1. Pirang’o saa moko jurutic pa Yehova giwinjiri nia gitie liyo kendgi?

DUPA m’i kindwa giwinjiri nia gitie kendgi. Ni jumoko, kite ma giwinjiri kone galu ngo, ento ni jumange egalu. Jumoko ginwang’iri nia gitie kendgi kadok gin’i kind dhanu dupa de. Jumoko ninwang’u jurimo i cokiri ma nyen ma gidok i iye tie lembe ma tek igi. Jukurucel gibed gitimo lembe ceke karacelo ku wedi migi i pacu, ento kinde ma gin’i bor ku wedi migi, ginwang’iri nia gitie liyo kendgi. Jumange ke ava ju ma gibed ginambu kugi nwang’u ubenegogi. Jukristu moko, akecane ju ma fodi gijolo lemandha ajola, ginwang’u nia gitie liyo kendgi pilembe nwang’u wedi migi kunoke jurimbgi ma con ubenyayu ragedo i kumgi.

2. Wabidwoko wang’ penji ma kani i thiwiwec maeni?

² Yehova ung’eyo man ebenyang’ i lembe ceke ma wabenwang’ara ko. Eng’eyo kinde ma wabenwang’ara liyo kendwa, man ebemito ekonywa. Yehova bekonyowa nenedi? Wan giwa ke wacopo timo ang’o pi ninwang’u kony? Man wacopo konyo jumange i cokiri ma giwinjiri nia gitie kendgi ke nenedi? Wakenwang’ dwokowang’ penji maeno.

3. Yehova unyutho nenedi nia edieng’ pir Eliya?

³ Yehova ubemito jurutic pare ceke gikwo kud anyong’a. Etie ceng’ini ku ng’atuman m’i kindwa man eneno ka watie ku can i cwinywa kunoke ka cwinywa tur. (Zab. 145:18, 19) Wakenen kite ma Yehova udieng’ ko man ekonyo ko jabila pare Eliya. Eliya ukwo i rundi ma nyithindho mir Israel gibino kwo i iye i peko. I saa maeno, jubino nyayu ragedo i kum jurutic  pa Yehova man Eliya ubino acel m’i kindgi ma judegi pa Mungu uketho wang’gi tingili i kume. (1 Ub. 19:1, 2) Bende, Eliya ubino paru nia en kende re m’edong’ ni jabila m’ubetimo ni Yehova; lembe maeno de copo bedo ire ni turcwiny ma lee. (1 Ub. 19:10) Mungu ugalu ngo, ekonyo Eliya pio pio. Eoro malaika ucidh utiel cwinye nia etie kende ngo, Juisrael mange de dupa nuti ma fodi gibelworo Mungu!​—1 Ub. 19:5, 18.

4. Giragora pa Marko 10:29, 30, unyutho nenedi nia Yehova dieng’ pi jurutic pare ma wedi migi kunoke jurimbgi uwenjogi?

⁴ Yehova ung’eyo nia tek wang’iyo nitimo ire, bikwayere nia jumoko m’i kindwa gitwoniri ku lembe dupa. Lembene moko copo bedo kony ma wedi migi kunoke jurimbgi ma gitimo ngo ni Yehova gibed gimiyo igi. Saa moko nyo jakwenda Petro de ubino lworo lembuno, uketho epenjo Yesu kumae: “Nen, waweko gin ceke man walubo ng’ei: Ka kumeno wabibedo ku girang’o?” (Mat. 19:27) Yesu uyero ni julub pare ku yoo nia umego ku nyimego mi cokiri bidoko igi ve wedi migi. (Som Marko 10:29, 30.) Yehova Wegwa m’i polo ung’olo nia ebikonyo dhanu ma gibemito gitim ire. (Zab. 9:10) Wakenen lembe moko ma wacopo timo kara wanwang’ kony pa Yehova kinde ma wabenyego ku peko mi bedo liyo kendjo.

5. Bero ma kani ma wanwang’u ka wabeparu pi kite ma Yehova ubekonyo kowa?

⁵ Par pi kite ma Yehova ubekonyi ko. (Zab. 55:22) Tek ibetimo kumeno, eno bikonyi ibineno nia itie ngo kendi. Nyamego moko ma jamusuma ma nyinge Carol, * ma jupagi tie ngo Jumulembe pa Yehova uwacu kumae: “Kan ating’o wang’a aparu pi kite ma Yehova ukonya ko i peko ma tung’ tung’ m’akadhu kud i iye, lembuno konya anwang’u nia atie ngo kenda. Lembene ketho cwinya bedo tek nia Yehova bikonya kadok i nindo m’ubino.”

6. Giragora pa 1 Petro 5:9, 10, copo tielo cwiny ju ma ginwang’iri nia gitie kendgi nenedi?

⁶ Par pi kite ma Yehova ubekonyo ko umego ku nyimego ma ginwang’iri nia gitie kendgi.  (Som 1 Petro 5:9, 10.) Umego Hiroshi ma tie Jamulembe pa Yehova en kende i kind jupagi uwacu kumae: “I cokiri, etie yot nineno nia ng’atuman utie ku peko. Ento ka ju ma wedi migi utie ngo Jumulembe pa Yehova gibeneno nia wan ceke wabetimo kero pi nitimo ni Yehova, lembuno tielo cwinygi lee.”

7. Rwo bekonyi nenedi?

⁷ Bed ku ng’iyo ma ber mi timo lembe mi tipo. Eno uketho i iye nikoro tap kite m’ibewinjiri ko ni Yehova nikadhu kud i rwo. (1 Pet. 5:7) Nyamego Massiel uwacu kumae: “Kud i kind lembe ma pigi tek m’ukonya ninyego ku peko mi bedo liyo kenda, utie nirwo i bang’ Yehova kud adundena ceke.” Kinde ma Massiel ucaku timo ni Yehova i aradu pare, enwang’ere nia etie liyo pilembe ebino Jamulembe pa Yehova kende i kind jupagi. Emedo kumae: “Yehova ubino ira ni Wego mandha, man kubang’ ceng’ abed arwo i bang’e wang’ dupa m’akoro ko ire kite m’abewinjara ko.”

8. Somo Biblia man nyamu iye bekonyi nenedi?

⁸ Bed isom Biblia kubang’ ceng’ man inyam i lembe m’ubenyutho nia Yehova umeri. Nyamego moko ma nyinge Bianca m’uciro wec mi turcwiny ma jupagi ubed uyero ire ukoro kumae: “Somo Biblia man nyamu i lembe iwi gin m’abesomo, man bende somo kpawa mi kwo mi jurutic pa Yehova ma giciro lembe m’urombo ku para ukonya lee mandha.” Jukristu moko bemaku giragora mi tielocwiny ma calu ve Zaburi 27:10 man Isaya 41:10 ku wigi. Jumange ke ginwang’u kony lee saa ma gibewinjo girasoma ma jumaku pir awinja kinde ma gibeyiko coko kunoke gibesomo Biblia. Lembuno ketho giwinjiri nia gitie ngo kendgi.

9. Cidho i coko bekonyi nenedi?

⁹ Bed itim kero nicidho nja i coko. Ibinwang’u bero i kum program ma tielocwinyjo man iromo nwang’u bende kaka mi ng’eyo umego ku nyimego. (Ebr. 10:24, 25) Massiel ma waweco pire uyero kumae: “Kadok nwang’u abed abedo jalewic lee de, re amaku yub mi becidho i coko ceke man mi bedwoko wang’ penji. Lembuno uketho awinjara ceng’ini kud umego ku nyimego mi cokiri.”

10. Pirang’o pire tie tek nitheyo mer kud umego ku nyimego i cokiri?

¹⁰ They mer kud umego ku nyimego. Say jurimo m’iromo nwang’u ponji i bang’gi i cokiri kadok nwang’u oro migi kunoke suru migi ukoc ku peri de. Biblia ubepoyo wiwa nia rieko nuti “ku judongo.” (Yob 12:12) Ju m’uteng’ini de giromo nwang’u ponji i bang’ aradu. Daudi ubino nyathin lee ni Yonathan, re lembuno ucerogi ngo nibedo jurimo ma ceng’ini i kindgi. (1 Sam. 18:1) Daudi giku  Yonathan gikonyiri i kindgi kara gitim ni Yehova kadok kud i kind peko dupa de. (1 Sam. 23:16-18) Nyamego Irina ma tie Jamulembe pa Yehova en kende i kind jupagi uyero kumae: “Umego ku nyimego mwa giromo doko iwa calu junyodo mwa kunoke awiya mwa. Yehova copo tiyo kugi pi nipong’o yeny mwa.”

11. Wacopo timo ang’o kara mer m’i kindwa ubed ma tek?

¹¹ Nitheyo mer tie lembe ma yot ungo, asagane kan itie jalewic. Nyamego Ratna ma tie jalewic ung’eyo lemandha kud i kind ragedo, eyero kumae: “Anwang’u nia andha abino ku yeny mi kony mir umego ku nyimego mi cokiri.” Ecopo bedo lembe ma tek ninyutho kite m’ibewinjiri ko ni ng’atu mange, ento kan ibekoro paru peri ngbeng’ ngbeng’ ire, eno copo ketho kindwu doko ceng’ini ku ng’atune. Jurimbi gibemito gitiel cwinyi man gikonyi; ento kara gitim lembuno, ukwayu ikor igi kite m’ibewinjiri ko.

12. Tic mi rweyo lembanyong’a bekonyi nenedi ninwang’u jurimo ma beco?

¹² Yo mange ma ber akeca ma watheyo ko mer utie nirweyo lembanyong’a ku jumange. Carol ma waweco pire uyero kumae: “Anwang’u jurimo dupa ma beco kinde m’aberweyo lembanyong’a karacelo ku nyimego man kinde ma wabetimo tic mange mi theokrasi. Pi oro ma dupa Yehova ukonya nikadhu kud i bang’ jurimo maeno.” Nitheyo mer ku Jukristu wadwa tie lembe ma miyo kony saa ceke. Yehova copo tiyo kugi pi nikonyi inyeg i dhu pidoic mi turcwiny ma calu ve bedo liyo kendjo.​—Rie. 17:17.

13. Wan ceke i cokiri watie ku rwom mi timo ang’o?

¹³ Wan ceke watie ku rwom mi ketho cokiri ubed ku kwiyocwiny, man mi nyutho mer ni dhanu ceke kara ng’atu moko kud unwang’ere nia etie kende. (Yoh. 13:35) Lembe ma wabetimo man ma wabeyero copo konyo jumange lee mandha! Nyamego moko uwacu kumae: “Kinde m’ang’eyo lemandha, umego ku nyimego gidoko ira ni jufwa. Nwang’u acopo doko ngo Jamulembe pa Yehova ka ku kony migi ngo.” Dong’ icopo timo ang’o pi nikonyo ju ma ginwang’iri nia gitie kendgi i lemandha, kara giwinjiri nia jumarugi i cokiri?

14. Icopo timo ang’o kara ithey mer ku ju ma nyen i cokiri?

¹⁴ Mak yub m’ithey ko mer ku jumange. Waromo jolo ku yaw yaw i cokiri mwa japonj Biblia m’ucaku bebino i coko, umego ku nyimego ma gidwogo ma nyen i cokiri mwa, man ju ma fodi gilimo alima. (Rum. 15:7) Kakare nimothogi amotha kende, waromo timo lembe mange de dupa. Wabemito mer m’i kindwa ubed ma tek nisagu m’i wang’e. Pieno ku yaw yaw, nyuth nia ibedieng’ andha ku dhanu m’utundo ma nyen. Pim ninyang’ i lembe ma gibekadhu kud i iye, re bed ku weng’i, kud ipenjgi ku penji ma romo nyayu lewic i wigi. Ecopo bedo tek ni jumoko nikoro iri kite ma gibewinjiri ko, pieno kud irergi arera. Ento telgi i kumi m’ipenjgi ko ku penji mi rieko man iwinjgi ku cirocir kinde ma gibedwoko wang’e. Ku lapor, icopo penjogi nia ging’eyo lemandha nenedi.

15. Jukristu m’uteng’ini i thenge mi tipo giromo konyo jumange nenedi i cokiri?

¹⁵ Dhanu ceke mi cokiri bitimo mediri i thenge mi tipo tek Jukristu m’uteng’ini ubedieng’ kugi, asagane judong cokiri. Melissa ma min utunge i lemandha uwacu kumae: “Abedwoko foyofoc lee ni umego ma gibedo ira ni wego i thenge mi tipo pi oro ma dupa. Saa ceke m’amito awec i bang’gi, gibedo  ayika niwinja.” Umego moko m’aradu ma nyinge Mauricio uwinjere ku can i cwinye man nia etie kende kinde ma ng’atu m’uponje ku Biblia uweko lemandha, ekoro kumae: “Judong cokiri gidieng’ pira man lembuno ukonya lee mandha. Gibed giweco kuda wang’ ma pol. Gibed girweyo lembanyong’a kuda, gibed gikoro ira lonyo mi tipo ma ginwang’u i ponji migi ma segi, man gibed gituko karacelo kuda.” Kawoni Melissa giku Mauricio zoo gibetimo i Bethel.

16-17. Wacopo timo ang’o kendo pi nikonyo jumange?

¹⁶ Mii kony ma ku timo. (Gal. 6:10) Leo ma timo tic mi misioner bor ku jupagi, uyero kumae: “Gin m’ukwayere utie ngo lembe ma lee, ndhu nitimo lembe ma nok, re tap i saane. Abepoy nindo moko m’agam anwang’u ret ku mutukari, akomo asu atundo i pacu man cwinya ubino pido lee. I ng’eye, umego moko ku min ot pare gilwong’a ni cam i bang’gi. Abepoy ungo nia cing’ nica wacamu ang’o, ento gin m’abepoy i kume utie kite ma ber ma giwinja ko. I ng’eye, awinjara ma ber mandha!”

¹⁷ Wan ceke anyong’a negowa ka watie karacelo kud umego ku nyimego man ka wabeweco iwi korolembe ma wawinjo, calu ve i coko ma dongo mi twodiri man mir adhura. Ento Carol ma waweco pire uyero kumae: “Kan acidho i coko ma dongo mi twodiri man mir adhura anwang’ara nia atie kenda.” Pirang’o? Emedo kumae: “Kadok nwang’u abedo i kind umego ku nyimego dak acel kunoke elufu swa de, wang’ ma pol inwang’u gibedo karacelo ku wedi migi. Kan anenogi, anwang’ara liyo kenda.” Ni jumange etie lembe ma tek nicidho i coko ma dit mir adhura kunoke mi twodiri wang’ ma kwong’a i ng’ei tho pa judhoggi mi gamiri. Nyo ing’eyo ng’atu moko m’ubekadhu kud i kit peko ma kumeno? Ka eyo, nyo ecibedo ber ungo nia i coko ma dit m’ubino ilwong’e wubed kude karacelo ku juruot peri?

18. Waromo tiyo nenedi ku 2 Jukorinto 6:11-13 kinde ma wabenyutho jol?

¹⁸ Bed ibed karacelo ku jumange. Tim kero ibed karacelo kud umego ku nyimego, asagane ku ju ma ginwang’iri nia gitie kendgi.  Wabemito ‘wayab adundewa ma lac’ (NWT), asagane ni dhanu ma kumeno. (Som 2 Jukorinto 6:11-13.) Melissa ma waweco pire ukoro kumae: “Wabed wabedo kud anyong’a lee mandha kinde m’umego ku nyimego gilwong’owa wacidh wanamb kugi i pacu migi, kunoke i kaka mange.” Nyo i cokiri peri de ng’atu moko nuti m’icopo nyutho ire jol?

19. Bedo karacelo ku Jukristu wadwa copo miyo bero asagane i saa ma kani?

¹⁹ Saa moko tie ma Jukristu wadwa giromo bedo ku foyofoc lee ka wabedo kugi karacelo. Ecopo bedo tek ni jumoko nibedo karacelo ku wedi migi ma gitie ngo Jumulembe pa Yehova kinde ma wedine gibetimo foc mi ceng’ ma dit. Jumange ke gicopo bedo ku can lee i nindo moko, calu ve nindo ma wedi migi ma gimaru utho i iye. Ka wabedo kud umego ku nyimego ma ginwang’iri ku peko ma kumeno, eca nwang’u wabenyutho nia ‘iwa pido’ pigi.​—Flp. 2:20.

20. Wec ma Yesu uyero ma nwang’ere i Matayo 12:48-50, bekonyowa nenedi kinde ma wanwang’ara liyo kendwa?

²⁰ Lembe tie dupa ma copo ketho saa moko Jakristu nwang’ere nia etie liyo kende. Re wiwa kud uwil nia Yehova ubedieng’ akeca pi dhanu ma kumeno. Ebemiyo iwa kony ma watie ku yenyne, asagane nikadhu kud i bang’ umego ku nyimego. (Som Matayo 12:48-50.) Wan ke wabinyutho foyofoc mwa ni Yehova pi lembe maeno nwang’u wabetimo kero mwa ceke pi nikonyo umego ku nyimego. Kadok saa moko wawinjara nenedi de, re wang’eyo nia saa ceke Yehova ni kudwa, watie ngo kendwa!