Kwong’ utie “macikara kunoke lembang’ola ma pek ma ng’atini timo kamaleng’ pi nitimo lembe moko, ma wang’ ma pol julwong’o ko nying’ Mungu i lembene.” Jucopo yere ayera ku dhogjo kunoke akiewa.

Dhanu moko copo paru nia etie rac nikwong’o kwong’, pilembe ya Yesu uwacu nia “Kud wukwong’ kwong’ nyanok de . . . Ento wuwek wec mwu ma nia, ‘eyo’ ubed eyo, ‘ungo’ mwu ke ubed ungo, kum m’usagu maeni uai i bang’ ng’atu ma rac.” (Mat. 5:33-37) Andha Yesu ugam ung’eyo nia Cik pa Musa uyiyo pi kwong’ moko man nia jurutic pa Mungu ma gigwoko bedo leng’ migi de gibed gikwong’o kwong’. (Tha. 14:22, 23; Ai 22:10, 11) Eng’eyo bende nia Yehova de ukwong’o kwong’. (Ebr. 6:13-17) Pieno Yesu mito nyutho ngo nia wacikara ngo nikwong’o kwong’ kadok nyanok de. Ento ebino cimo wang’ dhanu i kum kwong’o kwong’ iwi lembe ma kathere mbe. Wacikara nigwoko wec mi dhogwa ubed ni lembe ma leng’ ku bang’ ceng’, niwacu watim lembe ma wang’olo.

Dong’ ka jukwayu nia ikwong’iri ke? Mi kwong’o, mito ilar ing’ey nia ibitimo lembe m’ikwong’iri pirene. Kan ing’eyo nia icopo time ngo, ecopo bedo ber nia kud ikwong’iri. Lembe pa Mungu ubecimo wang’wa kumae: “Ng’olo lembang’ola ngo e ber, sagu ma tek ing’olo man iculo ngo.” (Ekl. 5:5) Mir ario, som cik mir ukungu mi Biblia m’uweco iwi kwong’o kwong’, man tim nimakere ku gin ma pidocwiny peri ma giragora uponjo ubeyero iri. Wakenen cik mir ukungune moko.

Kwong’ moko urombo ku yeny pa Mungu. Ku lapor, i saa mi nyom, Jumulembe pa Yehova gitimo lembang’ola i kindgi. Kit lembang’ola maeno utie kwong’. I wang’ Yehova man i wang’ dhanu, cwar mugole ku mugole gitimo lembang’ola i kindgi nia gibimariri, gibigwokiri, gibinyutho woro i kindgi man gibitimo kumeno ‘i nindo ceke ma gibikwo i iye.’ (Jumoko copo yero lembe m’ukoc nyanok ku lembang’ola maeno, re nwang’u asu gikwong’iri i wang’ Mungu.) I ng’eye gidoko nico ku dhaku, man gicikiri nikwo i gamiri i nindo ceke mi kwo migi. (Tha. 2:24; 1 Kor. 7:39) Kwong’ maeno ma jukwong’iri ko i saa mi gamiri umaku kaka man erombo ku yeny pa Mungu.

Kwong’ moko urombo ngo ku yeny pa Mungu. Jakristu mandha ucikere ngo nikwong’ere ku kit kwong’ ma kumeno, calu ve pi nicero ba ng’om ma thuggi kud atum, kunoke pi nikwero yiyoyic i Mungu. Lembe maeno utie gin m’uturo cik pa Mungu. Jakristu ucikere ngo nibedo i thenge “mi ng’om,” pieno wacopo ngo nimondo  i thubiri ku lwiny m’i iye.​—Yoh. 15:19; Isa. 2:4; Yak. 1:27.

Kwong’ moko utie lembe m’uneno pidocwiny pa ng’atini. Saa moko mito wabed wang’ii i kwong’ mwa cuu nimakere ku juk ma Yesu umiyo m’uwacu nia “wumii piny pa Kaisari ni Kaisari, ma pa Mungu ke ni Mungu.”​—Luka 20:25.

Ku lapor, Jakristu m’umito wilo ng’om mir anyoli pare copo nwang’u nia pi nidoko lwak mi ng’om mange mito ekekwong’ere, kunoke kara enwang’ kart m’emond ko i ng’omne. I ng’om ma kumeno, tek kwong’o kwong’ne utie nitimo lembang’ola m’ukoc ku cik pa Mungu, pidocwiny pare ma Biblia uponjo copo kwero ire nikwong’o kwong’ne. Re kadok kumeno de, gavmenti copo yiyo nia juwil kum wec mi kwong’ne kara pidocwiny pare kud ukwer ire.

Nitimo kwong’ ku wec ma juwilo kume copo rombo ku cik mir ukungu ma nwang’ere i Jurumi 13:1 m’uwacu nia, “kubang’ dhanu ceke maku giwor jubim mi ng’om.” Pieno, Jakristu copo neno nia etie rac ungo nikwong’iri pi nitimo lembe moko ma Mungu de ubekwayu nia jutim.

Pire tie tek bende nia iwor pidocwiny peri ma Biblia uponjo, tek jukwayu nia itii ku piny moko kunoke itim ayi moko i saa m’ikwong’iri i iye. Con Juroma ku Jusithia gibed gitiyo ku ku palamularu ni lanyuth i saa mi kwong’, pi nikwayu tego mi mungu mi lwiny man ninyutho nia gitie ku genogen i mungune. Jugiriki ke gibed giting’o cing’gi malu ka gibekwong’iri. I ayi maeno re ma gibed ginyutho nia mungu moko nuti m’ubeneno lembe ma jubeyero man ma jubetimo ma dhanu zoo bidwoko wel i bang’e.

Andha Jamulembe pa Yehova copo kwong’o ngo kwong’ m’etii ko kud ayi moko ci m’utie ku winjiri ku dini mi vupo kunoke ayi gin ma juworo. Dong’ ka jukwayu nia iketh cingi iwi Biblia i wang’ kesi pi nikwong’iri nia ibimiyo lembatuca mandha ke? Saa maeno icopo ng’iyo nia itim calu ma jukwayu, pilembe Biblia de uweco pi dhanu pa Mungu moko ma gikwong’iri ma gitiyo ku lanyuth. (Tha. 24:2, 3, 9; 47:29-31) Pire tie tek ipoy nia kan ibekwong’o kwong’ ma kumeno, eca nwang’u ibekwong’iri i wang’ Mungu nia ibiyero lemandha. Mito ilar iyikiri cuu pi nidwoko i ayi mandha wang’ penji ceke ma jucopo penji ko.

Waneno winjiri mwa ku Yehova ni gin ma pire tek lee, pieno mito warwo man wapar i lembe cuu pi kwong’ moko ci ma wabecikwong’ara ko, pi ninyang’ nia pidocwinywa ubedotowa ngo pire man erombo ku cik mir ukungu mi Biblia. Dong’ tek ing’iyo nia mito ikwong’iri, ukwayu inen nia iworo lembe m’ikwong’iri pirene.​—1 Pet. 2:12.