1. Julub pa Yesu giyero ni udul dhanu nia gitim ang’o?

UDUL dhanu ma dit m’uketho i iye co ku mon, gicokiri i Yeruzalem giai kud i ng’om ma tung’ tung’ man giweco dhok de ma tung’ tung’. Cing’ nica, lembe moko mi zungo utimere. Mbwang’ kumeni, Juyahudi moko gicaku weco dhok mir udul dhanu ma gicokirine! Lembuno uwang’u i udul dhanune lee mandha, ento lembe ma Juyahudi eno uyero igi ku ma jakwenda Petro uyero ni dhanu ceke re ma pire bino tek nisagu. Lembene moko ubino nia, kara gibothi umito ginyuth yiyoyic migi i Yesu Kristu. Wec maeno umulo adundegi lee mandha. Lembene ucwalugi uketho gipenjo kumae: “Wabitimo ang’o?” Petro udwoko igi kumae: “Wumak babutisi kubeng’wu kubeng’wu.”​—Tic. 2:37, 38.

2. Wabiweco iwi lembang’o i thiwiwec maeni? (Nen cal m’i ng’eye.)

² Lembe m’udong’ utimere i ng’eye ubino lembe mi zungo. Dhanu ma romo 3 000 ulimo batizo cing’ nica man gidoko julub pa Kristu. Eno ubino acaki mi tic ma dit mi ketho dhanu udok julub ma Yesu ung’olo ni julub pare nia gitim. Julubne gibemediri nitimo tic maeno nitundo tin. Tin wacopo ponjo ngo ng’atini pi saa ma nyanok ci, e ndhu elim batizo. Ecopo ting’o dwi ma lee, oro kunoke nikadhu kara japonj Biblia ulim batizo. Kan ibeponjo Biblia ku ng’atu moko kawoni, waparu ing’eyo ma ber nia niketho edok jalub pa Kristu utie tic ma yot ungo. I thiwiwec maeni, wabiweco iwi lembe m’icopo timo kara ikony ng’atu m’iponjo kude Biblia umedere nitundo i batizo.

3. Calu m’ugorere i Matayo 28:19, 20, japonj Biblia ucikere nitim’ang’o kara emedere nitundo i batizo?

³ I wang’ nilimo batizo, japonj Biblia ucikere nitiyo ku gin m’ebeponjo i Biblia. (Som Matayo 28:19, 20.) Tek ng’atu ma waponjo kude Biblia ubetiyo ku gin m’ebeponjo i kwo pare, ebibedo ve “ng’atu ma riek” ma Yesu uweco pire i lapor pare, m’utong’o ng’om ma thuth kara egier ot pare wi cana ma tek. (Mat. 7:24, 25; Lk. 6:47, 48) Wacopo konyo japonj Biblia nenedi kara etii ku lembe m’ebeponjo? Wakewec iwi lembe adek ma wacopo timo.

4. Wacopo konyo japonj Biblia nenedi kara etim mediri m’erom ko nilimo batizo? (Nen bende sanduku “ Kony japonj Biblia ubed ku lembakeca man etund i kumgi.”)

⁴ Kony japonj Biblia ubed ku lembakeca. Pirang’o pire tie tek nia ikonye ebed ku lembakeca? Wakemak lapor: Tek ibecidho i woth moko ma bor, icopo maru iwok iyom kaka moko ma ber i kor yo, i ng’eye, ndiri binegi ngo nia ka m’ibecidho i iye udong’ bor akeca. Kumeno bende, tek japonj Biblia ubeketho lembakeca ma thindho thindho man ebetundo i kumgi, ebinwang’u nia ecopo tundo i kum lembakeca pare mi limo batizo bende. Icopo tiyo ku sanduku “Lembe m’ukwayu itim,” ma nwang’ere i buku Icopo kwo kud anyong’a rondo rondo! pi nikonyo japonj Biblia ubed ku lembakeca. I thum mi ponjiman, wec iwi kite ma lembakeca copo konyo ko japonj Biblia nitiyo ku lembe m’eai eponjo. Tek itie ku lembakeca mange m’umito japonj Biblia utund i kume, kiewe kaka m’udong’ thwolo ma jukiewo i wiye nia “Mange.” Bed itii ku thenge meni thirithiri pi niweco ku japonj Biblia iwi lembakeca pare ma thindho man ma dongo m’eketho.

5. Calu m’ugorere i Marko 10:17-22, Yesu uyero ni jalonyo nia etim ang’o, man ke pirang’o?

 ⁵ Kony japonj Biblia utim alokaloka i kwo pare. (Som Marko 10:17-22.) Yesu ung’eyo nia ecopo bedo lembe ma tek ni jalonyo nilworo piny ceke m’etie ko. (Mk. 10:23) Re eyero ire nia etim alokaloka maeno ma dit i kwo pare. Pirang’o? Pilembe Yesu umare. Saa moko lworo copo negowa nimiyo amora i kum japonj Biblia nia etii ku lembe m’ebeponjo, pilembe waparu nia fodi etie ngo ayika nitimo alokaloka m’ukwayere. Niwanyu kura ma con cen man nironyo kura ma nyen, utie lembe ma ting’o nindo. (Kol. 3:9, 10) Ento Kan igalu ngo niweco kude iwi alokaloka m’ecopo timo, en de ecopo galu ngo nitimo alokaloka. Tek ibeweco kude iwi lembe maeno, eno nyutho nia ibedieng’ pire.​—Zab. 141:5; Rie. 27:17.

6. Pirang’o ukwayu wabed watii ku penji ma ketho ng’atini koro paru pare?

⁶ Pire tie tek nipenjo japonj Biblia unyuth paru pare iwi lembe ma wubeponjo. Eno biketho ibing’eyo ka nyo ebenyang’ man ebeyiyo lembe ma wubeponjo. Kan itimo kumeno thirithiri, ebibedo iri yot niweco kude iwi lembe ma yiyo cibedo tek ire. Buku Icopo kwo kud anyong’a rondo ku rondo! utie ku penji dupa ma ketho ng’atini koro paru pare. Ku lapor, i ponji mir 04 junwang’u penji mae: “Iparu nia Yehova copo winjere nenedi kan ibetiyo ku nyinge?” I ponji mir 09 ke: “Kekwan lembe moko m’icopo maru irwo pigi.” I acaki, ecopo bedo lembe ma tek nidwoko wang’ penji maeno. Ento pi nikonye, icopo ketho ebed ku ng’iyo mi nyamu i lembe iwi giragora man iwi cal m’i bukune.

7. Icopo tiyo nenedi ku lapor mi dhanu mange pi nikonyo japonj Biblia?

⁷ Tek japonj Biblia ung’eyo gin m’ukwayu etim, tii ku lapor mi lembe moko m’utimere pi nikonye. Ku lapor, tek ebed ecidho ngo nja i coko, icopo nyutho ire video ma thiwiye tie Yehova udieng’ pira ma nwang’ere i the thiwiwec “Tim sayusac,” i ponji mir 14. I ponji dupa mi buku Icopo kwo kud anyong’a rondo ku rondo! ibinwang’u lembe maeno i the thiwiwec “Med nyang’ peri,” kunoke “Tim sayusac”. * Bed ku weng’i, kud ipor japonj Biblia ku ng’atu mange m’iyer ko nia “ka ng’adi de utimo, in de icopo timo.” Wek en re m’eyer lembe maeno pire gire, in ungo. In wec peri iwi lembe ma pigi tek m’ukonyo dhanu ma wuneno i vedeo nitiyo ku gin ma Biblia ubeponjo. Saa moko icopo ketho nwoc iwi giragora ma pire tek kunoke iwi lembe ma dhanune gitimo. Bende ka copere, keth nwoc iwi kite ma Yehova ukonyo ko ng’atune.

8. Wacopo konyo japonj Biblia umar Yehova nenedi?

⁸ Kony japonj Biblia umar Yehova. Nenedi? Say yo ceke m’itel ko nen pare iwi kite ma tung’ tung’ pa Yehova. Kony japonj Biblia unen Yehova ni Mungu ma jamutoro ma konyo dhanu m’umare. (1 Tim. 1:11; Ebr. 11:6) Nyuth ire nia ebinwang’u bero tek ebetiyo ku lembe m’ebeponjo, man kor nia lembuno ubenyutho nia Yehova umare. (Isa. 48:17, 18) Ka japonj Biblia umaru Yehova lee, eno bicwale nitimo alokaloka ceke m’ukwayere.​—1 Yoh. 5:3.

9. Nimakere ku Marko 10:29, 30, ang’o ma bikonyo japonj Biblia nitwonere kara elim batizo?

⁹ Kara japonj Biblia utim mediri nitundo i batizo, ukwayu etwonere ku lembe dupa.  Calu jalonyo ma walar waweco pire, ukwayu juponj Biblia moko de gitwoniri ku giki dupa mi kum. Tek gibetimo tic m’urombo ngo ku cik mir ukungu mi Biblia, ecopo kwayere nia gitim alokaloka ma ginwang’ ko tic mange. Ni ju ma dupa, copo kwayere nia gilal mer ku ju ma gimaru ngo Yehova. Jumange ke nwang’u wedi migi m’umaru ngo Jumulembe pa Yehova uwenjogi. Yesu ung’eyo nia ecopo bedo tek ni dhanu moko nitwoniri ku lembe ma kumeno. Eng’olo nia juceke ma gibilubo toke, ang’eyang’o biwok ungo i igi. Yehova bimiyo igi mugisa ma gibinwang’u ko wedi migi i thenge mi tipo i kind dhanu pare. (Som Marko 10:29, 30.) Icopo konyo ng’atu m’iponjo kude Biblia nenedi kara enwang’ bero i kum giramiya ma ber maeno?

10. Inwang’u ponji ma kani i kum lembe ma Manuel uyero?

¹⁰ Bed jarimb ng’atu m’iponjo kude Biblia. Pire tie tek ninyutho ni japonj Biblia nia ibedieng’ pire. Pirang’o? Manuel ma kwo i ng’om mi Mexique ubepoy i kum lembe ma japonji pare utimo. Eyero kumae: “Nja i wang’ caku ponji, japonji para kelar penja ka nyo atie nenedi. Ekonya awinjara ma ber, man lembene ubed uketho akoro ire lembe ceke. Anyang’ andha nia ebed edieng’ pira.”

11. Juponj Biblia gicopo nwang’u bero ma kani tek wabenambu kugi?

¹¹ Bed inwang’ saa mi nambu karacelo ku juponj Biblia, tap calu ma Yesu de ubed utimo ku julubne. (Yoh. 3:22) Tek ng’atu m’iponjo kude Biblia ubetimo mediri, icopo lwong’e i beng’i i pacu pi nimadhu kude cai, nicamu kude kunoke nineno kude program mi Televizio JW ma bewok kubang’ dwi. Ecopo foyo lembene lee dit kan ilwong’e i nindo mi foc mi ceng’ ma dit, saa ma wedi pare ku jurimbe gibetimo iye focne man ebenwang’ere nia etie kende. Kazibwe ma kwo i Uganda uyero kumae: “Anwang’u ponji dupa iwi Yehova kinde ma wabenambu karacelo ku japonji para, tap calu m’abed anwang’u i saa mi ponji mwa mi  Biblia. Aneno kite ma Yehova ubedieng’ ko ku dhanu pare man anyong’a ma gitie ko. Eno tie tap ayi ma an de amito akwo ko.”

12. Pirang’o ukwayu wabed wacidh ku jurwey lembanyong’a ma tung’ tung’ kinde ma wabecitelo wi ponji mi Biblia?

¹² Bed icidh ku jurwey lembanyong’a ma tung’ tung’ kinde m’ibecitelo wi ponji mi Biblia. Saa moko wabed wanwang’u nia etie ber nicitelo wi ponji mwa mi Biblia kendwa kunoke ku jarwey lembanyong’a ma rom. Kadok etie rac ungo nitimo kumeno de, re japonj Biblia copo nwang’u kony lee tek wabecukucidho ku jurwey lembanyong’a ma tung’ tung’ pi nitelo wi ponji pare. Dmitrii ma kwo i ng’om mi Moldova uyero kumae: “Kubang’ jarwey lembanyong’a ma bebino ku japonji para pi nitelo wi ponji, wok koro lembe i ayi ma segi. Lembuno ukonya nineno ayi mange m’acopo tiyo ko ku gin m’abeponjo i kwo para. Bende kinde m’acidho i coko wang’ ma kwong’a, lworo uwok unega ngo pilembe adaru ng’eyo umego ku nyimego dupa.”

13. Pirang’o ukwayu wakony ju ma waponjo kugi Biblia gicidh i coko?

¹³ Kony japonj Biblia ucidh i coko. Pirang’o? Pilembe Yehova ung’olo nia jurutic pare gibed gicokiri karacelo, man eno tie acel m’i kind thier ma watimo ire. (Ebr. 10:24, 25) M’umedo maeno, umego ku nyimego mwa gidoko juruot mwa mi thenge mi tipo. Kinde ma wacokara kugi i coko, edog ebedo ve wabecamu cam ma mit karacelo i pacu. Tek ibekonyo ng’atu m’iponjo kude Biblia ucidh i coko, eca nwang’u ibekonye etim dagutielo ma pire tek nitundo i batizo. Re nicaku cidho i coko copo bedo ire lembe ma tek. Buku Icopo kwo kud anyong’a rondo rondo! romo konyo ng’atu m’iponjo kude Biblia nenedi kara evoy peko ceke ma copo cere nicidho i coko?

14. Wacopo miyo amora i kum japonj Biblia nenedi kara ecidh i coko?

¹⁴ Tii ku buku Icopo kwo kud anyong’a rondo ku rondo! ponjine mir 10, pi nimiyo amora i kum japonj Biblia. I wang’ niwodho buku maeno, jukwayu jurwey lembanyong’a moko nia gikegitii kude pi nitelo wi ponji mi Biblia. E giwacu nia bukune ubedo ku kony lee man eketho juponj Biblia gicaku cidho i coko. Kud ikur nia wukewutund i ponjine mir 10 kadong’ icak lwong’o japonj Biblia ubin i coko. Lwong’e ndhundhu ka copere, man mediri asu nilwong’e. Juponj Biblia gibenwang’iri ku peko ma tung’ tung’. Pieno, nen yeny ma japonj Biblia utie ko, man kite m’icopo miyo ko ire kony. Cwinyi kud utur tek ebegalu nicaku cidho i coko. Bed ku cirocir, mediri nilwong’e.

15. Japonj Biblia copo bedo ku lworo ma kani?

¹⁵ Nyo ibepoy pi lworo m’ibino ko pi nidoko Jamulembe pa Yehova? Saa moko nyo inwang’u nia icopo romo ngo nirweyo lembanyong’a ot ku bang’ ot. Kunoke nyo lworo ubino negi nia wedi peri ku jurimbi gibiceyi. Tek andha kumeno, icopo nyang’ ma ber kite ma japonj Biblia de ubewinjere ko. Yesu ung’eyo nia jumoko lworo copo negogi. Ento ekwayu julubne nia kud giwek lworo ucergi ku timo ni Yehova. (Mat. 10:16, 17, 27, 28) Yesu ukonyo julubne nenedi kara givoy lworo migi? In ke icopo lubo lapor pare nenedi?

16. Wacopo konyo japonj Biblia nenedi kara ewec ku jumange iwi gin m’ebeponjo?

¹⁶ Nok nok, kony japonj Biblia uwec ku jumange iwi gin m’ebeponjo. Kinde ma Yesu uoro julubne nia gicidh girwey lembanyong’a, nwang’u lworo copo negogi. Ento pi nikonyogi,  enyutho igi kaka ma girwey i iye man lembe ma giwok giyer. (Mat. 10:5-7) In ke icopo lubo lapor pa Yesu nenedi? Kony japonj Biblia unen saa m’ecopo rweyo iye lembanyong’a. Ku lapor, penje ka nyo eng’eyo ng’atu moko mange ma lembe m’ebeponjo copo miyo ire bende kony. I ng’eye pi nikonye, nyuth ire ayi ma yot m’eromo yero ko lemandha m’ebeponjone ni jumange. Tek ecopere, wucopo timo lanyuth karacelo kude iwi lembe ma nwang’ere i the thiwiwec “Dhanu moko beyero kumae,” man “Ng’atu moko romo penji kumae,” mi buku Icopo kwo kud anyong’a rondo ku rondo! Kinde ma wubetimo lanyuthne, konye etii ku Biblia pi nidwoko wang’ penjine i ayi ma yot man ku bodho.

17. Waromo tiyo ku Matayo 10:19, 20, 29-31 nenedi pi nikonyo japonj Biblia ujengere iwi Yehova?

¹⁷ Kony japonj Biblia ugen Yehova. Yesu uyero ni julubne nia Yehova bikonyogi pilembe emarugi. (Som Matayo 10:19, 20, 29-31.) Nyuth ni ng’atu m’iponjo kude Biblia nia en de Yehova bikonye. Pi nikonye ejengere iwi Yehova, rwo kude iwi lembakeca pare. Umego Franciszek ma kwo i Pologne uwacu kumae: “Wang’ ma pol ka japonji para uberwo, erwo bende pi lembakeca para. Kinde m’aneno nia Yehova udwoko wang’ rwo pare, e ndhundhu an de acaku nirwo. Aneno kony pa Yehova kinde m’akwayu jadit tic para nia ewek ira saa m’acidh ko i coko ma kubang’ yenga man i coko ma dit.”

18. Yehova winjere nenedi pi kero ma juponji gibetimo pi nikonyo dhanu ucor ceng’ini i vute?

¹⁸ Yehova ubedieng’ lee pi ju ma wabeponjo kugi Biblia. Etie ku foyofoc pi kero ma juponji gibetimo pi nikonyo dhanu ucor ceng’ini i vute man emarugi pi kero maeno ma gibetimo. (Isa. 52:7) Tek pi kawoni fodi imbe ku ponji mi Biblia m’ibetelo wiye, icopo dikiri ku jurwey lembanyong’a mange i ponji migi kara ikony juponj Biblia gitim mediri nitundo i batizo.