Jumoko ma gisomo giragora maeno nyamalu malu gipenjiri ku penji maeno. Ento i giragora eno, dhanu utie ario ma tung’ tung’ ma ceke nying’gi Mefiboceth, man wacopo nwang’u ponji i kum lembe m’unwang’ugi.

Saul ma tie ubimo mir Israel ubino kud awiya ma co abiro man ju manyir ario. Wode ma kayu ubino Yonathan. I ng’eye Rizpa ma dhaku pare m’araga udok unyolo ire nyathin mange ma nico ma nyinge Mefiboceth. Eno uketho ubimo Saul ubino ku wode man nyakware ma co ma ceke nying’gi Mefiboceth.

I kare moko, ubimo Saul ugam umito edar the dhanu mi Gibeon ma gibino kwo i kind nyithindho mir Israel. E de ve nia jugam junego ju ma dupa m’i kindgi. Eno ubino lembe ma rac mi tuko ngo. Pirang’o? Kum i wang’e i rundi pa Yocuwa, judongomawijo mir Israel ugam utimo lembariba mi kwiyocwiny ku dhanu mi Gibeon.​—Yoc. 9:3-27.

Lembariba maeno ubino tiyo asu nitundo i rundi p’ubimo Saul. Tung’ ku lembariba maeno, ubimo Saul umito pare edar the Jugibeon ceke cen. Eno uketho juruot pa Saul ubino ku dubo mi rimo i wigi. (2 Sam. 21:1) I ng’eye Daudi ugam udoko ubimo. E dong Jugibeon m’uboth kud i cing’ Saul ubin uyero ire pi racu ma dit ma jutimo i kumgi. Daudi upenjogi nia ginyuth pir adunya ma jucopo timo pi lembe ma rac ma Saul utimo kara Yehova umii mugisa iwi ng’om mir Israel. Kakare nikwayu sente, Jugibeon gikwayu nia jumii gineg awiya abiro pa ng’atu ‘m’upido lembe i kumgi nia junyothgi.’ (Wel 35:30, 31) Daudi uyiyo lembe ma gikwayu.​—2 Sam. 21:2-6.

Saa maeno nwang’u dong’ Saul giku Yonathan githo i lwiny, ento Mefiboceth ma wod Yonathan ubino kwo. Ebino won abala nikum ret m’enwang’u ma fodi e nyathin, man edikere ngo i lembe mi nek ma kwaru mire utimo i kum Jugibeon. Daudi giku Yonathan gigam gitimo lembariba mi bedo jurimo, man lembaribane ubino pi bero mi nyikway Yonathan, uketho i iye Mefiboceth ma wode. (1 Sam. 18:1; 20:42) Biblia uwacu nia “ubimo [Daudi] unyutho kisa ni Mefiboceth, ma wod Yonathan ma tie wod Saul, nikum kwong’ ma gitimo giku Yonathan i wang’ Yehova.”​—2 Sam. 21:7, NWT.

Dong’ Daudi uworo kwac mi Jugibeon nenedi? Emiyo awiya ario pa Saul, ma nying’ ng’atu acel m’i kindgi ubino Mefiboceth, man nyikway Saul mange abic. (2 Sam. 21:8, 9) Lembe ma Daudi utimo ukabu dubo mi rimo kud i ng’om mi nyithindho mir Israel.

Lembe maeni utie ngo kende kende kpawa. Cik pa Mungu uyero kamaleng’ kumae: “Nyithindho . . . kud juketh githo pi wego.” (Poi. 24:16) Ka nwang’u awiya ario pa Saul ku nyikwaye abic gibino mbe ku kosa, nwang’u Yehova copo yiyo ngo nia juneggi. Cik udok umedo kumae: “Ku ba dhanu ku ba dhanu juketh etho pi dubo pare gire.” Ubenen nia awiya pa Saul ario ku nyikwaye abic ma githo ca de, gidikiri i nek pa Saul m’emito edar ko the Jugibeon. Juabiro maeno ginwang’u matoke mi racu migi.

Lembuni ubenyutho nia ng’atini ucikere ngo nicero ba lembe ma rac m’etimo, m’epar ko kunoke m’eyer ko nia en elubo pare telowic ma jumiyo ire! Ecikere nicungo i dhu timo pare en gire. Lembieko moko uwacu nia “ii pid cu pi yo mi tiendi, man wek yo peri ceke cungi.”​—Rie. 4:24-27; Efe. 5:15.