1-2. Lapor pa jakwenda Paulo romo konyo judong cokiri tin nenedi?

 JAKWENDA Paulo ugam umaru umego pare lee. Etimo tic ma tek pigi. (Tic. 20:31) Eno re m’uketho umego ku nyimego de gimare lee mandha. Nindo moko, kinde ma judong cokiri mir Efeso giwinjo nia dong’ gibinene ngo kendo, “gin zoo gigam gipodho iwi wak ma lee.” (Tic. 20:37) Tin de judong cokiri mwa gibetimo tic ma tek pir umego ku nyimego, gimarugi lee, man ka gitie ku yeny mi kony, gi ii magwei kara gikonygi. (Filip. 2:16, 17) Re saa moko judong cokiri ginwang’iri bende i wang’ lembe ma tek. Dong’ ang’o ma copo konyogi ninyego ku lembe maeno?

² Judong cokiri mwa ma gibetimo tic ma tek giromo lubo lapor pa Paulo. (1 Kor. 11:1) Paulo ubino ngo ku copo ma calu mi jumalaika. En de ebino ku dubalaga, man saa moko ebed eii aiya nitimo lembe m’atira. (Rum. 7:18-20) Ebino bende ku peko dupa m’ukwayu enyeg ko. Ento cwiny Paulo utur ungo, kadi anyong’a pare de thum ungo. Ka judong cokiri gibelubo lapor pa Paulo, gicopo mediri asu nitimo ni Yehova kud anyong’a, kadok kinde ma gibenwang’iri i wang’ lembe dupa ma tek. Nenedi? Wakenenu.

3. I thiwiwec maeni wabiweco iwi lembang’o, man wabineno lembang’o mange?

³ I thiwiwec maeni, wabiweco iwi lembe ang’wen ma timo romo bedo tek ni judong cokiri: (1) ninwang’u saa mi rweyo lembanyong’a man mi pong’o rwom migi mange de, (2) ninwang’u saa mi tielo cwiny umego ku nyimego, (3) ninyego ku ng’ico migi gigi, man (4) nitimo karacelo ku Jukristu wagi ma gitie ku dubalaga. Bende, wabineno gin m’ukonyo Paulo ninyego ku peko maeno, man wabineno lembe ma judong cokiri giromo timo pi nilubo lapor pare.

4. Pirang’o saa moko eromo bedo tek ni judong cokiri nibedo lapor ma ber i tic mi rweyo lembanyong’a?

⁴ Pirang’o eromo bedo teki? Ubekwayu nia judong cokiri gibed ma kwong’a i lembe m’uneno rweyo lembanyong’a. Re lundo gitie ku rwom mange de bik. Ku lapor, i coko m’i kind yenga, ju ma dupa m’i kindgi gibedo juwikom mi coko kunoke gitelo wi Ponji mi Biblia mi cokiri wang’ ma pol, moko ke nwang’u gitie ku korolembe de. M’umedo maeno, gi ii niponjo jukony tic ku lembe dupa, man saa ceke gimiyiri pi nitielo cwiny umego ku nyimego ku mutoro. (1 Pet. 5:2) Judong cokiri moko lundo gitimo tic mi giedo man mi yiko kum Udi Ker ku udi mange ma watimo thier ni Yehova i igi. Re jadit cokiri utie calu jurwey mange ceke mi cokiri, niwacu tic pare ma kwong’a man ma pire tek lee utie nirweyo lembanyong’a.​—Mat. 28:19, 20.

5. Jakwenda Paulo uweko lapor ma kani i tic mi rweyo lembanyong’a?

⁵ Lapor pa Paulo. Gin m’ugam ukonyo Paulo nibedo jarwey ma cuu nwang’ere i Jufilipi 1:10. I giragora maeno, ewacu kumae: “Wung’ii lembe ma pigi tek nisagu.” Paulo utiyo ku juk pare eno en gire. Jumiyo ire tic mi rweyo lembanyong’a, man pi oro ma dupa, eneno tic maeno ni gin acel ma pire tek lee. Ebed erweyo “i wang’ dhanu ceke man ot kubang’ ot.” (Tic. 20:20) Eketho ngo nia i nindo acel, ebiberweyo saa rukani, kunoke nia en ebiberweyo pare nindo acel i kind yenga. Ento ebed erweyo kaka moko ci, man saa moko ci ma kan ucopere ire! Ku lapor, kinde m’ebekuro umego mange i Athene, erweyo lembanyong’a ni ungu mi dhanu moko ma pigi yik, man jumoko m’i kindgi gijolo lembene. (Tic. 17:16, 17, 34) Kadok kinde ma ‘jutwiyo’ Paulo i kol de, re asu erweyo ni ju ma gibino i vute keca.​—Filip. 1:13, 14; Tic. 28:16-24.

6. Paulo uponjo umego mange ku timo lembang’o?

⁶ Paulo utiyo ma ber mandha ku saa pare. Wang’ ma pol ebed ekwayu jumange nia girwey kugi. Ku lapor, i woth pare ma kwong’a pi tic mi misioner, eting’o Yohana ma julwong’o bende Marko; i woth mir ario ke eting’o Timoteo. (Tic. 12:25; 16:1-4) M’umbe jiji, Paulo uii ku kero pare zoo pi niponjo umego maeno cuu ku kite ma gicopo pangu ko lembe i cokiri, kite ma giromo timo ko tic mi kwayu rombe, man kite ma gicopo doko ko juponji ma weg bodho.​—1 Kor. 4:17.

7. Judong cokiri gicopo tiyo ku lembe ma Paulo uyero i Juefeso 6:14, 15 nenedi?

⁷ Ponji ni judong cokiri. Judong cokiri  gicopo lubo lapor pa Paulo nenedi? Nwang’u giberweyo ot kubang’ ot kende ngo, ento nwang’u gitie bende ayika nimiyo lembatuca saa moko ci, man kaka moko ci m’ucopere igi. (Som Juefeso 6:14, 15.) Ku lapor, giromo miyo lembatuca ni dhanu saa ma gicidho ng’iewo piny kunoke i tic migi. Kunoke kinde ma gibedikiri i tic mi giedo mi Ot Ker, giromo rweyo ni dhanu ma kwo ceng’ini keca, kunoke ni ju ma lworo igi piny. Calu Paulo, kinde ma judong cokiri giberweyo ku jumange, uketh’i iye jukony tic, i saa maeno gicopo ponjogi bende ku lembe dupa.

8. Saa mange ukwayu judong cokiri gitim ang’o?

⁸ Kwayu ngo judong cokiri giketh tic migi mi cokiri kunoke mi twodiri umak saa zoo, ma dong’ gicopo nwang’u de ngo saa mi rweyo lembanyong’a. Kara ginwang’ saa mi timo lembe zoo m’ukwayere igi, saa mange etie rac ungo nikwero tic moko ma jubemedo i korgi. I ng’ei ma giparu i lembene cuu man girwo pire, giromo nwang’u nia tek giyiyo tic mange, gibituc ungo nitimo lembe ma pigi tek nisagu. Lembe ma pigi tekne uketh’i iye nitelo wi thier mi juruot migi kubang’ yenga, nirweyo lee kud amora, kunoke niponjo awiya migi ku rweyo lembanyong’a. Ni jumoko ecopo bedo yot ungo nikwero rwom moko mi tic; re ukwayu cwinygi bed tek nia Yehova ubenyang’ nia gikwero pilembe gibemito lembeman uwoth kakare.

9. Lembe m’upong’ akeca i wang’ judong cokiri copo ketho ebedo igi tek nitimo ang’o?

⁹ Pirang’o eromo bedo teki? Dhanu pa Yehova gibekadhu kud i peko dupa. I nindo maeni mi kajik ceng’, wan ceke watie ku yeny mi tielocwiny, mi kony man mi jukojuk. Saa moko lundo, jumoko gibedo ku yeny mi kony kara kud gimond i timo ma rac. (1 Thes. 5:14) I andha, judong cokiri giromo daru ngo peko ceke ma dhanu pa Yehova gibenwang’iri ko. Re asu Yehova ubemito gi ii nitielo cwiny rombe pare man gigwokgi. Ento lembe m’upong’ akeca i wang’ judong cokiri copo ketho ebedo igi tek nikonyo umego ku nyimego ma gitie ku yeny mi kony. Dong’ gicopo nwang’u saa mi timo lembuno nenedi?

10. Nimakere ku 1 Juthesaloniki 2:7, Paulo unyutho nenedi nia ebedieng’ pi dhanu pa Yehova?

¹⁰ Lapor pa Paulo. Paulo ubed usayu yo mi foyo umego pare, man mi tielogi. Etie ber nia judong cokiri gilub lapor pare; mito gimar umego ku nyimego man gibed ma ber kugi. (Som 1 Juthesaloniki 2:7.) Paulo ubed uyero ni umego ku nyimego nia emarugi man nia Yehova de umarugi. (2 Kor. 2:4; Efe. 2:4, 5) Ebed eneno dhanu mi cokiri ni jurimbe, pieno ebed enwang’u saa mi bedo karacelo kugi. Ekoro igi thwolo thwolo lembe m’ubenyayu lworo i iye man ng’ico pare; eno unyutho nia egenogi. (2 Kor. 7:5; 1 Tim. 1:15) Re Paulo  uketho ngo wiye kwa i kum peko pare. Ento ebed emito ekony umego pare.

11. Pirang’o Paulo umiyo juk ni umego ku nyimego pare?

¹¹ Saa moko, ubed ukwayu nia Paulo umii juk ni umego ku nyimego pare. Ento ebed ejukogi ngo ku dhu ng’eicwiny m’i iye. Emiyo igi juk pilembe ebedieng’ pigi man ebemito gwokogi i kum ariti ma tung’ tung’. Ebed eii nimiyo igi juk ma gicopo nyang’ i iye yot yot, man ebed emito gijol jukne. Ku lapor, i barua m’ekiewo ni Jukorintho, emiyo igi juk ma kwiny. Ento i ng’ei m’ekiewo baruane, eoro Tito i bang’gi. Cwiny Paulo ubino dieng’ i kum kite ma gibijolo ko barua maeno. Kinde m’ewinjo nia gijolo juk pare man gikethe i timo, anyong’a unege lee!​—2 Kor. 7:6, 7.

12. Judong cokiri giromo tielo Jukristu wagi nenedi?

¹² Ponji ni judong cokiri. Judong cokiri giromo lubo lapor pa Paulo, nwang’u gibekoyo saa pi nibedo karacelo kud umego ku nyimego. Gicopo timo kumeno nenedi? Yo acel utie nitundo con i wang’ coko; eno bimiyo igi kaka mi weco ku jumange man mi tielogi. Wang’ ma pol, pi niyero wec ma copo tielo cwiny umego kunoke nyamego moko, eting’o dakika ma nyanok kende. (Rum. 1:12; Efe. 5:16) Bende, jadit cokiri m’ubelubo lapor pa Paulo tielo Jukristu wadi nwang’u ebetiyo ku Biblia pi nitielo yiyoyic migi, man pi niketho cwinygi nia Mungu umarugi. M’umedo maeno, etimo kero niketho ging’ey nia en de emarugi. Eweco kugi wang’ ma pol man efoyogi ka gitimo lembe moko ma ber. Kan ukwayu nia emii juk, etiyo ku Biblia pi nimiyo jukne. Eyero lembe m’unuti ngbeng’ ngbeng’, re ku mer, pilembe emito nia umego kunoke nyamego m’ebemiyo ire juk uyii jukne.​—Gal. 6:1.

13. Ng’ico ma jadit cokiri moko utie ko romo ketho ewinjere nenedi?

¹³ Pirang’o eromo bedo teki? Judong cokiri de gileng’ ungo, niwacu gitie ku kum mi dubalaga. Gin bende gitimo kosa calu jumange. (Rum. 3:23) Saa moko eromo bedo igi tek nibedo ku nen ma ber iwi ng’ico migi. Judong cokiri moko gicopo ketho wigi zoo i kum ng’ico migi, ma dong’ cwinygi de tur. Jumange lundo giromo cero ba ng’ico migi, man giparu nia gimbe ku yeny mi timo alokaloka moko ci.

14. Nimakere ku Jufilipi 4:13, jwigiri ukonyo Paulo nenedi ninyego ku ng’ico pare?

¹⁴ Lapor pa Paulo. Paulo ubino ng’atu ma jwigere, uketho enyang’ nia ecopo ii ngo ku ng’ico pare en gire. Ebino ku yeny mi tego ma Mungu romo miyo ire en. I wang’e, Paulo ular ubino dhanu ma wiye tek, man ebed enyayu ragedo ku rac i kum Jukristu. Ento i ng’eye, eyiyo kosa  pare, man ebino ayika niloko nen pare ku kura pare. (1 Tim. 1:12-16) Pieno ku kony pa Yehova, Paulo udoko jadit cokiri ma jamer, ma won kisa man ma jwigere. I andha, ebino ku can ma lee i adundene pi ng’ico pare; re kakare niparu hai iwi ng’icone, eng’iyo nigeno nia Yehova bitimo ire kisa. (Rum. 7:21-25) Esayu ngo nia ebed ng’atu ma leng’ m’umbe dubo. Ento etimo tic ma tek nironyo kura mi Jukristu; man ku jwigiri, ejengere iwi kony pa Yehova pi nitimo tic ma jumiyo i kore.​—1 Kor. 9:27; som Jufilipi 4:13.

15. Judong cokiri gicopo bedo ku nen ma ber iwi ng’ico migi nenedi?

¹⁵ Ponji ni judong cokiri. Kara umego moko udok jadit cokiri, jung’iye ngo nia pilembe embe ku dubalaga. Re kadok kumeno de, Yehova ubemito judong cokiri giyii kosa migi, man giceg kite mi Jukristu. (Efe. 4:23, 24) Pieno jadit cokiriman ucikere nitiyo ku Biblia pi ning’iyere en gire, man nitimo alokaloka ceke m’ukwayere. E Yehova bikonye ninwang’u mutoro man nibedo jadit cokiri ma ber.​—Yak. 1:25.

16. Ka judong cokiri gibeketho wigi kwa i kum ng’ico mir umego, lembang’o ma copo timere?

¹⁶ Pirang’o eromo bedo teki? Kinde ma judong cokiri gibetimo saa ma pol karacelo kud umego ku nyimego, giromo ng’eyo ng’ico migi cuu. Pieno ka gibedo ngo ku wang’gi, kwinyo copo makugi i kum umegone, gicopo doko ger kugi, man giromo kwong’o serogi kunoke nipoko lembe i wigi. Paulo upoyo Jukristu nia Sitani ubemito gitim tap kumeno.​—2 Kor. 2:10, 11.

17. Paulo ubino ku nen ma kani iwi umego ku nyimego?

¹⁷ Lapor pa Paulo. Saa ceke Paulo ubedo ku nen ma ber iwi umego ku nyimego pare. Egam eng’eyo ng’ico migi cuu, kum saa moko timo migi ubed unyayu can i iye bende. Re kadok kumeno de, Paulo ung’eyo nia ka ng’atini utimo kosa, eca nyutho ngo nia e dhanu ma rac. Emaru umego pare, man ebed eketho wiye kwa i kum kite migi ma beco. Tek umego ku nyimego gibeii kpe nitimo lembe ma cuu re lembene ubevoyogi, ebed enyang’ nia gitie ku pidoic ma ber, man ubekwayu ndhu jukonygi akonya.

18. Ayi ma Paulo ukonyo ko Eudia giku Sentike ubemiyo iri ponji ma kani? (Jufilipi 4:1-3)

¹⁸ Ku lapor, wakenenu kite ma Paulo ukonyo ko nyimego ario mi cokiri mi Filipi. (Som Jufilipi 4:1-3.) Copere nia teliri moko ugam uwok i kind Eudia giku Sentike uketho kindgi upokere. Paulo udoko ngo ger kugi man eserogi de ngo, ento eketho wiye hai i kum kite migi ma beco. Gibino nyimego ma weg bedopwe, man gitimo ni Yehova pi oro dupa. Paulo ung’eyo nia Yehova umarugi. Nen ma ber m’ebino ko iwi nyimego maeno uketho emiyo amora i kumgi nia gidar teliri ma  n’i kindgi. Bende, calu ma Paulo ubed uketho wiye i kum kite ma beco mi jumange, emedere nibedo kud anyong’a man ku winjiri ma cuu ku dhanu mi cokiri.

19. (a) Judong cokiri giromo timang’o kara gimediri nibedo ku nen ma ber iwi Jukristu wagi? (b) Cal pa jadit cokiri m’ubeketho leng’o i Ot Ker ubemiyo iri ponji ma kani?

¹⁹ Ponji ni judong cokiri. Judong cokiri, wusay kite ma beco mir umego ku nyimego mwu. Gin ceke gileng’ ungo; ento ng’atuman m’i kindgi utie ku kite ma beco ma copo nyang’uwa. (Filip. 2:3) Re ucero ngo nia saa mange judong cokiri gitwiny paru p’umego kunoke pa nyamego moko. Ento calu Paulo, ukwayu gitim tego ma kud giketh ko wigi i kum wec man timo p’umegone ma romo nyayu ng’eicwiny i igi. Mito giketh wigi i kum mer m’emaru ko Yehova, cirocir m’ebenyutho i tic pa Mungu, man gibed ku genogen nia etie ku pidoic mi timo lembe ma ber. Judong cokiri ma gitie ku nen ma ber iwi jumange giroyo yaw yaw i cokiri man giketho dhanu ceke winjiri ma ber.

20. Judong cokiri gicopo timang’o kara gimediri ninwang’u ponji niai kud i lapor pa Paulo?

²⁰ Judong cokiri, wubinwang’u kony lee dit tek wubemeduru ning’iyo i lapor pa Paulo. Ku lapor, yab Index des publications des Témoins de Jéhovah, man say thiwiwec “Paul” man nyathi thiwiwec, “Exemple: pour les anciens.” Kinde m’ibesomo girasoma ma juori i iye i the thiwiwec maeno, penjiri kumae: ‘Lapor pa Paulo copo konya nenedi nibedo asu kud anyong’a kinde m’abetimo tic para m’atie ko jadit cokiri?’

21. Cwiny judong cokiri copo bedo tek i kum lembang’o?

²¹ Judong cokiri, wupoy nia Yehova ubekwayu ngo nia wubed dhanu ma leng’ ma dubo ngo, ento ebekwayu nia wugwok bedoleng’ mwu. (1 Kor. 4:2) Tic ma tek ma Paulo utimo man gwoko bedoleng’ pare unyayu anyong’a lee i Yehova. Wun de cwinywu bed tek nia tic ma tek ma wubetimo ni Yehova ubenyayu mutoro i iye. Wiye biwil ungo nyanok de “i kum tic mwu man mer ma wunyutho pi nyinge, kum wutimo ni jumaleng’.”​—Ebr. 6:10.