1. Ubimo Suleman uyero lemandha ma kani i Eklizia 7:20?

 UBIMO Suleman ukiewo kumae: “Ng’atu ma pwe mbe i ng’om, ma timo ber, ma dubo de ngo.” (Ekl. 7:20) Eno tie lemandha! Wan ceke watie judubo. (1 Yoh. 1:8) Pieno, ng’atuman m’i kindwa utie ku yeny mi kisa pa Mungu man mi dhanu mange.

2. Ka jarimbi utimo iri kisa, iwinjiri nenedi?

² M’umbe jiji, ibepoy pi nindo moko m’iyero lembe m’uketho jarimbi ukier. Pi niyiko lembe m’i kindwu, ikwayu kisa ku cwinyi ceke nia ewek iri. Iwinjiri nenedi kinde m’etimo iri kisa? Nyo cwinyi ukwiyo? Eyo, lembene unyayu kadok anyong’a bende i ii!

3. Wabiweco iwi lembang’o i thiwiwec maeni?

³ Wabemito Yehova ubed jarimbwa ma ceng’ini, re saa moko wayero man watimo lembe ma nyayu can i iye. Kadok kumeno, pirang’o cwinywa copo bedo tek nia etie ayika nitimo iwa kisa? Timo kisa pa Yehova ukoc nenedi ku kisa ma watimo ni dhanu wadwa? Man ng’a ma copo nwang’u kisa pare?

4. Pirang’o cwinywa tek nia Yehova tie ayika nitimo kisa?

⁴ Lembe pa Mungu ubetego cwinywa nia Yehova tie ayika nitimo kisa. Kinde ma Yehova unyuthere ni Musa iwi  got Sinai, eyero nikadhu kud i bang’ malaika kumae: “Yehova, Yehova, Mungu ma won kisa ku bero, ng’atu ma bedo yo ni ng’ecwiny, man dit ku mer mi bero ku lemandha, ng’atu ma gwoko mer mi bero ni dhanu rubanga rubanga, m’eweko kier ku gondri man dubo.” (Ai 34:6, 7) Yehova tie Mungu ma jakisa ma saa ceke etie ayika nitimo kisa ni judubo m’uloko cwinygi.​—Neh. 9:17; Zab. 86:15.

5. Nimakere ku Zaburi 103:13, 14, ng’eyong’ec ma Yehova utie ko i wiwa becwale nitimo ang’o?

⁵ Yehova ung’eyowa cuu mandha kum en re m’ecwiyowa. Poy nia eng’eyo lembe acel acel iwi ng’atuman m’ubekwo iwi ng’om. (Zab. 139:15-17) Etie ku copo mi neno nyithi kosa ceke ma walagu i bang’ kwaruwa. M’umedo maeno, eng’eyo bende lembe ceke ma wanwang’ara ko i kwo mwa m’uketho watie ku timo kunoke kite moko m’ukoc. Ng’eyong’ec maeno ma thuc ma Yehova utie ko i wiwa becwale nitimo ang’o? Ecwale nitimo iwa kisa.​—Zab. 78:39; som Zaburi 103:13, 14.

6. Yehova unyutho nenedi nia etie kud ava mi timo iwa kisa?

⁶ Yehova unyutho nia etie kud ava mi timo iwa kisa. Eng’eyo nia nikum lembe m’Adamu utimo, wan ceke wanwang’ara i the kwong’ mi dubo man mi tho. (Rum. 5:12) Wabino mbe ku yo ma wagonyara ko giwa kud i the kwong’ne kadi ma wagony ko ng’atu mange. (Zab. 49:7-9) Ento Mungu mwa ma jamer unyutho iwa kisa, emaku yub pi nigonyowa. Nenedi? Yohana 3:16 uyero nia Yehova uoro Wode ma kulong’ ubin utho piwa. (Mat. 20:28; Rum. 5:19) Yesu ubin usendere man etho piwa pi nigonyo ju ma gibenyutho yiyoyic i iye. (Ebr. 2:9) Yehova unwang’ere ku can ma lee i cwinye kinde m’ebino neno Wode m’emaru ubetho ku tho mi litho man mi lewic! M’umbe jiji, Yehova copo weko ngo Wode utho piwa ka nang’ emito ngo nia etim iwa kisa.

7. Kenyuth lapor mi dhanu moko ma Biblia uweco pigi, ma Yehova utimo igi kisa.

⁷ I Biblia, wanwang’u lapor mi dhanu dupa ma Yehova utimo igi kisa. (Efe. 4:32) Lapor pa ng’a m’ubebino i wii? Saa  moko nyo p’ubimo Manase. Ng’atu maeno ma jatimrac udubo ni Yehova i ayi ma rac m’usagu. Eworo mungu m’araga man ecwalu jumange de utimo kumeca. Enego awiya pare gire, m’ethiero kogi ni mungu m’araga. Eketho kadok ayi gin m’acwiya i hekalu ma leng’ pa Yehova. Biblia uyero pire nia “etimo dubo dit i wang’ Yehova, kara unyai ng’ecwiny i ie.” (2 Kei. 33:2-7) Re kinde ma Manase unyutho nia eloko cwinye i andha, Yehova utimo ire kisa. Mungu uketho edok kendo iwi ker pare. (2 Kei. 33:12, 13) Saa moko nyo ibeparu bende pir ubimo Daudi, m’utimo dubo ma pek ni Yehova, uketho i iye abor ku nek m’enego. Re kinde ma Daudi uyiyo pi dubo pare man eloko cwinye, en de Yehova utimo ire kisa. (2 Sam. 12:9, 10, 13, 14) Pieno, cwinywa ubed tek nia Yehova utie ayika nitimo iwa kisa. Calu ma wabineno, ayi ma Yehova timo ko kisa ukoc bor ku ma dhanu timo ni wadi.

8. Yehova utie Japoklembe ma segi i ayi ma kani, man eno utie ku winjiri ma kani ku copo pare mi timo kisa?

⁸ Yehova tie “Japoklembe mi ng’om ngung’.” (Tha. 18:25) Japoklembe ma ber ucikere ninyang’ cuu i cik. Yehova utie Japoklembe mwa man eng’eyo cik cuu mandha pilembe en re m’etie Jamii cik mwa. (Isa. 33:22) Ng’atu mange mbe m’ung’eyo gin ma ber ku gin ma rac calu Yehova. Lembang’o mange ma japoklembe ma ber ucikere nitimo? Ukwayu elar eng’ey lembe ceke m’umulo kum kesi ma jukelo i wang’ nipoko lembe. I lembe maeno, Yehova tie Japoklembe ma porere ngo.

9. Lembang’o ma Yehova bedo ku ng’eyong’ecne kan ebemito etim kisa ni ng’atini?

⁹ Tung’ ku jupoklembe ma dhanu, Yehova utie ku nyang’ ma thuc iwi kesi moko ci m’unwang’ere i wang’e. (Tha. 18:20, 21; Zab. 90:8) Ejik ungo iwi lembe ma dhanu gibeneno kunoke gibewinjo. Enyang’ cuu i kum timo ma ng’atini ubenyutho nikum kura timo m’elagu i bang’ jurunyodo pare, pir ayi m’edongo ko, pi kaka m’edongo i iye man pi remo m’usende. Yehova neno bende lembe m’upondo i adunde. Enyang’ cuu i pidoic man ava m’ucwalu ng’atini i timo moko. Gin moko acel de mbe ma copo pondo i wang’ Yehova. (Ebr. 4:13) Pieno, ka Yehova ubetimo kisa ni ng’atini, nwang’u etie ku ng’eyong’ec iwi lembe pa ng’atune ceke.

10. Pirang’o pokolembe pa Yehova utie cuu man atira saa ceke? (Poi mi Cik 32:4)

¹⁰ Pokolembe pa Yehova utie cuu man atira saa ceke. Yehova umbe kud akoyakoya kadok nyanok de. Tie ngo leng’o pa ng’atini, lonyo, dito m’etie ko kunoke copo pare re ma ketho Yehova timo ire kisa. (1 Sam. 16:7; Yak. 2:1-4) Ng’atu moko mbe ma copo diyo Yehova kunoke ma turo ire kanyaka. (2 Kei. 19:7) Emaku ngo yub nyanok de ku kwinyo kunoke pi kite m’ewinjere ko. (Ai 34:7) M’umbe jiji, Yehova tie Japoklembe ma dit m’usagu zoo pilembe eng’eyowa cuu man enyang’ i lembe ma wabekadhu kud i iye.​—Som Poi mi Cik 32:4.

11. Ayi ma Yehova timo ko kisa ukoc nenedi ku mi dhanu?

¹¹ Dhanu ma gikiewo Lembagora mi dhu Juebrania ging’eyo nia ayi mi timo kisa pa Yehova ukoc bor ku mi dhanu. Buku moko uyero pi wec mi dhu Juebrania  ma gitiyo ko kumae: “Wecne jutiyo kude kende kende pi nikoro ayi ma Mungu timo ko kisa ni judubo. Jutiyo kude ngo pi niweco pi kisa ma dhanu timo ni wadi.” Yehova kende re m’utie ku copo mi weko dubo mi magwei ni ng’atu m’uyewo dubo pare. Ka Yehova utimo iwa kisa, wanwang’u bero ma kani?

12-13. (a) Wanwang’u bero ma kani ka Yehova utimo iwa kisa? (b) Bero ma wanwang’u nikum kisa pa Yehova galu i kadhiri ma rukani?

¹² Ka wang’eyo nia Yehova udaru timo iwa kisa, wanwang’u ‘nindo mi yom;’ eno uketho i iye kwiyocwiny mir adunde man pidocwiny ma leng’. Wawinjara kumeno nwang’u “Yehova en gire” re m’utimo iwa kisa ento ungo dhanu. (Tic. 3:19) Ka Yehova utimo iwa kisa, winjiri m’i kindwa kude dwogo kendo kakare calu ve watimo de ngo dubo ire.

¹³ I ng’ey ma Yehova utimo iwa kisa, edok eketho ngo dubone kendo i wiwa kunoke nimiyo iwa matira pire. (Isa. 43:25; Yer. 31:34) Yehova coro dubo mwa bor kud i kumwa tap “calu [ma] yo nyangu bedo bor ku yo reto.” * (Zab. 103:12) Ka waparu pi kisa ma dit pa Yehova, lembene ketho wabedo ku foyofoc lee man lworo. (Zab. 130:4) Dong’ ng’a ma copo nwang’u kisa pa Yehova?

14. Waponjo lembang’o nitundo kawoni iwi timo kisa pa Yehova?

¹⁴ Calu ma waneno, timo kisa pa Yehova ujengere ngo iwi dubo ma dit kunoke ma nok ma ng’atini utimo. Bende, waponjo nia Yehova tiyo ku ng’eyong’ec m’etie ko i wiwa calu Jacwic, Jamii cik, man Japoklembe pi nineno ka nyo etim kisa ni ng’atini kunoke ngo. Lembe ma kanigi ma Yehova lar ng’iyo iye pi nitimo kisa ni ng’atini?

15. Nimakere ku Luka 12:47, 48, lembe mi kwong’o ma Yehova lar ng’iyo iye utie ma kani?

¹⁵ Lembe mi kwong’o ma Yehova lar ng’iyo iye utie nia, nyo jadubo ular ung’eyo nia lembe m’ebino timo utie rac kunoke ngo. Yesu uyero lembuno  kamaleng’ i Luka 12:47, 48. (Som.) Ka ng’atini ukeco nitimo lembe moko, ma ke eng’eyo cuu nia utie lembe ma rac i wang’ Yehova, re asu etime; eca nwang’u etimo dubo ma pek mandha. Ng’atuno utie i ariti ma Yehova copo ng’iyo nia kud etim ire kisa. (Mark. 3:29; Yoh. 9:41) Mito wayii nia, saa moko lembe ma watimo ubino lembe ma wang’eyo nia utie rac. Re nyo asu wacopo bedo ku genogen pi kisa pa Mungu? Eyo! Eno ubekelowa iwi lembe mange ma Yehova ng’iyo iye.

16. Lokocwiny utie ang’o man pirang’o pire tie tek kara Yehova utim iwa kisa?

¹⁶ Lembe mange ma Yehova ng’iyo iye utie nia nyo jadubone uloko cwinye i andha. Niloko cwinyjo thelembene tie ang’o? Niloko cwinyjo utie “niwilo paru mijo, timo, man lembakeca.” Uketho i iye pidoic mir ang’eyang’o ma ng’atini bedo ko man can m’ebedo ko i cwinye pi lembe ma rac m’etimo kunoke pi lembe ma ber ma nwang’u ecikere nitimo. Jadubo m’uloko cwinye can nege ngo kende kende pi lembe ma rac m’etimo, ento bende pi winjiri pare m’enyotho ku Yehova. Poy nia ubimo Manase ku Daudi ceke gitimo dubo ma pek; re asu Yehova utimo igi kisa pilembe giloko cwinygi i andha. (1 Ub. 14:8) Wan de Yehova bitimo iwa kisa, tek eneno nia andha waloko cwinywa. Ento ninyutho nia watie ku can i cwinywa pi dubo ma watimo kende uromo ngo, wacikara nitimo lembe moko. * Eno ubecwaluwa iwi lembe mange ma Yehova ng’iyo iye.

17. Nilokiri thelembene tie ang’o, man pirang’o pire tie tek kara kud wapodh kendo i dubo ma romi? (Isaya 55:7)

¹⁷ Lembe mange ma pire tek ma Yehova ng’iyo iye utie nilokiri. Nilokiri thelembene tie “nidok ku ng’eijo.” I ayi mange, ng’atini ucikere niwilo ayi kwo pare ma rac man nicaku kwo nimakere ku yeny pa Yehova. (Som Isaya 55:7.) Ng’atune ucikere niwilo pidoic pare kara paru pa Yehova re m’utel wiye. (Rum.  12:2; Efe. 4:23) Ukwayu ebed ayika niweko paru ma rac man timo pare ma con cen. (Kol. 3:7-10) I andha, yiyoyic ma watie ko i lam ma Kristu uthiero re m’utie ukungu ma Yehova timo ko iwa kisa man m’elwoko kowa kud i dubo mwa. Yehova bitimo iwa kisa i ukungu mi lam maeno tek eneno nia wabetimo tego niwilo timo mwa.​—1 Yoh. 1:7.

18. Waponjo lembang’o iwi kisa pa Yehova?

¹⁸ Wakewec i adundo iwi lembe ma pigi tek ma waponjo. Andha Yehova tie Jatim kisa ma dit m’usagu zoo. Pirang’o wabewacu kumeno? Mi kwong’o, etie ayika saa ceke nitimo kisa. Mir ario, eng’eyowa i thucne. Eng’eyo lembe acel acel i wiwa, man etie ng’atu ma cuu ma copo neno nia nyo andha waloko cwinywa kunoke ngo. Mir adek, ka Yehova udaru timo iwa kisa, eweko lembene magwei calu ve wadubo de ngo. Lembuno ketho wabedo ku pidocwiny ma leng’ man wanwang’u bero i wang’e.

19. Kadok watie ku kum mi dubo man asu fodi dubo bitimere iwa de, pirang’o wacopo bedo kud anyong’a?

¹⁹ I andha, ka fodi watie ku kum mi dubo e ci, dubo bitimere iwa kokoro. Ento wacopo nwang’u jukocwiny i buku Étude perspicace, volim mir 2, mbaya mi 765, m’uwacu kumae: “Yehova tie jakisa man eng’eyo nia jurutic pare gitie dhanu ma gi ng’ic, pieno gimbe ku yeny mi bedo ku koo koo akeca pi kosa ma gitimo nikum dubo ma gilagu. (Zb 103:8-14; 130:3) Gicopo bedo kud anyong’a tek gibetimo kero niwotho i yo ma Mungu foyo. (Flp 4:4-6; 1Yh 3:19-22).” Eno tie lembe mi tielocwiny mi tuko ngo!

20. Wabiweco iwi lembang’o i thiwiwec m’ulubo?

²⁰ Wabedwoko foyofoc lee ni Yehova pilembe etie ayika niweko kier mwa ka wakwayu kisa pi dubo ma watimo. Dong’ wan ke wacopo lubo lapor mi kisa pare nenedi? Kisa ma watimo urombo i ayi ma kani ku kisa ma Yehova timo, man ekoc ke i yo ma kani? Pirang’o pire tie tek nia wanyang’ i tung’ tung’ maeno? Thiwiwec m’ulubo bidwoko wang’ penji maeno.