1-2. Wang’ ma pol ka dhanu ubelimo batizo, lembang’o ma betimere man in ke ukwayu itim ang’o?

 NYO idaru neno de ungu mi dhanu ma giwodhiri pi nilimo batizo? Iwinjo cungo migi nikadhu kud i dwandgi kinde ma gibino dwoko wang’ penji ario i wang’ nilimo batizo. Ineno kite ma wedi migi ku jurimbgi gibino ko kud anyong’a pigi. Saa ma ju m’ulimo batizo giwok kud i the pii, iwinjo padu cing’ man ineno anyong’a m’uberieny i wang’gi. Kubang’ yenga, dhanu elufu swa maku yub maeno pi nithiero kwo migi man nilimo batizo kara gidok Jumulembe pa Yehova Mungu.

² Ka in ke? Tek ibeparu pi nilimo batizo, itie ng’atu ma segi i ng’om maeni ma rac pa Sitani pilembe ‘ibeyenyo [Yehova].’ (Zab. 14:1, 2) Jukiewo thiwiwec maeni piri kadok nang’u in aradu kunoke itii. Re wan ceke ma wadaru limo batizo de wabemito wadwok lembakeca mwa mi timo ni Yehova nja ku nja ubed ma tek. Dong’ wakewanenu thelembe adek kud i kind mange dupa, m’uketho wabemito watim ni Yehova.

3. Pirang’o jurutic pa Yehova gimaru lemandha man bedopwe? (Zaburi 119:128, 163)

³ Yehova ung’olo ni dhanu pare nia ‘gimar lemandha.’ (Zek. 8:19) Yesu de ukwayu julub pare nia gilub tok bedopwe. (Mat. 5:6) Eno unyutho nia mito gibed kud ava ma lee mi timo bedopwe, ma cuu man ma leng’ i wang’ Mungu. Nyo imaru lemandha man bedopwe? Wang’eyo nia imaru. Idagu ndra, lembe ceke ma cuu ngo man ma reco. (Som Zaburi 119:128, 163.) Ng’ati ma javupo nang’u ubelubo kite pa Sitani ma tie jabim mi ng’om maeni. (Yoh. 8:44;  12:31) Kud i kind lembakeca pa Sitani, moko utie nicido nying Yehova Mungu ma leng’. Sitani ukwong’o mewo vupo iwi Mungu mwa niai ma jai uwok i Eden. Eketho dhanu gipar nia Yehova umarere gire, e jabim ma cuu ngo man m’ubetwono dhanu ku lembe ma beco. (Tha. 3:1, 4, 5) Vupo ma Sitani ubecwayu iwi Yehova ubemedere nimondo i paru mi dhanu man i adundegi. Ka dhanu gimaru ngo “lemandha,” Sitani romo telo wigi i kwond lembe ceke ma reco man cuu ngo.​—Rum. 1:25-31.

4. Yehova unyuthere nenedi nia etie “Mungu mi lemandha”? (Nen bende cal.)

⁴ Yehova tie “Mungu mi lemandha,” man ebeponjo lemandhane ku berocwinye ni ju ceke m’umare. (Zab. 31:5) Lemandha m’ebeponjone uketho dhanu pare gitie agonya kud i uwic mi ndra pa Sitani. Bende, Yehova ubeponjo jurutic pare kara gibed dhanu m’atira man ma pwe. Eno konyogi nibedo dhanu ma woriri man ma tie ku kwiyocwiny mir adunde. (Rie. 13:5, 6) Nyo edaru timo lembuno iri de kinde m’ibeponjo Biblia? Iponjo nia yo pa Yehova utie ber ma sagu ni kwond dhanu ceke man iri bende. (Zab. 77:13) Pieno, ibemito itim gin ma Mungu beyero nia utie atira. (Mat. 6:33) Ibemito icer bang’ lemandha, man imito inyuth nia lembe ma Sitani uyero iwi Mungu mwa Yehova utie vupo. Iromo timo lembuno nenedi?

5. Iromo diko cingi i kum lemandha man lembe ma pwe nenedi?

⁵ Icopo kwo i ayi ma dhanu ceke neno nia “ikwero vupo pa Sitani man ibediko cingi i kum lemandha. Icopo nyutho nia ibemito Yehova ubed Jabim peri man ibemito nitimo lembe m’ebeyero nia utie atira.” Iromo timo lembuno nenedi? Cor i vut Yehova nikadhu kud i rwo, thieriri ire, man i ng’eye nyuth thieriri perine kamaleng’ nikadhu kud i batizo. Mer mi lemandha man mi lembe ma pwe re m’utie thelembe ma tek ma ketho jutimo ng’iyong’ic mi limo batizo.

6. Zaburi 45:4 ubemiyo iri thelembe ma kani mi maru Yesu Kristu?

⁶ Pirang’o imaru Yesu Kristu? Thelembene moko ma beco nwang’ere i Zaburi 45:4. (Som.) Yesu umaru lemandha, molo kunoke jwigiri man bedopwe. Kan imaru lemandha man bedopwe, etie lembe  ma winjere nia imaru Yesu Kristu de. Kepar kite ma Yesu ucero ko bang’ lemandha man m’atira ku tegocwinye. (Yoh. 18:37) Dong’ enyutho jwigiri ke nenedi?

7. Lembang’o m’ubetelo nen peri lee iwi jwigiri pa Yesu?

⁷ Yesu unyutho jwigiri nikadhu kud i lapor pare. Ku lapor, ebed edwoko yung ceke ni Won, ento ire gire ngo. (Mark. 10:17, 18; Yoh. 5:19) Jwigiri pa Yesu uketho ibewinjiri nenedi? Nyo ebecweli ngo nimaru Wod Mungu man nilubo lapor pare? M’umbe jiji eyo. Pirang’o Yesu utie won jwigiri? Pilembe emaru man ebelubo lapor pa Won ma tie ng’atu ma jwigere. (Zab. 18:35; Ebr. 1:3) Nyo ibenweng’iri ngo ceng’ini ku Yesu m’ubenyutho kura yung pa Yehova tap tapi?

8. Pirang’o wamaru Yesu re m’ubed Ubimo mwa?

⁸ Wamaru Yesu ubed Ubimo mwa pilembe etie Jabim ma ber m’usagu zoo. Yehova uponjo Wode en gire man eng’iye pi nibedo ubimo. (Isa. 50:4, 5) Kepar bende pi mer mi wodhiri m’enyutho. (Yoh. 13:1) Calu Yesu utie Ubimo peri, eromo andha nia imare. Ekoro nia ju ma gimare i andha, niwacu ju m’elwong’o nia jurimbe, ginyutho mer migi ire nang’u gibeworo lembang’ola pare. (Yoh. 14:15; 15:14, 15) Etie yung ma dit rukani nibedo jarimb Wod Yehova!

9. Batizo mi Jukristu urombo nenedi ku pa Kristu?

⁹ Acel m’i kind lembang’ola pa Yesu utie nia julub pare gimak batizo. (Mat. 28:19, 20) Eweko iwa laporne. Ku yore moko, batizo m’elimo ukoc ku mi julub pare. (Nen sanduku “ Tung’ tung’ m’utie i kind batizo pa Yesu ku mi julub pare.”) Re i ayi mucelo, erombo. Saa ma Yesu ulimo batizo, ewodhere pi nitimo yeny pa Won. (Ebr. 10:7) Rom rom kumeno, julub pa Kristu gilimo batizo pi ninyutho kamaleng’ nia githiero kwo migi ni Yehova Mungu. Kawoni, gin ma pire tek i kwo migi utie nitimo yeny pa Mungu ento yeny migi ngo. Kumeno re ma gibelubo lapor pa Jadit migi.

10. Pirang’o mer m’imaru ko Yesu ucikere nicweli nilimo batizo?

¹⁰ Iyiyo nia Yesu utie Wod Mungu ma kulong’ man itie kud anyong’a nia etie Ubimo ma Mungu ung’iyo pi nibimo wiwa. Ing’eyo nia Yesu jwigere man elubo lapor pa Won tap tap. Iponjo nia emiyo cam ni ju ma kec ubino nego, ejuko ju ma cwinygi tur, man ekeyo ju ma kumgi remo. (Mat. 14:14-21) Ineno kite m’ebetelo ko wi cokiri pare tin eni. (Mat. 23:10) Man calu m’ing’eyo etie Ubimo mi Ker pa Mungu, ebitimo lembe dupa nisagu i nindo m’ubino. Dong’ iromo nyutho nenedi nia imare? Nwang’u ibelubo lapor pare. (Yoh. 14:21) Iromo caku nitimo lembuno tap nwang’u ibemiyo kwo peri ni Yehova man ilimo batizo.

11. Thelembe ma dit m’usagu ma ketho julimo batizo utie ma kani, man pirang’o wayero kumeno?

¹¹ Thelembe ma dit nisagu zoo ma julimo ko batizo utie ma kani? Yesu yero nia lembang’ola pa Mungu ma dit m’usagu zoo utie “nimaru Yehova Mungu peri kud adundeni ceke, ku ng’eyong’ec peri ceke, ku pidoic peri ceke, man ku tegoni ceke.” (Mark. 12:30) Wec maeno ubenyutho nia imaru Mungu peri rukani?

12. Pirang’o imaru Yehova? (Nen bende cal.)

¹² Thelembe tie dupa mi maru Yehova. Ku lapor, ituc ninyang’ nia etie “[acaki] mi kwo” man nia en re m’emiyo “giramiya ceke ma ber man ma cuu.” (Zab. 36:9; Yak. 1:17) Piny ceke ma nyayu anyong’a i  ii uai i bang’ Mungu mwa ma won berocwiny man ma jamer.

13. Pirang’o jamgony utie giramiya ma ber m’usagu zoo?

¹³ Jamgony utie giramiya ma ber m’usagu zoo ma Yehova umiyo iwa. Pirang’o wabeyero kumeno? Kenen winjiri m’utie i kind Yehova giku Wode. Yesu uyero kumae: “Wego umara” man “amaru Wego.” (Yoh. 10:17; 14:31) Winjiri m’i kindgine umedere nidoko tek pi oro milioni swa. (Rie. 8:22, 23, 30) Kepar kawoni kite ma Yehova uwinjere ko ku litho kinde m’eweko Wode usendere man utho. Yehova umaru kodhidhanu lee mandha, uketho i iye in bende. Pieno, ebino ayika nimiyo Wode m’emaru ni lam mi gony kara in ku jumange wukwo rondo ku rondo. (Yoh. 3:16; Gal. 2:20) Eno tie thelembe ma dit ma watie ko mi maru Mungu.

14. Lembakeca ma ber m’usagu zoo m’icopo maku i kwo peri utie ma kani?

¹⁴ Mer m’imaru ko Yehova umedere pilembe iponjo lembe lee i wiye. Andha ibemito ibed ceng’ini kude kawoni man rondo ku rondo. Ecopere iri. Ebekweyi ku mer nia inyay anyong’a i iye. (Rie. 23:15, 16) Iromo timo lembuno ku wec kende ngo ento ku timo bende. Kit kwo peri binyutho nia andha imaru Yehova. (1 Yoh. 5:3) Eno tie lembakeca ma ber m’usagu zoo m’icopo maku i kwo peri.

15. Iromo nyutho nia imaru Yehova nenedi?

 ¹⁵ Iromo nyutho nia imaru Yehova nenedi? Mi kwong’o, utie rwo peri ma segi m’ibethieriri ko ni Mungu mandha acel kende. (Zab. 40:8) I ng’eye, inyutho thieririne kamaleng’ kinde m’ibemaku batizo. Calu ma walar waneno i acaki mi thiwiwec maeni, saa mi batizo peri utie saa mir anyong’a man ma pire tek i kwo peri. Icaku kwo ma nyen iri giri ngo, ento ni Yehova. (Rum. 14:8; 1 Pet. 4:1, 2) Eromo nen ni yub ma dit m’imaku, de andha etie kumeno. Eno uyabu iri yo mi kwo ma ber m’usagu. Nenedi?

16. Calu ma Zaburi 41:12 uyero, Yehova bimiyo mugisa nenedi ni ju m’ubethiero kwo migi pi nitimo ire?

¹⁶ Yehova tie ng’atu ma cwinye leng’ m’usagu zoo. Kadok nang’ imii ire ang’o de, saa ceke ebidwoko iri wang’e lee m’usagu. (Mark. 10:29, 30) Kadok kawoni i ng’om maeni ma rac de, ebimiyo iri lembe ma nyayu anyong’a, mugisa man kwo ma ber. Re eno de fodi. Kwo m’ucaku ku batizo peri mito ngo ujiki. Kwayu imediri nitimo ni Wuru ma jamer rondo ku rondo; e mer m’i kindwu wuku Wuru bimedere nidongo. Man andha ibikwo lee dit calu en, rondo ku rondo.​—Som Zaburi 41:12.

17. Icopo miyo ang’o ni Yehova ma nang’u fodi embe ko?

¹⁷ Kan imaku yub mi thieriri man mi limo batizo, itie ku rwom mi miyo piny moko ma pire tek ni Wuru. Edaru miyo iri piny ceke ma beco, man nindo ceke mir anyong’a ma nang’u niai con zoo fodi ineno ngo. Pi niculo kawang’e, icopo miyo ni jacwi polo ku ng’om piny moko ma fodi embe ko, eno ke miyiri peri i tic ma leng’. (Yob 1:8; 41:11; Rie. 27:11) Eno re m’utie yo ma ber m’usagu zoo m’icopo kwo ko. M’umbe jiji, mer m’imaru ko Yehova utie thelembe ma dit m’usagu zoo mi limo batizo.

18. Mito ipenjiri ku penji ma kanigi?

¹⁸ Dong’ icopo dwoko nenedi wang’ penji ma e: Nyo itie ayika nilimo batizo? Icopo  dwoko in giri wang’ penji maeno. Man eno bikonyi nikepenjiri kumae: ‘Ang’o m’ubecera?’ (Tic. 8:36) Poy pi thelembe adek ma waai waweco pigi. Mi kwong’o, imaru lemandha man bedopwe. Kepenjiri kumae: ‘Nyo abemito anen nindo ma dhanu ceke biyero lemandha man bitimo lem m’atira i iye?’ Mir ario, imaru Yesu Kristu. Kepenjiri kumae: ‘Nyo abemito Wod Mungu ubed ubimo para man amito alub lapor pare?’ Man mir adek m’usagu zoo, imaru Yehova. Kepenjiri kumae: ‘Nyo abemito anyay anyong’a i Yehova man atim ire calu Mungu para?’ Ka dwokowang’ lembe maeno ceke tie eyo, dong’ ang’o m’ubeceri ku limo batizo?​—Tic. 16:33.

19. Pirang’o kwayu ngo ibed ku jiji iwi limo batizo? Kemii lapor moko. (Yohana 4:34)

¹⁹ Tek itie ku jiji iwi limo batizo, kenen lapor ma Yesu utiyo ko. (Som Yohana 4:34.) Poy nia Yesu uporo timo yeny pa Won ku cam. Pirang’o? Cam tie ber iwa. Yesu ng’eyo nia gin ceke ma Yehova kwayu i bang’wa nia watim, utie ber iwa. Yehova maru ngo watim gin moko ci ma romo timowa rac. Nyo yeny pa Yehova yor i beng’i utie nilimo batizo? Eyo. (Tic. 2:38) Pieno, cwinyi copo bedo tek nia niworo lembang’ola mi limo batizo bimiyo iri bero. Kan icopo bedo ngo ku jiji mi camu cam ma mit niloyo zoo, dong’ pirang’o itie ku jiji iwi limo batizo ke?

20. Wabineno lembang’o i thiwiwec m’ulubo?

²⁰ Ang’o m’ubeceri? Ju ma dupa romo dwoko wang’ penji maeno nia “an fodi atie ngo ayika.” Lemandha utie nia yub m’ibemaku mi thieriri ni Yehova man mi limo batizo utie yub ma pire tek nisagu zoo i kwo peri. Pieno etie lembe ma ting’o nindo, ekwayu paru i lembe kilili mandha, man kero ma lee pi nibedo ayika. Dong’ kan itie kud ava ma lee mi maku yub maeno, iromo timo ang’o kawoni pi niyikiri? Wabineno dwokowang’ penji maeno i thiwiwec m’ulubo.