Lembe pa Mungu uwacu nia “Rwoth en e mandha, [ebidwokowu tek], m’ebigwokowu de ni ng’atu ma rac.” (2 Tes. 3:3) Dong’ Yehova ubegwokowa i yo ma kani? Wakewec iwi yo ario m’ebegwokowa.

4. Nimakere ku Juefeso 6:13-17, Yehova umio iwa ang’o pi nigwokowa?

⁴ Yehova umio iwa jamtho kunoke jamlwiny kara ugwokwa i kum awic pa Sitani. (Som Juefeso 6:13-17.) Jamlwiny maeno ma Mungu umio utie tek man ekonyowa! Re ebikonyowa tek wakendo jambkum jamlwinyne ceke, man tek wabewodhogi ngo kud i kumwa. Theng jamlwinyman ubenyutho ang’o? Wakewec iwiman acel acel.

5. Mukaba mi lemandha utie ang’o, man pirang’o wacikara nikende?

⁵ [Mukaba mi] lemandha ubenyutho lemandha ma nwang’ere i Biblia, Lembe pa Mungu. Pirang’o wacikara nikendo mukaba eno? Pilembe Sitani utie ‘won ndra.’ (Yoh. 8:44) Eteng’ini lee i vupo, pilembe edaru cwaye pi oro elufu swa, man edaru wingo dhanu i “ng’om ngung’”! (Nyu. 12:9) Ento lemandha m’i Biblia gwokowa kara kud ewingwa. Dong’ wacopo kendo mukaba mi lapor nenedi? Wakende nwang’u wabeponjo ning’eyo lemandha iwi Yehova, wabewore “i tipo man i lemandha,” man nwang’u watie ku timo ma cuu i lembe ceke.​—Yoh. 4:24; Ef. 4:25; Ebr. 13:18.

6. Asi mi bedopwe ubenyutho ang’o, man pirang’o wacikara nikende?

⁶ Asi mi bedopwe ubenyutho cik mi bedopwe pa Yehova. Pirang’o wacikara nikende i korwa? Calu asi gwoko kor jaskari kara kud jukil adundene, asi mi bedopwe de gwoko adundewa mi lapor kara lembe ma reco mi ng’om maeni kud unyothwa. (Rie. 4:23) Yehova ubemito wamare man watim ire kud adundewa ceke. (Mat. 22:36, 37) Sitani ke lundo ubemito wamar giki mi ng’om maeni kara kud watim ni Yehova kud adundewa ceke, ma kun ke eno tie gin ma Yehova udagu. (Yak. 4:4; 1 Yoh. 2:15, 16) Ka Sitani uneno nia lembene ubewotho ire cuu ngo, enyayu ragedo i kumwa kara watim gin ma nyayu can i Yehova.

7. Wacopo kendo asi i korwa nenedi?

⁷ Wanyutho nia wakendo asi mi bedopwe i korwa, nwang’u wabeworo cik mir ukungu pa Yehova mi ng’io gin ma ber ku gin ma rac, man nwang’u wabekwo nimakere ku cikne. (Zab. 97:10) Jumoko paru nia cik mir ukungu pa Yehova ketho jubedo ngo agonya. Ento tek waweko nitio ku cik mir ukungu mi Biblia i kwo mwa, eca nwang’u watie ve jaskari m’uwodho asi kud i kore saa ma lwiny ucek i ie, pilembe enwang’u nia asine tie pek. Eno tie lembe mi kasegu! Ento tek wamaru Yehova, wabineno cik pare ni gin ma “pek ungo,” ento ni gin ma bodho kwo.​—1 Yoh. 5:3.

8. Nikendo wara mi lembanyong’a i tiendwa thelembene tie ang’o?

⁸ Paulo ukwayu bende nia wakend [wara] mi lembanyong’a . . . mi kwiocwiny i tiendwa. Eno ubenyutho nia wacikara nibedo ayika pi nirweyo lembanyong’a mi Ker. Ka waberweyo rwonglembe mi Biblia ni jumange, yioyic mwa doko tek. Etie lembe ma nyayu muturo nineno nia i wang’ ng’om zoo dhanu pa Yehova gibesayu yo ma girwei ko lembanyong’a saa ma gin i tic, i somo, kinde ma gicidho i lembe migi mi kuloka, ot ku bang’ ot, kinde ma ging’iewo piny, saa ma gibeliewo wedi migi ma juyic ungo, kinde ma girombo ku jurimbgi, man kadok saa ma gigonjo i ie i pacu. Ka lworo uketho waweko nirweyo lembanyong’a, wabibedo ve jaskari m’uwodho wara kud i tiende i saa mi lwiny, ma tiendene copo nwang’u ret yot yot. Eno copo ketho ebedo ire tek nigwokere man niworo telowic pa jadit mony pare de voye.

9. Pirang’o wacikara niting’o ban ma lac mi yioyic?

 ⁹ Thungu (ban ma lac) mi yioyic ubenyutho yioyic ma watie ko i Yehova. Watie ku yioyic nia ebipong’o lembang’ola pare ceke. Yioyic maeno bikonyowa ninego “lak athero mi mac ceke.” Pirang’o wacikara niting’o ban ma lac maeno mi yioyic? Pilembe egwokowa i kum ponji mi ju m’ujai i kum yioyic, man ekonyowa kara cwinywa kud utur ka jubecayu yioyic mwa. Ka wambe ku yioyic, wacopo nwang’u ngo tego ma wawor ko Yehova kinde ma jumange ubediyowa nia watim lembe m’edagu. Ento tung’ ku maeno, ka saa ceke wabekwero nitimo gin ma Yehova udagu, i tic kunoke i somo, eca nwang’u wating’o ban mi yioyic mwa. (1 Pet. 3:15) Kinde ma wakwero tic mi sente ma lee ma nwang’u copo cerowa nitimo ni Yehova ku kero mwa ceke, eca de nwang’u wating’o ban mi yioyic mwa. (Ebr. 13:5, 6) Bende, kinde ma wabemedara asu nitimo ni Yehova kud i kind ragedo, eca nwang’u ban mi yioyic mwa ubegwokowa.​—1 Tes. 2:2.

10. Sabu mi both utie ang’o, man pirang’o wacikara nikende?

¹⁰ Sabu mi both utie genogen ma Yehova umio iwa; niwacu, genogen m’ebicero kowa kud i tho, man m’ebimio ko mugisa ni dhanu  ceke m’utimo yeny pare. (1 Tes. 5:8; 1 Tim. 4:10; Tit. 1:1, 2) Tap calu ma sabu gwoko wi jaskari, wan de genogen mi both gwoko copo mwa mi paru lembe. Nenedi? Genogen maeno konyowa niketho wiwa zoo i kum lembang’ola pa Mungu man ekonyowa kara kud wavoci ka wabenwang’ara ku peko. Wacopo kendo sabu maeno nenedi? Wakende nwang’u wabeketho paru mwa uromb ku paru pa Mungu. Ku lapor, waketho ngo genogen mwa iwi lonyo ma kadhu akadha, ento iwi Mungu.​—Zab. 26:2; 104:34; 1 Tim. 6:17.

11. Palamularu mi tipo utie ang’o, man pirang’o wacikara nitio kude?

¹¹ Palamularu mi Tipo utie Biblia Lembe pa Mungu. Pala maeno utie ku tego m’etuco ko wi vupo ceke man m’egonyo kojo kud i ng’eca mi ponji mi ndra man kud i timo ma reco. (2 Kor. 10:4, 5; 2 Tim. 3:16, 17; Ebr. 4:12) Waponjo ning’eyo tio ku pala maeno cuu nikadhu kud i ponji mwa ma segi man kud i ponji ma wabenwang’u i dilo pa Mungu. (2 Tim. 2:15) M’umedo jamlwiny ma waai waweco pire, Yehova umio iwa tego mange pi nigwokowa. Etie tego ma kani?

12. Watie ku yeny mi kony mange ma kani, man ke pirang’o?

¹² Jaskari m’ung’eyo kiedo lwiny cuu, ng’eyo nia en kende ecopo ngo nikiedo lwiny i dhog udul mony dupa; ebedo ku yeny mi juaskari wadi. Wan bende wacopo voyo ngo lwiny i dhu Sitani ku ju pare kendwa; watie ku yeny mi kony mir umego ku nyimego mwa. Yehova umio iwa “umego” ku nyimego i wang’ ng’om zoo kara ukonyowa.​—1 Pet. 2:17.

13. Nimakere ku Juebrania 10:24, 25, wanwang’u kony ma kanigi i coko?

¹³ Yo acel ma wanwang’u ko kony utie coko ma wacidho i ie. (Som Juebrania 10:24, 25.) Saa moko wan ceke wanwang’u nia cwinywa utur. Ento kinde ma wabewinjara kumeno, cidho i coko copo mio iwa tego. Dwokowang’ penji m’umego ku nyimego gimio ku cwinygi ceke i coko tielo cwinywa. Korolembe ma jubemio m’ujengere iwi Biblia, ku lanyuth ma jubetimo i coko, mio amora i kumwa kara wamedara nitimo ni Yehova. Bende, wanwang’u tielocwiny ni kum wec ma wabed waweco karacelo i wang’ coko man i ng’eye. (1 Tes. 5:14) M’umedo maeno, coko mio iwa kaka ma wakonyo ko jumange; lembe maeno de mio iwa anyong’a. (Tic. 20:35; Rum. 1:11, 12) Coko mwa konyowa i yo mange bende. Ekonyowa nibedo jubodho i tic mi rweyo lembanyong’a man i ponji. Ku lapor, wang’eyo nitio ku jamtic mwa mi Sanduku mi ponjo Biblia ku dhanu. Pieno, yikiri cuu pi coko. Ka ini coko, winj lembe kilili, man tii ku ponji m’iai inwang’u. Kan itimo kumeno, ibibedo “jaskari ma ber pa Kristu Yesu.”​—2 Tim. 2:3.

14. Kony mange ma kani ma watie ko?

¹⁴ Wanwang’u bende kony mi jumalaika milioni swa. Kepar pi gin ma malaika acel kende copo timo! (Isa. 37:36) Man kawoni kedok ipar pi gin m’udul mony ma tek mi jumalaika copo nitimo. Ng’atu moko mbe acel de, kadok pajogi, ma romo cungo i wang’ lwiny i dhog udul mony ma tek pa Yehova. Yehova tie Jatego kpo. Pieno, ka eni kudwa, wabibedo tek nisagu judhogwa, kadok gipong’ ve miel. (Pok. 6:16) Eno tie lemandha! Bed ku paru maeno i wii tek inwang’u nia cwinyi tur pi lembe ma jaratic wedu, nyathin wedu mi somo, kunoke wedi peri ma juyic ungo uyero kunoke utimo iri. Poi nia itie kendi ngo i lwiny maeno, Yehova bikonyi kum ibeworo telowic pare.

15. Nimakere kud Isaya 54:15, 17, pirang’o ng’atu moko acel de mbe ma copo cero dhanu pa Mungu ku rweyo lembanyong’a?

¹⁵ Ng’om ma Sitani ubetelo wie, udaguwa pi thelembe dupa. Wamondo ngo nyanok de i lembgamba, man wadikara ngo i lwiny. Warweyo pi nying’ Mungu, wacwaku nia Ker pare kende re ma bikelo kwiocwiny, man waworo cik pare mi bedopwe. Wanyutho ngbeng’ kamaleng’ ni dhanu nia ng’atu m’ubebimo wi ng’om tin utie ng’atu ma rac, ma jandra man janek. (Yoh. 8:44) Man warweyo nia ceng’ini eni, jubinyotho ng’om pa Sitani. Kadok kumeno de, Sitani ku jupare, gibicerowa ngo nyanok de nijigo tic mwa mi lembanyong’a. Ento wabimedara asu nipaku Yehova i yo ceke ma wacopo! Kadok Sitani utie ng’atu ma tek de, re cero rwonglembe mi Ker kara kud unwang’ dhanu i wang’ ng’om zoo uvoye. Wabetimo lembuno kende kende ni kum gwok pa Yehova.​—Som Isaya 54:15, 17.

16. Yehova bibodho dhanu pare nenedi i saa mi masendi ma dit?

¹⁶ Ang’o m’ubekurowa i wang’wa? I saa mi masendi ma dit, Yehova bibodhowa i yo ario ma wang’u ijo. Mi kwong’o, ebibodho jurutic pare ma gigwoko bedoleng’ migi ire kinde m’ebiketho jubim mi ng’om maeni ginyoth Babeli ma dit, niwacu, dini ceke mi vupo. (Nyu. 17:16-18; 18:2, 4) Man mir ario, ebibodho dhanu pare kinde m’ebenyotho dong ng’om pa Sitani i lwiny mi Armagedon.​—Nyu. 7:9, 10; 16:14, 16.

17. Ka wabemedara nibedo ceng’ini ku Yehova, wabinwang’u bero ma kani?

¹⁷ Ka wabemedara nibedo ceng’ini ku Yehova, Sitani bitimo ngo lembe ma rac i kumwa ma bigalu rondo ku rondo. En re m’etie ng’atu ma jubinyotho mi ma gwei. (Rum. 16:20) Pieno, kend jamlwiny ceke i kumi, man kud iwodhgi! Kud ikied lwiny i dhu Sitani kendi. Dik cingi kud umego ku nyimego, man lub telowic pa Yehova. Kan itimo kumeno, ibibedo ku genogen nia Wuru m’i polo bidwoki tek man ebigwoki.​—Isa. 41:10.