YESU ular uyero nia julubne gibikayu cam lee i nindo maeni mi kajikceng’. (Mat. 9:37; 24:14) Wakenen kite ma wec maeno ubepong’o ko i ayi ma wang’u ijo i theng ng’om mi Transcarpatie, i ng’om mir Ukraine. Theng ng’om maeno utie kud adhura moko adek ma kindgi tie ceng’ini ceng’ini. * I adhuranegi, cokiri tie 50, jurwei ke wendgi kadhu 5 400. Eno nyutho nia ka judiko dhanu m’i igi zoo karacelo, junwang’u nia ng’atu acel iwi dhanu ang’wen utie Jamulembe pa Yehova!

Dhanu mi theng ng’ombe gitie ku nen ma nenedi? Umego moko ma kuca ma nyinge Vasile uyero kumae: “Dhanu ma keni giworo Biblia, gimaru lembe ma wotho atira, giwinjiri ma ber ku wat migi, man gimaru nikonyo jumange.” Emedo kumae: “Re saa moko giyio ngo ponji mwa. Ento kan inyutho igi lembe moko niai kud i Biblia, giwinjo kilili.”

Umego ku nyimego mwa gibenwang’iri ku kit peko ma segi kinde ma giberweyo i theng ng’om maeno ma wend jurwei uyenyo bedo rom ku wend dhanu m’ukwayu jurwei igi. Ku lapor, cokiri acel utie ku jurwei 134, re udi utie 50 kende ma giromo rweyo i igi! Dong’ Jurwei gibed gitimo nenedi?

Umego ku nyimego dupa gibed gimiiri pi nicirweyo i kabedo ma yeny mi jurwei utie lee i ie. Umego Ionash ma oro pare 90 ukoro kumae: “I kabedo ma cokiri mwa berweyo i ie, jarweiman utie ku udi ario kende m’ecopo rweyo i igi. Pi thelembe maeno, con abed awotho kilometre 160 kumeni pi nicirweyo lembanyong’a i kabedo ma nwang’u fodi jurweyo ngo i ie pi nindo dupa, man abed arweyo ku dhu hongrois. Ento kawoni dong’ arweyo i pacu ma ceng’ini ku bang’a, pilembe atie jaratwoyo.” Bende, jurwei gimiiri lee mandha pi nicirweyo i teritwar mange. Umego Ionash umedo kumae: “Con eca, abed aai saa 10 mi dhu kugweno pi nimaku train, man acidh arweyo nitundo saa 12 mi dhu uthieno i saa ma train dwogo i ie. Abed atimo kumeno wang’ ario kunoke wang’ adek kubang’ yenga.” Nyo enwang’u cegonying’ moko? Eyero kumae: “Anwang’u anyong’a lee i kite maeno mi rweyo. Abino ku mutoro ma lee dit nikonyo juruot moko mi kabedo ma bor ging’ei lemandha.”

I andha, jurwei moko mi cokiri ma tung’ tung’ mi theng ng’om maeno gimbe ku copo mi cirweyo i kabedo ma bor. Ento jurwei ceke mi cokiri, kadok ju m’utii, gitimo kero nirweyo mii i kabedo ceke ma cokiri migi rweyo i ie. Pieno, i oro 2017, wend dhanu m’ucokiri i Poi pi tho pa Yesu i adhura adek maeno zoo ubino rom ku wel mi jurwei wang’ ario, niwacu nusu pa dhanu mir adhurane zoo gibino. Ma jiji mbe, kaka moko ci ma waromo rweyo i ie, fodi “tic pa Rwoth” utie lee ma wacopo timo.​—1 Kor. 15:58.