1-2. Umego mwa ma dupa gibenwang’iri ku peko ma kani?

JAKWENDA Paulo utielo cwiny Timoteo, man bende cwiny Jukristu ceke nia gitim tic migi mi rweyo lembanyong’a cuu. (2 Tim. 4:5) Pieno, dong’ wan ceke waworu juk maeno ma Paulo umiyo kara watimu tic pa Mungu ku tego mwa ceke. Re saa moko lembene tie yot ungo, pilembe ni umego ku nyimego mwa ma pol, tic mi rweyo lembanyong’a utie lembe m’ukwayu tegocwiny. (2 Tim. 4:2) Ku lapor, kepar pir umego mwa ma gibekwo i ng’om ma jucero iye tic mwa, kunoke ma jukwere akwera zoo i iye. Re gibemediri asu nirweyo lembanyong’a kadok ging’eyo nia lembene copo ketho jutwiyogi de!

² Dhanu pa Yehova gibenwang’iri ku peko ma tung’ tung’ ma copo turo cwinygi. Ku lapor, ju ma dupa gitimo tic duu pi saa ma lee kende kende pi nipong’o yeny mi juruot migi. Gimito nwang’u gitim lee i tic mi lembanyong’a, ento i thum pa yenga nwang’u dong’ giol. Jumange tego migi nok ni kum twoyo m’umoko i kumgi ndikindiki, kunoke pi oro migi ma dong’ ucidho uketho kadok niwok kud i pacu migi de tie lembe ma tek igi. Jumange ke giparu nia pigi dong’ tie tek ungo i wang’ Yehova. Nyamego Mary * uyero kumae: “Atimo tego para ceke pi ninyego i dhu paru ma rac mi turcwiny m’atie ko man lembene miyo ira olo. I ng’eye, anwang’u nia atie won kosa kum lembene camu ira saa man kero ma nwang’u umaku arwey ko lembanyong’a.”

3. Wabiweco iwi lembang’o i thiwiwec maeni?

³ Kadok wabenwang’ara ku peko ma nenedi de, re Yehova miyo iwa tego ma wanyeg ko ku pekonegi man wamedara asu nitimo ire nimakere ku copo mwa. I wang’ niweco iwi kite ma Yehova ubekonyo kowa tin, wakewec iwi ayi m’egam ekonyo ko Paulo giku Timoteo i tic migi mi lembanyong’a kadok gibino nwang’iri ku peko ma tung’ tung’.

4. Paulo unyego ku peko ma kani?

⁴ Paulo ugam unwang’ere ku peko dupa. Ebino ku yeny mi kony pa Yehova asagane kinde ma judegine gifwode, ging’ure, man gitwiye i kol. (2 Kor. 11:23-25) Paulo umung’o ngo, eyero ngbeng’ nia saa moko ugam ukwayere nia enyeg i dhu pidoic mi turcwiny m’ebino ko. (Rum. 7:18, 19, 24) Ebino bende ku peko mi remokum m’ubedo ire ve ‘ukudho m’i ring’kum’ m’emito nia nwang’u Mungu ukabi.​—2 Kor. 12:7, 8.

5. Paulo utimo lembang’o kadok ebino nwang’ere ku peko dupa?

⁵ Yehova umiyo tego ni Paulo kara emedere ku tic pare mi rweyo lembanyong’a kadok kud i kind peko dupa. Wakewec pi gin ma Paulo utimo. Ku lapor, kinde ma jutwiye i kol i Roma, erweyo lembanyong’a kud amora ni judong Juyahudi man cicopere ni judongo pa gavmenti de. (Tic. 28:17; Flp. 4:21, 22) Erweyo bende lembanyong’a ni juaskari dupa ma m’ubed ukuro kum ubimo, man ni dhanu ceke m’ubino liewe. (Tic. 28:30, 31; Flp. 1:13) I saa maeno ku kony mi tipo ma leng’, ekiewo waraga m’ukonyo Jukristu mi rundi maeca, man m’ubekonyo bende Jukristu mi rundi mwa tin. Lapor pa Paulo umiyo tego i kum umego mi cokiri mi Roma uketho ginwang’u ‘tegocwiny mi yero lembe pa Mungu ma lworo mbe.’ (Flp. 1:14) Kadok saa moko Paulo unwang’u nia ecopo timo ngo lee calu ma nwang’u emito de, re etimo nimakere ku copo pare, uketho ‘lembanyong’a urweyere nisagu ni kume.’​—Flp. 1:12.

6. Nimakere ku 2 Jukorinto 12:9, 10, ang’o m’ukonyo Paulo kara etim tic pare mi lembanyong’a?

⁶ Paulo ung’eyo nia lembe ceke m’etimo i tic pa Yehova ubino ni kum tego pa Mungu, ento ni kum tego pare gire ngo. Eyero nia tego pa Mungu ‘udwoke ndhu cuu i ng’ico pare.’ (Som 2 Jukorinto 12:9, 10.) Yehova umiyo tego ni Paulo nikadhu kud i tipo ma leng’ kara etim tic mi lembanyong’a cuu kadok ebino nwang’ere ku ragedo, jutwiye, kunoke ebino nwang’ere ku peko mange de.

7. Timoteo ubino ku peko ma kani ma nwang’u copo cere nitimo tic pare mi rweyo lembanyong’a cuu?

⁷ Timoteo ma jawodh Paulo de ujengere iwi tego pa Mungu pi nitimo tic mi  lembanyong’a. Elubo tok Paulo kinde m’ebino cidho i woth pare ma bor mi misioner. Bende, Paulo udok uore ecidho i woth mange pi niciliewo man nitielo cwiny cokiri ma tung’ tung’. (1 Kor. 4:17) Saa moko nyo Timoteo unwang’u nia eromo ngo. Nyo pi thelembe maeno re m’uketho Paulo uyero ire nia “kud iyi ng’atu moko cei ya fodi i nyathin.” (1 Tim. 4:12) Man saa maeno, Timoteo de ubino kud ukudho pare mi ring’kum; niwacu ‘tho ma betime.’ (1 Tim. 5:23) Ento eng’eyo nia tego mi tipo ma leng’ pa Yehova bimiyo ire kero m’erwey ko lembanyong’a man m’ekony ko umego pare.​—2 Tim. 1:7.

8. Yehova miyo tego ni jurutic pare tin nenedi?

⁸ Tin Yehova bemiyo ‘tego ma sagu apila’ ni jurutic pare kara gimediri nitimo ire ku gwoko bedoleng’. (2 Kor. 4:7) Wakewec kawoni iwi piny ang’wen ma Yehova umiyo iwa kara umii iwa tego, man ukonywa nigwoko bedoleng’ mwa ire: rwo, Biblia, Jukristu wadwa, man tic mwa mi rweyo lembanyong’a.

9. Rwo copo konyowa nenedi?

⁹ Wanwang’u tego nikadhu kud i rwo. Calu m’ugorere i Juefeso 6:18, Paulo ubekwayuwa nia warwo i bang’ Mungu “ku ba nindo ceke.” Mungu bidwoko wang’ rwo mwa man ebikonyowa. Jonnie ma kwo i ng’om mi Bolivie uneno kite ma Yehova ukonye ko kinde m’ebino kadhu kud i peko dupa. Dhaku pare ku jurunyodo pare ario zoo twoyo ma pek upodho i wigi i saa ma rom. Ebino lembe ma tek ni Jonnie nitimo lembe ceke m’ukwayere pi nipong’o yeny mi dhanu adek eno zoo. Min utho man twoyo pa dhaku pare ku pa won de uting’o saa ma lee pi nikey. Jonnie ukoro pi peko maeno kumae: “Kinde m’abino i adieng’a maeno, gin m’ubed ukonya saa ceke utie nikoro kite m’awinjara ko ni Yehova nikadhu kud i rwo.” Yehova umiyo tego ni Jonnie kara ecir peko pare. Ronald ma tie jadit cokiri i ng’om mi Bolivie uwinjo nia min utie ku twoyo mi kanser. I ng’ei dwi acel ci, min ne udok utho. Ang’o m’ukonyo Ronald i saa mi peko maeno? Ewacu kumae: “Kan aberwo i bang’ Yehova, akoro ire kite ceke m’abewinjara ko. Ang’eyo nia enyang’ kuda ma ber nisagu ng’atu moko ci, kadok nisagu kite m’anyang’ ko kuda gira de.” Saa moko wacopo nwang’u nia waromo ciro ngo peko ma wabenwang’ara ko man wacopo koso gin ma wayer i rwo mwa. Ento Yehova ubekwayuwa nia warwo i bang’e kadok wanwang’u nia etie tek niyero paru mwa man kite ma wawinjara ko ire i wec.​—Rum. 8:26, 27.

10. Calu m’ugorere i Juebrania 4:12, pirang’o pire tie tek nisomo Biblia man ninyamu i gin ma wabesomone?

¹⁰ Wanwang’u tego nikadhu kud i Biblia. Tap calu Paulo de ugam ujengere iwi Lembagora pi ninwang’u tego man jukocwiny, wan bende wacikara nitimo kumeno. (Rum. 15:4) Kinde ma wabesomo Lembe pa Mungu man wabenyamu iye, Yehova copo tiyo ku tipo pare ma leng’ pi nikonyowa wanyang’ i kite ma Lembagorane copo konyo kowa i peko ma wanwang’ara i iye. (Som Juebrania 4:12.) Ronald ma waweco pire uwacu kumae: “Adwoko foyofoc lee pilembe atimo kero nisomo Biblia kokoro kubang’ uthieno. Anyamu lembe lee iwi kite ma tung’ tung’ pa Yehova, man iwi ayi m’ebegwoko ko dhanu pare. Lembuno miyo tego i kuma.”

11. Biblia umiyo tego nenedi i kum nyamego moko ma can ubino i cwinye?

¹¹ Lembe pa Mungu ma wabenyamu iye  bikonyowa nibedo ku nen ma ber iwi peko ma wanwang’ara ko. Wakewec iwi kite ma Biblia ukonyo ko nyamego moko m’ubino ku can i cwinye pi cware m’utho. Jadit cokiri moko uyero ire nia ecopo nwang’u ponji lee kan esomo buku pa Yob. Kinde m’ecaku somo bukune, paru ma kwong’a m’ubino i wiye utie nicayu paru ma rac ma Yob ubino ko. I paru pare ebino juko Yob kumae: “Yob! Kud ipar pi peko peri kende!” Ento i ng’eye, edog enwang’u nia karaman paru pare de nwang’u urombo tap ku paru pa Yob. Lembuno ukonye uketho eloko nen pare man enwang’u tego m’enyego ko ku can m’ebino ko i cwinye pi cware m’utho.

12. Yehova miyo tego i kumwa nenedi nikadhu kud i bang’ umego ku nyimego?

¹² Wanwang’u tego nikadhu kud i bang’ Jukristu wadwa. Yo mange ma Yehova miyo ko iwa tego utie nikadhu kud i bang’ Jukristu wadwa. Paulo ukiewo nia ava neno umego ku nyimego pare mi tipo ubenege ‘kara gijukiri i kindgi.’ (Rum. 1:11, 12) Mary ma waweco pire umaru nibedo kud umego ku nyimego. Eyero kumae: “Pi nikonya, Yehova utiyo kadok kud umego ku nyimego ma ging’eyo ngo pi peko para. Giyero ira wec kunoke gioro ira karathasi mi tielocwiny m’ubino tap gin m’abino ku yenyne. Lembene ukonya niweco ku nyimego mange ma gibino ku kit peko ma rom, man anwang’u ponji i kum gin ma gitimo. Man judong cokiri ke gibed giketho awinjara nia pira tie tek i cokiri.”

13. Wacopo tielo cwinywa nenedi i kindwa i coko?

¹³ Kud i kind kaka ma beco ma wanwang’u iye tielocwiny, acel utie coko. Pieno tek icidho i coko, nyo ecibedo ber ungo nia itiel cwiny jumange ku wec mi mer man inyuth igi foyofoc? Ku lapor, i wang’ coko, jadit cokiri moko ma nyinge Peter uyero kumae ni nyamego moko ma won ot pare tie ngo Jamulembe pa Yehova: “Ing’eyo, nineni anena kende keni ci utie lembe m’ubetielo cwinywa lee. In kud awiya peri abusiel wukoso ngo coko man wuyikuru pi dwoko wang’ penji.” Piwang’e ung’oy man edwoko ire ku foyofoc kumae: “Eno tie tap wec m’atie ku yeny mi winjo tin.”

14. Tic mi rweyo lembanyong’a konyowa nenedi?

¹⁴ Wanwang’u tego nikadhu kud i tic mi lembanyong’a. Kinde ma waberweyo lembanyong’a ni dhanu mange, wawinjara ma ber kadok nwang’u dhanune giwinjowa kunoke ngo de. (Rie. 11:25) Nyamego moko ma nyinge Stacy uneno ayi ma rweyo lembanyong’a miyo ko kero i kum dhanu. Kinde ma jukoyo wedi pare moko kud i cokiri, can umake man ewotho paru nia nwang’u ecopo timo lembe moko kara ekony wedi pare ma jukoyo. Niwodho parune kud i wiye ubino ire tek. Ang’o m’ukonye ninyego kud adieng’acwiny maeno? Tie tic mi rweyo lembanyong’a! Kinde m’eni tic mi lembanyong’a, eketho wiye zoo iwi dhanu m’eberweyo igi ma gitie ku yeny mi kony pare. Eyero kumae: “Saa maeno Yehova uketho anwang’u japonj Biblia moko m’utimo mediri pio pio. Lembuno utielo cwinya lee mandha. Lembe m’ukonya asaga i kwo para utie tic mi rweyo lembanyong’a.”

15. Lembe ma Mary uyero ubemiyo iri ponji ma kani?

¹⁵ Jumoko ni kum peko ma tung’ tung’ ma gibenwang’iri ko gicopo paru nia dong’ gimbe ku copo ma gitim ko lee i tic mi lembanyong’a. Tek in de ibewinjiri kumeno, poy nia anyong’a nego Yehova kan ibetimo ire i kadhiri m’icopo. Wakewec kendo iwi lapor pa nyamego Mary. Kinde  m’edok i kabedo ma juweco iye dhok mange, enwang’ere nia dong’ tije mbe. Ewacu kumae: “Pi kare moko, gin m’abed atimo i tic mi lembanyong’a ubino kende kende nibolo wec moko nyanok, nisomo verse mi Biblia, man nimiyo trakt.” Lembuno uketho enwang’ere nia tije mbe kan eporere ku dhanu ma giweco dhok ma kakeca cuu. Ento eloko paru pare. Ecaku nwang’u nia Yehova copo tiyo kude kadok ebeweco ngo dhokne cuu de. Eyero kumae: “Lembe ma Biblia ubeyero utie ngo lembe ma tek, man ecopo loko kwo mi dhanu.”

16. Ang’o ma copo konyo dhanu ma gigonjo i pacu ma re gimito girwey lembanyong’a?

¹⁶ Yehova neno ava mwa ma watie ko mi rweyo lembanyong’a, man anyong’a nege i kumwa kadok niwok kud i pacu utie iwa lembe ma tek de. Ecopo miyo iwa kaka ma warwey kudo lembanyong’a ni dhanu m’ubekurowa kunoke ni dokter man munganga m’umiyo iwa yath. Ka waporo tic mwa ma wabetimo kawoni ku ma wabed watimo con, lembene copo turo cwinywa. Ento ka wanyang’ i ayi ma Yehova ubekonyo kowa kawoni, wabinwang’u tego ma wacir ko peko moko ci kud anyong’a.

17. Nimakere kud Eklizia 11:6, pirang’o wacikara asu nimedara nirweyo lembanyong’a kadok wabeneno ngo adwogine pio pio?

¹⁷ Wang’eyo ngo nia kud i kind kodhi mi lemandha ma wapidho ma kani ma copo twi man ma copo dongo. (Som Eklizia 11:6.) Ku lapor, nyamego Barbara ma oro pare 80 ku wiye, berweyo lembanyong’a thiri thiri ku telefon man ku barua. I baruane moko acel eroyo Otkur ma Wiw mi nindo 1, dwi mir 3, 2014 (nen mi français); ma thiwie uwacu: “Ce que Dieu a fait pour vous.” M’umbe ning’eyo, eoro barua eno ni ng’atu moko ku min ot pare ma nwang’u jukoyogi kud i cokiri. Gibed gisomo gazetine kendo kendo. Won ot unwang’u nia edog ebedo ve Yehova ubeweco ire wang’ ku wang’. Gicaku cidho i coko man i ng’ei oro 27 ma gitimo woko, gidoko kendo Jumulembe pa Yehova. Kepar pi tielocwiny man tego ma Barbara unwang’u kinde m’eneno adwogi ma ber ma barua pare acel umiyo!

18. Wacikara nitimo ang’o kara Mungu umii iwa tego?

¹⁸ Yehova umiyo iwa piny dupa pi nikonyowa kara wanwang’ tego, calu ve rwo, Biblia, Jukristu wadwa, man tic mwa mi rweyo lembanyong’a. Ka wabetiyo ku piny maeno m’emiyo iwa, eca nwang’u wabenyutho nia watie ku genogen nia etie kud ava man copo mi konyowa. Dong’ wek saa ceke wajengara iwi Wegwa mi polo m’umito “enyuthre gire tek ni ju ma adundegi bedo dhu cu yor i bang’e.”​—2 Kei. 16:9.