Pirang’o i wang’ nitho Yesu udwogo iwi wec ma Daudi uyero i Zaburi 22:1?

I wang’ nitho, Yesu uyero wec ma e ma nwang’ere i Matayo 27:46: “Munguna, Munguna, ikuna nedi?” Wec maeno ma Yesu uyero, upong’o lembe ma Daudi ugam uwacu ma jugoro i Zaburi 22:1. (Mk. 15:34) Pieno, etie lembe ma cuu ngo niyero nia Yesu uyero wec maeno pilembe cwinye utur, kunoke nia ebino mbe ku yioyic saa maeno. Yesu unyang’ cuu mandha i thelembe m’ukwayu nia etho, man ebino ayika nitho. (Mat. 16:21; 20:28) Eng’eyo bende nia, i saa mi tho pare, Yehova bitwodo ngo “arara i kume.” (Yob 1:10) Pieno, Yehova ugwoko ngo Yesu saa maeno kara enyuth nia ecopo gwoko bedoleng’ pare kadok nwang’u tho pare copo bedo ire ni peko ma rukani de.​—Mk. 14:35, 36.

Kakumeno, dong’ pirang’o Yesu uyero wec ma nwang’ere i Zaburi eno? Kadok wang’eyo ngo thelembene akeca de, re wakenen thelembe ma saa moko nyo uketho eyero wec maeno. *

Nyo wec maeno ma Yesu uyero, ubenyutho nia ebino ketho nwoc nia Yehova urany tho pare? Ugam ukwayere nia Yesu umii jamgony m’umbe kony pa Yehova, man nia etho kara “ebil tho pi dhanu ceke.”​—Ebr. 2:9.

Wec ma nok ma Yesu udok i wie i Zaburi maeno, nyo ubenyutho nia emito telo  nen mi dhanu iwi Zaburi zoo? Ebino lembe ma copere nia nindo maeno Juyahudi gipoi i kum lembe dupa ma nwang’ere i Zaburi. Saa ma giwinjo giragora acel m’i Zaburi, nwang’u ukwayu gipoi i kum lembe mi Zaburine zoo. Kan andha Yesu ubino ku paru maeno i wie, nyutho nia nwang’u ecopo konyo Juyahudi ma gitie julub pare, ninyang’ i lembila dupa ma nwang’ere i Zaburi maeno m’uweco iwi lembe ma bitimere i saa mi tho pare. (Zab. 22:7, 8, 15, 16, 18, 24) Bende, verse ma tokcen mi Zaburi maeno, umio pak ni Yehova man ewacu nia etie Ubimo mi ng’om zoo.​—Zab. 22:27-31.

Nyo wec maeno ma Yesu udwogo i wie, ubenyutho nia ebino ketho nwoc nia ebino mbe ku kosa? I wang’ nitho, jusanedrini gilar gipoko lembe m’atira ngo i wie, man ging’olo kesi pare nia etie jayer lembacidi. (Mat. 26:65, 66) Jusanedrini gicokiri pio pio ku diewor, man gitito kesi pare ma giworo ko ngo cik m’ukethere. (Mat. 26:59; Mk. 14:56-59) Saa moko nyo ni kum wec ma Yesu uyero nia “Munguna, Munguna, ikuna nedi?” ebino telo nen mi dhanu nia etimo ngo gin ma rac m’uromo nia junege pire.

Nyo Yesu ubino poyo wi jumange nia kadok Daudi m’utie jagor Zaburi eni de, Yehova ugam uweko esendere, ma re asu Yehova unene ni jaratic pare ma pwe? Penji ma Daudi upenjo unyutho ngo nia ebino mbe ku yioyic. I ng’ei penjine, enyutho nia etie ku genogen iwi copo ma Yehova tie ko mi bodho dhanu, man Yehova umedere nimio ire mugisa. (Zab. 22:23, 24, 27) Kumeno bende, kadok Yesu ubino “wod Daudi,” man esendere iwi yen mi can de, eno ubenyutho ngo nia Yehova unene nia egwoko ngo bedoleng’ pare ire.​—Mat. 21:9.

Nyo Yesu ubino nyutho can ma dit m’ebino ko i cwinye, ma Yehova uwenje ko kara egwok bedoleng’ pare cuu? Lembakeca pa Yehova ubino ngo nia Wode usendere man etho. Ento i ng’ei m’Adamu giku Eva gidubo kadong’ lembene ukwayere. Yesu utimo ngo lembe moko ma rac, re ugam ukwayere nia esendere man etho kara edwok wang’ adote pa Sitani, man emii jamgony m’ukwayere pi nigonyo gin m’Adamu bayu. (Mk. 8:31; 1 Pet. 2:21-24) Lembuno copo timere kende kende tek Yehova uweko nigwoko Yesu pi saa moko. Eno utie lembe m’utimere wang’ ma kwong’a i kwo pa Yesu.

Nyo Yesu umito julub pare ginyang’ i thelembe m’uketho Yehova uweko esendere man etho iwi yen mi can? * Yesu ung’eyo nia kit tho ma jubinege ko iwi yen mi can calu jatim rac, biketho dhanu dupa bikier. (1 Kor. 1:23) Tek julub pare giketho wigi i kum thelembe m’uketho etho, e gibinyang’ cuu. (Gal. 3:13, 14) Ka gitimo kumeno, gibinene ni Jalar, ento ungo ni jatim rac.

Kadok thelembe m’uketho Yesu udok iwi wec maeno mi Zaburi ubed calu ma waweco i wie kunoke ngo de, re eng’eyo nia tho m’etho ko iwi yen mi can, ubino yo m’etimo ko yeny pa Yehova. Nyanok i ng’ei m’edok iwi wec mi Zaburi eno, ewacu kumae: “Ethum!” (Yoh. 19:30; Lk. 22:37) Gwok ma Yehova ugwoko ko ngo Yesu pi saa moko, umio kaka ni Yesu pi nipong’o lembe ceke ma juore ebin etim iwi ng’om. Bende, emio ire kaka m’epong’o ko lembe ceke m’ugorere pire “i cik pa Musa, ku jubila, [man] i zaburi.”​—Lk. 24:44.