1. Junyodo tie kud ava mi timo ang’o ni awiya migi?

 JUNYODO, wang’eyo nia wumito wukony awiya mwu ning’eyo man nimaru Yehova. Re Mungu kume nen ungo. Dong’ wucopo konyo awiya mwu nenedi ginene nia etie ng’atu m’utie andha man gicor ceng’ini i vute?​—Yak. 4:8.

2. Junyodo romo ponjo awiya migi ku lembe iwi kite pa Yehova nenedi?

² Niponjo Biblia karacelo kud awiya peri tie yo acel ma pire tek mi konyogi kara gicor ceng’ini ku Yehova. (2 Tim. 3:14-17) Re Biblia unyutho yo mange de ma romo konyo aradu kara giponj lembe iwi Yehova. I buku mi Lembrieko, wego moko upoyo wi wode nia kud ebay wang’e ki kud i kum kite pa Yehova m’ubenen nikadhu kud i giracwiya. (Rie. 3:19-21) Wabineno yone moko ma junyodo giromo tiyo ko ku giracwiya pi nikonyo awiya migi kara giponj lembe iwi kite pa Yehova.

3. Junyodo giromo miyo kony ma kani ni awiya migi?

³ Biblia uyero nia kite pa Mungu ma “nen ungo ubenen terere niai m’ecwiyo ng’om, pilembe gibenen nikadhu kud i piny m’ecwiyo.” (Rum. 1:20) Junyodo, copere nia wumaru nibekoyo saa pi niwok kud awiya mwu i nambu. Wutii ku saa maeno pi nikonyo awiya mwu ginen winjiri m’utie i kind ‘piny [ma Yehova] ucwiyo’ ku kite pare ma wang’u ijo. Dong’ wakenen ponji ma junyodo giromo nwang’u niai kud i lapor pa Yesu.

4. Yesu utiyo ku giracwiya nenedi pi niponjo julub pare? (Luka 12:24, 27-30)

⁴ Poy i kum kite ma Yesu ubed utiyo ko ku giracwiya  pi nimiyo ponji. Nindo moko, Yesu ukwayu julub pare nia ginen ungoro man thiwe. (Som Luka 12:24, 27-30.) Nwang’u Yesu romo kwanu lei kunoke thiwe moko ci, ento eng’iyo winyo ku thiwe ma julub pare ging’eyo cuu mandha. Julub gibino ku copo mi neno ungoro m’ubekadhu i wigi man thiwe m’uthiwo ma leng’ i die podho. Nyo ibeneno kite ma Yesu ubecimo ko bang’ piny maenogi kinde m’ebeweco? Etimo ang’o i ng’eye kinde m’eweco pi lapor maenogi? Eponjo julub pare ku lembe ma pire tek iwi berocwiny pa Weggi m’i polo nia, Yehova bitungo man bikendo jutic pare ma giweg bedopwe calu m’ebetimo ni ungoro man ni thiwe m’i podho.

5. Junyodo copo tiyo ku lapor ma kani mi giracwiya pi niponjo lembe ni nyathin migi iwi Yehova?

⁵ Junyodo, wubilubo lapor pa Yesu nenedi kinde ma wubeponjo awiya mwu? Icopo weco ku nyathin peri iwi giracwiya moko m’imaru lee, calu ve lei kunoke uboko ma nyeng’i. Kinde m’ibeweco kude, kor ire lembe ma pinyne ubeponjo kowa iwi Yehova. I ng’eye, penje nia lei kunoke uboko ma kani ma nyang’e. M’umbe jiji, ebiciko ithe kilili kinde m’ibeweco pi kite pa Yehova kan ibetiyo ku kit cwic moko m’udaru telo nen pare.

6. Gin ma min Christopher utimo ubemiyo iwa ponji ma kani?

⁶ Nyo ukwayu junyodo giketing’ saa ma lee mi sayu lembe iwi lei kunoke uboko moko, i wang’ nikoro lembe m’ebeponjo kowa iwi Yehova? Pire tek ungo. Yesu ukoro ngo lembe lee iwi cemo p’ungoro kunoke iwi dongo pa thiwe. Kadok nang’u nyathin peri bemaru ning’eyo lembe acel acel iwi piny ma Yehova ucwiyo de, re saa moko wec ma nok kunoke penji ci copo konye ninyang’ i gin m’ibeyero. Kewinj lembe m’umego moko ma nyinge Christopher ubepoy i kume kinde m’ebino nyathin, ewacu kumae: “Mama ubed utiyo ku wec ma yot pi nikonyowa nineno giracwiya m’i ng’etwa ni piny ma pigi tek. Ku lapor, kinde ma wani ceng’ini ku gudi, eyero kumae: ‘Kenen kite ma gudi e gidwong’ ko man gileng’ ma! Nyo eno tie ngo gin ma wang’u ijo pa Yehova?’ Kunoke ka wani ceng’ini i dhu nam, eyero kumae: ‘Kenen tego mi mujanga ca! Nyo eno ubenyutho ngo tego pa Mungu?’” Christopher uyero kumae: “Wec maeno ubed uketho waparu i lembe man ebedo kud adwogi ma lee i wiwa.”

7. Iromo ponjo awiya peri nenedi niparu lembe iwi giracwiya?

⁷ Kinde m’awiya peri gibedongo, iromo ponjogi gibed gipar lembe iwi giracwiya man gin m’ebeponjo kogi iwi kite pa Yehova. Iromo ketho nwoc iwi piny moko ma Mungu ucwiyo man icopo penjogi kumae: “Gin maeni ubeponjowu ku lembang’o iwi Yehova?” Ii romo wang’ niwinjo paru ma beco m’awiya peri gibewodho.​—Mat. 21:16.

8. Junyodo mir Israel gibino ku kaka mi timo ang’o kinde ma gibewotho “i yo”?

⁸ Junyodo mir Israel gibed giponjo awiya migi ku cik pa Yehova kinde ma gibewotho “i yo.” (Poi. 11:19) Yo ubed ukadhu kud i kind kiaru mi ng’omb Israel. Pieno jucopo neno lei ma tung’ tung’, winyo man thiwe. Kinde ma junyodo mir Israel gibewotho i yo, gibed gitelo nen mir awiya migi iwi giracwiya pa Yehova. Wu junyodo, copere wun de wutie ku kaka ma rom mi tiyo ku giracwiya pi niponjo awiya  mwu. Wakenen ayi ma junyodo moko ubed utimo ko.

9. Icopo nwang’u ponji ma kani kud i bang’ Punitha man Katya?

⁹ Nyamego moko ma nyinge Punitha, ma kwo i adhura moko ma lac mi ng’om mi India uyero kumae: “Ka wabecidho neno wedi mwa i kiaru, ebedo iwa ni kaka ma ber mi konyo awiya mwa kara giponj lembe iwi giracwiya pa Yehova ma wang’u ijo. Anwang’u nia awiya para gibed ginyang’ cuu i kum giracwiya kinde ma gini bor kud adhura.” Junyodo, copere nia wi awiya mwu biwil ungo pi saa m’utimo karacelo kugi i kabedo moko ma leng’. Nyamego Katya mi Moldavie ke uyero kumae: “Lembe m’acopo wil ko ngo kinde m’abino nyathin, utie lembe m’atimo ku junyodo para i kiaru. Abedwoko foyofoc igi pilembe giponja niai m’a nyathin nineno gin ma Yehova ucwiyo man ninene nia enuti nikadhu kud i giracwiya pare.”

10. Junyodo gicopo timo ang’o ka ginwang’u nia etie tek igi nicidho bor kud adhura? (Nen sanduku “ Kony ni junyodo.”)

¹⁰ Dong’ icopo timo ang’o tek ecopere ngo iri nicidho i kiaru? Amol, ma kwo de i ng’om mi India uyero kumae: “Kaka m’akwo i iye, junyodo para gitimo tic pi saa ma lee man nicidho i kiaru de lundo camu sente ma lee. Ento nicidho i kabedo ma juyiko ma ber kunoke kabedo ma juyiko iwi ethaj, copo konyo nineno giracwiya man niweco pi kite pa Yehova.” Kan ineno cuu mandha i ng’et pacu peri, copere nia ibinwang’u giracwiya dupa ma telo nen m’iromo nyutho ni awiya peri. (Zab. 104:24) Icopo nwang’u winyo, ukoko, uboko ku piny mange dupa. Karina, ma bedo i Allemagne uyero kumae: “Mama umaru thiwe, uketho kinde m’abino aradu, ebed ecimo thiwe ma beco ka wabewotho karacelo kude.” Junyodo, wucopo tiyo bende ku video man girasoma ma tung’ tung’  m’uweco iwi cwic ma dilo mwa uwodho pi niponjo awiya mwu. Kadok nang’u ibekwo kani de, icopo konyo awiya peri nineno piny ma Mungu ucwiyo. Kawoni wakewanenu kite pa Yehova moko m’icopo weco pire ni awiya peri.

11. Junyodo copo konyo awiya migi nenedi nineno mer pa Yehova?

¹¹ Pi nikonyo awiya peri nineno mer pa Yehova, icopo weco kugi pi kite ma lei gwoko ko nyithindhgi i ayi mi mer. (Mat. 23:37) Iromo bende niketho peko iwi kit giracwiya ma tung’ tung’ ma beco ma nyayu anyong’a i iwa. Karina ma wadaru weco pire uwacu kumae: “Kinde ma wabewotho, mama ubed uyero nia akeacungi man anen cuu kite ma thiweman utie ko segi man kite ma leng’o pare ubenyutho ko mer pa Yehova. Kawoni oro dupa udaru kadhu, re abemedara asu nineno thiwe kilili mandha; aneno tung’ tung’ migi, kite ma gicwiyiri ko man rangi migi. Thiwene gibemediri nipoyo wiya i kum mer ma Yehova umaru kowa lee.”

12. Junyodo copo konyo awiya migi nenedi nineno rieko pa Mungu? (Zaburi 139:14) (Nen bende cal.)

¹² Kony awiya peri ginen rieko pa Mungu. Yehova riek nikadhuwa swa. (Rum. 11:33) Ku lapor, icopo weco ku nyathin peri iwi kite ma pii doko ko ni afuru, man kite ma pii m’udoko ni afurune wotho ko m’umbe peko i kor yamu. (Yob 38:36, 37) Icopo weco bende iwi kite ma kum dhanu ucwiyere ko i ayi mir uduu. (Som Zaburi 139:14.) Kenen kite ma wego moko ma nyinge Vladimir utimo ko. Eyero kumae: “Nindo acel, wodwa upodho ku gari pare man elimo ret. Yo ng’ey nindo ma nyanok ci, rembe kei. Waku min wakoro ire nia Yehova ucwiyo kumwa ku copo mi doloth gire. Wayero nia fodi waneno ngo piny ma dhanu timo ma loth gire kumeno. Ku lapor, ka muthukari utimo ret, ecopo doyikere ngo en gire. Lembuno ukonyo wodwa ninyang’ i rieko pa Yehova.”

13. Junyodo giromo konyo awiya migi nenedi nineno tego pa Mungu? (Isaya 40:26)

¹³ Yehova ubekwayuwa nia wang’ay wang’wa i polo man wapar pi kite ma tego pare ma wang’u ijo ubegwoko ko nyikaluku kakagi. (Som Isaya 40:26.) Icopo  miyo amora i kum awiya peri nia gibed ginen kor polo man gipar pi gin ma gibeneno. Nyamego moko ma kwo i Taiwan ma nyinge Tingting ubepoy pi lembe m’utimere kinde ma fodi e nyathin, eyero kumae: “Nindo moko mama ting’a wacidh wabedo kaka moko ma mac mir adhura nyotho ngo wi dhanu i iye, kara wanen nyikaluku dupa uthieno. I saa maeno, abino lworo adici mir awiya wada mi somo man abino dieng’ ka nyo ebicopere ira nitimo ni Yehova ku gwoko bedoleng’. Re mama utielo cwinya niparu pi tego ma Yehova utiyo ko pi nicwiyo nyikaluku maeno ceke, man epoyo wiya nia Yehova copo tiyo ku tego ma rom eno pi nikonya kara avoy abidhe moko ci. I ng’ey ma waai waneno giracwiya, lembuno ucwala ning’eyo Yehova cuu man lembakeca para mi timo ire udoko tek.”

14. Junyodo giromo tiyo ku giracwiya nenedi pi nikonyo awiya migi ginen nia Yehova utie Mungu ma jamutoro?

¹⁴ Piny ma Yehova ucwiyo ubenyutho nia etie Mungu ma jamutoro, man ebemito wan bende wabed jumutoro. Jururieko gineno nia lei ma dupa betuko, uketho i iye winyo man rec. (Yob 40:20) Nyo awiya peri udaru ng’iero de ceng’ moko ma gineno lei moko ubetuko? Saa moko nyo gineno kajangu m’ubetuko i kum piny moko kunoke gineno nyithi gwok m’ubeng’ang’ini karacelo. Nindo mange, tek timo pa lei moko unyayu anyong’a i awiya peri, poy wigi nia wabetimo ni Mungu ma jamutoro.​—1 Tim. 1:11.

15. Lembang’o ma romo konyo junyodo nigolo paru ma n’i awiya migi? (Lembrieko 20:5) (Nen bende cal.)

¹⁵ Saa moko junyodo romo nwang’u nia etie igi lembe ma tek niketho awiya migi ukor igi peko ma ginwang’iri ko. Kan inweng’iri ku lembe ma kumeno, iromo bedo ku yeny mi golo paru mir awiya peri. (Som Lembrieko 20:5.) Junyodo moko nwang’u nia etie yot ning’eyo lembe m’i i awiya migi kinde ma gibeneno giracwiya karacelo kugi. Pirang’o? Thelembene  acel utie nia, nang’u lembe m’ubenyotho wi awiya ku junyodo zoo utie nok. Wego moko ma nyinge Masahiko i ng’om mi Taiwan unyutho thelembe mange, ewacu kumae: “Ka wawok kud awiya mwa niciliewo gudi kunoke niwotho i dhu wat, wang’ ma pol giwinjiri ma ber; eno ketho gidhwolo lembe mi igi man wang’eyo paru migi.” Katya ma wadaru weco pire uyero kumae: “I ng’ey somo, mama ubed utera i kabedo moko ma juyiko ma leng’. I kabedo ma kumeno re m’ebed ebedo ira lembe ma yot nikoro ire lembe m’ukadhu i somo kunoke lembe m’ubenyayu lworo i iya.”

16. Juruot copo nambu nenedi saa ma gibeneno giracwiya pa Yehova?

¹⁶ Giracwiya pa Yehova copo konyo bende juruot ninambu ma ber kud anyong’a man niketho mer m’i kindgi udok ma tek. Biblia uwacu nia nindo moko utie “nindo mi ng’iero” man “nindo mi miel.” (Ekl. 3:1, 4.) Yehova ucwiyo kabedo ma beco iwi ng’om m’i igi wacopo timo lembe ma wamaru. Juruot dupa bemaru nicidho karacelo pi nineno kaka ma jugwoko i iye lei, nicidho i ng’om kiaru, iwi gudi kunoke i dhu wat. Awiya moko bemaru niringo man nituko kaka moko ma juyiko ma leng’, nineno lei, nikwang’ i kulo kunoke i nam. Watie ku kaka ma ber mandha mi nambu i kind piny m’udhokowa ma Yehova ucwiyo!

17. Pirang’o ukwayu junyodo giponj awiya migi ninwang’u anyong’a i kum giracwiya pa Mungu?

¹⁷ I ng’om ma nyen pa Mungu, junyodo kud awiya zoo gibinwang’u anyong’a i kum giracwiya pa Yehova nisagu m’i wang’e zoo. Tung’ ku lembe m’ubetimere tin eni, wabibedo mbe ku thelembe mi lworo yedi kadok gin de gibilworowa ngo. (Isa. 11:6-9) Wabinwang’u anyong’a rondo ku rondo i kum piny ma Yehova ucwiyo. (Zab. 22:26) Ento wu junyodo, kud wukur nitundo saa maeca ka nya wubicaku ponjo awiya mwu nineno giracwiya kud anyong’a. Kan ibetiyo ku giracwiya pi niponjo lembe ni awiya peri iwi Yehova, m’umbe jiji gibituc nibedo ku paru ma rom ku p’Ubimo Daudi m’uyero kumae: ‘E [Yehova]; tic moko mbe ma calu tic peri’​—Zab. 86:8.