1. Ibino ku kit kwo ma nenedi i wang’ nicaku ponjo Biblia?

 IBINO ku kit kwo ma nenedi i wang’ nicaku ponjo Biblia ku Jumulembe pa Yehova? Ju dupa m’i kindwa gimito ngo nang’ paru mi kit kwone utund atunda de i wigi. Copere nia pidoic man kite mwa ugam unyothere ku cik ma ng’om maeni uketho iwi gin ma ber ku gin ma rac. Kan andha, nyutho nia ‘i ng’om wabino mbe ku genogen man wang’eyo ngo Mungu.’ (Efe. 2:12) Re ponjo Biblia uketho watimo alokaloka i lembuno ceke!

2. Lembang’o m’inwang’u kinde m’icaku ponjo Biblia?

² Kinde m’icaku ponjo Biblia, inwang’u nia karaman Wuru moko tie i polo m’umeri lee. Inyang’ nia pi ninyayu anyong’a i Yehova man nibedo acel m’i kind jurutic pare, mito itim alokaloka ma lee i kwo man i paru peri. Inwang’u bende nia mito ikwo nimakere ku cik mir ukungu pare.​—Efe. 5:3-5.

3. Nimakere ku Jukolosai 3:9, 10, Yehova ubemito watim ang’o, man wabiweco iwi lembang’o i thiwiwec maeni?

³ Yehova tie Jacwic man etie Wegwa m’i polo; pieno etie ku twero mi nyutho ni juruot pare kite ma gicikiri nikwo ko. Ebekwayu bende nia i wang’ nilimo batizo, watim kero ‘wakab ng’atu ma con cen ku timo pare de.’ * (Som Jukolosai 3:9, 10.) Thiwiwec maeni bikonyo ju ma gimito gilim batizo ninwang’u wang’ penji adek ma e: (1) “Ng’atu ma con” tie ang’o? (2) Pirang’o Yehova ubekwayuwa nia wakabe? (3) Wacopo kabe ke nenedi? Pi ju m’i kindwa ma gidaru limo batizo ke, thiwiwec maeni bikonyogi kara gicer ng’atu ma con kud udwog kendo i kwo migi.

4. Ng’atu m’uweko kite pare ma con ubim wiye bedo ku timo ma nenedi?

⁴ Ng’atu m’uweko kite pare ma con, niwacu “ng’atu ma con” ubim wiye, wang’ ma pol eparu man etimo lembe i ayi mi kum. Ecopo bedo ng’atu ma dieng’ pire gire, ma ng’eicwiny maku pio pio, ebedo ngo won foyofoc man ebedo jakuhaya. Ecopo maru nibeneno pornografi man filme mi kura ma reco kunoke mi rop. M’umbe jiji, etie ku kite ma beco bende man pidocwinye copo dote pi lembe ma reco m’ebeyero man m’ebetimo. Ento nwang’u lundo embe kud ava m’etim ko alokaloka i paru man i timo pare.​—Gal. 5:19-21; 2 Tim. 3:2-5.

5. Nyo wacopo kabu ng’atu ma con ceke ceke kud i kumwa? Kekor. (Tic mi Jukwenda 3:19)

⁵ Calu ma wa dhanu watie ku kum mi dubalaga, ebedo iwa lembe ma tek nikabu paru man timo ma reco ceke kud i adundewa man kud i wiwa. Saa moko kokoro wabitimo kunoke wabiyero lembe moko ma binyayu ang’eyang’o i iwa. (Yer. 17:9; Yak. 3:2) Ento tek wakabu ng’atu ma con cen, pidoic man timo mi kum bibimo wiwa kendo ngo. Wabidoko ayi dhanu ma tung’ ku mi wang’e.​—Isa. 55:7; som Tic mi Jukwenda 3:19.

6. Pirang’o Yehova ubekwayuwa nia wakab paru man timo ma reco cen ma gitie ng’atu ma coni?

⁶ Yehova ubekwayuwa nia wakab paru man timo ma reco cen pilembe emaruwa lee man ebemito wakwo ma ber kud anyong’a. (Isa. 48:17, 18) Eng’eyo nia ju ma gibenyego ngo i dhu paru ma reco, gimiyo peko i kumgi gigi man i kum jumange. Kan ebeneno wabenyayu can i kumwa giwa man i kum jumange, lembene time rac.

7. Nimakere ku Jurumi 12:1, 2, watie ku ng’iyong’ic ma kani i wang’wa m’ukwayu watimi?

⁷ Saa moko wedi mwa copo cayuwa pi kum wabetimo alokaloka i kura mwa. (1 Pet. 4:3, 4) Gicopo yero nia watie ku twero mi timo gin moko ci ma wamito, man nia wacikara ngo niweko jumange re m’unyuth iwa lembe m’ukwayu watim. Ento dhanu ma gibekwero nitiyo ku cik mir ukungu pa Yehova gitie ngo agonya. I andha gibeweko ng’om  ma Sitani ubetelo wiye re m’ubim wigi. (Som Jurumi 12:1, 2.) Wan ceke watie ku ng’iyong’ic m’ukwayu watim: Nigwoko asu ng’atu ma con ma dubo ku ng’om pa Sitani ubimo wiye, kunoke niweko Yehova ulokwa wadok ng’atu ma ber niai kawoni.​—Isa. 64:8.

8. Ang’o ma copo konyowa nikabu paru man timo ma reco?

⁸ Yehova ung’eyo nia niweko paru man timo ma reco tie gin ma ting’o nindo man ekwayu kero. (Zab. 103:13, 14) Ento nikadhu kud i Lembe pare, tipo pare man dilo pare, ebemiyo iwa rieko, tego, man kony ma watie ku yenyne kara watim alokaloka. Ma jiji mbe edaru nikonyi bende. Wakenen kawoni lembe ma tung’ tung’ m’icopo timo ma bikonyi nikabu ng’atu ma con cen kara ibed ayika pi nilimo batizo.

9. Lembe pa Mungu copo konyi nitimo ang’o?

⁹ Tii ku Biblia pi ning’iyiri cuu. Lembe pa Mungu ubedo ve kieu; eromo konyi ning’iyo i paru peri, wec peri, man timo peri. (Yak. 1:22-25) Ng’atu ma telo wi ponji peri mi Biblia ku Jukristu mange ma giteng’ini i tipo gicopo nyutho iri kite m’iromo ng’iyiri ko in giri. Ku lapor, gicopo tiyo ku Lembagora pi nikonyi inen thenge m’itek i iye man m’ing’ic i iye. Gicopo ponji ku kite m’inwang’ ko lembe m’ujengere iwi Biblia ma romo konyi nivoyo timo ma reco. Bende, Yehova tie ayika nikonyi. Etie ng’atu ma ber m’usagu ma romo konyi pilembe eng’eyo adundeni. (Rie. 14:10; 15:11) Pieno, bed ku ng’iyo mi rwo i bang’e man mi ponjo Lembe pare kubang’ ceng’.

10. Lembe ma Elie ukadhu kud i iye ubemiyo iri ponji ma kani?

¹⁰ Bed ma cwinyi tek nia cik mir ukungu pa Yehova tie ber m’usagu. Lembe ceke ma Yehova ubekwayu nia watim utie pi bero mwa. Ju ma gibekwo nimakere ku cik mir ukungu pare jumiyo igi woro, gibedo ku lembakeca i kwo migi, man ginwang’u anyong’a mandha. (Zab. 19:7-11) Tung’ ku maeno, dhanu ma gibeworo ngo cik mir ukungu pa Yehova gisendiri pilembe gibetimo lembe ma reco. Umego moko ma nyinge Elie ukoro pi matoke ma junwang’u ka jubeworo ngo cik pa Mungu. Jurunyodo pare gibino dhanu ma gimaru Yehova. Ento en kinde m’edoko jalawobi, eng’iyo jurimo ma reco. E emondo i kit kwo mi tiyo ku yath ma merojo, i lembsasa mi tarwang’ man i kwalu kwo. Eyero nia edoko ng’atu ma kwiny lee man ma jarop. Ekoro kumae: “Atimo lembe ceke ma jugam juponja ko nia Jakristu ucikere ngo nitimo.” Re wi Elie uwil ungo ku gin ma juponje ko kinde ma fodi e nyatin. Ecaku ponjo kendo Biblia. Etimo tego eweko timo pare ma reco man elimo batizo i oro 2000. Nikwo nimakere ku cik mir ukungu pa Yehova umiyo ire bero ma kani? Ewacu kumae: “Kawoni dong’ atie ku kwiyocwiny man pidocwiny ma leng’.” * Calu ma lapor pa Elie unyutho, ju ma gikwero niworo cik mir ukungu pa Yehova gibemiyo peko i kumgi gigi. Kadok kumeno de, re Yehova tie ayika nikonyogi kara gitim alokaloka.

11. Yehova udagu lembang’o?

¹¹ Ponj nidagu gin ma Yehova udagu. (Zab. 97:10) Biblia unyutho nia Yehova  udagu “wang’ mi kuhaya, leb mi ndra, man cing’ ma cwiro rimo ma lembe mbe.” (Rie. 6:16, 17) Edagu bende “ng’atu ma rieu rimo nege man jabombi.” (Zab. 5:6) Yehova udagu pidoic ku timo maeno lee mandha, uketho yang’ con egam enyotho jutimrac ceke mi rundi pa Noa pilembe gigam gipong’o ng’om ku rop migi. (Tha. 6:13) Wakewec iwi lapor mukende. Nikadhu kud i bang’ jabila Malaki, Yehova uwacu nia edagu ju ma gibesayu gilal gam migi ku judhoggi mi gamiri m’umbe ku kosa. Ebejolo ngo thier migi man ebikwayu wel i bang’gi pi timo migi.​—Mal. 2:13-16; Ebr. 13:4.

12. ‘Nidagu gin ma rac’ thelembene tie ang’o?

¹² Yehova ubemito ‘wadag gin ma rac.’ (Rum. 12:9) Wec “nidagu” ma jutiyo ko eno, ubenyutho adegi ma judagu ko piny moko ma rac mandha ma ketho jung’ok. Icopo winjiri nenedi ka jukwayu nia icam cam m’utopi? Paru mi lembene kende ci copo ketho cwinyi lemi. Kumeno bende, kadok paru mi timo lembe ma rac ma Yehova udagu de ucikere nilemo cwinywa.

13. Pirang’o wacikara niwodho paru ma rac cen kud i wiwa?

¹³ Gwok paru peri. Paru cwaluwa i timo. Eno re m’uketho Yesu uponjo nia wawodh paru ma copo cwaluwa nitimo dubo. (Mat. 5:21, 22, 28, 29) Wan ceke wabemito wanyay anyong’a i Wegwa m’i polo. Pieno, pire tie tek nia wawodh m’umbe galu paru moko ci ma rac m’ubebino i wiwa!

14. Wec mi dhogwa nyutho lembang’o i wiwa, man penji ma kani ma wacikara nidwoko wang’e?

¹⁴ Lur i wec peri. Yesu uwacu kumae: “Gin ma wok kud i dhok ai i adunde.” (Mat. 15:18) Wec mi dhogwa nyutho nia watie kit dhanu ma nenedi. Pieno, etie ber nia ikepenjiri ku penji ma e: ‘Nyo abed akwero nicwayu vupo kadok nwang’u yero lemandha bikelo peko i kuma de? Calu ma dong’ adaru gamara, nyo asu abed anyutho wang’ mi mer ni ng’atu mange m’utie ngo jadhoga mi gamiri? Nyo abed alworo sembo lele mi tarwang’ calu ma julworo ko thong’omi? Nyo abed adwoko lembe ku yoo tek juyero lembe moko m’uton i iya?’ Nyamu i lembe iwi penji maeno bikonyi. Wec ma reco tie ve wuzi. Calu wuzi diko kind bongu doko ni acel, wec ma reco de coko dhu kite mwa ma con i kumwa. Pieno, tek imito ikab  ng’atu ma con ceni, wek wec ma reco de cen, niwacu cwayu vupo man sosiwec mi tarwang’.

15. Niguro timo mwa ma con “iwi yen” thelembene tie ang’o?

¹⁵ Bed ayika nitimo lembe m’ukwayere. Jakwenda Paulo utiyo ku wec moko mi lapor m’unyutho nia pire tie tek watim alokaloka i kwo mwa. Ekiewo nia wacikara niguro timo mwa ma con “iwi yen.” (Rum. 6:6) I ayi mange, wabemito walub lapor pa Yesu, kum ebino ayika niyiyo jugure iwi yen kara enyay anyong’a i Yehova. Wan de wacikara nikabu pidoic man timo ma reco ma Yehova udagu cen. Tek watimo lembe maeno, wabibedo ku pidocwiny ma leng’ man ku genogen mi kwo rondo ku rondo. (Yoh. 17:3; 1 Pet. 3:21) Poy nia Yehova biwilo ngo cik pare mir ukungu kara ya enyay anyong’a i iwa, ento wan re ma wacikara niloko kite mwa man niworo cik pare.​—Isa. 1:16-18; 55:9.

16. Pirang’o ukwayu imediri asu ninyego i dhug awanya ma raci?

¹⁶ Mediri ninyego i dhug awanya ma rac. Ukwayu imediri asu ninyego i dhug awanya ma rac kadok i ng’ey batizo peri. Ng’atu moko ma nyinge Maurício uyero nia, kinde m’edongo edoko jalawobi, ecaku kit kwo mi timo ribiri co ku co. Saa maeno, erombo ku Jumulembe pa Yehova man ecaku ponjo Biblia. I ng’ey m’etimo alokaloka i kwo pare, elimo batizo i oro 2002. Kawoni Maurício udaru timo ni Yehova pi oro dupa; re eyero kumae: “Saa moko ubed ukwayere nia anyeg asu i dhug awanya ma rac.” Eweko ngo lembuno utur cwinye. Emedo kumae: “Cwinya bedo tek pilembe ang’eyo nia acopo nyayu anyong’a i Yehova, kan atimo ngo lembe m’awanya ma rac ubecwala nitimo.” *

17. Lapor pa Nabiha ubetielo cwinyi nenedi?

¹⁷ Kway Yehova ukonyi man jengiri iwi tipo pare, ento ungo iwi tego peri giri. (Gal. 5:22; Filip. 4:6) Wacikara nibedo ku lembakeca mi kabu ng’atu ma con cen man kud wawek edwog kendo. Wakewec iwi lapor pa dhaku moko ma nyinge Nabiha. Won ugam uwenje kinde ma fodi oro pare abusiel. Eyero kumae: “Lembene  uketho awinjara ku can ma lee i cwinya.” Saa ma Nabiha udongo, edoko ng’atu ma kwiny man ma won ali. Emondo i kuloka mi yath ma merojo, e jutwiye etimo oro ma dupa i kol. Kinde ma Jumulembe pa Yehova moko ucidh uliewo ju ma jutwiyo i kol, giwok gicaku ponjo kude Biblia. Nabiha ucaku timo alokaloka ma lee i kwo pare. Ekoro kumae: “Ebino ira yot niweko lembe moko ma rac m’abed atimo; ento niweko madhu taba ubino lembe ma tek.” Re enyego ku peko pare pi oro ma kadhu acel nitundo eweko madhu taba. Etimo nenedi? Ewacu kumae: “M’usagu zoo, abed akwayu Yehova thirithiri kara ekonya awek nimadhu taba.” Kawoni ebed eyero ni jumange nia “ka an de atimo alokaloka pi ninyayu anyong’a i Yehova, ang’eyo nia ng’atu moko ci de copo timo!” *

18. Nimakere ku 1 Jukorintho 6:9-11, jurutic pa Mungu dupa ginwang’u copo mi timo ang’o?

¹⁸ I rundi ma kwong’a, jumoko ma Yehova ung’iyogi pi nibimo karacelo ku Kristu, gibed gitimo lembe ma reco i wang’ nidoko juyic. Ku lapor, gibino weg abor, ju ma timo ribiri co ku co kunoke mon ku mon, man jukwo. Ento ku kony mi tipo ma leng’ pa Mungu, giloko kura migi. (Som 1 Jukorintho 6:9-11.) Tin bende Biblia udaru konyo dhanu milioni dupa nitimo alokaloka i kwo migi. * Giweko timo ma reco ma nwang’u dong’ ulage unyang’ i igi. Lapor migi ubenyutho kamaleng’ nia in de icopo timo alokaloka i kwo peri man nikabu timo peri ma reco, e icopo bedo ng’atu m’uromo nilimo batizo.

19. Wabiweco iwi lembang’o i thiwiwec m’ulubo?

¹⁹ M’uweko kero ma jutimo pi nikabu ng’atu ma con, ukwayu ju ma gibemito gilim batizo gitim bende tego nironyo ng’atu ma nyen. I thiwiwec m’ulubo, wabiweco iwi ayi ma wacopo ronyo ko ng’atu ma nyen ne man ayi ma jumange copo konyo kowa.