Saa maeno, cokiri copo neno gam ma kwong’a ni gin m’ulal niai ma nico udok ugamu dhaku mange man gam ma nyen ke ni gam ma cuu. Pi ninyang’ cuu i thelembe m’uketho watundo i wec maeno, wakenen lembe ma Yesu uyero iwi lalu gam man iwi gamiri kendo.

Calu m’ukiewere i Matayo 19:9, Yesu unyutho thelembe acel kende m’umakere ku Lembagora ma ketho julalu gam. Eyero kumae: “Ng’atu ma tek ulalu gamiri ku dhaku pare, m’uweko pi lembsasa mi tarwang’ man egamu mange, nwang’u etimo abor.” Wec pa Yesu ubekelowa i nyang’ ma e: (1) lembsasa mi tarwang’ kende re ma tie thelembe ma Lembagora uyiyo pi nilalu gam man (2) ng’atu ma tek ulalu gam ku dhaku pare mananu m’umbe ku thelembe mi Lembagora, man egamu mange, nwang’u etimo abor. *

Nyo wec ma Yesu uyero ubenyutho nia ng’atu ma nico m’utimo tarwang’ man elalu gam ku dhaku pare, etie agonya nimakere ku Lembagora nidok gamere kendo? Utie ngo kwa kumeno. Tek ng’atu ma nico utimo abor i gamiri, dhaku pare copo ng’iyo en nia ewek ire kunoke ekwere. Kan ekwere man gilalu gamne i wang’ ciki, e gin ario ceke gitie agonya nidok gamiri kendo ku ng’atu mange i ng’ey lalu gam migi.

Saa moko lundo, dhaku ma cware utimo abor copo maru nia asu ebed i gam pare man eromo wacu ni cware nia etie ayika nitimo ire kisa. Dong’ ka cware ulund ukwero kisa ma dhaku pare ubetimo ire man elalu gam asu i wang’ cik ma giwinjiri ngo ke? Calu dhaku tie ayika niweko ni cware man nibedo asu i gam, cware utie ngo agonya nimakere ku Lembagora nidok gamere ku ng’atu mange. Ento tek enyono tiende asu egamu dhaku mange ma en ke etie ngo agonya nimakere ku Lembagora, eca nwang’u etimo kendo abor, man judong cokiri copo ketho komite mi pokolembe kendo i wiye pi dubo pare.​—1 Kor. 5:1, 2; 6:9, 10.

Ka ng’atu ma nico m’utie ngo agonya nimakere ku Lembagora ugamere kendo, cokiri copo neno gam pare mi kwong’o ku mir ario nenedi? Nimakere ku Lembagora, nyo gam pare mi kwong’o utie asu gam ma cuu? Nyo dhaku pare ung’iyo asu nitimo ire kisa kunoke nikwere? Nyo cokiri bineno gam ma nyen ma cware umondo i iye ni gam mir abori?

Con, cokiri ubed uneno gam ma nyen ma cware umondo i iye ni gam mir abor ka fodi dhaku pare ma kwong’a utie asu kwo, egiero ngo man epodho ngo i dubo mi lembsasa mi tarwang’. Re Yesu uweco ngo pi ng’atu mi gamiri ma kosa pare mbe ma jadhoge utimo abor, kinde m’ebino weco iwi lalu gam man nidok gamiri kendo. Ento ekoro nia ng’atu m’ulalu gam ku dhaku pare mananu m’umbe thelembe mi Lembagora man egamu mange, nwang’u etimo abor. I lembe ma kumeno, lalu gam man gamiri kendo ma Yesu uweco pire utie tap abor ma copo lalu gam pare mi kwong’o.

Tek ng’atu ma nico ulalu gam ku dhaku pare man edok egamu dhaku mange, dong’ ecopere  ngo nia dhaku pare mi kwong’o utim ire kisa kunoke ekwere. Pieno, ukwayu ngo enegere nimaku yub moko ma pek m’etim ko kisa kunoke m’ekwer ko cware ma dong’ uweke. Bende, cokiri bineno gam ma nyen ni gam ma cuu, kadok nwang’u jadhoge mi gamiri ma kosa pare mbe ubed kwo, egamere ngo kendo, man kadok emondo ngo i lembsasa mi tarwang’ de. *

Nimakere ku lembe ma wakoro malu, ng’atu ma nico utimo abor e uketho gam migi ulal. Dong’ ka ng’atu ma nico utimo ngo abor, re asu elalu gam man edok egamu dhaku mange ke? Kunoke lembe copo bedo nenedi ka ng’atu ma nico utimo ngo lembsasa mi tarwang’ i wang’ lalu gam, re edok etime i ng’eye, man egamu dhaku mange ma dhaku m’i wang’e ke ubino ayika nitimo ire kisa? I lembe maeno ceke, lalu gam man gamu dhaku mange ceke gitie timo abor ma copo jigo the gam mi kwong’o. Gam ma nyen utie gamiri ma cuu ma cik uyiyo pire. Calu ma jukoro i Otkur ma Wiw (mi français) mi nindo 15, dwi mir 2, 1980, i mbaya mi 32, “kawoni dong’ emondo i gam ma nyen man ecopere ngo nia ejig the gam maeni man edok i ma kwong’a; kum lalu gam kud abor m’etimo man dhaku mange m’edok egamu ujigo the gam pare ma kwong’a cen.”

Alokaloka maeno ubenyutho ngo nia dong’ Jakristu ucikere nineno nia gam utie ngo gin ma leng’, kunoke nia dubo mi timo abor utie ngo dubo ma pek. Ng’atu ma nico m’ulalu gam ku dhaku pare i ayi m’umakere ngo ku Lembagora man edok egamu mange m’etie ngo aganya nigamu nimakere ku Lembagora, judong cokiri biketho komite mi pokolembe pire pilembe etimo abor. (Tek dhaku ma nyen m’egamu de utie Jakristu, en de jubiketho komite mi pokolembe pire pilembe etimo abor.) Kadok gam migi ma nyen ma gigamiri ko jubineno ngo nia tie abor de, re ng’atu ma nico binwang’u ngo rwom mi timo tic ma segi i cokiri pi oro ma dupa; kan ebinwang’u rwomne ke, ebibedo i ng’ey ma nang’ dong’ dhanu umbe ku ng’eicwiny i igi pi lembe m’etimo man nwang’u dong’ gibenene ni ng’atu m’umito jumii ire woro. I wang’ nimiyo ire rwom moko ci mi tic, judong cokiri gicikiri nineno peko ma dhaku m’eweko ubekadhu kud i iye, ma saa moko nyo utie pi gam ma julalu i wiye mananu, man niparu bende pir awiya ma thindho ma saa moko nyo ng’atu m’ulalu gam uweko.​—Mal. 2:14-16.

Lalu gam man nidok gamiri kendo m’umbe ku thelembe mi Lembagora kelo peko ma lee. Pieno, mito Jukistu gunyuth rieko ma ginen ko gam ni gin ma leng’ calu ma Yehova neno.​—Ekl. 5:4, 5; Ebr. 13:4.