Paulo ukiewo kumae: “Ni lembe mi cik atho ni cik, kara abed kwo ni Mungu.”​—Gal. 2:19.

Lembe ma Paulo ukiewo urombo ku lembe ma pire tek m’ebino weco pire ni Jukristu mi cokiri mi Galatia. I cokirine, Jukristu moko giweko juponji mi ndra uwingogi. Gibino ponjo nia kara ng’atini ubothi, mito ewor Cik pa Musa, akecane Cik m’uweco iwi timo yaa. Ento Paulo ung’eyo nia dong’ Mungu ubekwayu ngo nia jutim yaa i kum juyic. Enyamu i lembe kugi cuu man eketho ginyang’ nia eno tie ponji mi vupo; e etielo yiyoyic mir umego i lam mi gony pa Yesu Kristu.​—Gal. 2:4; 5:2.

Biblia uyero ngbeng’ nia ka ng’atini utho, ng’eyong’ec pare rwinyo man eng’eyo ngo gin m’ubetimere i ng’ete. (Ekl. 9:5) Pieno, kinde ma Paulo uyero nia “atho ni cik,” ebino weco iwi Cik pa Musa ma dong’ umbe ku tego i wiye. Ento eng’eyo cuu nia yiyoyic m’enyutho i lam mi jamgony re m’uketho ‘ebedo kwo ni Mungu.’

Paulo unwang’u alokaloka maeno ‘ni kum cik.’ Nenedi? Elar ekoro nia “ng’atu moko mbe ma lembe m’i wie gonjre ku tic mi cik, ndhu ku yic ma juyio ko Yesu Kristu re.” (Gal. 2:16) Cik upong’o lembe moko ma pire tek lee. Paulo ukoro ni Jugalatia kumae: “[Cik umedre] ni kum dubo, cil maram nyakware biwok ko ma lembang’ola yere i kume.” (Gal. 3:19) Andha, Cik unyutho kamaleng’ nia dhanu copo woro ngo cik tap tap, man nia gitie ku yeny mi lam ma leng’ ma tokcen. Pieno, Cik utero dhanu i kum “nyakware” niwacu Kristu. Ni kum yiyoyic ma ng’atini unyutho i Yesu Kristu re ma Mungu copo nene ni won bedopwe. (Gal. 3:24) Paulo uyero lembe maeno pilembe Cik re m’uketho ejolo Yesu man eyiye. I ayi maeno re ma Paulo ‘utho ni cik’ man ‘ebedo kwo ni Mungu.’ Mungu re m’utie ku tego i wiye, ento Cik ungo.

Paulo uweco iwi paru ma rom eno i waraga pare m’egoro ni Jurumi. Ekiewo kumae: “Juwada, wun bende juketho wutho ni cik ni kum kum Kristu . . . Wabedo agonya ni cik, kum wadaru tho ni maeno m’ucerowa.” (Rum. 7:4, 6) Giragora maeni man Jugalatia 2:19 ubenyutho nia Paulo ubino weco ngo iwi tho ma jadubo tho ko ma nwang’u jupoko ko lembe i wiye i the Cik. Ento ebino weco iwi bedagonya ma jubedo ko kud i the Cik. Pieno, dong’ Cik umbe kendo ku copo i wiye man iwi jumange calu en. Gibedo agonya ni kum yiyoyic i jamgony pa Kristu.