Pi ninyayu anyong’a i Yehova, wacikara nibedo ku yiyoyic. Ento Biblia uyero nia “tie ngo dhanu ceke ma gitie ku yiyoyic.” (2 Thes. 3:2) Eno jakwenda Paulo ubino weco pi “jutimrac man judubo” ma gibino nyayu ragedo i kume. Ento lembe m’eyero iwi yiyoyic umulo kum dhanu mange bende. Jumoko gimito ngo giyii giranyutha ma kamaleng’ m’ubecwaku nia Mungu ucwiyo piny ceke. (Rum. 1:20) Jumange giromo yero nia giyiyo piny moko kunoke ng’atu ma tego pare lee. Ento yiyoyic ma kumeno kende uromo ngo pi ninyayu anyong’a i Yehova.

Wacikara niyiyo andhandha nia Yehova nuti man nia etie “ng’atu ma miyo sukulia” ni dhanu ceke ma gitie ku yiyoyic ma tek. (Ebr. 11:6) Yiyoyic utie acel m’i kind nying tipo pare ma leng’. Kara wanwang’ tipo ma leng’ eno, wacikara nilokara i bang’ Yehova ku yore mi rwo. (Luka 11:9, 10, 13) Ayi mange ma pire tek ma wacopo nwang’u ko tipo maeno utie nisomo Lembe pa Mungu ma jukiewo ku telowic mi tipone. I ng’eye ke ukwayu wanyam i lembe ma wabesomone man waii nitiyo ku ponji ma wanwang’u. E kumeno, tipo ma leng’ pa Yehova bitelo wi kwo mwa kara wakwo i ayi ma nyutho nia watie ku yiyoyic ma nyayu anyong’a i Mungu.