Pirang’o ng’atu ma julwong’o nia “In e!” uwacu nia ‘ebinyotho’ giralaga pare kan egamu Rutha? (Ruth 4:1, 6)

I rundi mi Biblia, ka nico moko utho m’umbe ninyolo awiya, ubed ukwayere nia judwok wang’ penji ma e: Lembang’o ma bitimere i kum ng’om pare? Nyo nying’ juruot pare birwinyo mi magwei? Cik pa Musa ubed ukonyo nidwoko wang’ penji ma kumeno.

Lembang’o m’ubed utimere i kum ng’om pa ng’atu m’utho, kunoke ng’atu m’ulworo ng’om pare nikum cani? Umin kunoke ng’atu moko ma ceng’ini copo niwaru ng’ombe. Eno copo ketho ng’ombe bedo asu i kind juruot ma rom.​—Law. 25:23-28; Wel 27:8-11.

Jubed jugwoko nenedi nying’ juruot pa ng’atu m’utho? Nikadhu kud i lagu, calu m’utimere i kum Rutha. Ng’atu m’umin utho copo lagu ci umin m’udong’ dhatho, pi ninyolo kude nyathin ma biting’o nying’ jarathone, man bilagu piny pare. Yub mi mer maeno ubed ugwoko bende dhatho.​—Poi. 25:5-7; Mat. 22:23-28.

Kenen lembe m’ugam utimere i kum Naomi. Egamere ku ng’atu moko ma nyinge bino Elimelek. Kinde ma en kud awiya pare ma co ario githo, ng’atu moko mbe ma co m’udong’ ma copo gwoko Naomi. (Ruth 1:1-5) Kinde ma Naomi udok i Yuda, ekwayu Rutha ma ciwode upenj Boaz ka nyo ecopo ng’iewo ng’om migi; kum Boaz ubino wat ma ceng’ini pa Elimelek. (Ruth 2:1, 19, 20; 3:1-4) Ento Boaz unyang’ nia wat moko mange ma ceng’ini unuti ma Biblia ulwong’o nia “In e!” Pieno, nwang’u ng’atune re m’utie ku twero mi lar ng’iyo nibedo jawar kunoke ngo.​—Ruth 3:9, 12, 13.

Ku kwong’a, ng’atu ma julwong’o nia “in e” ubino ayika nikonyo. (Ruth 4:1-4) Eng’eyo nia bikwayere enyoth sente moko pi ning’iewo ng’ombe, re eng’eyo bende nia Naomi copo nyolo ngo nyathin ma bilagu ng’om pa Elimelek. Nwang’u jubecimedo ng’om maeno i kum giralaga pa ng’atu ma julwong’o nia “in e,” pieno nang’ ecibedo de pi bero pare.

Ento ng’atu ma julwong’o nia “in e” uloko paru pare kinde m’enyang’ nia ukwayu egam Rutha. Eyero kumae: “Acopo ware ira gira ngo, amaru nyotho musolu para gira.” (Ruth 4:5, 6) Pirang’o eloko paru pare?

Ka ng’atu ma julwong’o nia “in e” kunoke ng’atu mange ugamu Rutha, man enyolo ire nyathin ma nico, nwang’u nyathin maeca re m’ubecilagu ng’om pa Elimelek. Dong’ eno romo “nyotho musolu” pa ng’atu ma julwong’o nia “in e” ke nenedi? Biblia unyutho ngo, re thelembene moko copo bedo m’ulubo e:

• Mi kwong’o, copo nen nia ebenyotho sente pare mananu pi ning’iewo ng’om pa Elimelek, pilembe ng’ombe bidong’ ungo ire; ento bidok i cing’ wod Rutha.

• Mir ario, nang’ ecibedo ku twero mi tungo man mi gwoko Naomi giku Rutha zoo.

• Mir adek, ka Rutha nyolo awiya mange ku ng’atu ma julwong’o nia “in e,” nwang’u awiyane becipoko i giralaga kud awiya pare mange ceke.

• Mir ang’wen, ka nang’ ng’atu ma julwong’o nia “in e” ular ubedo mbe kud awiya, nwang’u wod Rutha ubecibedo ku twero mi lagu ng’om pa Elimelek ku pa ng’atuno ceke. Pieno kan etho, ng’om pare copo dong’ ni nyathin ma junyolo ku nyinge ngo, ento ku nying’ Elimelek. Ng’atu ma julwong’o nyinge “in e” umito ngo eketh giralaga pare i ariti pi nikonyo Naomi. Eng’iyo nimiyo twero mi war maeno ni Boaz ma tie de wat ma ceng’ini. Boaz uyiyo pilembe emito “nying’ ng’atu m’utho ulwong’ere asu i kum giralaga pare.”​—Ruth 4:10, NWT.

Copere nia ng’atu ma julwong’o nia “in e” ubino dieng’ akeca pi nigwoko nyinge man giralaga pare gire. Ebino dieng’ kwa pire gire. Etimo tego kara nyinge ugwokere, re tin nyingene jung’eyo de ngo. Bende ekoso rwom ma segi ma Boaz unwang’u mi doko acel m’i kind kwaru pa Masiya, Yesu Kristu. Ebino adwogi ma rac mi tuko ngo ni ng’atu ma julwong’o “in e,” kum kakare nikonyo ng’atu m’utie i yeny mi kony, edieng’ pare kwa pire gire!​—Mat. 1:5; Luka 3:23, 32.