1. Yehova ubekwayu ang’o i bang’wa?

 I KIND lembe ma nyayu anyong’a lee i ju m’ugamiri, acel utie nyoliri pa nyathin m’utie ku yotkum ma cuu. Ento kadok nwang’u junyodo gimaru nyathin migine de, re gimito ngo nia ebed nyathin i kwo pare zoo. Cwinygi caku dieng’ lee kan ebedongo ngo. Yehova bende kumeno; anyong’a nege kinde ma wadoko julub ma nyen pa Yesu, re ebemito ngo nia wabed kwa awiya i thenge mi tipo. (1 Kor. 3:1) Ento ebekwayu nia wadok Jukristu ‘m’udongo.’—1 Kor. 14:20.

2. Wabidwoko wang’ penji ma kani i thiwiwec maeni?

² Jakristu m’uteng’ini utie ng’atu ma nenedi? Wacopo timo ang’o pi nidoko Jukristu m’uteng’ini? Cam ma nwang’ mi tipo copo konyowa nenedi nidongo i thenge mi tipo? Pirang’o ukwayu ngo wapar nia watimo mediri uromo? I thiwiwec maeni, wabidwoko wang’ penji maenogi.

JAKRISTU M’UTENG’INI UTIE NG’ATU MA NENEDI?

3. Nidoko Jakristu m’udongo thelembene ang’o?

³ I 1 Jukorintho 14:20, wec mi dhu Jugiriki ma juloko nia “judongo” copo nyutho bende “m’uteng’ini,” “ma pwe,” man “ma boo.” a (1 Kor. 2:6) Wadoko Jukristu m’udongo kunoke m’uteng’ini nwang’u wakadhu thino mi thenge mi tipo man wadoko jumaco kunoke jumamon mi tipo. Re kadok wadaru tundo keno de, ukwayu ngo wajig nitimo mediri. (1 Tim. 4:15) Wan ceke wacopo bedo dhanu m’uteng’ini i tipo, eno ke kadok ju ma gitie awiya i thenge mi  kum. Dong’ ang’o ma nyutho nia Jakristu moko uteng’ini i tipo?

4. Jakristu m’uteng’ini utie ng’atu ma nenedi?

⁴ Jakristu m’uteng’ini utie ng’atu ma kwo nimakere ku lembe ceke ma Mungu ubekwayu; elondo man eng’iyo ngo cik m’emito ewor. Re calu etie ku dubalaga, saa moko etimo kosa. Ento i kwo pare ma kubang’ ceng’, enyutho nia eparu man etimo lembe nimakere ku yeny pa Mungu. Etie ng’atu m’uronyo ng’atu ma nyen man m’ubemedere nitimo kero wek kara paru pare uromb ku pa Mungu. (Efe. 4:22-24) Etie bende ng’atu m’uponjo nimaku yub mi rieko ma jengere iwi cik man cik mir ukungu pa Yehova, pieno embe ku yeny mi cik ma jurieyo pi nitelo wi kwo pare ceke. Kan edaru maku yub moko, enyutho kweriri gijo pi nitimo calu m’epangu.—1 Kor. 9:26, 27.

5. Jakristu m’uteng’ini ngo nwang’ere i wang’ ariti ma kani? (Juefeso 4:14, 15)

⁵ I ng’ete m’ucelo lundo, Jakristu m’ubeteng’ini ngo i tipo weko “vupo” man “repdhok mir abidhe” uwing wiye. Eyiyo rwonglembe mi vupo m’ubemew i kind dhanu man eweko ponji mi jujai uwing wiye. b (Som Juefeso 4:14, 15.) Bende, kumira nege i kum jumange, ebedo janyay titi, jacul kwor kunoke epodho i abidhe wang’ ma pol.—1 Kor. 3:3.

6. Wacopo poro dongo mwa mi thenge mi tipo kud ang’o? (Nen bende cal.)

⁶ Calu ma waneno i acaki mi thiwiwec maeni, Lembagora uporo dongo mwa mi thenge mi tipo ku dongo pa nyathin. Nyathin koso ng’iyo i lembe, pieno ebedo ku yeny mi gwok man telowic pa jadit. Ku lapor, mego romo kwayu nia nyaku pare ma nyanok ubed umak cinge pi nikadhu loka ndaki. Kinde m’ebedongo, min romo caku weke ekadh gire, ento emedere nipoyo wiye nia ebed enen theng gengi kun ku kun pi niuro ariti. Saa m’edongo, ecaku uro ariti gire. Tap calu m’awiya ma thindho gibedo ku yeny mi judongo pi niuro ariti, Jukristu m’uteng’ini ngo i tipo bende wang’ ma pol gibedo ku yeny mi Jukristu m’uteng’ini pi niuro ariti mi thenge  mi tipo man pi nimaku yub mi rieko. Ento kan ubekwayu nia Jukristu m’uteng’ini gimak yub, ginyamu i lembe iwi cik mir ukungu mi Biblia pi ninyang’ i paru pa Yehova, man i ng’eye gitiyo ku parune.

7. Nyo Jukristu m’uteng’ini de gibedo ku yeny mi kony mi jumange?

⁷ Nyo eno ubenyutho nia Jukristu m’uteng’ini gimbe nyanok de ku yeny mi kony mi jumange? Ungo. Saa moko gin de gibedo ku yeny mi kwayu kony. Ento ng’atu m’uteng’ini ngo i tipo romo kuro nia jumange re ma ginyuth ire gin m’ukwayu etim kunoke nia gimak yub kakare. Tung’ tung’ utie nia, Jakristu m’uteng’ini romo kwayu kony i bang’ dhanu ma riek man m’ung’eyo lembe lee, ento ewil ungo nia Yehova ubekwayu nia “[eyey] ter pare gire.”—Gal. 6:5.

8. Jukristu m’uteng’ini gikoc nenedi i kindgi?

⁸ Tap calu ma dhanu ma dongo gibedo ngo i ayi ma rom, Jukristu m’uteng’ini bende ginyutho ngo kurayung ma calu rieko, tegocwiny, berocwiny, man kisa i kadhiri ma rom. Bende, ka Jukristu ario m’uteng’ini gin’i wang’ lembe m’urombo, giromo maku yub m’ukoc ma re zoo ujengere iwi Lembagora. Lembuno timere asagane tek ukwayu ng’atuman umak yub nimakere ku pidocwiny pare. I ng’eye gicayiri ngo kadok gimaku yub m’ukoc. Ento giketho wigi i kum bedo i acel.—Rum. 14:10; 1 Kor. 1:10.

WACOPO TIMO ANG’O PI NIDOKO JUKRISTU M’UTENG’INI?

9. Nyo nidongo i thenge mi tipo utie lembe ma timere gire kumeni? Kekor.

⁹ Nyathin dongo ku nindo m’ubekadhu; ento kara ng’atini udong i thenge mi tipo, ukwayu etim kero moko kokoro. Ku lapor, umego ku nyimego mi Korintho gigam giyiyo lembanyong’a, gilimo batizo, ginwang’u tipo ma leng’ man ginwang’u ponji i bang’ jakwenda Paulo ku kume. (Tic. 18:8-11) Ento oro moko i ng’ey batizo migi, nwang’u fodi asu ju dupa m’i kindgi giteng’ini ngo. (1 Kor. 3:2) Wacopo timo ang’o kara kud wapodh i lembe ma rom eno?

10. Wacikara nitimo ang’o pi niteng’ini i thenge mi tipo? (Yuda 20)

¹⁰ Pi niteng’ini i tipo, wacikara nilar pidho avane. Ju ma ‘gimaru ngo ning’eyo lembe akeca,’ niwacu ju ma gimaru nibedo awiya i thenge mi tipo, timo mediri voyogi. (Rie. 1:22, NWT.) Wabemito ngo wabed calu dhanu ma gidongo i thenge mi kum, ento gibemediri nikuro nia junyodo migi re m’umak yub kakagi. Tung’ kugi, wabemito wamak lembe i cingwa pi nitimo mediri i thenge mi tipo. (Som Yuda 20.) Tek fodi asu ibeii pi niteng’ini i tipo, kway Yehova umii iri “ava man kero mi timo” kumeno.—Filip. 2:13.

11. Wacopo nwang’u kony kani pi niteng’ini i tipo? (Juefeso 4:11-13)

¹¹ Yehova ubekwayu ngo nia wadong i thenge mi tipo ku tego mwa giwa. Ju ma gitie jukwac man juponji i cokiri, julilogi pi nikonyowa ‘wadong’ i thenge mi tipo, “kara wadok dhanu m’uteng’ini i mukero mi dongo man mi pong’ pa Kristu.” (Som Juefeso 4:11-13.) Yehova bemiyo iwa bende tipo pare ma leng’ pi nikonyowa wabed ku “paru pa Kristu.” (1 Kor. 2:14-16) M’umedo maeno, etelo wi tic mi kiewo Injili ang’wen pi ninyutho iwa kite ma Yesu ubed uparu, uweco man utimo ko lembe kinde m’ebino iwi ng’om. Tek ibelubo lapor pa Yesu, ibitundo i kum lembakeca peri mi doko Jakristu m’uteng’ini.

 TIC PA CAM MA NWANG’ MI TIPO

12. “Ponji ma kwong’a m’uneno Kristu” utie ang’o?

¹² Kara watim mediri i thenge mi tipo, wacikara bende nikadhu “kadhiri mi ponji ma kwong’a m’uneno Kristu,” niwacu ponji mir ukungu mi Jukristu. Ponjine moko utie m’uweco iwi lokocwiny, yiyoyic, batizo man cer. (Ebr. 6:1, 2) Eno utie kum ponji ma yiyoyic mi Jukristu ujengere i wigi. Pieno re ma jakwenda Pethro uweco pigi kinde m’eberweyo ni udul dhanu i ceng’ mi Pentekoste. (Tic. 2:32-35, 38) Wacikara niyiyo ponji mir ukungunegi pi nidoko julub pa Kristu. Ku lapor, Paulo umiyo cimowang’ ma nia ng’atu m’ukwero ponji mi cer, nyutho nia ekwero yiyoyic ceke mi Jukristu. (1 Kor. 15:12-14) Ento wacikara ngo nijik kende kende iwi ng’eyong’ec mir ukungu mi lemandha.

13. Wacikara nitimo ang’o pi ninwang’u bero i kum cam ma nwang’ mi tipo ma juweco pire i Juebrania 5:14? (Nen bende cal.)

¹³ Tung’ ku ponji ma kwong’a, cam ma nwang’ mi tipo udiko cik pa Yehova man bende cik pare mir ukungu ma konyowa ninyang’ i paru pare. Pi ninwang’u bero i kum cam maeno, wacikara niponjo Lembe pa Mungu, ninyamu iye man nitiyo kude mii. E kumeno, wabiponjo nimaku yub ma nyayu anyong’a i Yehova. c—Som Juebrania 5:14.

14. Paulo utimo ang’o pi nikonyo Jukorintho kara gidong i thenge mi tipo?

¹⁴ Wang’ ma pol, Jukristu m’uteng’ini ngo wigi lal kinde ma gin’i wang’ lembe m’ubekwayu ninyamu i cik mir ukungu mi Biblia man nitiyo kugi. Tek cik mi Biblia ma terere umbe, jumoko giromo paru nia gicopo timo gin ceke ma gimaru. Jumange ke giromo banju cik kadok i lembe m’ukwayu ngo jutii ku cik. Ku lapor, copere nia Jukristu mi Korintho gipenjo Paulo ka nyo eyiyere nicamu cam ma juthiero ni ayi gin m’acwiya kunoke ngo. Kakare ninyutho igi gin m’umito gitim, eyero nia lembe moko kwayu pidocwiny man nia ng’atuman utie ku “twero ... mi timo ng’iyong’ic.” Paulo ung’iyo i cik mir  ukungu ma biketho ng’atuman ubed ku pidocwiny ma ber ma nwang’u ebeketho ngo jumange gikier. (1 Kor. 8:4, 7-9) E kumeno ekonyo Jukorintho nidongo i thenge mi tipo, wek kara gibed gitii ku copo migi mi ng’iyo i lembe kakare nikuro nia jumange re m’umak yub kakagi kunoke nibanju cik i lembe ceke.

15. Paulo ukonyo Jukristu ma Juebrania nenedi kara gidong i thenge mi tipo?

¹⁵ Wacopo nwang’u ponji moko ma pire tek i lembe ma Paulo ukiewo ni Jukristu ma Juebrania. Jumoko gitimo ngo mediri i thenge mi tipo; gibino “dok kendo niyenyo cak kakare nicamu cam ma nwang’ [mi tipo].” (Ebr. 5:12) Gimediri ngo niponjo man niyiyo lemandha ma Yehova ubino nyutho nok nok nikadhu kud i cokiri. (Rie. 4:18) Ku lapor, juyic ma pol ma Juyahudi gibino moko asu i kum Cik pa Musa kadok nwang’u dong’ oro ma romo 30 ugam ukadhu niai ma lam pa Kristu ujigo the Cikne. (Rum. 10:4; Tito 1:10) Oro 30 umiyo kaka ma lee akeca ni Jukristu ma Juyahudi niloko paru migi! I andha, ng’atu moko ci m’usomo barua ma Paulo ukiewo igi ku telowic mi tipo ma leng’, romo cwaku nia buku maeno utie ku cam ma nwang’ mi tipo. Ebino tap gin ma gibino ku yenyne pi niteng’o yiyoyic migi i ponji ma nia yub ma Yehova umaku pi thier mi Jukristu uloyo zoo. Ekonyogi bende ninwang’u tegocwiny mi miyo lembatuca kadok kud i kind jai mi Juyahudi mange.—Ebr. 10:19-23.

KUD IPAR NIA ITIMO MEDIRI UROMO

16. M’uweko nitimo mediri i thenge mi tipo, wacikara nitimo ang’o mange?

¹⁶ Wacikara nitimo kero pi niteng’ini i thenge mi tipo; re wacikara bende nigwoko teng’inine. Pieno, kud ipar nia dong’ itimo mediri uromo. (1 Kor. 10:12) Ukwayu ‘wamedara ning’iyara’ wan giwa pi ninyang’ ka nyo andha waweko ngo nitimo mediri.—2 Kor. 13:5.

17. Barua ma Paulo ukiewo ni Jukolosai ubenyutho nenedi nia pire tie tek nigwoko teng’ini mi tipo?

¹⁷ I barua ma Paulo ukiewo ni Jukolosai, enyutho kendo nia pire tie tek nigwoko teng’ini mi tipo. Jukristu mi Kolosai gigam giteng’ini, re ecimo wang’gi i kum awic mi paru mi ng’om. (Kol. 2:6-10)  Epafra m’ugam ung’eyogi cuu bende ubed urwo saa ceke wek kara “gicung ma tek [kunoke gibed ma giteng’ini] i yeny ceke pa Mungu.” (Kol. 4:12) Eno ubemiyo iwa ponji ma kani? Paulo gikud Epafra zoo ginyang’ nia kara wagwok teng’ini mwa mi tipo, ubekwayu watim kero man wakway kony i bang’ Mungu. Gibino mito nia Jukolosai gimediri nibedo Jukristu m’uteng’ini kunoke m’udongo i tipo, eno ke kadok gibino nwang’iri ku peko ma nenedi.

18. Ang’o ma romo nwang’u Jakristu m’uteng’ini? (Nen bende cal.)

¹⁸ Paulo ucimo wang’ Juebrania nia Jakristu m’uteng’ini de romo bayu rwom mi bedo jarimb Yehova pi nja. Adundene romo caku doko nwang’ ma dong’ ecopere ngo ire niloko cwinye pi ninwang’u kisa pa Mungu. Ku lembe ma ber, nwang’u fodi Juebrania gipodho ngo nitundo i kadhiri maeno. (Ebr. 6:4-9) Dong’ ka ju kindwa ma tin ma gikegikwiyo i tipo kunoke ma jukejukoyo kud i cokiri, kan i ng’eye gidok giloko cwinygi e ke? Lokocwiny migi ma ku jwigiri ubenyutho nia gikoc ku ju ma Paulo ugam ukiewo pigi. I andha re kinde ma gidwogo i bang’ Yehova, gibedo ku yeny mi kony pare. (Eze. 34:15, 16) Pieno judong cokiri giromo pangu nia Jukristu moko m’uteng’ini ukonygi kara ginwang’ tego migi mi thenge mi tipo kendo.

19. Ukwayu wabed ku lembakeca ma kani?

¹⁹ Tek ibetimo kero pi niteng’ini i thenge mi tipo, ng’ey nia ecopere iri nitundo i kum lembakeca maeno! Pieno, mediri nicamu cam ma nwang’ mi tipo man bed iketh paru peri uromb ku pa Yehova. Tek dong’ idoko Jakristu m’uteng’ini ke, mediri nibedo nging’ nging’ i thenge mi tipo.