THIWIWEC MIR 21
WER 107 Walub kit mer pa Mungu
Icopo timo ang’o pi ninwang’u jadhogi ma cuu mi gamiri?
“Ng’a ma copo nwang’u dhaku m’uromo? Valer pare ukadhu valer pa korai bor dit.”—RIE. 31:10, NWT.
I ADUNDO
Wabineno cik mir ukungu mi Biblia ma copo konyo ng’atini ning’iyo jadhoge ma cuu mi gamiri man ma copo konyo jumange mi cokiri ning’eyo kite ma gicopo konyo ko jumusuma ma gibemito gamiri.
1-2. (a) Ukwayu Jukristu ma jumusuma gilar gipar pi lembang’o i wang’ nicaku ng’eyiri pi gamiri? (b) “Ning’eyiri pi gamiri” thelembene tie ang’o? (Nen “Koro i wec.”)
NYO IBEMITO igemiri? I andha, gamiri ngo re m’utie gin ma kwong’a ma ketho junwang’u mutoro. Ento Jukristu ma dupa ma jumusuma, dok gibed aradu kunoke ju m’uteng’ini, gikuro nindo ma gibinwang’u iye jadhoggi mi gamiri kud ava ma lee. I wang’ nicaku ning’eyiri ku ng’atu moko pi gamiri, ukwayu ibed ku winjiri ma ceng’ini ku Yehova, ilar ibed ku sente m’uromo, man ing’eyiri cuu nia itie kit dhanu ma nenedi. a (1 Kor. 7:36) E kumeno, ebicopere iri ninwang’u mutoro i gamiri peri.
2 Ento wang’ ma pol, ebedo yot ungo ninwang’u jadhogjo ma cuu mi gamiri. (Rie. 31:10) Man kadok kinde m’inwang’u ng’atu moko m’iromo maru ing’ey cuu pi gamiri b de, re ebedo yot ungo nicaku the lembene. I thiwiwec maeni, wabineno gin ma copo konyo Jakristu ma jamusuma ninwang’u ng’atu ma copo bedo jadhoge ma cuu mi gamiri man wabiweco iwi ayi m’ecopo caku ko ning’eyere kude. Wabineno bende kite ma jumange mi cokiri gicopo konyo ko ju ma gibemito gigamiri.
ICOPO TIMO ANG’O TEK IBEMITO INWANG’ JADHOGI MA CUU MI GAMIRI?
3. Ukwayu Jakristu ma jamusuma ular upar pi lembang’o i wang’ nicaku sayu jadhoge mi gamiri?
3 Tek ibemito igemiri, pire tie tek lee ning’eyo kurayung m’ibesayu i bang’ jadhogi mi gamiri i wang’ nicaku ng’eyiri ku ng’atu moko. Kan ungo, ibiweko ng’atu ma nwang’u romo bedo jadhogi ma cuu mi gamiri man ibipoy nia icaku beng’eyiri pi gamiri ku ng’atu ma wiwu urombo ngo kude. I andha, Jakristu moko ci m’ulimo romo bedo jadhogjo ma cuu mi gamiri. (1 Kor. 7:39) Ento utie ngo nia ng’atu moko ci m’ulimo bibedo jadhogi ma cuu mi gamiri. Pieno, penjiri kumae: Atie ku lembakeca ma kani i kwo para? Abemito nia jadhoga mi gamiri ubed ku kurayung ma kanigi? Nyo lembe m’abesayu i bang’ jadhogane ubenyutho nia i lembe para tie tek kunoke ngo?’
4. Dhanu moko gituc niroyo lembang’o i rwo migi?
4 Tek nwang’u ibesayu jadhogi mi gamiri, m’umbe jiji idaru rwo i bang’ Yehova pi lembene. (Filip. 4:6) I andha, Yehova ung’olo ngo nia ebimiyo dhaku kunoke nico ni ng’atuman m’i kindwa. Ento ebedieng’ i kum yeny peri man i kum kite m’ibewinjiri ko, man ecopo konyi kinde m’ibesayu jadhogi mi gamiri. Dong’ imediri ninyutho ire ava peri man kite m’ibewinjiri ko. (Zab. 62:8) Rwo pi ninwang’u rieko man nibedo ku cirocir. (Yak. 1:5) Umego moko mi ng’om mir États-Unis ma nyinge John c unyutho lembe m’ebed eroyo i rwo pare, eyero kumae: “Anyutho ni Yehova pi kurayung m’abesayu i bang’ jadhoga mi gamiri. Akwaye nia emii ira kaka mi rombo ku ng’atu ma romo bedo jadhoga ma cuu mi gamiri, man nia ekonya nicego kite ma biketho abibedo won ot ma ber.” Nyamego moko mi ng’om mi Sri Lanka ma nyinge Tanya ke uyero kumae: “Kinde m’abesayu jadhoga ma cuu mi gamiri, akwayu Yehova ukonya amedara nigwoko bedoleng’ para ire, nibedo ku nen ma ber man nibedo jamutoro.” Kadok fodi ebecopere ngo iri ninwang’u ng’atu ma copo bedo jadhogi ma cuu mi gamiri i saa m’ipangu de, Yehova ung’olo nia ebimedere nipong’o yeny peri mi thenge mi kum man ebinyang’ kudi.—Zab. 55:22.
5. Jukristu ma jumusuma gitie ku kaka ma kani mi rombo ku jumusuma mange m’umaru Yehova? (1 Jukorintho 15:58) (Nen bende cal.)
5 Biblia ubekwayuwa nia wabed ku “lembe dupa ma [wabetimo] i tic pa Rwoth.” (Som 1 Jukorintho 15:58.) Tek ibed imiyiri zoo i tic pa Yehova man ikoyo saa mi dikiri karacelo kud umego ku nyimego ma tung’ tung’, ibibedo ngo kende kende i ng’et jurimo ma bitielo cwinyi, ento ibinwang’u bende kaka mi rombo ku jumusuma mange ma giketho wigi zoo i kum timo ni Yehova calu in. Man kinde m’ibemediri ninyayu anyong’a i Yehova, ibinwang’u mutoro mandha.
Tek ibemiyiri zoo i tic pa Yehova man ibed idikiri ku Jukristu ma tung’ tung’, iromo rombo ku jumange de ma gibesayu judhoggi mi gamiri (Nen udukuwec mir 5)
6. Kinde ma Jukristu ma jumusuma gibesayu judhoggi mi gamiri, ukwayu gipoy i kum ang’o?
6 Re ibed ku weng’i: Kud iwek sayu jadhogi mi gamiri udok ni gin ma pire tek nisagu zoo i kwo peri. (Filip. 1:10) Poy nia mutoro mandha ujengere ngo iwi gamiri, ento iwi winjiri peri ku Yehova. (Mat. 5:3) Bende, tek itie jamusuma, eromo bedo iri yot nitimo lee i tic pa Mungu. (1 Kor. 7:32, 33) Dong’ itii ma ber mandha ku saa maeno. Nyamego moko mir États-Unis ma nyinge Jessica m’ugomo ku oro kago 40, ukoro kumae: “Kinde m’abino jamusuma, amiyara zoo i tic mi rweyo lembanyong’a. Eno ukonya nigwoko anyong’a para kadok nwang’u abino kud ava mi gamiri.”
TING’ SAA MI LUBO NG’ATU M’UCELO
7. Pirang’o etie lembe mi rieko niting’o saa mi lubo ng’atu m’ibemito udok jadhogi mi gamiri i wang’ ninyutho ire paru peri? (Lembrieko 13:16)
7 Dong’ tek ibeparu nia inwang’u ng’atu ma romo bedo jadhogi ma cuu mi gamiri ke? Nyo ukwayu inyuth ire ndhu ndhu nia imare? Biblia uyero nia ng’atu ma riek nwang’u ng’eyong’ec mi lembe moko i wang’ nitime. (Som Lembrieko 13:16.) Pieno, etie lembe mi rieko nilubo ng’atini i amung’ pi kare moko i wang’ ninyutho ire nia imare. Umego Aschwin mi ng’om mi Pays-Bas uyero kumae: “Ava pa ng’atini romo loth pio pio mandha i ii, man eromo thum de pio pio. Pieno kan iting’o saa mi kelube, ibicaku ngo the mer m’ujengere iwi kite m’ibewinjiri ko.” Bende, kinde m’ibelubo ng’atini i amung’, iromo nwang’u nia ebibedo ngo jadhogi ma cuu mi gamiri.
8. Tek itie jamusuma, icopo lubo ng’atu m’iparu nia romo bedo jadhogi ma cuu mi gamiri nenedi? (Nen bende cal.)
8 Iromo lubo ng’atini i amung’ nenedi? I saa pa coko kunoke i saa mi nambu, iromo nyang’ i kum thenge pare mi tipo, i kum kurayung pare man timo pare. Ng’agi ma gitie jurimbe? Ebed eweco iwi lembang’o? (Luka 6:45) Nyo lembakeca pare urombo ku peri? Iromo weco ku judong cokiri pare kunoke ku Jukristu mange m’uteng’ini pi ning’eye ma ber. (Rie. 20:18) Iromo sayu ning’eyo lembe iwi kite pare man iwi rwonge. (Rut. 2:11) Kinde m’ibelubo ng’atini i amung’, bed ku weng’i ma kud iketh ewinjere ko rac. Pieno, wor kite m’ebewinjere ko, amung’ mi kwo pare, man kud ilube ndro ndro.
I wang’ ninyutho pidoic peri ni ng’atu moko, ukwayu ilar ilube i amung’ pi kare moko (Nen udukuwec mir 7-8)
9. I wang’ ninyutho ni ng’atini nia ibemito wuting’ saa mi ng’eyuru kude pi gamiri, ukwayu cwinyi ular ubed tek i kum lembang’o?
9 Ukwayu ilub ng’atini pi kare ma rukani i wang’ ninyutho ire pidoic peri? Tek kumi ular umiel niyero paru peri ni ng’atini, eromo paru nia ava kum re m’ubecweli. (Rie. 29:20) Ku ng’ete kurucel lundo, tek ibegalu akeca, ng’atune romo paru nia maku yub ubevoyi, asagane kan edaru nyang’ nia ebetelo nen peri. (Ekl. 11:4) Poy nia i wang’ ninyutho paru peri ni ng’atini, pire tie tek ungo nilar bedo ku tegocwiny nia wubigemuru kude. Ento ukwayu cwinyi ubed tek nia in dong’ itie ayika pi gamiri man nia ecopo bedo jadhogi ma cuu mi gamiri.
10. Iromo timo ang’o tek inyang’ nia ng’atu moko ubefoyo kudi ma en ke lundo ebetelo ngo nen peri?
10 Dong’ tek inyang’ nia ng’atu moko ubefoyo kudi ke? Tek en lundo ebetelo ngo nen peri, wek lembene unen kamaleng’ nikadhu kud i timo peri. Ecibedo rac magwei niketho ng’atini ubed ku genogen p’undiek.—1 Kor. 10:24; Efe. 4:25.
11. Tek imito yubo lembe wek kara jumoko gicak ning’eyiri pi gamiri, ukwayu ngo iwil i kum lembang’o?
11 I kabedo moko, juromo kwayu nia junyodo kunoke judongo mange re ma ging’ii mon kunoke co ni wedi migi ma jumusuma. I kabedo mange lundo, junyodo kunoke jurimo ging’iyo ng’atu ma romo bedo jadhu ng’atini ma cuu mi gamiri, man i ng’eye giyubo lembe wek kara jalawobi ku nyaku gineniri pi ninyang’ ka nyo wigi urombo. Tek jukweyi nia iyub lembe wek kara umego ku nyamego moko gicak ng’eyiri pi gamiri, kud iwil i kum lembe ma ng’atuman umaru man i kum yeny pa ng’atuman. Tek inwang’u nia ng’atu moko romo bedo nico kunoke dhaku ma cuu ni jarimbi kunoke ni wat peri moko, say ning’eye cuu; ng’ey kite pare, man m’usagu zoo, ng’ey thenge pare mi tipo. Poy nia winjiri ma ceng’ini ku Yehova pire tie tek nisagu sente, ponjiri man karamlembe ma ng’atini udongo i iye. Re kud iwil nia ukwayu umego ku nyamego ma jumusumane re ma mito gimak yub ma tokcen ka nyo andha gibigamiri kunoke ngo.—Gal. 6:5.
CAKU THE NG’EYIRI PI GAMIRI
12. Tek ibemito nia wung’eyuru ku ng’atu moko pi gamiri, iromo nyutho ire lembene nenedi?
12 Tek ibemito nia wucak ning’eyuru ku ng’atu moko pi gamiri, iromo nyutho ire lembene nenedi? d Iromo pangu niweco kude i kabedo ma dhanu bepong’ lee i iye kunoke i telefon. Kor ire pidoic peri terere. (1 Kor. 14:9) Ka copere, mii ire saa m’edog enyam ko i lembene i wang’ nidwoko. (Rie. 15:28) Tek emaru lembene ngo, kud idiye; wor pidoic pare.
13. Icopo timo ang’o tek ng’atu moko uyero iri nia emeri? (Jukolosai 4:6)
13 Icopo timo ang’o tek ng’atu moko uyero iri nia emeri? M’umbe jiji, ugam ukwayu ire tegocwiny ma lee pi nibino nyutho lembene iri, pieno dwok ire lembe ku yoo man ku woro. (Som Jukolosai 4:6.) Tek imito ting’o kare moko pi ninyamu i lembene i wang’ niyiyo kunoke nikwero, nyuth ire. Re kud ilund igal akeca ku dwoko wang’ lembene. (Rie. 13:12) Tek lembene umaku wii ngo, nyuth ire kamaleng’, re ku woro. Kenen kite m’umego Hans mi ng’om mir Autriche udwoko ko lembe ni nyamego m’uyero ire nia emare, ekoro kumae: “Anyutho ire paru para kamaleng’, re ku woro. Adwoko ire lembene ke wang’ acel, pilembe amito ngo nia aketh ebed ku genogen ma iye nanu. Pi thelembe maeno, agwokara nitimo kunoke niyero ire lembe moko ci ma romo ketho eparu nia abiwilo paru para.” I ng’ete m’ucelo lundo, tek in de imaru nicaku the mer mi gamiri ku ng’atune, nyuth ire man wuwec iwi lembe ma wubibetimo saa ma wubeng’eyuru i iye. Re kud iwil nia wuromo bedo ku paru m’ukoc iwi lembe moko, eno ke nimakere ku suru mwu kunoke pi thelembe mange.
JUMANGE GICOPO KONYO JUKRISTU MA JUMUSUMA NENEDI?
14. Wacopo konyo Jukristu ma jumusuma nenedi ku wec mwa?
14 Ng’atuman m’i kindwa copo konyo Jukristu ma jumusuma ma gibemito gamiri nenedi? Yo acel utie nibedo ku wang’wa i kum wec m’ubewok kud i dhogwa. (Efe. 4:29) Iromo penjiri kumae: ‘Nyo abed adhuro mac i kum ju ma gibemito gigamiri? Kinde m’aneno nia umego ma jamusuma ubeweco ku nyamego moko de ma jamusuma, nyo abed aparu wang’ acel nia gidaru mariri i kindgi?’ (1 Tim. 5:13) Bende, ukwayu ngo waketh Jukristu ma jumusuma gipar nia girem ku lembe moko i kwo migi pilembe nia gigamiri ngo. Hans ma wadaru weco pire ukoro kumae: “Umego moko gipenjo nia, ‘Pirang’o ibegemiri ngo? Dong’ itie ngo nyathin.’ Wec ma kumeno romo ketho jumusuma giwinjiri nia jumarugi ngo man dhuro mac i kum ava ma gitie ko mi gamiri.” Etie ber magwei ninwang’u kaka mi foyo Jukristu ma jumusuma!—1 Thes. 5:11.
15. (a) Nimakere ku cik mir ukungu ma nwang’ere i Jurumi 15:2, ukwayu wang’ii i lembang’o i wang’ nicaku konyo ng’atu moko ninwang’u jadhoge mi gamiri? (Nen bende cal.) (b) Inwang’u ponji ma kani ma pigi tek i video ma thiwiye tie, Dhanu m’ubenyego ma tek pi yiyoyic migi—Jukristu ma jumusuma?
15 Iromo timo ang’o tek ibeparu nia umego ku nyamego moko giromo nibedo dhaku ku cware? Biblia ubekwayuwa nia wabed wadieng’ i kum kite ma jumange giwinjiri ko. (Som Jurumi 15:2.) Jumusuma ma pol gimaru ngo nia jumange re m’unyuth pigi ni ng’atu moko ma romo bedo jadhoggi ma cuu mi gamiri. Ukwayu wawor pidoic migi. (2 Thes. 3:11) Jumange lundo giromo foyo nia jukonygi, re ukwayu ngo wamond i lembe migi ka fodi gikwayuwa ngo. e (Rie. 3:27) Jumoko ke gimaru ngo nia junyuth pigi terere. Nyamego moko ma jamusuma mi ng’om mir Ujermani ma nyinge Lydia uyero kumae: “Iromo ketho umego ku nyamegone ginwang’iri i kind ungu moko ma dit mi dhanu. Yub kende kende kaka m’umego ku nyamegone girombi ko, man iwek dong lembe mange zoo i cing’gi.”
Jukristu ma jumusuma ginwang’u kaka mi rombo i kindgi saa ma dhanu dupa ucokiri karacelo (Nen udukuwec mir 15)
16. Ukwayu ngo Jukristu ma jumusuma giwil i kum ang’o?
16 Ng’atuman m’i kindwa, dok ebed jamusuma kunoke ng’atu m’ugamere, copo kwo kwo ma ber man mir anyong’a! (Zab. 128:1) Pieno tek ibemito igemiri, ma re fodi inwang’u ngo ng’atu moko, mediri niketho wii i kum tic pa Yehova. Nyamego moko mi Macao ma nyinge Sin Yi uyero kumae: “Tek iporo saa mi bedo jamusuma ku saa m’ibibedo iye ku jadhogi mi gamiri i Paradizo, ibinwang’u nia saa mi bedo jamusuma utie nyanok magwei. Nen saa maeno ni saa ma pire tek lee, man itii kude ma ber.” Dong’ iromo timo ang’o tek inwang’u ng’atu ma romo bedo jadhogi ma cuu mi gamiri man wudaru caku ning’eyuru kude? I thiwiwec m’ulubo, wabineno gin ma wucopo timo kara lembe uwoth iwu miero i saa ma wubeng’eyuru i iye pi gamiri.
WER 137 Mon ma weg bedopwe, nyimego mwa
a Pi ninyang’ ka nyo itie ayika nicaku the mer mi gamiri, nen thiwiwec m’uwacu, “Fréquenter (partie 1) : Suis-je prêt ?” i jw.org.
b KORO I WEC: I thiwiwec maeni man i m’ulubo, wec ma nia “ning’eyiri pi gamiri,” ubenyutho saa ma jalawobi ku nyaku giting’o pi ning’eyiri i iye cuu, pi ninyang’ ka nyo giromo bedo nico ku dhaku ma wigi rombo. I ng’om moko, julwong’e nindo mi twiyo mer. Ecaku kinde ma jalawobi ku nyaku ginyutho kamaleng’ nia ng’atuman umaru wagi, man emedere nitundo i nindo ma gimoko i iye nia andha gibigamiri kunoke nia mito gilal merne cen.
c Juloko nying’ moko.
d I suru moko, wang’ ma pol umego re ma cipenjo dwand nyamego pi nikwaye nia gikegiting’ kare moko pi ning’eyiri cuu. Ento, nyamego de romo bedo ku twero mi penjo dwand umego. (Rut. 3:1-13) Pi ninyang’ lee, nen thiwiwec m’uwacu, “Les jeunes s’interrogent . . . Comment lui dire ce que je ressens pour lui ?” i Reveillez-vouz! mi nindo 22, dwi mir 10, 2004.
e Nen video ma thiwiye tie, Dhanu m’ubenyego ma tek pi yiyoyic migi—Jukristu ma jumusuma i jw.org.