CALU ma wabekwo i ng’om ma lembe ma reco usagu i ie, etie yot ungo ninwang’u kwiocwiny. Re kadok watie ku nyathi kwiocwiny moko de, wang’ ma pol gwoke bebedo tek. Dong’, juk ma kani mi Biblia ma copo konyowa kara wanwang’ kwiocwiny mandha man ma galu? Man waromo konyo dhanu mange nenedi kara gin bende ginwang’ ayi kwiocwiny maeno?

Wacopo kwo ku kwiocwiny mandha kende kende ka wabenwang’ara ngo i wang’ ariti moko, man ka wambe kud apidacwiny. Bende, wacikara nibedo ku winjiri ma ber mandha ku dhanu mange. Re m’usagu zoo, kara wanwang’ kwiocwiny mandha man ma galu, wacikara nibedo ku winjiri ma ceng’ini ku Mungu. Dong’, kara wabed ku winjirine, wacopo timo ang’o?

Pi ninyutho nia wageno Mungu man wabemaru nibedo ku winjiri ma ceng’ini kude, wacikara niworo cik pare ma saa ceke tie pwe. (Yer. 17:7, 8; Yak. 2:22, 23) Ka wabetimo kumeno, en de ebicoro ceng’ini kudwa man ebimio iwa kwiocwiny mandha mir adunde. Giragora pa Isaya 32:17 uwacu kumae: ‘Tic mi bedopwe bibedo kwiocwiny; man nying’ bedopwe, en e bedo yo, ku genogen (bedomoth) mi nja.’ Wacopo nwang’u kwiocwiny mandha mir adunde, nwang’u wabeworo cik pa Yehova kud adunde mwa ceke.​—Isa. 48:18, 19.

Gin mange ma bikonyowa kara wabed ku kwiocwiny mandha, tie giramia ma pire tek ma Wegwa mi polo umio, niwacu tipo pare maleng’.​—Tic. 9:31.

I kind thenge abung’wen mi “nying’ tipo” ma jakwenda Paulo ukwanu, mir adege tie kwiocwiny. (Gal. 5:22, 23) Tipo maleng’ re ma mio kwiocwiny mandha; pieno wacikara niweko etel wiwa kara wabed ku kwiocwinyne. Wakenen yo  ario ma tipo maleng’ pa Mungu copo konyo kowa ninwang’u kwiocwiny mandha.

Mi kwong’o, wacopo nwang’u kwiocwiny mandha nwang’u wabesomo kubang’ ceng’ Lembe pa Mungu, ma tipo pare maleng’ re m’uyuyo i wie. (Zab. 1:2, 3) Ka wabenyamu i lembe ma wabesomo, tipo maleng’ konyowa ninyang’ i paru pa Mungu iwi lembe dupa. Ku lapor, wanyang’ nia Mungu tie won kwiocwiny, man nia pirang’o kwiocwiny pire tek lee i ie. Man ka wabetio ku lembe ma wabeponjo i Biblia, wabedo ku kwiocwiny lee akeca i kwo mwa.​—Rie. 3:1, 2.

Mir ario, wacikara nikwayu Mungu umii iwa tipo pare maleng’. (Lk. 11:13) Yehova ung’olo nia ka watimo kumeno, ‘kwiocwiny [pare], ma sagu ng’eyong’ec ceke, bikuro adundewa ku pidoiwa i Kristu Yesu.’ (Flp. 4:6, 7) Ka wabekwayu Yehova kubang’ nindo nia ekonywa ku tipo pare maleng’, ebipong’o adundewa ku kwiocwiny mandha, m’emio kende kende ni ju ma gitie ku winjiri ma ceng’ini kude.​—Rum. 15:13.

Dhanu moko gituc nitio nenedi ku juk maeno mi giragora, man gitimo alokaloka ma kani kara gibed ku kwiocwiny ku Yehova, man ku dhanu mange?

Tin eni, cokiri pa Yehova utie ku dhanu moko ma i wang’e gilar gibino ‘jung’ecwiny,’ re kawoni gidoko dhanu ma dieng’ pi jumange, dhanu ma ber, ma cirolembe, man gitie ku kwiocwiny ku jumange. * (Rie. 29:22) Ku lapor, wakenen kite m’umego acel ku nyamego moko gituc niweko ko ng’ecwiny, man gitimo kero nibedo ku kwiocwiny ku jumange.

David ubino ku timo ma rac, uketho wec pare de ugam udoko rac. I wang’ nithiero kwo pare ni Mungu, ebed eweco kwa rac ku nying’ jumange man kan ebeweco ku jupagi, eyero zoo lembe ma tang’. Yong’ei nindo, David unwang’u nia ukwayu elok timo pare man edok won kwiocwiny. Etimo ang’o? Eyero kumae: “Akwong’o nitio ku juk mi Biblia i kwo para, e nok nok acaku nyutho woro ni jufwa.”

Rachel de kite m’edongo ko uketho timo pare ubino rac. Eyero kumae: “Nitundo kawoni,  ng’ecwiny bemaka pio pio pilembe adongo i ot ma dhanu zoo kwiny akwinya i ie.” Lembang’o m’ukonye kara edok won kwiocwiny? Eyero kumae: “Abed arwo man abed akwayu kony i bang’ Yehova.”

Lapor pa David man pa Rachel ubenyutho nia ka wabeworo cik ma nwang’ere i Biblia, man wabekwayu Mungu ukonywa ku tipo pare maleng’, waromo nwang’u kwiocwiny. Kadok wabekwo i ng’om m’upong’ ku rop i ie de, ma jiji mbe, wacopo bedo ku kwiocwiny ku wedi mwa man ku Jukristu wadwa. M’uweko maeno, Yehova ubekwayu nia ‘wabed ma cwinywa kwio ku dhanu ceke.’ (Rum. 12:18) Nyo lembuno copere andha? Man mugisa ma kani ma wacopo nwang’u ka wabeii nibedo ku kwiocwiny ku jumange?

Nikadhu kud i tic mi rweyo lembanyong’a, wabekwayu dhanu giwinj rwonglembe mi kwiocwiny iwi Ker pa Mungu. (Isa. 9:6, 7; Mat. 24:14) Wang’ ma pol, dhanu dupa gijolo rwonglembene. Pieno, dong’ gidieng’ ungo akeca ku lembe ma reco m’ubekadhu i ng’etgi man ng’ecwiny de negogi ngo pi lembene. Ento gitie ku genogen mandha pi nindo m’ubino, man gibetimo kero ‘niyenyo kwiocwiny, man niriemo toke.’​—Zab. 34:14.

Ento jumoko jolowa ngo ka watero igi lembanyong’a wang’ ma kwong’a. (Yoh. 3:19) Re asu, tipo maleng’ pa Mungu konyowa nirweyo igi ku woro man kwiocwiny. Ka wabetimo kumeno, nwang’u wabelubo telowic ma Yesu umio pi tic mi rweyo lembanyong’a. I Matayo 10:11-13, eyero kumae: “Ka wumondo de i ot, wumothe. Man tek ode romo, wek kwiocwiny mu bin i wie: ento tek eromo ngo, wek kwiocwiny mu dwog i beng’wu.” Ka wabelubo telowic maeno, waromo weko pacu pa ng’atini ku kwiocwiny man wacopo bedo ku genogen nia ebiwinjowa macen.

Bende, wacopo ketho kwiocwiny ka wabeweco ku jurutic pa gavmenti ku woro, kadok ku ju ma gimaru ngo tic mi lembanyong’a. Ku lapor, gavmenti mi ng’om moko mir Afrika ubino ku nen ma rac i wiwa, uketho ekwero nimio iwa twero mi giero Udi Ker i ng’ombe. Pi niyiko lembe maeno ku kwiocwiny, umego moko ma con ular ubedo misioner i ng’om maeca ucidh uweco kud Ambasader mi ng’ombe, ma nwang’ere i Londres, i ng’om mir Angleterre. Ecidh ekoro ire nia tic ma Jumulembe pa Yehova gibetimo i ng’om ma thugi ambasaderne utie tic mi kwiocwiny. Rombo migi ubino ku matoke ma kani?

Umegone ukoro kumae: “Kinde m’atundo, aneno kit bongu ma dhaku ma jolo dhanu kakeca ukendo, e anyang’ nia etie dhanu mi thek moko m’ang’eyo dhok migi. Agam amothe ku dhu thugi. Lembuca uwang’u ie, uketho epenja kumae: ‘Wacopo konyi nenedi?’ Ayero ire ku woro nia amito niweco kud Ambasader. Ndhundhu elwong’e i telefon man Ambasaderne uwok i bang’a man emotha ku dhu thugi. I ng’eye, ewinja kilili kinde m’abino koro ire nia tic ma Jumulembe gibetimo i ng’om ma thugi utie tic mi kwiocwiny.”

Lembe ma umego maeno ukoro ni Ambasader ku woro uketho enyang’ ma ber, man paru ma rac m’ebino ko iwi tic mwa ugam uwok kud i wie. Nindo moko i ng’eye, gavmenti mi ng’om maeca mir Afrika udok uyio nimio iwa twero mi giero Udi Ker. Lembuno unyayu anyong’a lee mandha i umego ku nyimego! Lapor maeno ubeponjowa nia ka wabenyutho woro ni dhanu mange, wacopo nwang’u adwogi dupa ma beco, calu ve kwiocwiny.

Tin eni, dhanu pa Yehova gibekwo ku kwiocwiny mandha i kindgi i paradiso mi tipo. In de icopo medo kwiocwinyne kan ibetimo kero nicego thenge maeno mi nying’ tipo i kwo peri. M’usagu zoo, kan itimo kumeno, ibifoyo i Yehova, man i nindo m’ubino, ebimio iri kwiocwiny ma lee man ma rondo ku rondo i ng’om ma nyen.​—2 Pet. 3:13, 14.