Wec mi dhu Juebrania ma jutio ko, copo ketho junyang’ i verse maeno i ayi dupa. Ento, lembe ma tung’ tung’ m’ulubo e ubekonyowa ninyang’ i ie i ayi m’atira:

1. Lembe m’i verse mir 12 nitundo i 15. Ubenen nia mugisa ma juweco pigi i verse mir 12 nitundo i 14 utie ni weg bedopwe, niwacu dhanu ma gibekwayu nia ‘jubodhgi man julargi’ kud i the cing’ jutimrac (verse mir 11). Paru ma rom eno nwang’ere bende i verse mir 15, kaka ma juyero i ie wang’ ario nia dhanu ma rom, niwacu “dhanu ma Mungu migi en e Yehova” gitie “jumutoro.”

2. Paru maeno urombo ku mi giragora mange mi Biblia m’uweco pi mugisa ma Mungu ung’olo ni dhanu pare ma gigwoko bedoleng’ migi ire. Zaburi maeni ubenyutho genogen ma Daudi ubedo ko nia i ng’ei ma Mungu bibodho thek mir Israel kud i the cing’ judhoggi, ebipoko mugisa iwi dhanu pare; e gibikwo kud anyong’a man gibikoso ngo piny moko. (Law. 26: 9, 10; Poi. 7: 13; Zab. 128:1-6) Ku lapor, Poi mi Cik 28:4 uyero kumae: “Mugisa bikwanyu kodhi m’i ii, ku nying’ mi ng’om peri, ku kodhi mi lim peri, ku nyai mi dhiang’ peri, ku nyithindh udul rombe peri.” De andha, i the bimobim pa Suleman ma wod Daudi, nyithindho mir Israel gikwo kud anyong’a ma yawe mbe man gikwo i lonyo, lembe ma nwang’u fodi utimere ngo igi i wang’e. M’umedo maeno, kit kwo ma dhanu gikwo ko i the bimobim pa Suleman ubino nyutho i ayi moko ma nok kite ma dhanu bikwo ko i the bimobim pa Masiya.​—1 Ub. 4: 20, 21; Zab. 72: 1-20.

I adundo, Zaburi 144 uketho wabenyang’ ma cuu i genogen ma jurutic pa Yehova gitie ko niai con, man ma Zaburi zoo uweco pire, nia jubinyotho jutimrac, man i ng’eye, weg bedopwe gibikwo nja ku mutoro man gibikoso ngo piny moko acel de.​—Zab. 37: 10, 11.