“MWOKA bedo dit andha, ento jutic e ma gi nok: ka kumeno wukwai Rwoth mi mwoka, nia eor jutic i mwoka pare.” (Lk. 10:2) Niai ma Yesu uyero wec maeno, oro udaru kadhu ma romo 2 000. Wecne ubenyutho kamaleng’ lembe m’ubetimere tin i Myanmar. Pirang’o wayero kumeno? I ng’om mi Myanmar, jurwei 4 200 kumeni kende re ma giberweyo ni dhanu milioni 55 mi ng’ombe.

Ento Yehova ma tie “Rwoth mi mwoka,” umulo adunde umego ku nyimego dupa mi ng’om ma tung’ tung’, e gicidho pi nikayu mwoka mi tipo i ng’om maeno ma nwang’ere yo nyangu mir Asia ma yo piny. Ang’o m’ucwalugi niweko pacu migi? Gitimo ang’o kara gicidh i Myanmar kuca? Man gibenwang’u mugisa ma kani? Wakenenu.

I kind oro m’ukadhu, thimbu uredho jayab yo moko mi Japon, ma nyinge Kazuhiro, man rieko pare urwinyo, e jutere i odiyath. Dokter uyero ire nia pi oro ario, kud ering ku mutukari. Lembuno unyayu can lee dit i adunde Kazuhiro. Epenjere kumae: ‘Abitimo ang’o kara amedara asu ku tic pa jayab yo m’amaru lee rukeni e?’ Egam ekwayu Yehova kud adundene ceke nia enyuth ire kite m’ecopo medere ko ku tic pa jayab yo.

Kazuhiro ukoro kumae: “Dwi acel i ng’eye, jarimba moko ma timo tic i Myanmar uwinjo pi peko m’ugam unwang’a. Elwong’a man eyero ira kumae: ‘I Myanmar, dhanu bemaku basi pi niwotho. Kan ibino kuni, icopo mediri asu ku tic mi lembanyong’a m’umbe niringo ku mutukari.’ E apenjo dokter m’ubethiedha ka nyo ecopere ira nicidho i Myanmar. Dokter udwoko ira lembe m’uwang’u ia lii, eyero kumae: ‘Dokter moko ma thiedho thimbu m’uai i Myanmar ubeliewo Japon, man ebitundo keni kawoni. Abiwok koro piri ire, kara ka thimbu uredhi kendo, ecopo thiedhi.’ Wec pa dokter eno ubino ira ve wang’ rwo para ma Yehova udwoko.”

E ndhundhu, Kazuhiro uoro barua (e-mail) ni biro mi filial mi Myanmar, pi ninyutho nia en ku dhaku pare gibemito gicidh gitim tic pa jayab yo i Myanmar kuca. Nindo abic kende i ng’eye, filial udwoko igi kumae: “Wubin, watie ku yeny mi juyab yo lee dit.” Kazuhiro giku Mari ma dhaku pare, gigam gilworo mutukari migi, ging’iewo karatasi mi woth (visa) man ging’iewo tiket mi idho avio. Tin eni, gitie kud anyong’a nirweyo karacelo kud ungu mi dhok mi babuba i adhura mi Mandalay. Kazuhiro  uyero kumae: “Lembe maeno ma wakadhu kud i ie utielo yioyic mwa i lembang’ola pa Mungu ma nwang’ere i Zaburi 37:5, m’uwacu: ‘Wek yo peri ba Yehova; gene bende man ebiketho etimbre.’”

I oro 2014, Jumulembe pa Yehova mi Myanmar gibino ku rwom mi timo coko ma dit ma segi i bang’gi. Umego ku nyimego mi ng’om mange de dupa gibino i cokone. Ng’atu acel m’i kindgi ubino nyamego ma oro pare 34, ma nyinge Monique, m’uai i États-Unis; ekoro kumae: “I ng’ei m’aai kud i coko ma dit, akwayu Yehova nia enyuth ira gin mange m’ukwayu atim i kwo para. Aweco bende ku junyodo para iwi lembakeca para mi tipo. Wan ceke wanwang’u nia ukwayu adok i Myanmar. Ento pi nimaku yub ma tokcen, ugam ukwayu nindo ma lee man rwo ma wang’ dupa.” Monique ukoro kumae:

“Yesu uketho cwiny julubne nia ‘gilar gikwan wel piny ma gitie ko.’ Pieno apenjara kumae: ‘Nyo atie ku sente m’acopo tundo ko kuca? Nyo abicopo nipong’o yeny para i ng’ombuca m’umbe nitimo tic mi kum nja?’” Eyero kumae: “Anwang’u nia ambe ku sente ma romo tera i ng’om ma bor.” Dong’ Monique utimo ang’o kara etund nicidho i Myanmar?​—Lk. 14:28.

Ekoro kumae: “Nindo moko, bos para uyero ira nia wakewec kude. Cwinya upido, pilembe aparu nia jubeciwodha kud i tic. Ento elund ewok efoya afoya nia abetimo tic cuu. I ng’eye, eyero nia epangu nimedo ira sente moko ni lesu; sente m’emedone ubino tap wend sente ma nwang’u urem!”

Monique ubetielo tic mi lembanyong’a i Myanmar niai dwi mir 12, 2014. Ewinjere nenedi pi tic maeno m’ebetimo kaka ma yeny mi jurwei utie lee i ie? Eyero kumae: “Atie ku mutoro lee dit nibedo keni. Abeponjo Biblia ku dhanu adek. Ng’atu acel m’i kindgi utie mego ma oro pare 67. Kan atundo i bang’e, egwaka ku ng’iero kwa. Nindo moko, kinde m’ewinjo nia nying’ Mungu tie Yehova, ewak awaka. Eyero kumae: ‘Niai ma junyola, eni tie wang’ ma kwong’a m’abewinjo nia nying’ Mungu tie Yehova. Itie nyathin ira, re inyutho ira lembe ma pire tek ma nwang’u fodi ang’eyo ngo.’ An de acaku wak. Kit lembe ma kumeno ketho junwang’u mutoro ka juberweyo kaka ma yeny ni ie.” I kind nindo m’ukadhu ceng’ini eni, julwong’o Monique i somo mi Jurwei-injili mi Ker.

Lembe mange m’umio amora i kum dhanu moko nidok i Myanmar, utie gin ma jukoro iwi ng’ombe i buku mi oro mi Jumulembe pa Yehova (Annuaire 2013). Nyamego Li ma oro pare 30 ku wie ubino kwo yo nyangu mir Asia ma yo piny. Ebed etimo tic pare mi kum nja, ento lembe m’esomo i buku mi oro ucwale nineno ka nyo ecopo cidho pi nitielo tic mi lembanyong’a i Myanmar. Ekoro kumae: “Kinde m’acidho i coko ma dit ma segi i adhura mi Rangoun i oro 2014, wawok wanwang’ara kud umego moko ku min ot pare ma girweyo lembanyong’a i Myanmar ni dhanu ma weco dhu Chinois. Calu ma an de aweco dhu Chinois, ang’io nia ukwayu adok i Myanmar pi nitielo ungu mi dhu Chinois. Wawinjara waku Monique, e wadok i Mandalay. Yehova ukonyowa wanwang’u tic mi ponji i école ma rom, man watie ku saa ma waromo rweyo ko; bende wanwang’u ot ceng’ini keca. Kadok piny lieth man peko mange nuti de, amaru nirweyo lembanyong’a keni. Dhanu mi Myanmar gikwo ngo ku giki mi kum dupa, ento gitie dhanu ma wor man gimaru niwinjo lembanyong’a. Etie iwa mutoro ma lee dit, nineno kite ma Yehova ubedhulo ko tic mi lembanyong’a. Ang’eyo andha nia Yehova re m’uketho abino keni i Mandalay.”

Jurwei dupa ma gitimo tic mi lembanyong’a kaka ma yeny utie lee i ie, ginwang’u nia rwo utie ku tego. Wakenen lapor pa Jumpei giku min ot pare Nao ma oro migi 30 ku wie, ma gibino i cokiri moko mi dhok  mi babuba i Japon. Pirang’o gidok i Myanmar? Jumpei ukoro kumae: “Waku min ot para wabedo ku lembakeca mi citielo tic mi lembanyong’a i ng’om mange ma yeny mi jurwei utie lee i ie. Umego moko ma wabino kugi i cokiri ma rom mi babuba i Japon udok i Myanmar. E i dwi mir 5, 2010, wan de wadok kuca, kadok nwang’u wabino ku sente nyanok kende ma walar wagwoko de. Umego ku nyimego mi Myanmar gijolowa ku mutoro!” Jumpei uwinjere nenedi pi tic mi lembanyong’a i dhok mi babuba i Myanmar? Eyero kumae: “Dhanu maru niwinjo lembe. Ka wabenyutho video mi dhok mi babuba, babubane igi wang’ lii. Watie ku mutoro lee mandha nitimo ni Yehova keni!”

Umego Jumpei giku min ot pare Nao gibed ginwang’u sente kani pi nikwo? Gikoro kumae: “I ng’ei oro adek, nwang’u sente ma walar wagwoko ubecithum, man wabino mbe ku sente ma waromo pangu ko ot oro m’ulubo. Waku min ot para warwo wang’ udul. Nindo moko mbwang’ kumeni, wanwang’u barua m’uai i biro mi filial m’ukwayuwa nia wabed juyab yo ma segi pi nindo moko! Wageno Yehova man wanwang’u andha nia ewekowa ngo. Egwokowa i lembe ceke.” Nindo m’ukadhu ceng’ini eni, Jumpei giku Nao gicigisomo somo mi Jurwei-injili mi Ker.

Umego Simone ma oro pare 43 man ma thugi ni Italie, giku min ot pare Anna ma thugi ni Nouvelle-Zélande de gidok i Myanmar. Lembang’o m’umio amora i kumgi nidok kuca? Anna udwoko kumae: “Ubino lembe ma jukoro iwi Myanmar i buku mi oro 2013.” Simone de ukoro kumae: “Etie rwom ma dit iwa nibedo i Myanmar. Keni kwo tie yot mi tuko ngo, man acopo timo tic pa Yehova pi saa ma lee. Kite ma Yehova ubegwoko kowa keni kaka ma yeny utie lee i ie ubemio iwa mutoro ma lee dit.” (Zab. 121:5) Anna udok umedo kumae: “Atie ku mutoro ma yawe mbe. Wabekwo ngo ku piny dupa. Kindwa udoko ceng’ini mandha ku won ot para, pilembe wabetimo saa ma pol wakude. Watheyo bende mer ku jurimo dupa ma beco. M’umedo maeno, dhanu ma keni gineno Jumulembe pa Yehova rac ungo, man etie lembe ma wang’u ijo nineno ava ma gitie ko mi winjo lembanyong’a.” Pirang’o Anna ubeyero kumeno?

Ekoro kumae: “Nindo acel, kinde ma ani soko, awok arweyo ni nyaku moko ma somo université, man wawinjara nia wabirombo kendo ma cen. Saa m’adok niliewe, anwang’u elwong’o jarimbe. Nindo m’ulubo, elwong’o jumange bende. I ng’eye, emedo kendo jumange. Kawoni, abeponjo Biblia ku ju abic m’i kindgi.” Simone de uyero kumae: “Dhanu mi kabedo ma warweyo i ie gitie dhanu ma ber, man gimaru ging’ei lembe dupa. Ju ma pol gimaru niwinjo lembanyong’a. Saa re m’udoko nok ma waliew ko gin ceke.”

Jurwei maeno gitimo ang’o kara gicidh gitiel tic i Myanmar? Nyamego Mizuho mi Japon ukoro kumae: “Waku Sachio ma won ot para, wabed wamito dit nia wacidh warwei i ng’om ma yeny utie lee i ie. Re wapenjara nia wabicidho kani? Kinde ma  wasomo lembe ma beco ma jukoro iwi ng’om mi Myanmar i buku mi oro 2013, lembene umio amora lee mandha i kumwa, uketho wacaku neno ka nyo wan de wacopo cidho nitimo kuca.” Sachio umedo kumae: “Wang’io nia pi yenga acel, walar waliew Rangoun ma tie adhura ma dit mi Myanmar, pi ning’eyo lembe m’i ie. Nikadhu kud i nyathi liew maeca, wanyang’ i lembe dupa, m’ucwaluwa nidwogo keni.”

Rodney giku dhaku pare Jane ma gitie dhanu mir Australie, man ma oro migi 50 ku wie, gibetielo tic mi lembanyong’a i Myanmar niai oro 2010, karacelo ku Jordan ma wodgi man Danica ma nyaku migi. Rodney uyero kumae: “Ava ma dhanu utie ko mi winjo Lembe pa Mungu umulo adundewa lee dit. Abekwayu juruot mange de gikegipim nicirweyo i kabedo ma calu Myanmar.” Pirang’o? Emedo kumae: “Etie lembe mi mutoro ma lee dit nineno kite ma tic maeno uketho ko kindwa udoko ceng’ini mandha ku Yehova. Aradu ma pol giketho wigi zoo i kum lembe m’uneno telefon, mutukari, i kum tic migi, man lembe mange. Re awiya mwa gimiiri niponjo dhok ma nyen pi nirweyo lembanyong’a. Gibeii ning’eyo kite ma gicopo weco ko ku dhanu m’ung’eyo ngo lembe mi Biblia, man kite ma gicopo dwoko ko wang’ penji i coko; bende, gibemiiri i tic mange dupa mi tipo.”

Umego Oliver mir États-Unis ma oro pare 37 ukoro thelembe m’uketho ebekwayu jumange de ukeupim kit tijuni. Eyero kumae: “Nitimo ni Yehova kaka mange umio ira mugisa lee dit. Dok m’adok ko kaka mange uketho ajengara iwi Yehova man agene i lembe moko ci. Abetimo karacelo ku dhanu ma walar wang’eyara ngo kugi i wang’e, ento yioyic mwa udiko kindwa. Lembe ma kumeno timere kende kende i dilo pa Mungu.” Tin, Oliver giku dhaku pare Anna, gibemediri nirweyo kud amora ni dhanu ma weco dhu Chinois.

Nyamego Trazel mir Australie, ma oro pare 52 m’ucaku timo i Myanmar niai i oro 2004 uyero kumae: “Abekwayu nia dhanu ma gimbe ku macero gicidh gitim kaka ma yeny utie lee i ie. Anwang’u nia kan imaru nitimo yeny pa Yehova, emio iri mugisa kwa pi kero m’ibetimo. Alar aparu ngo apara de nia nindo moko kwo para bibedo kumeni. Abenwang’u mugisa man mutoro m’alar ageno ngo nia abinwang’u.”

Dong’ wek wec maeno mi ju ma gicidh gitimo kaka ma yeny lee i ie, umii amora i kumi kara inen ka nyo in de icopo konyo dhanu ma cwinygi leng’, ma ginwang’iri i kabedo ma fodi jurweyo ngo i ie. Eyo, umego ku nyimego maeno gibekweyi ma tek kumae: “Bin lokani i Myanmar, man ikonywa!”