“Kinde ma wabino dhau wakud umara, ang’wenyo dwande man acaku deye. Amito anege cen.”​—Paul.

“Lembe ma nyanok de ubed unyayu ng’ecwiny i ia yofwa. E acaku ng’enyo ajeni, meza, kom ku piny ceke m’anwang’u i wang’a.”​—Marco.

Ju ma pol m’i kindwa gimbe ku kit kwinyo ma kumeno. Re wan ceke saa moko ebedo iwa yot ungo nikwerara giwa. Thelembe mi kwong’o utie nia walagu dubo p’Adamu. (Rum. 5:12) Calu Paul giku Marco, jumoko de nuti ma kumgi cek pio pio. Jumange ke ginwang’u nia nikweriri gigi utie lembe ma yot ungo, kum nwang’u giketho wigi zoo i kum lembe m’unyayu ng’ecwiny i igi. Ni jumoko etie lembe ma tek dit niceriri i kum tarwang’, i kum mer ku kong’o kunoke i kum tio ku yath ma merojo.

Ju ceke ma gibimo ngo wi paru migi, ava migi man timo migi, gicopo nyotho kadok kwo migi bende. Re wacopo uro lembe maeno. Nenedi? Nwang’u wanyutho kite mi kwerigijo i kwo mwa. Wakewec iwi penji adek ma bikonyowa nicego kite maeno i kwo mwa: (1) Kwerigijo tie ang’o? (2) Pirang’o etie kite ma pire tek? (3) Man wacopo cego kite acel maeno mi “nying’ tipo” nenedi? (Gal. 5:22, 23) I ng’eye, wabineno gin ma ng’atuman copo timo en gire, tekene nyutho kwerigijo bebedo ire yot ungo.

Ng’atu ma kwerere gire kume cek ungo vur vur, man eyero ngo wec kunoke etimo ngo lembe ma copo nyayu can i Mungu.

Lembe ma Yesu utimo unyutho iwa kamaleng’ nia kwerigijo utie ang’o. Biblia uyero kumae: “Ka jucaye edwoko wang’ cac de ngo; kan esendre, ecimo cim ungo; ento emire gire ni ng’atu m’upoko lembe pwe.” (1 Pet. 2:23) Yesu unyutho kwerigijo kinde ma judegi pare ubecaye m’eni wi yen mi can. (Mat. 27:39-44) I wang’e de elar enyutho kwerigijo ma yawe mbe kinde ma judong dini mi Juyahudi gipenje ku penji dupa kara gimak the lebe. (Mat. 22:15-22) Enyutho bende kwerigijo ma lee kinde ma Juyahudi moko ma kwinyo umondo i igi gicoko kidi pi nicanye! Ento kakare nidwoko wang’ rac ku rac “Yesu pale gire, man ewok ku i hekalu.”​—Yoh. 8:57-59.

Nyo ecopere iwa de nilubo lapor pa Yesu? Eyo, ecopere i kadhiri moko. Jakwenda Petro ukiewo kumae: “Kristu bende sendre piwu, m’eweko ko por iwu, kara wulub ba tiende.” (1 Pet. 2:21) Pieno, kadok waleng’ ungo de, re wacopo lubo lapor pa Yesu mi kwerigijo ceng’ini ceng’ini mandha. Dong’ pirang’o pire tie tek nia watim kumeno?

Ukwayu wabed ku kite mi kwerigijo kara wanyai mutoro i Yehova. Kadok wadaru timo  ni Yehova ku bedopwe pi oro m’ulwar de, wacopo nyotho mer mwa kude ka wang’io ngo cuu i lembe ma wabetimo kunoke ma wabeyero.

Wakewec iwi lapor pa Musa; Biblia uyero nia ebino ng’atu ma “mol dit, ma sagu dhanu ceke ma [gibino i] wang’ ng’om” i saa maeca. (Wel 12:3) Musa uciro jai mi nyithindho mir Israel pi oro m’ulwar, re ceng’ acel egam ekwerere ngo gire. Kwinyo umake kinde ma nyithindho mir Israel gicaku ng’ur i kume kendo pilembe gikoso pii. Eweco ku kwinyo ni udul dhanu, eyero kumae: ‘Wuwinj kawono, wujujai; wabiwodho pii iwu kud i cana maeni?’​—Wel 20:2-11.

Musa ugam ukwere ngo gire. Emio ngo yung ni Yehova m’uketho pii uwok i ayi mir udu. (Zab. 106:32, 33) Eno uketho Yehova uyio ngo emond i Ng’om mi lembang’ola. (Wel 20:12) Copere nia i dong nindo mi kwo pa Musa zoo, cwinye ubed udieng’ nia pirang’o ekwerere ngo gire.​—Poi. 3:23-27.

Eno ubemio iwa ponji ma kani? Kadok nwang’u watie i lemandha niai con de, ukwayu ngo wawec ku kwinyo ni ng’atu m’unyayu ng’ecwiny i iwa, kunoke tek ukwayere nia wamii juk ni ng’atu moko. (Ef. 4:32; Kol. 3:12) I andha, ka ng’atini ucaku betii, saa moko cirolembe doko ire tek. Poi i kum Musa. Wamito ngo wanyoth bedoleng’ mwa ma wagwoko ni Yehova pi oro m’ulwar ni kum koso kwerigijo ma pi saa ma nok. Dong’ wacopo timo ang’o kara waceg kite maeno ma pire tek?

Kwai tipo maleng’. Pirang’o? Pilembe kwerigijo tie thenge acel mi nying’ tipo pa Mungu, man Yehova ke mio tipo maleng’ pare ni dhanu ceke m’ubekwaye. (Lk. 11:13) Yehova copo tio ku tipo pare maleng’ pi nimio tego kara inyuth kite mi kwerigijo. (Flp. 4:13) Ecopo konyowa bende nicego kite mange mi nying’ tipo, calu ve mer; merne ke biketho ebidoko iwa yot ninyutho kite mi kwerigijo.​—1 Kor. 13:5.

Koyiri ku gin ceke ma copo ketho nyutho kwerigijo doko tek iri. Ku lapor, kud imond i kusika mir Internet ma junyutho i ie timo ma reco, man koc ku galuwang’ ma kumeno. (Ef. 5:3, 4) I andha, wacikara nikoyara ku piny ceke ma copo cwaluwa nitimo lembe ma rac. (Rie. 22:3; 1 Kor. 6:12) Ku lapor, ng’atu m’awanya ma rac mi tarwang’ mondo pio pio i ie ucikere ngo nineno filme  man nisomo buku ma junyutho lembe mi tarwang’ i ie.

Wacopo nwang’u nia tio ku juk maeno tie tek. Ento ka watimo tego mwa ceke, Yehova bimio iwa copo kara wakwerara giwa. (2 Pet. 1:5-8) Ebikonyowa kara wang’ii i gin ma waparu, i wec mwa man i timo mwa. Lembuno unen kamaleng’ i kwo pa Paul giku Marco ma waweco pigi i acaki. Ng’atuman m’i kindgi uponjo nibimo wi kwinyo pare. Wakewec bende iwi lapor p’umego moko ma wang’ ma pol ubed uthubere ku bacofer mange kan eberingo mutukari. Etimo ang’o pi ninyego i kum lembe maeno? Ekoro kumae: “Abed arwo wang’ dupa kubang’ ceng’. Aponjo thiwiwec ma tung’ tung’ m’uweco iwi kwerigijo man amaku ku wiya verse dupa ma copo konya. Kadok nwang’u adaru ii kumeno pi oro ma dupa de, re nja kugweno i wang’ niwok aketho lembakeca nia ukwayu awok akwii kuma. Pieno, aai con nwang’u fodi mutukari pong’ ungo hai i ndaki, kara kud acak dhulara adhula.”

Saa moko ninyutho kite mi kwerigijo copo jai iwa wan ceke. Ka lembene ujai iwa, lewic copo negowa nirwo i bang’ Yehova. Ento eno re m’utie saa m’ukwayu wakwai kony lee i bang’ Yehova. Pieno ka lembuno uwok, rwo ndhundhu i bang’ Yehova. Kwai kisa i bang’e, yeny kony i bang’e man tim kero kara kud ipodh i kit kosa maeno kendo. (Zab. 51:9-11) Kud ipar nia Yehova biwinjo ngo rwo peri m’iberwo ko i bang’e ku cwinyi ceke kara etim iri kisa. (Zab. 102:17) Jakwenda Yohana upoyo wiwa nia rimb Yesu ma Wod Mungu “ubelonyowa ni dubo ceke.” (1 Yoh. 1:7; 2:1; Zab. 86:5) Poi nia Yehova ung’olo ni jutic pare nia gibed giwek lembe i kindgi wang’ dupa dupa. Pieno, wang’eyo andha nia en bende ebiweko iwa lembe kumeno.​—Mat. 18:21, 22; Kol. 3:13.

Anyong’a unego ngo Yehova kinde ma pi saa moko Musa ukoso ninyutho kwerigijo i langa. Ento Yehova utimo ire kisa. Bende Biblia uyero nia Musa ubino ng’atu ma won bedopwe man ma wacikara nilubo lapor pare. (Poi. 34:10; Ebr. 11:24-28) Yehova uyio ngo Musa umond i Ng’om mi lembang’ola, ento i nindo m’ubino ebiyio Musa ukwo i paradiso iwi ng’om, man ebimio ire kaka mi kwo rondo ku rondo. Wan bende wacopo bedo ku genogen mi kwo rondo ku rondo, tekene wabeii ninyutho kwerigijo ma tie kite ma pire tek.​—1 Kor. 9:25.