1, 2. (a) Umego ku nyimego dupa giberweyo asu kadok dhanu dupa ubewinjogi ngo. Lapor migi ubekonyowa nenedi? (Nen cal mir acaki.) (b) Yesu uyero ang’o iwi tic mi rweyo lembanyong’a i “ng’om ma thugi ma dhe”? (Nen korolembe mi there.)

SERGIO GIKUD OLINDA ma min ot pare gitie juyab yo i États-Unis. Gin ario zoo oro migi udaru kadhu 80. Niai i kind nindo m’ukadhu, wotho udoko tek igi pi tiendgi ma beremo. Ento nja saa acel mi kugweno, gibed gicidho nirweyo i kakare moko ma dhanu bepong’ i ie i adhura migi, tap calu ma gibed gitimo niai con. Gicigibedo ceng’ini ku kaka moko ma mutukari becungo i ie, man gimio girasoma ni dhanu m’ubekadhu ku keca. Dhanu dupa bedieng’ ungo kugi, ento Sergio gikud Olinda gibedo asu kakagi man givonjo i bang’ ju m’ubeneno bang’gi. Ka saa abusiel mi dieceng’ uromo, gicokiri man gicaku dok yo yo i pacu. Urwonde de saa acel, gidok kendo kaka ma rom. Gibed girweyo kumeno wang’ abusiel kubang’ yenga, nitundo oro thum.

² Calu Sergio gikud Olinda, umego ku nyimego mange de dupa  gicaku rweyo niai con i kabedo ma gibekwo i ie, man gibemediri asu kadok dhanu ma pol ubewinjogi ngo de. Saa moko nyo in bende iberweyo i kabedo ma kumeno. Ka kumeno, wabefoyi lee, pilembe ibeciro man ibemediri asu nirweyo. * Ng’ei nia lapor peri ubetielo cwiny umego ku nyimego dupa, kadok ju ma gicaku rweyo niai con. Jaliew moko mi twodiri uyero kumae: “Kan aberweyo kud umego ku nyimego ma kumeno, lapor migi mio amora i kuma.” Jaliew ma kucelo uwacu kumae: “Cirocir migi tielo cwinya, man ketho an de amedara nirweyo ku cirocir man kud amora.” Jaliew mange ke uyero kumae: “Lapor migi mulo adundena lee mandha.”

3. I thiwiwec maeni, wabidwoko wang’ penji adek ma kani, man dwokowang’ penjine bikonyowa nenedi?

³ I thiwiwec maeni, wabidwoko wang’ penji adek ma e: Lembang’o ma copo turo cwinywa saa moko? Nicego nying’ thelembene tie ang’o? Lembang’o ma bikonyowa kara wamedara nicego nyingwa ku cirocir? Dwokowang’ penji maeno bitielo cwinywa kara wamedara asu nitimo tic mi rweyo lembanyong’a ma Yesu umio iwa.

4. (a) Paulo ugam uwinjere nenedi kinde ma Juyahudi ma pol gijai i kum lembanyong’a? (b) Pirang’o ewinjere kumeno?

⁴ Nyo cwinyi daru tur de nindo moko pilembe dhanu mi kabedo m’iberweyo i ie gibewinjo ngo lembanyong’a mi Ker? Ka kumeno, icopo winjiri calu ma jakwenda Paulo de ugam uwinjere ko. Erweyo lembanyong’a pi oro 30, man ekonyo dhanu dupa nidoko Jukristu. (Tic. 14:21; 2 Kor. 3:2, 3) Re Juyahudi ma pol gidoko ngo Jukristu, pilembe dupa m’i kindgi gikwero niwinje, man jumoko ginyayu kadok ragedo i kume. (Tic. 14:19; 17:1, 4, 5, 13) Paulo uwinjere nenedi kinde ma gijai i kum lembanyong’a m’eberweyo? Eyero kumae: “Can ma dwong’ man remo ma thum ungo de ni i adundena.” (Rum. 9:1-3) Pirang’o can umondo i ie thorukeno? Pilembe emaru nirweyo lembanyong’a man emaru dhanu lee magwei. Paulo ubed udieng’ akeca pi Juyahudi, uketho can umondo i ie kinde ma gikwero kisa pa Mungu.

5. (a) Lembang’o ma cwaluwa nirweyo lembanyong’a? (b) Pirang’o cwinywa copo tur saa moko?

⁵ Calu Paulo, wan de waberweyo pilembe wabedieng’ pi dhanu man wabemito nikonyogi. (Mat. 22:39; 1 Kor. 11:1) Lembe ma wakadhu kud i ie uketho wang’eyo cuu nia gin ma mio mutoro mandha i kwo utie kende kende nitimo ni Yehova. Wabemito wakony dhanu mange de ginwang’ mutoro mandha i kwo migi. Eno re m’uketho wabed waol ungo nikonyogi kara giponj lemandha iwi Yehova man iwi lembakeca pare pi dhanu. Etie ve wabetero giramia moko ma cuu ni ng’atini, man wayero ire kumae: ‘Wakweyi, timba jol giramia maeni.’ Pieno, kan ekwero giramiane, can copo mondo i adundewa, calu m’ugam umondo i adunde Paulo. Can maeno nyutho ngo nia wambe ku yioyic, ento emondo i iwa pilembe wamaru dhanu lee mandha. Pieno, kadok saa moko cwinywa copo tur de, wamedara asu nirweyo. Wacopo bedo ku paru ma rom ku pa nyamego Elena m’utie jayab yo oro daru kadhu 25, m’uyero kumae: “Anwang’u nia etie yot ungo nirweyo lembanyong’a. Ento, tic mange mbe ma mio ira mutoro lee nisagu maeni.”

6. Wabidwoko wang’ penji ma kani kawoni?

⁶ Ang’o m’ubenyutho nia wacopo nwang’u adwogi ma ber i lembanyong’a kaka  moko ci ma waberweyo i ie? Pi nidwoko wang’ penji maeno, wakenen lapor ario ma Yesu umio, m’ubenyutho nia ukwayu ‘waceg nyingwa.’ (Mat. 13:23) Laporne mi kwong’o uweco iwi tiend ulok.

7. (a) I lapor ma Yesu umio, “jatipodho” tie ng’a, “tiend ulok” tie ng’a, man “jange” ke tie ng’a? (b) Penji ma kani m’ukwayu wakedwok wang’e?

⁷ Som Yohana 15:1-5, 8. I lapor maeni, Yesu ukoro nia “jatipodho (jafurpodho)” tie Yehova, “tiend ulok” tie en e Yesu, man “jange” * ke tie julubne. I ng’eye, Yesu uyero ni jukwenda pare kumae: “I maeni Vwa doko dwong’ ya wucego nyingwu dupa; man [wubenyuthuru nia wu] julubna.” Dong’, nicego nying’ thelembene tie ang’o? I lapor maeni, Yesu unyutho ngo nia nying’ ma jucegone utie ang’o i andha, ento eyero lembe moko ma copo konyowa nidwoko wang’ penji maeno.

8. (a) I lapor ma Yesu umio, pirang’o nicego nying’ thelembene tie ngo niketho dhanu dok julub? (b) Yehova bekwayu lembe ma nenedi i bang’wa?

⁸ Yesu uyero pi Won kumae: “Ku ba janga ceke ma ni i ia ma cego nyinge ngo, ekabe woko.” Wec maeno ubenyutho nia wacopo bedo jurutic pa Yehova kende kende ka wabecego nyingwa. (Mat. 13:23; 21:43) I lapor maeni, nicego nying’ thelembene tie ngo niketho dhanu dok julub. (Mat. 28:19) Pilembe ka nwang’u utie kumeno, nwang’u Jumulembe ma fodi gikonyo ngo kadok ng’atu acel de nidoko jalub pa Yesu, gitie ve jangyen ma cego nyinge ngo. Re tie kumeno ngo! Pirang’o? Pilembe wacopo diyo ngo dhanu adiya nia gidok julub. Yehova tie Mungu ma jamer, man eromo kwayu ngo nia watim lembe ma wacopo ngo. Ento ebed ekwayu watim kende kende lembe ma wacopo.​—Poi. 30:11-14.

9. (a) Wacopo cego nyingwa nenedi? (b) Wabiweco iwi lapor ma kani?

⁹ Dong’ nicego nying’ thelembene tie ang’o ke? Ubenen kamaleng’ nia nicego nying’ utie nitimo tic ma wan ceke wacopo timo. Tic ma kani? Yehova umio ni jurutic pare ceke tic mi rweyo lembanyong’a mi Ker pare. * (Mat. 24:14) Lapor ma Yesu umio iwi jacoikodhi bikonyowa ninyang’ i lembuno ma ber. Wakewec iwi laporne.

10. (a) I lapor ma Yesu umio iwi jacoikodhi, kodhi tie ang’o, man ng’om ma jucoye i ie ke tie ang’o? (b) Tiend nganu copo cego ang’o?

¹⁰ Som Luka 8:5-8, 11-15. I lapor pa jacoikodhi, Yesu ukoro nia kodhi utie “lem pa Mungu,” niwacu rwonglembe mi Ker pa Mungu. Ng’om ma jucoye i ie ke utie adunde dhanu. Kodhi m’upodho i ng’om ma ber utwi, edongo man edoko yen ma zoo. I ng’eye, “ecego nyinge, acel bang’ dak.” Ka nwang’u yen maeno ubino tiend nganu, nwang’u nyinge m’ecopo cego tie ang’o? Nyo nwang’u ecopo cego de tiend nganu? Ungo, nwang’u ecego nying’ kodhi, ma i ng’eye bidongo man bidoko bende tiend nganu. I lapor maeno, Yesu ukoro nia nying’ kodhi acel ucego mange 100. Eno ubeponjowa ku lembang’o iwi tic mi lembanyong’a?

11. (a) Lapor pa jacoikodhi ubeponjowa nenedi iwi tic mwa mi lembanyong’a? (b) Wacego kodhi ma nyen nwang’u wabetimo ang’o?

¹¹ Saa ma junyodo mwa ma gi Jukristu, kunoke Jumulembe mange giponjowa wang’ ma kwong’a iwi Ker pa Mungu, ubino ve gicoyo kodhi i ng’om ma ber. Kinde ma gineno nia wajolo lembene, gibino ku mutoro ma lee. Kodhi ma gicoyone utwi man emedere nidongo nitundo edoko ma cego nyinge. Calu ma walar wakoro, tiend nganu  cego ngo tiend nganu mange, ento ecego nying’ kodhi. Kumeno bende, nyingwa ma wacego tie ngo dhanu m’ubedoko julub ma nyen, ento tie kodhi ma nyen mi Ker. * Wacego nying’ne nenedi? Kinde ma wabeyero pi Ker pa Mungu ni dhanu mange, etie ve wabenyayu kit kodhi ma rom ma jular jucoyo i adundewa. (Lk. 6:45; 8:1) Pieno, ka wabemedara nirweyo lembanyong’a mi Ker pa Mungu, nwang’u ‘wabecego nyingwa’ ku cirocir.

12. (a) Lapor ma Yesu umio iwi tiend ulok man iwi jacoikodhi ubemio iwa ponji ma kani? (b) Ponji maeno uketho ibewinjiri nenedi?

¹² Lapor ma Yesu umio iwi tiend ulok man iwi jacoikodhi ubemio iwa ponji ma kani? Gin ma nyutho nia ‘wabecego nyingwa’ utie ngo kite ma dhanu gibejolo ko lembe mwa. Ento wanyutho nia wabecego nyingwa kende kende ka wabemedara nirweyo lembanyong’a. Jakwenda Paulo de uyero wec m’urombo ku maeno; ewacu kumae: “Ng’atuman binwang’u sukulia pare gire rom ku tic pare gire.” (1 Kor. 3:8) Andha, Yehova bimio iwa sukulia pi tic mwa, ento ungo pir adwogi mi tic mwa. Nyamego Matilda, ma tie jayab yo kawoni oro doko 20 uyero kumae: “Atie ku mutoro ma lee dit ning’eyo nia Yehova bemio iwa sukulia pi kero ma wabetimo.”

13, 14. Nimakere ku Jurumi 10:1, 2, pirang’o Paulo umedere asu nirweyo?

¹³ Lembang’o ma bikonyowa ‘nicego nyingwa’ ku cirocir? Wakeng’ii i lapor pa Paulo cuu. Waponjo nia can umondo lee i Paulo pilembe Juyahudi gikwero niwinjo rwonglembe mi Ker. Re eweko ngo nyanok de nirweyo igi. Ekoro paru m’ebino ko i wigi kumae: “Yeny mir adundena man kwayukwac para ma ba Mungu en e pigi, ya gibothi. Kum anyutho pigi nia gibedo kud amora pi Mungu, endre calku ng’eyong’ec ungo.” (Rum. 10:1, 2) Pirang’o Paulo umedere asu nirweyo lembanyong’a?

¹⁴ Mi kwong’o, Paulo uyero nia ‘yeny mir adundene’ re m’ubed ucwale nirweyo ni  Juyahudi. Ebino kud ava ma lee mi konyogi kara gibothi. (Rum. 11:13, 14) Mir ario, etimo ‘kwayukwac [pigi i] ba Mungu.’ Paulo ukwayu Yehova ukony ng’atuman acel acel m’i kind Juyahudi niyio rwonglembe mi Ker. Mir adek, Paulo uyero kumae: “Gibedo kud amora pi Mungu.” Paulo ubed uketho wie i kum kite ma beco mi dhanu, man ebedo ku genogen nia gicopo timo ni Yehova nindo moko. Eng’eyo nia Juyahudi maeca ma gibino weg amora, gicopo doko bende julub pa Kristu ma weg amora calu en.

15. Wacopo lubo lapor pa Paulo nenedi? Kemii lapor moko.

¹⁵ Wacopo lubo lapor pa Paulo nenedi? Mi kwong’o, wacikara nibedo kud ava ma lee mi yenyo ‘dhanu ma gitie ayika pi kwo ma rondo ku rondo.’ Mir ario, wakwai Yehova ukony dhanu ma gitie kud adunde ma ber kara gijol lembanyong’a ma waberweyo igi. (Tic. 13:48; 16:14) Nyamego Silvana, ma tie jayab yo kawoni oro kago 30 betimo kumeno. Eyero kumae: “I wang’ nicidho i tic mi rweyo lembanyong’a, alar akwayu Yehova ukonya abed ku nen ma ber iwi dhanu.” M’umedo maeno, wacikara nirwo bende nia jumalaika gitel wiwa kara wanwang’ dhanu ma gitie ayika niwinjowa. (Mat. 10:11-13; Nyu. 14:6) Umego Robert ma tie jayab yo kawoni oro daru kadhu 30 uyero kumae: “Etie lembe mi mutoro ma lee dit nitimo tic karacelo ku jumalaika pilembe ging’eyo lembe ma juwinj mwa gibekadhu kud i ie.” Mir adek, ukwayu watim kero niketho wiwa i kum kite ma beco mi dhanu, man nibedo ku genogen nia gicopo timo ni Yehova nindo moko. Jadit cokiri moko ma nyinge Carl m’ulimo kawoni oro daru kadhu 50, uyero kumae: “Abed asayu nineno kadok lembe moko ma nyanok m’unyutho nia ng’atini utie kud adunde ma ber. Ku lapor, nyo ebevonjo, eyimo ngo wang’e, kunoke ebepenjo penji pi ninyang’ andha.” Ka wabetimo lembe adek maeno ceke, ‘wabicego nyingwa’ ku cirocir calu Paulo.

16, 17. (a) Ponji ma kani ma wacopo nwang’u i Eklizia 11:6? (b) Tic mwa mi lembanyong’a copo bedo ku matoke ma kani iwi ju m’ubenenowa?

¹⁶ Wiwa ucikere ngo niwil nia tic mwa mi rweyo lembanyong’a copo bedo ku matoke ma ber iwi dhanu, kadok wabeneno nia ve gibewinjowa ngo. (Som Eklizia 11:6.) Dhanu benenowa ka waberweyo. Gineno kite ma wakendara ko ma ber, woro mwa man kite ma wabeweco ko nzanza ku dhanu. Lembuno copo telo nen migi, man yo yo, kadok ju ma gitie ku paru ma rac i wiwa de, gicopo loko paru migine. Sergio gikud Olinda ginwang’u nia eno tie lemandha.

¹⁷ Sergio ukoro kumae: “Pi nindo moko, wacidho ngo kaka ma wabed warweyo i ie pilembe wabino remo. Kinde ma wacaku cidho kendo, dhanu caku penjowa kumae: ‘Ang’o m’ubino cerowu? Saa ma wubino mbe, avenwu negowa lee dit.’” Olinda ke umedo kumae kud anyong’a: “Ju ma ringo mutukari gibed gimothowa kud i mutukari migi man jumoko m’i kindgi giyero iwa nia, ‘Tic ma ber!’ Gibed gikwayu bende wamii igi gazeti.” Nindo moko, ng’atu moko ubino kaka ma giberweyo i ie ku jamtic ma jukpero buku i wie (présentoir), emio igi thiwe man efoyogi pi tic ma gibetimo. Lembuno uwang’u i Sergio gikud Olinda mi tuko ngo.

18. Pirang’o ibimediri asu ‘nicego nyingi’ ku cirocir?

¹⁸ Kan ‘ibecero ngo cingi,’ niwacu ibemediri asu niyero pi Ker pa Mungu ni jumange, ng’ei nia ibediko cingi i kum tic ma pire tek dit mi mio “lembatuca ni thek ceke.” (Mat. 24:14) M’usagu zoo, ibibedo ku mutoro ma dit pilembe ing’eyo nia ibenyayu anyong’a i Yehova, kum emaru dhanu ceke ma “gicego nying’gi” ku cirocir!