“JAMBU! Wuceu nenedi?”

Ma jiji mbe, idaru tio ku wec maeno pi nimotho dhanu. Saa moko nyo ibed imotho dhanu bende ku cingi kunoke wugwekuru agwaka. Kite ma jumothiri ko ubed ukoc nimakere ku kaka ma jubekwo i ie, ento moth ceke mio kit bero ma rom. I andha, ng’atu ma motho ngo dhanu kunoke ma dwoko ngo wang’ moth, jucopo nene ni ng’atu ma wie tek kunoke m’umaru ngo dhanu.

Ento dhanu zoo ngo re ma mothojo. Jumoko motho ngo dhanu pi lewic, kunoke ginwang’u nia pigi tek ungo. Jumange ke ginwang’u nia etie tek nimotho dhanu mi rangi mange, mi suru mange, kunoke ma nivo mi kwo migi ukoc ku migi. Re kadok moth m’adundo de copo bedo ku matoke ma beco.

Dong’ kepenjiri kumae: ‘Moth utie ku bero ma kani? Man Lembe pa Mungu copo mio ira ponji ma kani iwi moth?’

Kinde ma jakwenda Petro ujolo Kornelio m’ubino ng’atu ma kwong’a mi thekdhanumange i cokiri mi Jukristu, eyero kumae: “Dhanu bedo tung’ tung’ ungo i wang’ Mungu.” (Tic. 10:34) I ng’eye, jakwenda Petro ukiewo nia Mungu ubemito “dhanu ceke gitund ba lokocwiny.” (2 Pet. 3:9) Verse maeni ubeweco mi kwong’o pi ju ma fodi gibeponjo lemandha aponja. Re Petro uyero ni Jukristu kumae: “Wuyung dhanu ceke. Wumar umego.” (1 Pet. 2:17) Nyo waneno ngo nia etie ber nimotho dhanu mange, m’umbe nineno rangi, suru, kunoke nivo mi kwo migi? Eno tie yo acel ma wacopo yungo kogi man ma wacopo nyutho ko mer mwa igi.

Jakwenda Paulo ukwayu dhanu mi cokiri kumae: “Wujolu, cil calu Kristu bende jolowu.” (Rum. 15:7) Paulo uweco asagane pi dhanu ma ‘gibedo ire ni juk’. I rundi ma tin eni, umego ku nyimego gitie ku yeny mi kero ma lee kara gicung ma tek i wang’ ragedo ma Sitani ubenyayu i kum dhanu pa Mungu.​—Kol. 4:11; Nyu. 12:12, 17.

Lapor dupa mi Biblia unyutho nia moth copo ketho ngo kende kende ng’atini winjere ma ber, ento ecopo mio matoke mange dupa ma beco.

Kinde ma Mungu ubeciketho kwo pa Wode i Maria, eoro malaika ucidh uwec ku Maria. Malaikane ucaku wec pare kumae: “Moth iri, in ma mugisa kwenyi, [Yehova] ni kudi.” Maria ucaku penjere nia pirang’o malaika ubeweco i bang’e, uketho “ie pido dit.” Saa ma malaika uneno nia cwinye ubepido, ewacu kumae: ‘Lworo kud unegi, Maria: kum inwang’u bero ba Mungu.’ Malaika ukoro nia lembakeca pa Mungu utie nia enyol Masiya. Wec maeno ukwio cwiny Maria. Pi ninyutho woro pare, eyero ni malaika kumae: “Nen, an a bong’ pa [Yehova]; dong’ ebed ira calu lembe peri.”​—Lk. 1:26-38.

Ebino rwom ma lee dit ni malaika maeno nikelo lemkwenda pa Yehova; re eneno ngo nia niweco ku ng’atu ma tie ku kum mi dubo copo jwigo dito pare. Ecaku thewec pare ku moth. Ponji ma kani ma wacopo nwang’u niai kud i lapor maeno? Wacikara nibedo ayika nimotho jumange man niketho cwinygi. Ku wec ma nyanok kende ci, wacopo konyo umego ku nyimego mwa ging’ei nia andha gin de gitie i kind dhanu pa Yehova.

Jakwenda Paulo utuc ning’eyo dhanu dupa mi cokiri mir Asia ma nok man mir Europe. I barua pare, emotho umego ku nyimego ku nying’gi. Ku lapor, i Jurumi thek 16, eoro moth ni umego ku nyimego dupa. Emotho Foibe m’elwong’o nia “nyamegwa,” man ekwayu umego ‘gijole i Rwoth, calu  m’umaku jumaleng’, man gikonye i gin ceke ma cande ni i kume.’ Paulo umotho bende Priskila gikud Akula, ewacu kumae: “Amio foyofoc igi a kenda ngo, endre kanisa (cokiri) mi thekdhanumange bende.” I kind dhanu m’emothone, jumoko tie ma wang’eyo ngo lembe dupa i wigi tin. Ku lapor, eyero nia “Epaineto ma jamerna,” man “Trufaina ku Trufosa, ma gimuli ku tic i Rwoth.” M’umbe jiji, Paulo umotho umego ku nyimego ma jucwale ngo acwala.​—Rum. 16:1-16.

Kepar kite ma umego ku nyimego maeno giwinjiri ko kinde ma gineno nia Paulo uwil ungo ku nying’gi. Ma jiji mbe, lembuno uketho mer ma gimaru ko Paulo man ma gimariri ko i kindgi umedere ameda. Bende, moth maeno uketho cwiny Jukristu mange, man ukonyogi kara gimediri nicungo ma tek i yioyic. Eyo, moth man foyofoc m’uai kud i adunde ketho mer doko tek, man diko kind jurutic pa Mungu.

Kinde ma Paulo ginyiko i dhu wat mi Puteoli man gitundo i Roma, Jukristu ma keca ubin ujole. Saa ma Paulo unenogi ku bor, “efoyo Mungu, man cwinye doko tek.” (Tic. 28:13-15) Saa moko, waromo nivonjo avonja kende i bang’ ng’atini kunoke nimothe ku bor. Lembuno kende ci copo nyayu anyong’a i ng’atini, ma saa moko nyo cwinye tur kunoke can umondo i ie.

Saa moko, ugam ukwayere nia Yakobo umii juk ma tek ni Jukristu, pilembe nwang’u jumoko m’i kindgi gicaku timo gier i thenge mi tipo, niwacu gicaku mer ku ng’om. (Yak. 4:4) Re kenen kite m’ecaku ko barua pare:

“Yakobo, ma jamiru pa Mungu man pa Rwoth Yesu Kristu, ni [suru] apar wi ario mi Jumulal mba, moth iwu.” (Yak. 1:1) Jukristu m’eoro igi barua gijolo jukne yot yot kinde ma gineno nikadhu kud i moth pare nia gin ceke gibetimo tic ma rom ni Mungu. Eyo, moth kende de copo yabu yo ma juweco ko kadok iwi lembe ma dongo.

Moth m’adundo copo bedo ku matoke ma cuu, tek eai kud i adundewa, kadok ng’atu ma wabemotho ubedieng’ ungo ku mothne de. (Mat. 22:39) Nyamego moko mi ng’om mir Irlande ugam utundo i Otker nwang’u dong’ coko ubecicaku. Kinde m’ebelarere nimondo i Otker, umego moko uvonjo i bang’e, man emothe kumae: “Jambu. Wafoyo dit nineni.” Nyamegone udwoko ngo wang’ moth pare, ento ekadhu akadha ecidh ebedo.

Yenga moko i ng’eye, nyamegone ubino i bang’ umego maeca, man ekoro ire nia i kind nindo maeca, ebino kadhu kud i peko ma tek yo pare. Ewacu kumae: “Uthieno nica abino ku ng’ecwiny mi tuko de ngo m’ayenyo bino ngo abina zoo de i coko. Abepoi ungo iwi lembe dupa ma juponjo i coko ma cing’ nica, ento gin m’abepoi i kume utie kende kende moth peri. Moth peri uketho awinjara ma ber. Afoyi lee dit.”

Umegone ung’eyo ngo nia karaman moth pare ubino ku matoke ma cuu. Eyero kumae: “Kinde ma nyamego maeno uwacu nia moth m’amothe ko uketho ewinjere ma ber, anwang’u nia kara atimo ber dit nimothe. Lembuno unyayu anyong’a i ia bende.”

Suleman ukiewo kumae: “Bol kwen peri wi pi, kum ibinwang’e yo ng’ei nindo dupa.” (Ekl. 11:1) Ka wang’eyo bero ma moth mwa mio ni jumange, asagane ni Jukristu wadwa, wabinyayu mutoro igi, man wan de wabibedo ku mutoro. Dong’ wiwa kud uwil ku matoke ma beco mi motho dhanu.