1. Yehova utimo iri lembang’o?

IDOKO Jamulembe pa Yehova nenedi? Mi kwong’o, iwinjo “lembanyong’a.” Saa moko nyo iwinje nikadhu kud i bang’ junyodo peri, jurutic wedu, awiya wedu mi somo, kunoke nikadhu kud i lembanyong’a ma jubino rweyo ot kubang’ ot. (Mk. 13:10) I ng’eye, ng’atu moko ukoyo saa pare lee man etimo kero pi niponjo kudi Biblia. I kind nindo maeno, icaku maru Yehova man inwang’u nia en de emeri. Yehova uteli i lemandha, man kawoni ma dong’ idoko jalub pa Kristu, itie ku genogen mi kwo ma rondo ku rondo. (Yoh. 6:44) M’umbe jiji, ibedwoko foyofoc lee ni Yehova, pilembe eketho ng’atu moko ubin uponji ku lemandha, man eyiyo nia ibed acel m’i kind jurutic pare.

2. Wabiweco iwi lembang’o i thiwiwec maeni?

² Kawoni ma dong’ wang’eyo lemandha, watie ku rwom mi konyo dhanu mange de gidikiri kudwa i yo mi kwo. Saa moko ecopo bedo iwa yot nirweyo lembanyong’a ot kubang’ ot, ento ninwang’u ng’atu ma waponj kude Biblia man nitelo wi ponjine, copo bedo lembe ma tek. Nyo in de ibewinjiri kumeno? Ka eyo, lembe moko ma jukoro i thiwiwec maeni copo konyi. Wabiweco iwi gin ma cwaluwa nikonyo dhanu mange udok julub. Wabiweco bende iwi ayi ma wacopo voyo ko peko ma romo cerowa niponjo Biblia ku dhanu. Wakelar wanen nia pirang’o umito ngo wabed jurwey lembanyong’a kende, ento bende juponji.

3. Pirang’o waberweyo lembanyong’a?

³ Kinde ma Yesu ubino iwi ng’om, emiyo tic ario ma pigi tek ni julub pare. Mi kwong’o, eyero igi nia girwey lembanyong’a  mi Ker man enyutho igi kite ma gicopo rweyo ko. (Mat. 10:7; Lk. 8:1) Kud i kind lembe ma Yesu utimo pi niyiko julubne pi tic m’emiyo igi, acel ubino nia dhanu moko bijolo rwonglembe mi Ker, jumange ke bikwero. (Lk. 9:2-5) Elar enyutho igi nia tic migi mi rweyo lembanyong’a bimedere ameda, man nia gibirweyo lembanyong’ane “ni lembatuca ni thek ceke.” (Mat. 24:14; Tic. 1:8) Kadok nwang’u dhanu giwinjgi kunoke ngo de, re ukwayu julub gimediri asu nirweyo pi rwonglembe mi Ker ni dhanu, ku gin ma Kerne bitimo.

4. Nimakere ku Matayo 28:18-20, m’uweko rweyo lembanyong’a mi Ker, ukwayu watim ang’o mange?

⁴ Tic mir ario ma Yesu umiyo nia julub pare gitim utie ang’o? Eyero igi nia giponj dhanu uwor gin ceke m’eng’olo. Jumoko paru nia Yesu umiyo tic mi rweyo lembanyong’a ku mi ponjo dhanu ni Jukristu mi rundi ma kwong’a kende. Nyo eno tie lemandha? Ungo, Yesu unyutho nia tic maeno ma pire tek bimedere nitundo i rundi mwa, niwacu “cil i kajik mi ng’om.” (Som Matayo 28:18-20.) Copere nia Yesu umiyo tic maeno kinde m’enyuthere ni julub pare ma kadhu 500. (1 Kor. 15:6) Bende i ginmawokiwang’ ma Yohana uneno, Yesu unyutho kamaleng’ nia ukwayu julub pare ceke gikony jumange ung’ey Yehova.​—Nyu. 22:17.

5. I 1 Jukorinto 3:6-9, Paulo utiyo ku lapor ma kani pi ninyutho winjiri ma n’i kind tic mi rweyo lembanyong’a ku mi ponjo dhanu?

⁵ Jakwenda Paulo uporo tic mi ketho dhanu udok julub ku tic mi pidho kodhi, m’enyutho ko nia wacikara ngo nipidho kodhine apidha kende. Epoyo wi Jukristu mi Korintho kumae: “Apidho, Apolo ke kwoyo pi . . . Wun wu girafura (podho) pa Mungu.” (Som 1 Jukorinto 3:6-9.) Calu ma wabetimo tic i “[podho] pa Mungu,” wacikara ngo nipidho kodhi apidha kende i iye, ento ukwayu wakwoy bende pii iwi kodhine man wanen dongo migi thirithiri. (Yoh. 4:35) Ukwayu wang’ey nia Mungu re m’ubeketho gibedongo.

6. Kinde ma wabeponjo dhanu, wacikara nikonyogi gitim ang’o?

⁶ Wabeyenyo ju “m’adundegi ubedo ayika pi kwo ma rondo ku rondo.” (Tic. 13:48, NWT) Kara ng’atuman m’i kindgi udok jalub, ukwayu wakonygi (1) ginyang’, (2) giyii, man (3) gitii ku gin ma gibeponjo i Biblia. (Yoh. 17:3; Kol. 2:6, 7; 1 Tes. 2:13) Wan ceke i cokiri wacopo konyo juponj Biblia nikadhu kud i mer man jol ma wabenyutho igi kinde ma gibino i coko. (Yoh. 13:35) Bende, ukwayu ng’atu m’ubetelo wi ponji mi Biblia ukoy saa ma lee man etim kero pi nikonyo japonj Biblia uredh “gin ma tek piny,” niwacu yiyoyic kunoke timo ma rac m’ulage unyang’ i iye. (2 Kor. 10:4, 5) Ecopo ting’o dwi ma lee pi nikonyo ng’atini utim alokaloka maeno i kwo pare kara etund i kum lembakeca mi limo batizo. Re alokaloka maeno utie ku bero ma lee.

7. Ang’o ma cwaluwa nirweyo lembanyong’a man niketho dhanu udok julub?

⁷ Pirang’o wabed wamiyara i tic mi rweyo lembanyong’a man mi ketho dhanu udok julub? Mi kwong’o, pilembe wamaru Yehova. Kan ibetimo kero ibeworo lembang’ola mi rweyo lembanyong’a man mi ketho dhanu udok julub, eca nwang’u ibenyutho nia imaru Mungu. (1 Yoh. 5:3) Kepar lembe ma e: Mer m’imaru ko Yehova re m’ubecweli nirweyo lembanyong’a. Nyo niworo lembang’ola maeno tie lembe ma yoti? Ungo. Kinde ma fodi icaku rweyo lembanyong’a acaka, nyo lworo unegi ngo? M’umbe jiji,  lworo unegi! Re ing’eyo nia eno tie tic ma Yesu ung’olo nia itim man ukwayu iwor lembene. Man kubang’ nindo m’ubekadhu, tic mi rweyo lembanyong’a udoko iri yot. Nyo telo wi ponji mi Biblia de tie yot iri? Nyo lworo benegi? Saa moko. Ento kan ibekwayu Yehova kara ekonyi ibed ku tegocwiny mi telo wi ponji mi Biblia, e ebikonyi iketh dhanu udok julub.

8. Nimakere ku Marko 6:34, lembang’o mange ma cwaluwa niponjo dhanu?

⁸ Mir ario, mer ma wamaru ko dhanu wadwa de cwaluwa niponjogi ku lemandha. Ku lapor, nindo moko kinde ma Yesu ku julub pare girweyo lembanyong’a giol, gibino ku yeny ma giyom ko kaka moko, ento udul dhanu ma dit ucoro i wigi. Kisa umaku Yesu i kumgi man ecaku ponjogi ku “gin dupa.” (Som Marko 6:34.) Etimo tic ma tek saa maeno kadok nwang’u eol de. Pirang’o? Pilembe ekethere kakar udul dhanu. Emito ekonygi kum eneno gibino sendiri man gibino ku yeny mi genogen. Tin de dhanu gibenwang’iri i kit lembe ma rom kadok ubenen nia ve gitie kud anyong’a kunoke gikwo ma ber de. Gibedo ve rombe m’ulal swa ma jakwac migi mbe. Jakwenda Paulo uyero nia dhanu ma kumeno ging’eyo ngo Mungu man gimbe ku genogen. (Efe. 2:12) Gin’i yo “ma tundo kanyoth”! (Mat. 7:13) Ka waparu pi kite ma dhanu mi teritwar mwa gitie ko ku yeny mi ng’eyo Mungu, mer man kisa bicwaluwa nikonyogi. Yo ma ber akeca ma wacopo konyo kogi utie niponjo kugi Biblia.

9. Nimakere ku Jufilipi 2:13, Yehova copo konyi nenedi?

⁹ Saa moko nyo lworo ubenegi nicaku ponjo Biblia ku dhanu, pilembe iparu nia yikiri man telo wi ponjine bicamu iri saa ma lee. Tek andha kumeno, nyuth ni Yehova kite m’ibewinjiri ko i rwo. Kwaye ekonyi ibed kud ava m’inwang’ ko ponji mi Biblia m’icopo telo wiye. (Som Jufilipi 2:13.) Jakwenda Yohana uyero nia Mungu biwinjo rwo mwa tek wabekwaye nimakere ku yeny ma iye uyenyo. (1 Yoh. 5:14, 15) Pieno, ng’ey nia Yehova bikonyi ibed kud ava mi ketho dhanu udok julub.

10-11. Lembang’o ma copo ketho wabedo ku lworo mi telo wi ponji mi Biblia?

¹⁰ Wang’eyo nia tic mwa mi ponjo dhanu pire tie tek lee, ento ecopo bedo iwa lembe ma tek niketho dhanu udok julub tek wabenwang’ara ku peko. Wakewec iwi pekone moko, man kite ma wacopo voyo kogi.

¹¹ Wacopo bedo mbe ku tego ma watim ko lee calu ma wamaru. Ku lapor, jurwey lembanyong’a moko dong’ tiyo kunoke twoyo udaru mondo i kumgi. Nyo in de itie acel m’i kindgi? Ka eyo, kenen tielocwiny ma wanwang’u i kind nindo mi thong’om mi Korona. Wanwang’u nia wacopo telo wi ponji mi Biblia nikadhu kud i telefon kunoke kud i jamtic mange mir elektronik! Pieno, icopo caku ponjo Biblia ku dhanu nwang’u ibedo kakeri i pacu. Bero mange de nuti. Dhanu moko gimaru niponjo Biblia, ento wang’ ma pol saa m’umego mwa giberweyo iye lembanyong’a, nwang’u gimbe i pacu. Ento juromo nwang’ugi kugweno con kunoke reto dhug uthieno. Nyo icopo ponjo ngo Biblia ku ng’atu moko i saa maeno? Poy nia Yesu de ugam uponjo Nikodem kud uthieno, i saa ma Nikodem ung’iyo.​—Yoh. 3:1, 2.

12. Lembang’o ma romo ketho cwinywa bedo tek nia wacopo doko juponji ma cuu?

¹² Wacopo paru nia waromo telo ngo wi ponji mi Biblia. Saa moko wacopo nwang’u  nia mito walar wabed ku ng’eyong’ec kunoke ku bodho lee calu pa japonjo, ka dong’ wacak ponjo Biblia ku ng’atini. Kan iparu kumeno, lembe adek ma e copo konyi nibedo ku tegocwiny mi ponjo Biblia ku dhanu. Mi kwong’o, Yehova ung’eyo nia iromo niponjo jumange. (2 Kor. 3:5) Mir ario, Yesu ma tie ng’atu ma ‘ng’ol m’i polo ku m’i ng’om ceke umiyere ire’ ung’olo nia iponj dhanu, eno nyutho nia egenowa. (Mat. 28:18) Man mir adek, icopo kwayu kony i bang’ Yehova man i bang’ umego. Yehova ukonyo Yesu ning’eyo gin m’ukwayu eyer. In de eromo timo iri kumeno. (Yoh. 8:28; 12:49) M’umedo maeno, icopo kwayu janen wi tic mir ungu mi lembanyong’a, jayab yo, kunoke jarwey moko ma jabodho ukonyi nicaku man nitelo wi ponji mi Biblia. Yo mange m’iromo doko ko japonji ma cuu, utie nidikiri ku jurwey maeno kinde ma gibetelo wi ponji mi Biblia.

13. Pirang’o ukwayu wang’ii kud ayi ma nyen mi telo wi ponji?

¹³ Ecopo bedo iwa lembe ma tek nitiyo ku bodho man jamtic ma nyen. Ayi ma watelo ko wi ponji mi Biblia dong’ ulokere. Buku Icopo kwo kud anyong’a rondo ku rondo! ubekwayu nia wayikara cuu man watel wi ponji i ayi m’ukoc ku ma wabed watimo ko con. Ukwayu wasom udukuwec nyanok man wawec i wiye lee ku japonj Biblia. Kinde ma wabetelo wi ponji, mito watii ku video ma tung’ tung’, jamtic ma nwang’ere i kusika mwa mir Internet, man JW Library. Tekene ing’eyo ngo nitiyo ku jamtic maenogi, kway ng’atu moko uponji ing’ey nitiyo kugi. Dhanu gibed gimaru nitimo gin ma ging’iyo ko. Etie yot ungo iwa ning’iyo kud ayi ma nyen mi timo lembe moko. Kadok kumeno de, re ku kony pa Yehova man mi jumange, ibing’iyo pio man ibinwang’u nia etie yot niponjo Biblia ku dhanu. Jayab yo moko uyero kumae: Kit bodho maeni mi telo wi ponji tie “ber ni japonj Biblia ku japonji bende.”

14. Ukwayu wapoy i kum lembang’o tek waberweyo i teritwar ma dhanu ubewinjowa ngo i iye, man 1 Jukorinto 3:6, 7 ubetielo cwinywa nenedi?

¹⁴ Saa moko nyo waberweyo i teritwar ma caku ponji mi Biblia ku dhanu tie tek i iye. Dhanu moko gimaru ngo niwinjo rwonglembe ma wabeyero igi, kunoke gijai ajaya zoo. Dong’ i teritwar ma kumeno, ang’o ma copo konyowa nibedo ku genogen nia gicopo winjo rwonglembe mwa asu? Poy nia kwo mi dhanu copo lokere pio pio i ng’om maeni ma rac, man dhanu ma gilar gimaru ngo niwinjo rwonglembe ma wabeyero, giromo nwang’u nia gitie ku yeny mi telowic pa Mungu i kwo migi. (Mat. 5:3) Jumoko ma con gibed gikwero girasoma mwa, i ng’eye gidok giyiyo nia juponj kugi Biblia. Wang’eyo bende nia Yehova re m’utie Rwoth mi mwoka. (Mat. 9:38) Ebemito wamedara nipidho kodhi man nikwoyo pii i wigi, ento en re m’ebiketho gidongi. (1 Kor. 3:6, 7) Mito wang’ey nia kadok pi kawoni fodi wambe ku ponji mi Biblia ma wabetelo wiye de, re Yehova bimiyo iwa mugisa pi kero ma wabetimo ento ungo pir adwogi ma wabenwang’u! *

15. Yehova winjere nenedi kinde ma ng’atu moko ujolo ponji mi Biblia man ebetiyo ku lembe m’ebeponjone?

¹⁵ Anyong’a nego Yehova ka ng’atu  moko ujolo lemandha mi Biblia man ebenyutho lembene ni jumange. (Rie. 23:15, 16) Anyong’a dok nege nisagu kan ebeneno tin dhanu pare giberweyo lembanyong’a man gibeponjo jumange. Ku lapor, kadok kud i kind thong’om mi Korona, i oro mi tic 2020, jutelo wi ponji mi Biblia milioni abiro kud elufu dak abiro kud abic ku dak abiro pier abusiel wi abic (7 705 765), man dhanu elufu dak ario ku pier ang’wen wi acel ku dak abung’wen pier abung’wen wi ang’wen (241 994) githiero kwo migi ni Yehova man gilimo batizo. Julub ma nyen maeno de gibitelo wi ponji mi Biblia man gibiketho dhanu dupa udok julub. (Lk. 6:40) M’umbe jiji, wanyayu anyong’a i Yehova kinde ma wabedikara i tic mi ketho dhanu udok julub.

16. Waromo ketho lembakeca ma ber ma kani?

¹⁶ Tic mi ketho dhanu udok julub tie tic ma tek, re ku kony pa Yehova, wacopo ponjo ju ma nyen kara gimar Wegwa m’i polo. Nyo ecibedo ber ungo nia waketh lembakeca ma wacak ko nitelo wi ponji mi Biblia kadok acel kende? Ka wabetimo kero nicaku ponji ku dhanu ma gimaru giponj Biblia, iwa biwang’ nineno adwogi ma ber ma lembene bikelo.

17. Wabiwinjara nenedi tekene wabetelo wi ponji mi Biblia?

¹⁷ Etie iwa rwom ma dit nirweyo lembanyong’a man niponjo lemandha ni jumange! Tic maeni ketho wabedo kud anyong’a andha. Jakwenda Paulo m’ukonyo dhanu dupa nidoko julub i adhura mi Thesaloniki uyero kumae pi kite m’ewinjere ko: “Kum genogen mwa en e ang’o, kadi anyong’a mwa, kadi jamkermiwic mwa mi kulula? Ndhu wun ungo, i wang’ Rwoth mwa ma Yesu i bino pare? Kum wun wu dwong’ mwa man mutoro mwa.” (1 Tes. 2:19, 20; Tic. 17:1-4) Dhanu dupa tin de gibewinjiri kumeno. Nyamego moko ma nyinge Stéphanie ma giku won ot pare gikonyo dhanu dupa ulimo batizo uyero kumae: “Anyong’a mange mbe ma sagu anyong’a ma junwang’u ka jubekonyo dhanu uthier kwo migi ni Yehova.”