TIN wan ceke wayio nia Yehova ubetelo wi dhanu pare man ebemio igi gin ma gitie ku yenyne kara gibed ceng’ini kude i nindo maeni mi “kajik ceng’.” (2 Tim. 3:1) Dong’ ubekwayu wan ceke wabed wor ire. Wacopo poro lembe ma wanwang’ara ko i dilo pa Yehova tin, ku lembe ma Juisrael ginwang’iri ko kinde ma gini langa. Ugam ukwayere nia gibed gicok woth ndhundhu kinde ma giwinjo dwand agwara ci.

Yehova uketho Musa uyiko agwara ario mi mola ma tar pi ‘lwong’o udul, man pi woth mi gonjo.’ (Wel 10:2) Julam ubed ukudho agwarane i dwal ma tung’ tung’ pi ninyutho ni udul dhanu gin m’ukwayu gitim. (Wel 10:3-8) Tin bende dhanu pa Mungu ubenwang’u telowic i ayi ma tung’ tung’. Wakenen ayi adek ma wanwang’u ko telowic tin eni, man wapore kud ayi ma dwand agwara ubed uwak ko i Israel ma con. Ayi adekne gini e: coko ma dongo, somo ma tung’ tung’ mi judong cokiri, man telowic ma nyen kud alokaloka ma wabed wanwang’u nikadhu kud i cokiri.

Kinde ma Yehova ubemito “udul ceke” gicokiri i dhugola ma yo nyangu mi hema mi cokiri, julam gibed gikudho agwara ario ceke. (Wel 10:3) Suru apar ario ceke mir Israel gibed giwinjo dwand agwara maeno; jupoko i surune i ungu ma dongo ang’wen man kagonjo migi utieko hema mi cokiri tingili. Ju ma gigonjo ceng’ini ku dhugola mi hema gibed gitundo pio, ju ma gigonjo bor nyanok ke ubed ukwayere nia giwoth pi saa moko man gitim kero pi nitundo. Kadok gibedo ceng’ini kunoke bor de, Yehova ubed umito nia gin ceke gicokiri pi nibino winjo telowic pare.

Tin wacokara ngo i hema mi cokiri, ento wanwang’u lwong’o pi nicodho i coko ma tung’ tung’ mi dhanu pa Mungu; calu ve coko ma dongo mir adhura ku coko mange ma segi. I cokone wabed wanwang’u ponji ku telowic ma pigi tek. I ng’om zoo, dhanu pa Yehova gilubo program ma rom. Pieno dhanu ceke ma gicidho i coko maeno gibedo kud anyong’a nicokiri karacelo. Jumoko giai bor nisagu jumange. Ento ka gitundo, giwok ginwang’u nia kara gitimo kero mananu ngo.

Nyo ju ma gini bor magwei ku kaka ma coko ma dongo betimere i ie de ginwang’u bero mi cokone? Ni kum teknoloji ma tin eni, gin bende gibenwang’u bero mi program ma rom. Eno ketho gin bende ginwang’iri ve nia gini kaka ma programne ubekadhu i ie. Ku lapor, kinde ma jaor mwa mi kabedo ma dit ucidh uliewo Bethel mi Benin, Bethelne umaku yub ma julubo ko programne ku yore mi video i ng’om mi Niger, i nyathin adhura moko ma nyinge Arlit ma nwang’ere bor i langa mi Sahara. Umego ku nyimego 21 ku jumange  ma gi Jumulembe ngo gilubo programne. Kadok gibino bor de, re ginwang’u nia gibedo karacelo kud udul dhanu 44 131 ma gibedo kaka ma programne ubekadhu i ie. Umego acel ukiewo kumae: “Wafoyowu ku cwinywa zoo pi program maeno ma wuketho walubo. Eno unyutho kamaleng’ nia karaman wumaruwa andhandha.”

Ka julam mi Israel ukudho agwara acel kende, “judongomawijo ma wi rubanga” kendgi re ma gicokiri i dhu hema mi cokiri. (Wel 10:4) Kuca re ma gicidh giwang’u telowic man ponji i bang’ Musa. Eno konyogi nitimo tic mi telo wi suru migi cuu. Ka nwang’u in de ibedo i kind judongomawijo maeno, nyo nwang’u icopo timo ngo kero peri ceke kara ibed unuti man inwang’ bero mi ponjine?

Tin judong cokiri gitie ngo “judongomawijo” man girwodho de ngo arwodha iwi rombe pa Mungu ma gibeneno wigi. (1 Pet. 5:1-3) Ento gitimo tego migi ceke pi nikwayu rombe pa Mungu. Pieno ka julwong’ogi ninwang’u ponji, calu ve i Somo mi tic mi Ker, gibedo ayika nicidho. I somo maeno judong cokiri ginwang’u ponji ma tung’ tung’ ma copo konyogi niyiko lembe mi cokiri cuu. Kadok nwang’u jadit cokiri moko ukoso somone acel de, re asu edok enwang’u bero mi somone i bang’ ju m’ucidho, pilembe gidok gitio ku lembe ma giponjone pi nikonyo cokiri.

Saa moko julam gibed gikudho agwara ma nwang’u gibeloko dwande aloka. Eno ubed unyutho nia Yehova ubemito nyithindho mir Israel gicok woth. (Wel 10:5, 6) Kan udul dhanu gibeai kud i kagonjo, gicoko wothne i ayi m’upangere ma ber, ento ubed ukwayu nia ng’atuman ubed utim tic ma tek. Saa moko copere nia jumoko ava coko woth ubed ubedo mbe i kumgi. Pirang’o?

Cicopere nia jumoko ubed unwang’u nia agwara mi coko woth kud i kagonjo ucukuwak pio pio dit man lembene tundo de rek. “Nindo moko afuru bedo gambre uthieno cil kugweno;” saa moko ke ebedo “ceng’ ario, kadi dwi, kadi rundi” kan eai. (Wel 9:21, 22) I andha Juisrael uwilo kabedo wang’ adi ma tung’ tung’? Wel thek 33 uweco pi kabedo ma tung’ tung’ 40 ma Juisrael gibed gigonjo i ie.

Saa moko kagonjo mi Juisrael moko ubed ubedo i the tipo. Nigonjo i the tipo ubino lembe m’ubed unyang’u Juisrael lee dit kinde ma gini “langa ma ng’oyo ndiri.” (Poi. 1:19) Pieno, saa moko nyo gibed giparu nia, ka giai kud i kagonjo ma kumeno gibicigonjo kaka ma rac.

Ka suru ma gini i ungu acel gicoko woth, jumange gikegikuro, eno ubed ukwayu cirocir ma lee. Suru ceke winjo dwand agwara mi coko woth, ento giai ungo i saa ma rom. Kan agwara mi coko woth uwak wang’ mi kwong’o, eno nyutho nia suru ma gigonjo yo nyangu, niwacu suru pa Yuda, pa Isakar man pa Zebulun re ma gibicoko woth. (Wel 2:3-7; 10:5, 6) Ka gidaru cidho, julam gikudho agwara mi coko woth kendo wang’ mir arionde pi ninyutho nia suru adek m’ugonjo yo piny gicok woth. Julam gitimo kumeno nitundo suru ceke ma gigonjo keca gicidho.

Saa moko nyo kinde ma dilo pa Yehova ugam utimo alokaloka moko, inwang’u nia etie lembe ma tek nijolo alokalokane. Pirang’o? Ecicopere nia iparu nia alokalokane de judaru timo dit, kunoke nyo nwang’u in ilar imaru peri ayi ma jubed jutimo ko i wang’e man imito ngo nia juloke. Pieno igam inwang’u nia etie yot ungo ning’iyo kud alokalokane man eting’o iri nindo ma lee. Tek wabetimo kero ning’iyo kud alokaloka pilembe wang’eyo nia etie gin m’ukwayu watim, wabinyang’ kamaleng’ nia karaman jutimo alokalokane pi bero mwa man wabinyayu mutoro i Yehova.

I rundi pa Musa, Yehova utelo wi jumaco, jumamon man awiya milioni dupa kinde ma gini langa. Ka nwang’u egwokogi ngo man etelo wigi ngo, nwang’u githo kpo. Tin Yehova ubetelo wiwa i nindo ma rac maeni mi kajik ceng’, ebekonyowa kara kindwa ubed ceng’ini kude man kara yioyic mwa ubed tek! Pieno, dong’ wan ceke watim kero nibedo wor, calu nyithindho mir Israel ma gibed giworo dwal ma tung’ tung’ mir agwara!