Penji mi jusom
Nyo wec ma nia “ibikuro kumgi,” ma nwang’ere i Zaburi 12:7, ubeweco pi “jucan” (mi verse mir 5) kunoke pi “wec pa Yehova” (mi verse mir 6)?
Lembe m’ugwaku kum verse maeno ubenyutho nia ebeweco pi dhanu.
I Zaburi 12:1-4, Biblia uyero nia “dhanu ma jugeno girwinyo kud i kind dhanu.” Kawoni kenen Zaburi 12:5-7 (NWT) ma tie verse ma penji mwa ucungo i wigi.
“‘Nikum masendi mi ju ma jubenyayu can i kumgi,
nikum cur mi jucan,
abiai malu pi nibodhogi,’ Yehova wacu.
‘Abibodhogi kud i cing’ ju m’ubecayugi.’
Wec pa Yehova tie leng’;
gi calu mola ma tar ma julilo i uka mir ulobo, ma judwoko leng’ wang’ abiro.
Ibikuro kumgi, E Yehova;
ibigwoko ng’atuman m’i kindgi ni dhanu m’utuk maeni pi nja.”
Verse mir 5 unyutho lembe ma Mungu uyero pi jucan; ebibodhogi.
Verse mir 6 umedo nia “wec pa Yehova tie leng’,” nia “gi calu mola ma tar ma julilo.” Eno ubenyutho kite ma Jukristu mandha ceke giwinjiri ko.—Zab. 18:30; 119:140.
Kawoni kenen verse m’ulubo, niwacu Zaburi 12:7. Eyero kumae: “Ibikuro kumgi, E Yehova; ibigwoko ng’atuman m’i kindgi ni dhanu m’utuk maeni pi nja.” Wec ma nia ‘gi’ ubenyutho ang’o kunoke ng’a?
Calu ma verse mir 7 ubino i ng’ey lembe ma juyero pi “wec pa Yehova,” jumoko giromo paru nia wec ma nia ‘gi’ ma jutiyo ko i verse maeno ubenyutho wec pa Mungu. Wang’eyo nia Mungu utuc nikuro kum Biblia (kunoke egwoke) kadok judegi pare gi ii wang’ dupa pi ninyothe kunoke nikwero kud jutii kude.—Isa. 40:8; 1 Pet. 1:25.
Ento, lembe ma juyero i verse mir 5 bende utie lemandha. Yehova utuc nikonyo man ebimedere nikonyo man nibodho ‘ju ma jubesendo’ ku “ju ma jubenyayu can i kumgi.”—Yob 36:15; Zab. 6:4; 31:1, 2; 54:7; 145:20.
Ka kumeno, ‘gi’ ma juweco pire i verse mir 7 ubenyutho ang’o kunoke ng’a?
Lembe ma juweco pire i zaburi maeni ubenyutho nia ‘gi’ maeno ubeweco pi dhanu.
Zaburi 12:1 uweco pi “dhanu ma jugeno” ma jutuc nicwayu igi ndra. I ng’eye, Biblia unyutho nia Yehova biai i kum ju ma gibetiyo rac ku lebgi. Wec mi zaburi maeno ubetielo cwinywa nia wacopo bedo ku genogen nia Mungu bibodho dhanu pare pilembe wec pare tie leng’.
Pieno verse mir 7 uyero nia Yehova bikuro “kumgi” man ‘bigwokogi,’ niwacu ju ma jutimrac ubenyayu can i kumgi.
Wec ma jutiyo ko ma nia ‘gi’ ubewodho paru mi gor mi Jumasori mi dhu Juebrania. La Septante mi dhu Jugiriki utiyo ku ‘wa’ wang’ ario i verse mir 7; wec maeno ubenyutho ju ma jugeno ma jubesendo man ma jubenyayu can i kumgi. Tokcenne, verse mir 7 uyero nia “ng’atuman m’i kind” ju ma jugenone bibedo agwoka “ni dhanu m’utuk maeni,” niwacu ni dhanu ma gibecwaku lembe ma rac. (Zab. 12:7, 8) I Targum mi dhu Juaramea, verse mir 7 uyero kumae: “In, E RWOTH, ibigwoko weg bedopwe, ibikuro kumgi ni dhanu m’utuk maeni pi nja. Jutimrac gibewotho kun ku kun, calu kamandindi m’ubecwiyo rimb wot dhanu.” Lok maeni ubemedo nicwaku nia Zaburi 12:7 ubeweco ngo pi wec pa Mungu.
Pieno, verse maeni ubemiyo genogen ni “dhanu ma jugeno” ma nia Mungu bibodhogi.