1-2. Kan itie ngo ayika nilimo batizo, pirang’o mito ngo cwinyi turi? (Nen cal mi ng’eye.)

 KAN ibemaru nilimo batizo, eno nang’ iketho iri lembakeca ma ber mi tuko de ngo. Nyo itie ayika nimaku yubne kawoni eni? Kan iyiyo nia itie ayika man judong cokiri de giyiyo, dong’ kud ibed ku jiji mi limo i coko ma dit m’ubino. Kwo mi mugisa ubekuri i tic pa Yehova.

² Re nyo ng’atu moko udaru yero iri de nia ukwayu iketim mediri lee i wang’ nilimo batizo? Kunoke nyo inwang’u in giri nia ukwayu iketim mediri? Tek eyo, kudi cwinyi tur. Iromo timo mediri pi nitundo i kum yub maeno ma pire tek kadok itie aradu kunoke iteng’ini de.

3. Jaethiopia ma timo i kal upenjo lembang’o i bang’ Filipo, man eno ubekelo penji ma kani? (Tic mi Jukwenda 8:36, 38)

³ Som Tic mi Jukwenda 8:36, 38. Jaratic moko mi kal m’uai i Ethiopia upenjo Filipo ma jarwey injili kumae: “Ang’o m’ubecera ku limo batizo?” Jaethiopia maeno ubino kud ava mi limo batizo; re nyo andha ebino ayika pi yub maeno ma pire teki?

4. Jaethiopia unyutho nenedi nia ebino ku lembakeca mi medere niponjo lembe?

⁴ Jaethiopia maeno ‘ucidho i Yeruzalem nitimo thier ni Mungu.’ (Tic. 8:27) Pieno, copere nia eyiyo dini mi Juyahudi; m’umbe jiji, edaru ponjo lembe iwi Yehova nikadhu kud i Lembagora ma leng’ mi dhu Juebrania. Re asu ebino kud ava mi ponjo lembe lee. I andha kinde ma Filipo ucidh urombo ku jatic mi kal eno i yo, ewok enwang’u ebetimo ang’o? Ebino somo kitabu m’adola pa jabila Isaya. (Tic. 8:28) Eno ubino lemandha ma thuc mi lembagora. Jaratic  maeno m’i kal ubino kud anyong’a ungo kende kende ning’eyo lembe mir ukungu mi lembagora, ento emito emedere niponjo lembene.

5. Jaethiopia utimo ang’o ku gin m’eng’eyo?

⁵ Jaethiopia maeno ubino ng’atu ma pire tek lee m’ubed utimo tic i kal p’ubimo ma dhaku mir Ethiopia ma nyinge Kandake; “ebed eneno wi lonyo p’ubimo ceke.” (Tic. 8:27) Pieno, ecikere nibedo ku tic lee man rwom dupa. Re ebed enwang’u saa mi woro Yehova. Ejik ungo ku ng’eyo lemandha ang’eya kende, ento ebed eketho gin m’eng’eyone i timo; uketho ebed eciko woth niai i Ethiopia pi niciworo Yehova i hekalu i Yeruzalem. Jaethiopiane ubed utimo tego lee pi niciworo Yehova kadok nwang’u wothne ubed ukwayu saa man sente ma lee de.

6-7. Mer ma Jaethiopia umaru ko Yehova umedere nidongo nenedi?

⁶ Jaethiopia ung’eyo lemandha moko ma pigi tek niai kud i bang’ Filipo, acel m’i kindgi ubino nia Yesu utie Masia. (Tic. 8:34, 35) M’umbe jiji, jatic m’i kal maeno ubino kud anyong’a ning’eyo gin ma Yesu utimo ire. I ng’ey m’eponjo lembe dupa, etimo ang’o? Nwang’u ecopo jik kende kende nibedo ng’atu ma juworo m’ujolo yic mi Juyahudi. Ento mer m’emaru ko Yehova man Wode umedere. Eno ucwale nimaku yub ma pire tek mi limo batizo man nibedo jalub pa Yesu Kristu. Filipo uneno nia ng’atuno uromo, e emiyo ire batizo.

⁷ Kan ibelubo lapor pa Jaethiopia eno, iromo bedo ayika pi nilimo batizo. In de ibiyero ma cwinyi tek nia “ang’o m’ubecera ku limo batizo?” Dong’ wakenen kite m’iromo timo ko lembe ma rom ma Jaethiopia utimo: Emedere ning’eyo, eketho gin m’eng’eyone i timo, man emedere niweko mer m’emaru ko Mungu udongi.

8. Yohana 17:3 uyero nia icikiri nitimo ang’o?

⁸ Som Yohana 17:3. Nyo wec maeno ma Yesu uyero ukonyi nimaku yub mi ponjo Biblia? Ni ju ma pol mi kindwa etie andha kumeno. Nyo wec ma rom eno ubeyero bende nia wamedara niponjo lembe? Eyo. Wabijik ungo ‘ning’eyo . . . Mungu mandha m’e kende.’ (Ekl. 3:11) Wabimedara niponjo lembe rondo ku rondo. Ka wamedara niponjo lembe, wabicoro bende ceng’ini ku Yehova.​—Zab. 73:28.

9. Ka wadaru ng’eyo lemandha mir ukungu mi Biblia, ukwayu watim ang’o i ng’eye?

⁹ Ka jubeponjo lembe iwi Yehova, jucaku ku ng’eyo lembe mir ukungu mi Biblia.  I barua ma jakwenda Paulo ukiewo ni Juebrania, eporo ponji mir ukungu mi Biblia ku “gin ma kwong’a.” Ebino cayu ngo “ponji ma kwong’a” nia pire tek ungo, ento epore ku cak ma konyo awiya ma thindho. (Ebr. 5:12; 6:1) Ekwayu bende Jukristu nia kud gijik iwi ponji mir ukungu maeno, man nia giponj lemandha ma thuc mi Lembe pa Mungu. Nyo itie kud ava mi ng’eyo ponji ma thuc mi Biblia? Nyo itie ayika nimediri niteng’ini, nimediri ning’eyo lembe iwi Yehova man lembakeca pare?

10. Pirang’o jumoko copo nwang’u nia etie lembe ma tek niponjo pinyi?

¹⁰ Ni ju ma pol m’i kindwa lundo etie lembe ma tek niponjo piny. Ka in ke? Nyo iponjo ng’eyo somo piny cuu i kalasi? Nyo inwang’u nia ponjo piny miyo anyong’a man ekonyojo? Kunoke nyo inwang’u nia etie iri lembe ma tek niponjo piny mi buku? Ka eyo, itie ngo kendi. Re kadok kumedo de, Yehova romo konyi; pilembe etie ng’atu m’umbe ku kosa man etie japonjo ma ber m’usagu zoo.

11. Yehova unyutho nenedi nia etie “Japonji peri ma dit”?

¹¹ Yehova ulwong’ere en gire nia “Japonji peri ma dit.” (Isa. 30:20, 21, NWT.) Etie japonji ma jacir lembe, ma ber, man ma nyang’ ku dhanu. Eneno lembe ma beco ma n’i ju m’eponjo. (Zab. 130:3) Man ekwayu ngo nia watim lembe m’ukadhu kadhiri ma wacopo. Poy nia emiyo iri ng’ith ma tie giramiya ma ber mandha. (Zab. 139:14) Jucwiyowa kud ava mi ng’eyo lembe. Jacwic mwa ubemito nia wamedara niponjo piny rondo ku rondo, man wanwang’ anyong’a i lembene. Pieno etie lembe mi rieko nibedo “kud ava ma lee” mi lemandha mi Biblia niai kawoni. (1 Pet. 2:2) Keth lembakeca m’iromo tundo i kumgi, mok i kum program peri mi somo Biblia man ponje nja. (Yoc. 1:8) Ku kony pa Yehova ibituc nimaru somo piny man niponjo lembe kwa iwi Yehova.

12. Pirang’o wacikara niponjo lembe iwi kwo pa Yesu man iwi tic pare?

¹² Bed inwang’ saa mi paru lembe nja iwi kwo pa Yesu man iwi tic pare. Pire tie tek nia walub lapor pa Yesu tap tap tek wabemito watim ni Yehova, asagane i nindo maeni ma lembe tie tek i iye. (1 Pet. 2:21) Yesu uweco ter ter iwi peko ma julub pare gibinwang’iri ko. (Luka 14:27, 28) Re cwinye bino tek nia julub pare mandha de gibivoyo pekone calu ma en de evoyo. (Yoh. 16:33) Ponj lembe ceke m’ukoro i kwo pa Yesu man keth lembakeca mi lubo lapor pare i kwo peri ma kubang’ ceng’.

13. Ukwayu ibed ikway lembang’o i bang’ Yehova man ke pirang’o?

¹³ Nibedo ku ng’eyong’ec kende uromo ngo. Re pire tie tek pilembe ebikonyi ning’eyo lembe lee iwi Yehova, man nicego kite ma tung’ tung’ calu ve nimare man nibedo ku yiyoyic i iye. (1 Kor. 8:1-3) Kinde m’ibemediri niponjo lembe, bed ikway Yehova ukonyi ibed ku yiyoyic lee. (Luka 17:5) Edwoko wang’ kodhi rwo ma kumeno ku berocwinye. Yiyoyic mandha m’ujengere iwi ng’eyong’ec ma tap pa Mungu mwa bikonyi nitimo mediri.​—Yak. 2:26.

14. Jakwenda Pethro uketho nwoc nenedi nia pire tie tek nitiyo ku gin ma wabeponjo? (Nen bende cal.)

¹⁴ Jakwenda Pethro uketho peko nia pire tie tek ni julub pa Yesu nia gimediri nitiyo ku gin ma gibeponjo. Edok iwi lembe ma Biblia ukoro iwi Noa. Yehova uyero  ni Noa nia ebecinyotho dhanu ma rac mi rundi maeca ku pii. Kara Noa gibin gibothi ku juruot pare, kwayu ngo ging’ey ang’eya kende nia jubino nyotho ng’om ku pii. Poy nia Pethro ubino weco iwi lembe m’utimere i saa ma fodi pii coro ngo ng’om, niwacu “saa ma jubino giero avur.” (1 Pet. 3:20) Andha Noa ku juruot pare gitiyo ku lembe ma Mungu uponjo kogi pi nigiero avur m’utie yei ma dit. (Ebr. 11:7) I ng’eye Pethro udok uporo lembe ma Noa utimo ku batizo, ekiewo kumae: “Rom rom kumeno, batizo bende ubebodhowu kawoni.” (1 Pet. 3:21) I ayi moko, waromo poro gin m’ibetimo kawoni pi niyikiri nilimo batizo ku tic ma Noa ku juruot pare gitimo pi oro ma lee pi nigiero avur. Dong’ tic ma kani m’ukwayere nia itim kara ilim batizo?

15. Lokocwiny mandha uketho i iye ang’o?

¹⁵ Acel m’i kind gin ma wacikara nitimo, utie niloko cwinywa i andha pi dubo ma watimo. (Tic. 2:37, 38) Lokocwiny mandha ketho jutimo alokaloka de mandha. Nyo idaru weko timo ceke ma nyayu can i Yehova: Kwo mi lemsasa mi tarwang’, madhu taba, man wec ma reco? (1 Kor. 6:9, 10; 2 Kor. 7:1; Efe. 4:29) Tek fodi iweko ngo lembuno, tim kero itim alokaloka. Wec iwi lembene ku ng’atu ma ponjo kudi Biblia, kunoke kway kony man telowic i bang’ judong cokiri. Tek fodi itie aradu m’ibekwo yopewu ke, mediri nikwayu kony i bang’ junyodo peri kara iwek timo ceke ma copo ceri nilimo batizo.

16. Nibedo ku ng’iyo ma ber mi tipo uketho i iye ang’o?

¹⁶ Bende, pire tie tek nibedo ku ng’iyo ma ber mi lembe mi tipo. Lembene uketho i iye nibecidho i coko mi Jukristu man nibedikiri i iye. (Ebr. 10:24, 25) Man kan iromo pi nicaku tic mi rweyo lembanyong’a, keth edok iri ni theng ng’iyo peri ma zoo. Kan ibedikiri lee i tic ma bodho kwo, anyong’a peri de bimedere ameda i tije. (2 Tim. 4:5) Kan itie aradu m’ibekwo yopewu kepenjiri kumae: ‘Nyo junyodo para bepoyo wiya kwa apoya pi nicidho i coko man i tic mi lembanyong’a? Kunoke nyo abed acidho an gira?’ tek ibetimo lembe maenogi in giri, eno nang’  ibenyutho yiyoyic, mer, man foyofoc ni Yehova Mungu. Eno gitie giramiya m’ibemiyo ni Yehova man timo m’ubenyutho nia ‘imoko kikiki i kum Mungu.’ (2 Pet. 3:11; Ebr. 13:15) Giramiya ceke ma wabemiyo ni Mungu ku berocwiny man m’umbe adici nyayu anyong’a i iye. (Nen bende 2 Jukorintho 9:7.) Wamaku yub maeno pilembe anyong’a negowa ka wabemiyo piny ma beco ma watie ko ni Yehova.

17-18. Kite ma kani ma pire tek lee ma bikonyi nitimo mediri nitundo i batizo, man ebikonyi nenedi? (Lembrieko 3:3-6)

¹⁷ Kinde m’ibetimo mediri nitundo i batizo, ibinweng’iri ku peko dupa. Dhanu moko copo ng’ieri pi yiyoyic peri ma nyen; giromo nyayu kadok ragedo de i kumi. (2 Tim. 3:12) Saa moko nyo ibetimo tego pi nijigo timo moko ma reco, re asu idog ipoy nia ipodho i timone. Kunoke icopo nwang’u nia ibeciro ngo man cwinyi tur pilembe lembakeca peri ubeyenyo nen nia ni bor dit. Ang’o ma bikonyi niciro? Utie kite ma pire tek mandha, niwacu mer m’imaru ko Yehova.

¹⁸ Kite ma ber m’usagu zoo m’itie ko, utie mer m’imaru ko Yehova. (Som Lembrieko 3:3-6.) Merne bikonyi nivoyo peko ceke m’ibenweng’iri ko i kwo peri. Man kan itie ku kite maeno, ibijigo ngo nitimo ire kadok ibenweng’iri ku peko de. Biblia beweco wang’ ma pol pi mer ma lokere ngo ma Yehova utie ko pi jurutic pare. Mer maeno nyutho nia Yehova copo weko ngo jurutic pare man ebijigo ngo nimarugi. (Zab. 100:5) Icwiyiri i ayi pa Mungu. (Tha. 1:26) Dong’ icopo kwanyu kit mer maeno nenedi?

19. Icopo medo nyutho foyofoc peri nenedi pi gin ceke ma Yehova utimo iri? (Jugalatia 2:20)

¹⁹ Cak ku dwoko foyofoc. (1 Thes. 5:18) Kubang’ nindo, bed ipenjiri kumae: ‘Yehova unyutho ira mer nenedi?’ I ng’eye foy Yehova nikadhu kud i rwo peri, ma nwang’u ibeweco iwi lembe ma tap m’etimo iri. Nen nia lembe ceke ma Yehova utimo iri utie pilembe emeri, tap calu ma jakwenda Paulo de uneno. (Som Jugalatia 2:20.) Kepenjiri kumae: ‘Nyo an de abemito anyuth nia amare?’ Mer m’imaru ko Yehova bikonyi niceriri i wang’ abidhe, man niciro peko dupa. Ebicweli nimediri niworo Yehova nja ma nwang’u ibenyutho ni Wuru nia imare ceng’ ceke.

20. Thiero kwo peri ni Yehova uketho i iye lembang’o, man yubne pire tie tek rukani?

 ²⁰ I ng’eye, mer m’imaru ko Yehova bicweli nitimo rwo moko ma segi. Ibithiero kwo peri ni Mungu. Poy nia kan idaru thieriri ni Yehova tap ci, nwang’u itie ku genogen ma e ma wang’u ijo: Dong’ itie pare rondo ku rondo. Kinde m’ithiero kwo peri ni Yehova, ing’olo nia ibitimo ire i saa ma ber man i saa ma rac de. Jutimo lembang’ola maeno wang’ acel kende. Ku lemandha, ka wabethiero kwo mwa ni Yehova, nwang’u wabemaku yub mi tuko ngo. Ento kepar pi lembe ma e: Ibimaku yub dupa i kwo peri, moko bibedo ma beco, re acel de mbe ma bisagu thiero kwo peri ni Yehova. (Zab. 50:14) Sitani bitimo kero nikwiyo mer m’imaru ko Wuru, ma nang’ ebegeno ko nia ibijigo nigwoko bedoleng’ peri ire. Kud imii aloci ni Sitani! (Yob 27:5) Mer ma tek m’imaru ko Yehova bikonyi nikwo nimakere ku thieriri peri, man ibicoro ceng’ini ku Wuru m’i polo.

21. Pirang’o waromo yero nia batizo utie ngo ajiki ento acaki?

²¹ I ng’ey m’ithieriri ni Yehova, wec ku judong cokiri peri pi yubne ma pire tek m’ulubo. Bed ipoy saa ceke nia batizo utie ngo ajiki, ento acaki. Etie acaki mi timo ni Yehova m’umbe nijigo. Pieno, dwok mer m’imaru ko Wuru udok tek kawoni. Keth lembakeca ma mer perine umedere ko nidoko tek kubang’ nindo. Timo kumeno bicweli nilimo batizo. Ebibedo iri ni nindo mir anyong’a mandha. Ento eno utie kende kende acaki. Dong’ mer m’imaru ko Yehova man m’imaru ko Wode umedere nidongo rondo ku rondo!