NYAMEGO moko ma nyinge Lisa * uweco iwi gin m’utele wang’ ma kwong’a i lemandha, eyero kumae: “Bero m’umego ku nyimego ginyutho ira ubedo kud adwogi ma lee dit i wiya.’’ Anne de uwinjere kumeno, eyero kumae: “Gin m’utela ku kwong’a ubino bero mi Jumulembe pa Yehova ento ungo ponji migi.” Nyimego ario eno ceke kawoni gimaru somo Biblia man ninyamu i lembe i wiye. Re gin m’ubedo kud adwogi ma ber akeca i wigi ubino bero ma junyutho igi.

Wacopo nyutho bero ma romo mulo adunde dhanu m’udhokowa nenedi? Wakewec iwi ayi ario: Nikadhu kud i wec mwa man timo mwa. I ng’eye ke wabineno nia ukwayu wanyuth berone ni jukani.

Dhaku ma ber ma juweco pire i Lembrieko thek 31 ubino ku “cik mi bedo ber” iwi lebe. (Rie. 31:26) Eweko “cik” maeno utel wi wec pare man ayi m’eweco ko. Ubekwayu wego de giketh “cik’’ maeno iwi lebgi. Jurunyodo ma pol ging’eyo cuu dit nia wec ma ku gero romo bedo kud adwogi ma rac lee iwi awiya migi. Ging’eyo bende nia twinyo awiya migi ku wec mi kwinyo copo timo awiyane rac man giromo winjogi ngo. Ka jurunyodo ubeweco ku bero man mer ni awiya migi, ebedo yot ni awiyane niwinjogi man niworogi.

Kadok ibed janyodo kunoke ngo, icopo timo ang’o kara wec peri ubed ma beri? Lembe ma romo konyowa nwang’ere i Lembrieko thek 31:26 i thengene ma kwong’a: “Ealu dhoge ku rieko.” Eno uketho i iye nilondo wec mwa kud ayi ma wayere ko ku rieko wang’. Lembuno bikonyowa wang’ ma pol nibepenjara kumae: ‘Nyo wec m’abeciyero e copo nyayu ng’eicwiny kunoke romo kwiyo wi lembe akwiya?’ (Rie. 15:1) Eyo, etie ber nilar paru i lembe iwang’ niweco.

Lembrieko mange uyero kumae: “Gin moko nuti ma weco vur vur calu cob mi palamularu.” (Rie. 12:18) Ka waparu pir adwogi ma wec mwa man ayi ma wayere ko copo bedo ko iwi jumange, eno bicwaluwa ning’iyo i lembe ma wabeciyero. Eyo, tiyo ku “cik mi bedo ber” bikonyowa nicerara i kum wec ma timojo rac man ma ku kwinyo. (Efe. 4:31, 32) Wabiwilo paru man wec ma reco ku wec ma beco man wabiweco ku dwal mi molo. Yehova unyutho lapor i lembe maeno kinde m’eyero wec ma tielo cwinyjo ni jaratic pare Eliya ma lworo ubino nego. Malaika ma Yehova uoro uweco ku “dwal ma nok ma yo.” (1 Ub. 19:12) Nibedo dhanu ma ber utie ngo kende kende niweco wec ma ber. Ento wacikara bende nitimo lembe ma ber. Nenedi?

Walubo lapor pa Yehova nwang’u wabeyero wec ma ber man nwang’u wabetimo bero. (Efe. 4:32; 5:1, 2) Nyamego Lisa ma waweco pire ukoro pi bero ma Jumulembe pa Yehova utimo igi, ewacu kumae: “Kinde m’ugam ukwayere nia wawil  kabedo nya pio pio, Jumulembe pa Yehova moko ario ku mon migi giweko tic migi pi nikonyowa ku coko dhu ter. I saa maeno nang’ fodi acaku ponjo de ngo Biblia!” Timo maeno ucwalu Lisa nimaru lemadha.

Anne ma waweco pire i acaki mi thiwiwec maeni de ufoyo bero ma Jumulembe pa Yehova unyutho ire. Ewacu kumae: “Nikum lembe ma rac ma jubed jutimo ira, uketho ebino ira lembe ma tek nigeno ng’atu moko ci.” Edok emedo kumae: “Kinde m’arombo ku Jumulembe pa Yehova, akeabedo ku jiji i wigi. Apenjara kumae: ‘Pirang’o jugini gibedieng’ pira kumeni?’ Ento bero ma japonjo para mi Biblia ubino nyutho ira uketho agene.” Adwogine ubedo ang’o? Ewacu: “I ng’eye acaku ketho wiya cuu mandha i kum gin m’abino ponjo.”

Poy nia timo ma beco mi dhanu mi cokiri re m’umulo lee mandha adunde Lisa giku Anne, man ukonyogi nicaku ponjo lemandha. Bero ma dhanu mi cokiri unyutho uketho gicaku geno Yehova ku dhanu pare.

Jumoko gidongo kaka ma juweco ma ber i iye man nzanza, uketho ecopo bedo igi yot nitimo lembuno. Etie ber ka dhanu moko gitie ku kite maeno nikum suru ma gidongo i iye. Ento tek wabetimo lembuno pilembe ya wadongo ko adonga, kunoke nia etie kura mwa, eno nyutho ngo kwa nia wabelubo kite mi bero pa Mungu.​—Nen bende Tic mi Jukwenda 28:2.

Bero mandha ma ai i bang’ Mungu utie thenge acel mi nying’ tipo pare. (Gal. 5:22, 23) Pieno, kara wanyuth bero mandha, mito tipo ma leng’ pa Mungu re m’utel wi paru mwa man timo mwa. Ka watimo kumeno, wabilubo lapor pa Yehova man pa Yesu. Bende, wa Jukristu ukwayu wadieng’ pi jumange. I ayi maeno re ma wanyutho mer ni Yehova Mungu man ni dhanu wadwa. I ng’eye, bero ma wacukunyutho bidoko ni kite mwa ma pire tek ma wanyutho niai kud i adunde man ma Mungu foyo.

Ecopo bedo yot ninyutho bero ni ju m’ular unyutho iwa bero kunoke ni juma wang’eyo. (2 Sam. 2:6) Yo acel ma wanyutho ko igi bero utie nifoyogi. (Kol. 3:15) Dong’ ka wanwang’u nia ng’atu moko uromo ngo nia wanyuth ire bero ke?

Wakewec iwi lembe ma e: Yehova unyutho lapor ma ber mandha mi bero ma yawe mbe, man Lembe pare Biblia ubemiyo iwa ponji ma pire tek iwi nyutho kite maeno. Wec ma nia “bero ma yawe mbe” jutiyo kude wang’ ma pol i Lembagora mi Jugiriki mi Jukristu. Dong’ Mungu ubenyutho iwa bero nenedi?

Kepar pi milioni mi dhanu dupa tin ma Yehova ubenyutho igi bero pare kara ginwang’ gin ma gicopo kwo ko. (Mat. 5:45) I andha, kadok kinde ma fodi wang’eyo ngo Yehova de, nwang’u dong’ enyutho iwa bero pare. (Efe. 2:4, 5, 8) Ku lapor, emiyo Wode m’acel kulong’ pi dhanu ceke. Jakwenda Paulo ukiewo nia Yehova umiyo jamgony “ni kum lonyo mi bero pare ma yawe mbe.” (Efe. 1:7) M’umedo maeno, kadok wadubo man watimo lembe ma ton i i Yehova de, re ebemedere asu nitelo wiwa man niponjowa. Telowic man Lembe pare utie ve “ng’idho koth.” (Poi. 32:2) Ecopere ngo iwa niculo pi bero ceke m’ebenyutho iwa. Bende, tie nikum bero ma yawe mbe pa Yehova re m’uketho watie ku genogen pi nindo m’ubino.​—Nen bende 1 Pethro 1:13.

M’umbe jiji, bero pa Yehova utie gin ma telojo i kume man ma cwalujo i timo. Pieno, kakare nilondo dhanu ma wanyuth igi bero alonda, wacikara nitimo tego nilubo lapor pa Yehova, ma waketh ko timo bero ubed ni kit kwo mwa ma kubang’ ceng’. (1 Thes. 5:15) Ka wabetimo bero thirithiri ni jumange, ebedo ve wakudho mac i kumgi i saa pa koyo. Wabedo ni jukocwiny ni wedi mwa, Jukristu wadwa, jurutic wadwa, awiya wadwa mi somo man ni jirani mwa.

Par pi wedi peri kunoke dhanu moko m’i cokiri ma copo nwang’u kony nikum wec man timo peri ma ber. Saa moko nyo ng’atu moko nuti i cokiri peri m’utie ku yeny, asagane ma jukur man juyik ko pacu pare, kunoke nyo jukonye ku ng’iewo piny. M’umedo maeno, kan inwang’u ng’atu moko i tic mi lembanyong’a m’utie ku yeny mi kony, nyo icopo konye ngo?

Pi nilubo lapor pa Yehova, dong’ wek “cik mi bedo ber” utel wi wec mwa man timo mwa saa ceke.