1, 2. (a) Pirang’o bedo ng’eca ku bedagonya ubed udieng’o cwiny dhanu ma pol i rundi pa Paulo? (b) Paulo unyutho nia Ng’a ma copo mio bedagonya mandha?

JUKRISTU mi rundi ma kwong’a gibino nikwo i the bimobim mi Roma, i kind dhanu ma gigam gimaru lee dit cik migi, kite ma jubed jupoko ko lembe, man bedagonya ma gibino ko. Re wang’ ma pol bimobimne ubed uketho dhanu ma gitie ng’eca re ma gitim tic ma tek. Saa moko, i the bimobim mi Roma, dhanu 30 iwi dak ubino ng’eca. Ma jiji mbe, bedo ng’eca ku bedagonya ubino lembe ma lee m’ubed udieng’o cwiny dhanu ma pol, uketho i ie Jukristu bende.

² Jakwenda Paulo ukiewo pi bedagonya wang’ dupa. Re ebed emito ngo ekel alokaloka i lembe mi ng’om maeni, calu ma dhanu ma dupa gibed gimito gitim. Ento Paulo ku Jukristu wagi gitimo kero ma lee pi nirweyo lembanyong’a mi Ker pa Mungu ni dhanu, man nikonyogi kara ginyang’ nia jamgony ma Yesu Kristu uthiero pire tie tek akeca. Paulo unyutho ni Jukristu wagi nia Ng’a ma copo mio igi bedagonya mandha, ekiewo kumae: ‘Yehova en e Tipo, man kaka ma tipo pa Yehova ni i ie, e gony de nuti.’​—2 Kor. 3:17.

3, 4. (a) Paulo uweco iwi lembang’o i verse ma nwang’ere i wang’ 2 Jukorinto 3:17? (b) Wacikara nitimo ang’o kara wanwang’ bedagonya ma Yehova mio?

 ³ I barua mir arionde ma Paulo ukiewo ni Jukorinto, ekoro lembe m’utimere i kum Musa saa m’ebeloro kud iwi got Sinai, ma nwang’u eai i wang’ malaika pa Yehova. Dend wang’e ubino rieny! Kinde ma nyithindho mir Israel gineno Musa, lworo makugi, pieno egam eumo wang’e ku bongu. (Ai 34:29, 30, 33; 2 Kor. 3:7, 13) Paulo ukoro kumae: ‘Ento kinde ma tek elokre ni Yehova, bongune kabre woko.’ (2 Kor. 3:16) Paulo umito yero ang’o?

⁴ I thiwiwec m’ukadhu, waponjo nia Yehova, ma Jacwic mi piny ceke kende re ma tie ku bedagonya ma mupakane mbe. Pieno ubenen kamaleng’ nia bedagonya nuti, “ka ma tipo pa Yehova ni i ie.” Re Paulo uyero nia tek wabemito wanwang’ bedagonya maeno, wacikara nilokara i bang’ Yehova. Eno ubenyutho nia wacikara nibedo ku mer ma ceng’ini ku Yehova. Nyithindho mir Israel ma gibino i langa gineno ngo lembe calu Yehova, ento gineno lembe calu ma dhanu neno ko. Edong’ ebedo ve giumo wi paru migi man adundegi ku bongu. Gimito gitii ku bedagonya ma giai ginwang’u pi nipong’o yeny migi gigi.​—Ebr. 3:8-10.

5. (a) Tipo pa Yehova mio kit bedagonya ma nenedi? (b) Lapor ma kani m’ubenyutho nia ng’atini copo bedo ng’eca kunoke jucopo twiye i kol, re nwang’u asu etie ku bedagonya ma Yehova mio? (c) Penji ma kani m’ubekwayu wadwok wang’gi?

⁵ Tipo pa Yehova mio bedagonya ma lee nisagu bedagonya ma ng’atu ma ng’eca nwang’u, niwacu bedagonya ma dhanu copo mio. Tipo pa Yehova copo gonyowa kud i ng’eca mi dubo man mi tho, man bende kud i dini mi vupo ku kura ceke m’i ie. (Rum. 6:23; 8:2) Eno tie bedagonya ma yawe mbe! Kadok ng’atu ma tie ng’eca kunoke ng’atu m’utie i kol de copo nwang’u bedagonya maeno. (Tha. 39:20-23) Ku lapor, jutwiyo nyamego Nancy Yuen, man umego Harold King i kol pi oro ma dupa pi yioyic migi, re asu gibino ku kit bedagonya maeno. Wacopo neno kite ma gibekoro ko pi lembe ma gikadhu kud i ie i Televizio mi JW. (Yab i the thiwiwec INTERVIEWS ET TÉMOIGNAGES > L’ENDURANCE DANS L’ÉPREUVE.) Kawoni wakedwok wang’ penji ario ma e: Wacopo nyutho nenedi nia bedagonya mwa pire tek dit iwa? Wacopo timo ang’o kara watii ku bedagonya mwa ku rieko?

6. Nyithindho mir Israel gitimo ang’o, m’unyutho nia gifoyo ngo bedagonya ma Yehova umio igi?

⁶ Ka ng’atu moko umio iwa giramia ma pire tek, wadwoko foyofoc lee ni ng’atune. Re nyithindho mir Israel ginyutho ngo foyofoc pi bedagonya ma Yehova umio igi. Dwi moko kende i ng’ei ma Yehova ugonyogi kud i Misiri, gicaku paru pi cam ma gibed gicamu kuca. Ging’ur pi mana, ma tie cam ma Yehova umio igi. Bende, gimito gilok gidok i Misiri. Ginwang’u nia, ‘rec, ukuju, ukondo, pwaro, onyo, man ai’ pigi ubino tek nikadhu bedagonya ma Yehova umio igi kara gitim ire. Ma jiji mbe, ng’ecwiny pa Yehova uopo lee mandha i kumgi. (Wel 11:5, 6, 10; 14:3, 4) Lembuno ubemio iwa ponji ma pire tek akeca.

7. Paulo utio nenedi ku juk m’ekiewo en gire, ma nwang’ere i 2 Jukorinto 6:1, man wan de wacopo timo calu en nenedi?

⁷ Paulo ucimo wang’ Jukristu ceke nia kud gidok dhanu ma nyutho ngo  foyofoc pi bedagonya ma Yehova umio nikadhu kud i bang’ Wode ma Yesu Kristu. (Som 2 Jukorinto 6:1.) Paulo ubino ku kum mi dubo, niwacu ebino ng’eca mi dubo man mi tho; lembuno ubed unyayu can lee i ie. Re asu eyero kumae: “Afoyo Mungu ni kum Yesu Kristu Rwoth mwa.” (Rum. 7:24, 25; 8:2) Pirang’o Paulo uyero wec maeno? Ekoro ni Jukristu wadi kumae: “Kum cik mi Tipo mi kwo i Kristu Yesu ugonya kud i cik mi dubo man mi tho.” (Rum. 7:24, 25; 8:2) Calu Paulo, wiwa ucikere ngo niwil nia Yehova ugonyowa kud i ng’eca mi dubo man mi tho. Nikum jamgony, wabetimo ni Mungu mwa ku pidocwiny ma cuu, man wabenwang’u anyong’a mandha.​—Zab. 40:8.

8, 9. (a) Jakwenda Petro umio juk ma kani iwi kite mi tio ku bedagonya mwa? (b) Ang’o ma copo cwalu ng’atini nitio rac ku bedagonya pare?

⁸ Wacikara ngo kende kende niyero ayera nia wabefoyo Yehova, ento ubekwayu wabed ku wang’wa, kara kud watii ku bedagonya mwa i kite ma rac. Ku lapor, Jakwenda Petro ucimo wang’wa nia wacikara ngo niparu nia calu watie agonya ci, wacopo timo lembe ma reco. (Som 1 Petro 2:16.) Juk maeno ubepoyo wiwa i kum lembe m’unwang’u nyithindho mir Israel i langa. Wacikara nitio ku jukne asagane tin eni. Sitani karacelo ku ng’om pare ubewodho kendi, cemo, meth, man bende jamnambu ma copo telo nen mwa akeca. Bende, ju ma giyawu lemkuloka gitio ku dhanu ma beco pi nicwaluwa kara wang’iew piny ma nwang’u i andha, wambe ku yenyne. Ng’om copo wondowa yot yot, man ecopo cwaluwa nitio ku bedagonya mwa i kite ma rac.

⁹ Wacopo tio bende ku juk ma Petro mio pi nitimo ng’iong’ic i lembe ma dongo mi kwo, calu ve ponjiri, man tic ma wabitimo. Ku lapor, tin eni jucwalu aradu nia gisom ku kero, kara jubin juyiigi i somo ma malu ma pigi yik. Ju ma dupa yero igi nia ka gisomo lee, gibinwang’u tic ma cuu, gibibedo ku sente lee, man jubibeworogi awora. Gimio kadok lapor m’ubenyutho nia dhanu ma gisomo somo ma malu gitie ku sente lee nisagu ju m’usomo somo mi diere. Paru mi somo ma malu copo nen cuu akeca ni aradu, kinde m’ebemaku yub ma bibedo kud adwogi iwi dong kwo pare ceke. Dong’ aradu maeno ku junyodo migi gicikiri nipoi iwi lembang’o?

10. Wacikara ning’eyo lembang’o ka wabetimo ng’iong’ic i lembe mwa giwa?

¹⁰ Jumoko giromo paru nia calu eno utie lembe migi gigi, dong’ gitie agonya nitimo mito migi, ka pidocwiny migi ubesendogi ngo. Gicopo yero kit wec ma e ma Paulo uyero: “Gony m’abedo ko agonya e, cwiny m’ubepido pa ng’atu mange ng’olo lembe pire nedi?” (1 Kor. 10:29) Kadok watie agonya nitimo ng’iong’ic mwa giwa iwi somo kunoke iwi tic ma wabitimo de, re wacikara ning’eyo nia bedagonya mwa tie ku mupaka, man yub ceke ma wabemaku utie ku matokene. Pi thelembe maeno re ma Paulo uyero kumae: “Cik uyio gin ceke; ento gin ceke ber ungo ya jutim. Cik uyio gin ceke; ento gin ceke teng’o jo ngo.” (1 Kor. 10:23) Pieno, kadok watie agonya nitimo ng’iong’ic i lembe mwa giwa de, wacikara ngo niketho yeny mwa re ma pire ubed tek nisagu.

11. Pirang’o Yehova ugonyowa?

¹¹ Kinde ma Petro ucimowa nia kud watii ku bedagonya mwa i ayi ma rac,  enyutho nia yo ma cuu utie nitio kude “calu jumiru (ng’eca) pa Mungu.” Yehova utio ku Yesu pi nigonyowa kud i ng’eca mi dubo man mi tho, kara watii ku kwo mwa zoo pi nitimo ire.

12. Noa ku juruot pare giweko iwa lapor ma kani?

¹² Yo ma cuu mandha ma waromo tio ko ku bedagonya mwa utie nitio ku saa, man kero mwa pi nitimo lee ni Yehova. Eno biketho wabiweko ngo lembakeca mi ng’om maeni, man yeny mwa giwa udok ni gin ma pire tek i kwo mwa. (Gal. 5:16) Kepar iwi lembe ma Noa ku juruot pare gitimo. Kadok gibino nikwo i ng’om ma rop ku lemsasa mi tarwang’ unyai i ie de, re gibedo ngo ku kit lembakeca man ku kit timo mi dhanu ma gibino nikwo kugi. Ging’io nitimo kende kende tic ma Yehova umio igi. Gigiero avur, gicoko cam igi man ni lei, man gipoyo jumange pi pii ma dit m’ubebino umo ng’om. “Noa timo kumeca; calku gin ceke ma Mungu ng’olo ire, etimo kumeca.” (Tha. 6:22) Pieno, Noa ku juruot pare giboth kinde ma Mungu unyotho ng’om i rundi maeca.​—Ebr. 11:7.

13. Tic ma kani ma Yehova ung’olo nia watim?

¹³ I rundi ma tin eni, Yehova ung’olo nia watim tic ma kani? Calu ma watie julub pa Yesu, wang’eyo nia Mungu ung’olo iwa nia warwei lembanyong’a. (Som Luka 4:18, 19.) Tin eni, Sitani udaru umo wang’ dhanu ma pol, uketho gibeng’eyo ngo nia gitie ng’eca mi dini mi ndra, mi giki mi kum man mi lemgamba mi ng’om maeni. (2 Kor. 4:4) Calu Yesu, watie ku tic mi konyo jumange kara gitund ning’eyo Yehova ma tie Mungu ma mio bedagonya, man kara giwore. (Mat. 28:19, 20) Re tic mi rweyo lembanyong’a utie yot ungo. I kabedo moko, dhanu gidieng’ ungo nia ukwayu gitund ning’eyo Mungu; jumange ke kwinyo re ma mondo i igi ka waberweyo igi. Dong’ calu etie tic ma Yehova re m’ung’olo nia watim, wacikara nipenjara kumae: ‘Nyo  acopo tio ku bedagonya para pi nitimo lee i tic pa Yehova?’

14, 15. Jurutic ma pol pa Yehova ging’io nitimo ang’o? (Nen cal mir acaki.)

¹⁴ Etie lembe mi mutoro ning’eyo nia dhanu ma dupa ma gibetimo ni Yehova ginyang’ nia ajiki mi ng’om maeni udhingo, pieno gijwigo piny ma gitie ko, man gicaku timo tic pa jayab yo. (1 Kor. 9:19, 23) Jumoko gitimo tic pa jayab yo kaka ma gini ie, jumange ke gidok i cokiri mange ma yeny utie lee i ie. I kind oro abic m’ukadhu, jurwei ma kadhu 250 000 gicaku tic pa jayab yo, man kawoni wel mi juyab yo ma nja sagu 1 100 000. Etie lembe ma ber dit nineno nia dhanu ma wel migi lee rukeno gibetio ku bedagonya migi pi nitimo ni Yehova i kite maeno!​—Zab. 110:3.

¹⁵ Ang’o m’ubekonyogi nitio ku bedagonya migi ku rieko? Kenen lapor pa John giku Judith, ma gitimo i ng’om ma tung’ tung’ pi oro 30. Gikoro nia kinde ma Somo mi tic mi juyab yo ucaku i oro 1977, jugam juketho cwiny awiya mi somone nia gicidh gikony kaka ma yeny utie lee i ie. Kara John giku Judith gitund nitimo kumeno, gigam gineno nia ubemito ngo gibed ku giki dupa mi kum. Pieno re ma wang’ ma pol John ubed uwilo tic pare mi kum. I ng’eye, gicidh girweyo i ng’om mange. Dong’ ang’o m’ukonyogi kara gitund niponjo dhok ma nyen, kara ging’ii ku suru mange man kara ging’ii ku ng’ico man lietho? Girwo, man gijengiri iwi Yehova kara ekonygi. Giwinjiri nenedi pi tic maeno ma gitimo ni Yehova pi oro ke ma dupa? John ukoro kumae: “Anwang’u nia amiara i tic ma cuu m’usagu tic moko ci m’ang’eyo man m’adaru timo. Acaku neno Yehova ni ng’atu m’unuti andha, calu wego ma jamer. Kawoni dong’ anyang’ ma ber i wec ma nwang’ere i Yakobo 4:8 m’uyero kumae: ‘Cor i vut Mungu, man ebicoro i vuti.’ Andhandha, anwang’u gin m’abino yenyo, niwacu thelembe mandha mi kwo.”

16. Ju ma dupa gitimo ang’o pi nitio ku bedagonya migi ku rieko?

¹⁶ Jumoko gicopo timo tic pa jayab yo pi oro ma dupa calu John giku Judith. Jumange ke nikum lembe ma tung’ tung’ mi kwo, gicopo timo tije pi nindo moko kende. Re asu umego ku nyimego ma dupa gibed gimiiri gigi pi nikonyo tic mi giedo m’ubetimere i wang’ ng’om. Ku lapor, umego ku nyimego ma romo 27 000 gicidh gikonyo tic mi giedo mi kabedo mwa ma dit i Warwick, i New York. Jumoko ubed ubino pi yenga ario, jumange pi dwi moko, jumange ke pi oro acel kunoke nikadhu de. Umego ku nyimego maeno ma pol gitwoniri ku lembe moko kokoro kara gicidh gikony tic mi giedo i Warwick. Andha, gitie lapor ma cuu akeca mi dhanu ma gitio ku bedagonya migi pi nipaku man niyungo Yehova, ma tie Mungu ma mio bedagonya!

17. Ka wabetio ku bedagonya mwa ku rieko tin eni, wacopo nwang’u bero ma kani?

¹⁷ Watie kud anyong’a ma lee pilembe watundo ning’eyo Yehova, man pilembe thier mandha umio iwa bedagonya mandha. Dong’ wek watim ng’iong’ic m’unyutho nia bedagonyane pire tie tek lee i iwa. Kakare nitio ku bedagonya mwa i ayi ma rac, watii kude pi nitimo lee ni Yehova, nimakere ku copo mwa. Kumeno re ma wacopo nwang’u bero ma Yehova ung’olo pi nindo m’ubino, kinde ma lembang’ola ma e bipong’o: “Jubigonyo giracwia pa Mungu en bende kud i ng’eca mi nyoth ni gony mi dwong’ mi nyithindho pa Mungu.”​—Rum. 8:21.