1. Thelembe ma kani ma segi m’uketho watie kud anyong’a?

WATIE kud anyong’a ma lee dit niwinjo kite ma jurutic pa Mungu gibeketho ko der migi urieny! I kind oro m’ukadhu, Jumulembe pa Yehova gitelo wi ponji mi Biblia ma kadhu 10 000 000. Bende, dhanu milioni dupa ma gifoyo ku lemandha gibino i Poi pi tho pa Yesu, man gituc niponjo lembe iwi jamgony ma tie giramia ma Mungu mio iwa ku mer.​—1 Yoh. 4:9.

2, 3. (a) Lembang’o ma copo cerowa ngo nirieny “calu der”? (b) I thiwiwec maeni, wabiweco iwi lembe ma kani?

² I wang’ ng’om zoo, Jumulembe pa Yehova giweco dhok dupa ma tung’ tung’. Ento eno ubecerowa ngo niyungo Yehova i acel. (Nyu. 7:9) Kadok waweco dhukani kunoke wakwo kakani de, wacopo rieny “calu der i ng’om.”​—Flp. 2:15.

³ Tic mi rweyo lembanyong’a ma wabetimo, bedo i acel mwa man kite ma wabemedara ko nikio, ubemio yung ni Yehova. I thiwiwec maeni, wabineno kite ma wacopo ketho ko der mwa  urieny nikadhu kud i lembe adek maeno.​—Som Matayo 5:14-16.

4, 5. (a) M’umedo tic mi lembanyong’a, wacopo timo ang’o pi niketho der mwa urieny? (b) Ka wabeweco ma ber i bang’ dhanu i lembanyong’a, wacopo nwang’u adwogi ma kani? (Nen cal mir acaki.)

⁴ Yo acel ma pire tek ma waketho ko der mwa urieny, utie tic mi lembanyong’a man mi ketho dhanu dok julub. (Mat. 28:19, 20) Ku lapor, i Otkur ma Wiw mi nindo 1, dwi mir 6, 1925 m’ubino ku thiwiwec “Der i mudho,” jukoro nia, i kind nindo maeni mi kajik ceng’, ng’atu moko mbe ma copo gwoko bedoleng’ pare ni Rwoth kan ebeyenyo ngo “ayi m’eketh ko der pare urieny.” Jumedo bende kumae: “Ng’atune ucikere nitimo kumeno nwang’u eberweyo lembanyong’a ni dhanu, man nwang’u en gire de ebekwo nimakere ku cik mi bedopwe pa Yehova.” M’umedo tic mi rweyo lembanyong’a, timo mwa de yungo Yehova. Dhanu dupa benenowa kinde ma waberweyo lembanyong’a. Ka wabevonjo i bang’gi man wabemothogi ku mutoro, eno ketho gibedo ku paru ma ber i wiwa man iwi Mungu ma wabeworo.

⁵ Yesu uyero ni julub pare kumae: ‘Ka wumondo de i ot, wumoth [won ode].’ (Mat. 10:12) I kabedo ma Yesu ubed urweyo i ie, dhanu bino ku ng’iyo mi jolo welo i ot. Re i kaka ma dupa tin, lembuno dong’ timere ngo. Wang’ ma pol, lworo kunoke ng’ecwiny re ma maku dhanu ka gineno welo utundo i pacu migi. Ento ka wabeweco ma ber i bang’gi, kumgi piei. Kinde m’iberweyo ku présentoir kaka ma dhanu bepong’ i ie, nyo idaru neno de nia kan ivonjo i bang’ dhanu man imothogi kud anyong’a, gibin gigamu girasoma m’umbe lworo? Gicopo maru bende nicaku wec kudi!

6. Umego moko giku min ot pare gibed gitimo ang’o kara gimediri asu nirweyo?

⁶ I ng’om mir Angleterre, umego moko giku min ot pare ma gidaru tii, gimbe ku copo mi rweyo lembanyong’a ot kubang’ ot calu ma gibed gitimo con, pilembe twoyo udaru gonjogi. Kara gimediri asu nirweyo, giketho meza moko ku girasoma i wie i dhu lela migi. Calu ma ot migi ni ceng’ini ku daraza moko, gikpero girasoma ma ginwang’u nia copo telo nen mi junyodo m’ubino gamu awiya migi kud i somo. Junyodo moko gidaru gamu girasomane moko, calu ve Les jeunes s’interrogent. Réponses pratiques, bukune mi 1 ku mir 2. Bende, nyamego moko ma jayab yo becirweyo kud umego maenogi. Junyodo ma dupa gineno nia nyamegone weco ma ber i bang’ dhanu, man umego maeno giku min ot pare gitie andha kud ava mi konyo dhanu. Janyodo acel ucaku kadok niponjo Biblia.

7. Icopo timo ang’o pi nikonyo dhanu m’uringo ng’wec i beng’wu?

⁷ I kind nindo m’ukadhu, lwiny uketho dhanu dupa giweko pacu migi man giringo i ng’om mange. Ka dhanu ma kumeno utie i kabedo mwu, icopo timo ang’o pi nikonyogi kara ging’ei Yehova? Mi kwong’o, icopo ponjo kite ma jumotho ko dhanu i dhok migi. M’umedo maeno, icopo tio kud application JW Language, pi niponjo kite m’iromo caku ko thewec kugi. I ng’eye, icopo nyutho igi video man girasoma ma nwang’ere i dhok migi i jw.org.​—Poi. 10:19.

8, 9. (a) Coko mwa mi Kwo man tic bekonyowa nenedi? (b) Junyodo gicopo konyo awiya migi nenedi kara gidwok wang’ penji cuu i coko?

 ⁸ Yehova umio iwa tap piny ma watie ku yenyne kara warwei cuu. Ku lapor, i coko mi Kwo man tic, waponjo lembe ma konyowa niliewo dhanu, man nicaku ponji mi Biblia ma cwinywa tek.

⁹ Wang’ mapol, ka dhanu mange gibino i coko mwa, igi wok wang’ lii ka gibeneno kite m’awiya ubedwoko ko wang’ penji. In de icopo ponjo awiya peri kara gibed gidwok wang’ penji i coko ku wec migi gigi, m’umbe nisomo asoma. Dhanu moko gituc niponjo lemandha pilembe giwinjo kite m’awiya ubedwoko ko wang’ penji niai kud i adundegi, ku wec ma yot man ma terere.​—1 Kor. 14:25.

10. Thier mi juruot konyowa nenedi nibedo i acel?

¹⁰ Yo mange ma wamio ko yung ni Yehova utie niponjo juruot mwa kara wakwo kugi i acel man ku kwiocwiny. Ku lapor, kan itie janyodo, tim kero kud wukos nitimo thier mwu mi juruot kubang’ yenga. Juruot ma dupa gibed gineno program mi Televizio JW ma bewok kubang’ dwi, man i ng’eye giweco iwi kite ma giromo tio ko ku lembe ma giai ginenone. Poi nia ayi m’icopo ponjo ko nyathin ma nyanok ukoc ku kite m’iromo ponjo ko aradu ma dong’ udongo. Keth thier mwu mi juruot umii kony ni ng’atuman m’i ot peri.​—Zab. 148:12, 13.

11-13. Waromo timo ang’o kara cokiri mwa ubed i acel?

¹¹ Kadok itie aradu de, icopo konyo ng’atuman m’i cokiri unwang’ nia en de pire tek. Yo acel m’iromo timo ko kumeno utie nitheyo mer kud umego ku nyimego m’utii. Penjgi nia lembang’o m’ukonyogi kara gimediri nitimo ni Yehova pi oro ma dupa. Icopo nwang’u ponji dupa ma beco i bang’gi. Kan ibetimo kumeno, ibiketho cwinygi, man gin de gibiketho cwinyi. Re kadok watie aradu kunoke wadaru tii de, wan ceke wacopo jolo welo m’ubino i Otker mwa. Icopo nimothogi, nivonjo i bang’gi, nikonyogi ginwang’ kabedo, man ninyuthogi ni dhanu mange. Keth giwinjiri ma ber.

 ¹² Ka juketho nia itel wi coko mi rweyo lembanyong’a, icopo konyo ju m’utii kara gimediri niketho der migi urieny. Mii igi teritwar ma giromo rweyo i ie yot yot. Pokgi girwei kud aradu. Wang’ ma pol, umego ku nyimego ma gitii man ma gitie ku remo moko, cwinygi tur ka gibeneno nia dong’ gicopo rweyo ngo calu ma con. Re giwinjiri ma ber ka gibeneno nia idieng’ kugi man ibenyang’ i kum peko migi. Kadok gitii kunoke gitimo oro lee i lemandha de, asu kite m’ibedieng’ ko kugi copo ketho gimediri nirweyo kud amora.​—Law. 19:32.

¹³ Nyithindho mir Israel gibino kud anyong’a nitimo thier karacelo ni Yehova. Jagor Zaburi ukiewo kumae: “Nen, maram e ber e mit de ni umego ya gibed karacelo i [acel]!” (Som Zaburi 133:1, 2.) Eporo bedo i acel ku mo m’awira ma yomo kumjo, man ma ng’wice ng’ar. Calu mo maeno, wacopo kwio cwiny umego ku nyimego mwa, nwang’u wabenyutho igi mer man berocwiny. Eno ketho cokiri medere nibedo i acel. Dong’ nyo icopo ngo ni ii kara ing’ei cuu umego ku nyimego mi cokiri peri?​—2 Kor. 6:11-13.

14. Icopo timo ang’o kara der peri urieny kaka m’ibekwo i ie?

¹⁴ Der peri copo rieny kaka moko ci m’ibekwo i ie. Kan ibekwo ma ber ku judhugola peri, gibimaru giponj lembe iwi Yehova. Kepenjiri kumae: ‘Judhugola para beparang’o i wiya? Nyo abed ayiko ot para bedo ma leng’ saa ceke? Nyo pacu para zoo bebedo ma leng’? Nyo abed akonyo judhugola para de?’ Iromo penjo Jumulembe mange gikor iri nia berocwiny man lapor migi ma ber ubedo kud adwogi ma kani iwi wedi migi, iwi judhugola migi, iwi jurutic wagi kunoke iwi awiya wagi mi somo.​—Ef. 5:9.

15. Pirang’o ubekwayu wamedara nikio?

¹⁵ Ka wabemito nia der mwa ucarere acara, wacikara ngo niwil ku nindo maeni ma wabekwo i ie. Yesu uyero ni julubne wang’ dupa kumae: “Wuki.” (Mat. 24:42; 25:13; 26:41) Tek wabeparu nia fodi “masendi ma dit” ni bor, wabitundo ngo nitio ku kaka ceke m’unen iwa pi nikonyo dhanu mange giponj lemandha iwi Yehova. (Mat. 24:21) Pieno, kakare ma der mwa ucarere acara, nok nok ebijwik man ecopo kadok nitho.

16, 17. Iromo timo ang’o kara imediri nikio?

¹⁶ I nindo ma wabekwo i ie eni, ubekwayu wamedara nikio nisagu m’i wang’e. Ng’om ubemedere ameda ninyothere. Re wang’eyo nia ajiki bibino tap i nindo ma Yehova uketho. (Mat. 24:42-44) Ento ma fodi nindone k’utundo ngo, wacikara ninyutho cirocir, man ukwayu waketh wiwa zoo i kum lembe m’ubino i wang’wa. Bed isom Biblia kubang’ ceng’, man kud iwek nirwo i bang’ Yehova. (1 Pet. 4:7) Nwang’ ponji i bang’ umego ku nyimego ma gitimo ni Yehova pi oro dupa. Icopo bende nisomo kpawa mi kwo mir umego ku nyimego i girasoma mwa ma tung’ tung’.

¹⁷ Tim ni Yehova m’umbe anyothawic. Tim bero ni jumange man bed inwang’ saa mi nambu kud umego ku nyimego. Kan ibetimo kumeno, ibibedo ku mutoro man ibineno nia nindo ubecidho pio pio. (Ef. 5:16) I kind oro dak acel m’ukadhu, jurutic pa Yehova gitimo lembe dupa. Re tin, watie ku tic lee dit nisagu  m’i wang’e zoo. Tic pa Yehova unyai lee i kite ma yerere ngo. Andhandha, der mwa ubecarere!

18, 19. Judong cokiri gikonyowa nenedi kara watim ni Yehova kud amora? Kemii lapor moko.

¹⁸ Kadok wabed watimo kosa wang’ ma pol de, re asu Yehova uweko watim ire. Pi nikonyowa, emio iwa “giramia [ma] dhanu,” niwacu judong cokiri. (Som Juefeso 4:8, 11, 12.) Pieno, ka judong cokiri ubino niliewi, tim kero inwang’ kony moko kokoro nikadhu kud i juk man rieko migi.

¹⁹ Ku lapor, umego moko mir Angleterre giku dhaku pare gibino ku peko i gamiri migi, e gikwayu kony i bang’ judong cokiri moko ario. Dhaku unwang’u nia won ot pare ubetelo ngo wigi cuu kara gitim ni Yehova. Won ot de unwang’u nia etie ngo japonji ma cuu, man eyero nia ebed epangu ngo program, kara thier mi juruot utimere kubang’ yenga. Pi nikonyogi, judong cokiri umio lapor pa Yesu. Giketho cwiny won ot nia elub kite ma Yesu ubed udieng’ ko pi julubne. Bende, giketho cwiny dhaku nia ebed ku cirocir i bang’ won ot pare. Judong cokiri ginyutho bende lembe mange ma gicopo timo kara gitim thier migi mi juruot karacelo kud awiya migi ario. (Ef. 5:21-29) Won ot ugam utimo kero ma lee pi nidoko jawiot ma cuu. Judong cokiri giketho cwinye nia kud evoci, man ejengere iwi tipo pa Yehova. Mer man kite ma judong cokiri ukonyo ko juruot maeno umio amora i kumgi.

20. Kan ibeketho der peri urieny, adwogine bibedo ang’o?

²⁰ Jagor Zaburi uyero kumae: “Mugisa ni ju ma lworo Yehova kubang’gi kubang’gi, ma wotho i yo pare.” (Zab. 128:1) Kan iketho der peri urieny, ibibedo ku mutoro ma lee. Pieno, ponj jumange ging’ei Mungu, tim lembe ceke m’icopo kara ikony juruot peri man cokiri ubed i acel, man mediri nikio. Lapor peri ma ber biketho jumange de bimio yung ni Wegwa ma Yehova.​—Mat. 5:16.