Icopo ponjo Biblia cuu man ku mutoro nenedi?

NG'II DHOK M'IMARU

YOCUWA ubino ku tic ma lee mi telo wi nyithindho mir Israel nitundo i Ng’om mi lembang’ola. Lembene ubino yot ungo ire. Re Yehova utielo cwinye man emio amora i kume kumae: “Bed tek man ku tegocwiny ma dit.” Ewacu ni Yocuwa nia tek esomo Cik pare man eworo Cikne, ebimaku yub mi rieko, man lembe biwotho ire miero.—Yoc. 1:7, 8.

Wabekwo i “nindo mi can [ma ciro tek].” Eno copo ketho kwo mwa de doko tek. (2 Tim. 3:1) Dong’ kara lembe uwoth iwa ma ber, ukwayu watii ku juk ma Yehova umio ni Yocuwa. Wacikara nisomo Biblia kubang’ ceng’, man nitio ku lembe ma wabesomone pi nimaku yub ma beco.

Re saa moko nyo wang’eyo ngo cuu kite mi ponjo Biblia, kunoke nyo ponjine mio ngo iwa mutoro. Kadok kumeno de, pire tie tek lee nia watim ponji mwa ma segi mi Biblia. Kinde m’ibeng’io i sanduku ma thiwie tie “ Kepim nitimo kumae,” ibinwang’u paru ma bikonyi kara iponj Biblia cuu, man kara inwang’ mutoro lee i ponjine.

Jagor Zaburi moko ukiewo kumae: “Keth awoth i yo mi lembang’ola peri; kum anyong’a nega i kume.” (Zab. 119:35) In de ponji mi Biblia copo mio iri anyong’a. Tek ibemediri nitime m’umbe niweko, ibinwang’u paru dupa ma beco.

Kadok ibitelo ngo wi thek moko calu ma Yocuwa ugam utimo de, re itie ku peko moko kokoro. Pieno, calu Yocuwa, ponj Lembe pa Mungu man kethe i timo. Kan itimo kumeno, ibimaku yub mi rieko, man lembe biwotho iri miero.

KEPIM NITIMO KUMAE

Cak ku rwo. I Biblia, junwang’u paru ma Yehova uketho jukiewo pi nikonyi. Pieno, kinde m’ibesomo Biblia, kwai Yehova ukonyi kara inyang’ i lembe m’ibesomone, kara edong’ i wii, man kara itii kude pi nimaku yub ma beco i kwo peri.—Ezr. 7:10.
Woth penjiri ku penji kinde m’ibesomo Biblia, kunoke girasoma mange m’ujengere iwi Biblia. Ku lapor, ‘Thenge maeni ubeponja ku lembang’o iwi Yehova? Lembene urombo nenedi ku thiwiwec ma dit mi Biblia? Acopo konyo jumange nenedi ku paru maeni?’
Nyam i lembe m’ibeponjo. Kinde m’ibesomo, kecung pi saa ma nyanok, man inyam i lembe m’iai isomone. Penjiri kumae: ‘Lembuni uketho abewinjara nenedi? Pirang’o abewinjara kumeni ke? Nwang’u acopo tio nenedi ku lembe m’abesomo eni i lembe m’akadhu kud i ie con, man acopo tio kude nenedi kawoni kunoke i nindo m’ubino? Acopo tio ku juk maeni mi Biblia kunoke cik maeni mir ukungu nenedi i kwo para?’ (Yob 23:5; Zab. 49:3) Kinde m’ibenyamu i lembene, kepim nineno ka nyo icopo koro nia pirang’o Yehova ukwero dhanu pare kud ubed ku kit timo moko. Kunoke, kepar nia ka nwang’u ng’atu m’iai isomo pire utimo tung’, nwang’u adwogine cibedo ang’o.—Poi. 32:28, 29.
Tii ku paru peri kinde m’ibesomo Biblia. Ku lapor, kepim niparu pi lwor m’umego pa Yosefu gilwore ko ni Juicmaeli. (Tha. 37:18-28) Ka nwang’u ini keca, ang’o m’icopo nineno, niwinjo man ning’wio? Kekethiri kaka dhanu m’iai isomo pigi. Wigi ubino paru ang’o, man giwinjiri nenedi i adundegi? Kan ibetio ku paru peri pi ninyamu i lembe, ibinyang’ cuu mandha i lembe m’ibeponjo.
Tii ku jamtic mi ponji ma dilo pa Yehova uwodho, kara itim sayusac cuu. Ponj nitio ku jamtic ma nwang’ere i dhok peri, copo bedo mir Internet kunoke ma juwodho iwi karatasi. Kud ilwor nipenjo dhanu mange unyuth iri kite mi tio cuu ku jamticne. Ku lapor, jamtic ma calu ve Kapang buku i Internet Watchtower, kunoke Guide de recherche pour les Témoins de Jéhovah, bikonyi ninyang’ i thiwiwec dupa ma jukoro, man ninyang’ i verse dupa. Tek Biblia m’uwok ma nyen (La Bible. Traduction du monde nouveau) utie i dhok moko m’icopo somo, tii ku thenge ma jumedo ma nwang’ere i ie. Thengene copo konyi lee dit ning’eyo kabedo ma tung’ tung’, kite ma lembe ulwobere ko, jam pimo piny ma jubed jutio ko con, man lembe mange dupa.
Cok dhu paru ma dongo dongo m’iai iponjo. Eno biketho lembe m’iai iponjo bimoko i wii. Bende, wii kud uwil nikoro ni jumange lembe m’iponjo. Nyo lembene moko nuti m’icopo tio ko i lembanyong’a? Kan itimo kumeno, wii biwil ungo ku paru ma dongo dongo m’iponjo, man jumange de binwang’u bero nikum ponji peri.