1. Paru mi weco ku dhanu i tic mi lembanyong’a ketho jumoko giwinjiri nenedi? (Nen bende cal.)

 WA JUMULEMBE pa Yehova, warweyo ni jumange pilembe wamaru Wegwa m’i polo man wabemito wakony gin de ging’eye. Jurwey ma dupa ginwang’u anyong’a lee i tije, ento ni jumange ebedo yot ungo. Pirang’o? Pilembe jumoko gi weg lewic man giparu nia gimbe ku bodho. Jumoko ke gilworo nicidho yo pa dhanu ma julwong’ogi ngo. Jumange gilworo nia jubiwok winjogi ngo. Jumange lundo juponjogi nia e ber ungo niketho jumange giwinjiri rac. Umego ku nyimego mwa maeno gimaru Yehova lee, re ebedo igi tek nirweyo ni dhanu ma ging’eyo ngo. Ento calu ging’eyo nia pi tic maeno utie tek lee, gidikiri nja i iye. Anyong’a ubenego Yehova lee mandha i kumgi!

2. Kan etie iri tek ninwang’u anyong’a i tic mi lembanyong’a, pirang’o ukwayu ngo cwinyi tur?

² Nyo saa moko ebedo iri tek ninwang’u anyong’a i tic mi lembanyong’a nikum peko maenogi? Tek eyo, cwinyi kud utur. Kan ibeparu nia imbe ku bodho mi rweyo, eno nyutho nia itie won jwigiri man nia ibemito ngo itel nen mi dhanu i wii. Eno nyutho bende nia imaru ngo piem. I andha, ng’atu moko mbe ma maru nia jumange gikwer wec pare, asagane kan ebeyere pi bero migi. Wuru m’i polo ung’eyo peko peri cuu, man ebemito emii iri kony m’itie ku yenyne. (Isa. 41:13) I thiwiwec maeni, wabineno lembe moko abic ma copo konyowa ninyego ku  peko maenogi man wabineno kite ma wacopo nwang’u ko anyong’a lee i tic mi lembanyong’a.

WEK LEMBE PA MUNGU UMII IRI TEGO

3. Ang’o m’ukonyo jabila Yeremia nirweyo ni jumange?

³ Niai con, rwonglembe m’uai i bang’ Mungu ubed umiyo tego i kum jutic pare kinde m’ukwayu gitim tic moko ma tek. Wakewec iwi jabila Yeremia. Saa ma Yehova umiyo ire tic mi rweyo, lworo make. Eyero kumae: “Ang’eyo ngo maram awec ko; kum an a nyathin.” (Yer. 1:6) Ang’o m’ukonye ninwang’u tegocwiny? Utie lembe pa Mungu. Emedo kumae: “Ebedo calu mac m’uwang’ yor i adundena ma juciko bang’e yor i cogona, man aol ku twiocwiny, e acopo ciro ngo.” (Yer. 20:8, 9) Kadok ugam ukwayu Yeremia urwey i therithwar ma rweyo tek i iye de, re rwonglembe m’ukwayu erwey umiyo ire tego m’ebino ku yenyne pi nitimo tije.

4. Ka wabesomo Lembe pa Mungu man wabenyamu iye, ang’o ma timere? (Jukolosai 1:9, 10)

⁴ Jukristu ginwang’u tego i rwonglembe mi Biblia. Ku lapor, kinde ma jakwenda Paulo ubekiewo barua ni umego pare mi cokiri mi Kolosai, eyero igi nia ninwang’u ng’eyong’ec ma tap bicwalugi “[niwotho] i ayi m’uromo ku Yehova” kara ‘gimediri nicego nying’gi i tic ceke ma beco.’ (Som Jukolosai 1:9, 10.) Acel m’i kind tic maeno utie nirweyo lembanyong’a. Pieno kinde ma wabesomo Lembe pa Mungu man wabenyamu iye, yiyoyic ma watie ko i Yehova doko tek man waneno kamaleng’ nia pire tie tek nirweyo rwonglembe mi Ker.

5. Wacopo timo ang’o kara wanwang’ bero lee i som man i ponji mwa mi Biblia?

⁵ Kara wanwang’ bero lee i Lembe pa Mungu, ukwayu ngo wabed wasome, waponje man wanyam iye nyamalu malu, ento pi saa ma lee. Tek ipodho iwi giragora moko ma nyang’ i iye ubesendi, kud ikadh kud i wiye ndhu ndhu. Pi ninwang’u kite ma jukoro ko iye, tii kud Index des publications des Témoins de Jéhovah kunoke ku Buku mi timo sayusac mi Jumulembe pa Yehova. Tek ibed iting’o saa lee pi niponjo Biblia, ibiyiyo andhandha nia ebeyero lemandha. (1 Thes. 5:21) E ibibedo kud anyong’a niweco iwi ponji m’inwang’une ku jumange.

 BED IYIKIRI MII PI TIC MI LEMBANYONG’A

6. Pirang’o ukwayu wabed wayikara mii pi tic mi lembanyong’a?

⁶ Tek ibed iyikiri mii pi tic mi lembanyong’a, ibiwinjiri ma ber kinde m’ibeweco ku dhanu. Ku lapor, Yesu ukonyo julub pare kara giyikiri ma ber i wang’ niorogi i tic. (Luka 10:1-11) Calu ma gitiyo ku ponji m’emiyo igi, ginwang’u anyong’a lee mandha i tic ma gitimo.—Luka 10:17.

7. Waromo yikara nenedi pi tic mi lembanyong’a? (Nen bende cal.)

⁷ Waromo yikara nenedi pi tic mi lembanyong’a? Ukwayu walar wapar cuu pi gin ma wabiyero man warud wang’e ku wec mwa giwa. Walar wapar bende pir ayi moko ma dhanu mi therithwar mwa gijolo ko lemandha man wayik dwokowang’ lembe ma wabimiyo igi. I ng’eye saa ma wabeweco kugi, waii niweco ma kumwa poto, wavonji man wabed nza nza kugi.

8. Jukristu gitie calu agulu mir ulobo ma jakwenda Paulo uweco pire i ayi ma nenedi?

⁸ Jakwenda Paulo uyero ni umego ku nyimego pare kumae: “Wabedo ku piny m’akana maeni i agulu mir ulobo.” (2 Kor. 4:7) Piny m’akana maeno utie ang’o? Utie tic mi rweyo rwonglembe mi Ker ma tie tic ma bodho kwo. (2 Kor. 4:1) Agulu mir ulobo ke utie ang’o? Gibenyutho jutic pa Yehova ma girweyo lembanyong’a ni jumange. I rundi pa Paulo, jukuloka gibed gitiyo kud agulu mir ulobo pi niyeyo jamkuloka ma pigi tek, calu ve cam, kong’o man sente. Yehova de umiyo rwonglembe ma pire tek mi lembanyong’a i cingwa. Ku kony pare, wacopo nwang’u tego ma watie ku yenyne pi nitwong’e ku tegocwiny.

BED IRWO PI NINWANG’U TEGOCWINY

9. Wacopo timo ang’o pi nivoyo lworo ma nia dhanu biwinjowa ngo? (Nen bende cal.)

⁹ Saa moko waromo lworo nia dhanu biwinjowa ngo. Wacopo voyo peko maeno nenedi? Wakewec iwi rwo ma jukwenda girwo kinde ma jung’olo igi nia kud girwey. Kakare niweko nia lworo umakgi, gikwayu Yehova ukonygi kara “gimediri niyero lembe [pare] ku tegocwiny ceke.”  Edwoko wang’ rwo migine ndhu ndhu. (Tic. 4:18, 29, 31) Tek saa moko lworo pa dhanu bepikere i iwa, ukwayu wan bende warwo i bang’ Yehova pi nikwayu kony. Kwaye eketh mer m’imaru ko dhanu umedere kara lworo kud unegi nirweyo igi.

10. Yehova konyowa nenedi i tic mwa mi bedo Jumulembe pare? (Isaya 43:10-12)

¹⁰ Yehova ung’iyowa wabed Jumulembe pare, man eng’olo nia ebikonyowa wabed weg tegocwiny. (Som Isaya 43:10-12.) Ekonyowa i yo moko ang’wen ma e: Mi kwong’o, Yesu utie karacelo kudwa saa ceke ma waberweyo lembanyong’a. (Mat. 28:18-20) Mir ario, Yehova uketho jumalaika gikonywa. (Nyu. 14:6) Mir adek, emiyo iwa tipo pare ma leng’ ubed jakony ma poyo wiwa i kum lembe ma wadaru ponjo. (Yoh. 14:25, 26) Mir ang’wen, emiyo iwa umego ku nyimego kara watim tije karacelo kugi. Ku kony pa Yehova man mir umego ku nyimego mwa ma jumer, wacopo medara nirweyo ku tegocwiny.

YIK I PROGRAM PERI MAN BED KU NEN MA BER

11. Icopo timo ang’o kara ibed inwang’ dhanu lee saa m’iberweyo? (Nen bende cal.)

¹¹ Nyo cwinyi betur kan inwang’u ngo dhanu lee i pacu migi? Tek eyo, bed ipenjiri kumae: ‘Kawoni dhanu m’i therithwar para e giromo bedo kani?’ (Tic. 16:13) ‘Nyo gin’i tic kunoke i soko?’ Tek utie kumeno, nyo iromo rweyo ngo i dhu yo pi ninwang’u dhanu lee? Umego moko ma nyinge Joshua uyero kumae: “Abed anwang’u kaka mi rweyo i soko man i kabedo mange ma dhanu bepong’ i igi.” Giku min ot pare Bridget, gibed ginwang’u bende dhanu lee i pacu migi ka giwok i lembanyong’a ku dhug uthieno man ceng’ yenga reto.—Efe. 5:15, 16.

12. Icopo timo ang’o pi ninyang’ i yiyoyic mi dhanu kunoke i lembe m’ubedieng’o cwinygi?

¹² Tek lembe m’ibeweco i wiye ubenyang’u ngo dhanu, kepim ninyang’ i yiyoyic migi kunoke i lembe m’ubedieng’o cwinygi. Umego Joshua giku Bridget gibed gitiyo ku penji ma n’i ng’ey trakti pi nicaku the wec. Ku lapor, ka gibetiyo ku  trakti ma thiwiye tie Nen peri tie ang’o iwi Biblia?, giyero kumae: “Dhanu moko gineno Biblia calu buku m’uai i bang’ Mungu, jumange lundo gitie ku paru m’ukoc. In ke paru peri tie ang’o?” Eno ci yabu dhu wec.

13. Pirang’o wacikara nineno nia wabetimo tic mwa cuu kadok jubewinjowa ngo de? (Lembrieko 27:11)

¹³ Utie ngo adwogi mi tic mwa mi lembanyong’a re ma nyutho nia wabetimo tije cuu kunoke ngo. Pirang’o? Pilembe nwang’u wadaru miyo lembatuca, tap calu ma Yehova giku Wode gibekwayu i bang’wa. (Tic. 10:42) Tek wabenwang’u ngo dhanu ma wawec kugi kunoke tek jubewinjowa ngo, wabed mwa kud anyong’a pilembe wang’eyo nia wabenyayu anyong’a i Wegwa m’i polo.—Som Lembrieko 27:11.

14. Pirang’o wacopo bedo kud anyong’a kinde ma jarwey mange re m’unwang’u ng’atu m’unyutho nen ma ber i therithwar mwa?

¹⁴ Anyong’a copo negowa bende kinde ma jarwey mange re m’unwang’u ng’atu m’unyutho nen ma ber i therithwar mwa. Otkur ma Wiw moko uporo tic mwa ku tic mi sayu nyathin moko m’urwinyo. Dhanu dupa giwodhiri pi nisaye kaka m’erwinyo i iye. Saa ma ng’atu acel unwang’e, gin zoo anyong’a unegogi, ng’atu m’unwang’ene kende ngo. Kumeno bende, tic mi ketho dhanu udok julub utie tic ma judiko cing’jo adika i kume. Ukwayu jurwey ceke girwey i therithwar mi cokiri migi, man gin ceke anyong’a negogi ka ng’atu acel ma nyen ucaku cidho i coko.

KETH WII I KUM MER M’IMARU KO YEHOVA MAN DHANU WEDU

15. Nitiyo ku Matayo 22:37-39 copo konyowa nenedi nimedo anyong’a mwa i tic mi lembanyong’a? (Nen bende m’i ng’eye.)

¹⁵ Wacopo medo anyong’a mwa i tic mi lembanyong’a nwang’u wabeketho wiwa i kum mer ma wamaru ko Yehova man dhanu wadwa. (Som Matayo 22:37-39.) Pieno, bed ipar pir anyong’a ma nego Yehova kan ebeneno tic ma wabetimo man pir anyong’a ma jumange gibinwang’u ka gicaku ponjo Biblia! Bed ipar bende pi both m’ubekuro dhanu ma gijolo rwonglembe mwa ma ber.—Yoh. 6:40; 1 Tim. 4:16.

16. Wacopo nwang’u anyong’a nenedi i tic mwa mi lembanyong’a kinde ma wambe ku copo mi wok kud i pacu mwa? Kemii lapor moko.

 ¹⁶ Nyo lembe moko uketho ecopere ngo iri niwok kud i pacu? Tek eyo, keth wii i kum gin m’icopo timo pi ninyutho nia imaru Yehova man dhanu wedu. Ku lapor, i saa mi Korona, umego Samuel giku min ot pare Dania gibino mbe ku copo mi wok kud i pacu migi. I kind saa ma tek maeno, gibed gimiyo lembatuca thiri thiri ku telefon, gibed gikiewo barua man gitelo wi ponji mi Biblia ku yore mi Zoom. Umego Samuel ubed umiyo lembatuca ni dhanu m’ebed erombo kugi i odiyath saa m’ecimaku yath mi kanser. Ekoro kumae: “Peko ma wanwang’ara ko ujebo wiwa, udaru tego kud i kumwa man uketho yiyoyic mwa i amulaic ma lee. Wabemito wanwang’ anyong’a i tic ma wabetimo ni Yehova.” Kud i kind lembe maeno, Dania upodho uketho egonjo iwi kavuto pi dwi adek. I ng’eye ugam ukwayu ewoth ku kom mi weg goro pi dwi abusiel. Eyero kumae: “Aii nitimo gin ceke m’abino ku copo mi timo. Abed arweyo ni munganga ma dhaku m’ubed uliewa, man abed aweco ku ju ma gibed gitero piny yo pa dhanu. Aweco bende ma ber mandha i telefon ku munganga ma dhaku ma neno wi odiyath moko.” Lembe ma Samuel giku Dania gikadhu kud i iye ujwigo tic migi, ento gitimo gin ceke ma gicopo, uketho ginwang’u anyong’a.

17. Icopo timo ang’o kara inwang’ bero i kum lembe ceke ma waneno i thiwiwec maeni?

¹⁷ Ibinwang’u bero lee i kum lembe ma waneno i thiwiwec maeni kan itiyo kugi ceke i saa ma rom. Gibedo ve jam wang’ dek ma jutiyo ko pi nitedo cam moko. Ka judikogi karacelo, giwodho cam ma mit. Tek itiyo ku lembene kpo, ibibedo ku gin ceke m’itie ku yenyne pi ninyego i kum paru ceke ma copo turo cwinyi man ibinwang’u anyong’a lee i tic mi lembanyong’a.