Yehova ubemito dhanu ario ma gigamiri gikwo kud anyong’a man gimediri nibedo ku winjiri ma ceng’ini i kindgi. (Mat. 19:4-6) Tek imito igam kunoke igemiri, icopo nwang’u jadhogi ma cuu ma wugemuru kude nenedi? Calu Yehova tie Jacwic mwa, eng’eyo gin m’ukwayu watim kara wakwo ma ber kud anyong’a i gamiri mwa. Pieno, tek ibetiyo ku cik mir ukungu m’emiyo iwa, ibinwang’u adwogi ma ber. Dong’ wakenen cik mir ukungune moko.

Mi kwong’o, mito wakewanyang’ wan giwa i lembe ma e: “Adunde en e jabombi ma sagu gin ceke, enyothre apila.” (Yer. 17:9) Kinde ma dhanu ario ma gimito gigamiri ginwang’iri man gicaku beng’eyiri i kindgi, mer ma ng’atuman ubewinjere ko pi wadi copo medere pio pio man ecopo bedo igi tek nimaku yub mi rieko. Tek ng’atini ubemaku yub kende kende pir ayi m’ebewinjere ko pi wadi, wang’ ma pol ang’eyang’o dok wok i iye i ng’eye. (Rie. 28:26) Pi thelembe maeno re ma mito ngo dhanu ario ma gibeng’eyiri gilar ginyuth kite ma thuc mi mer ma giwinjiri ko i kindgi, kunoke gitim lembang’ola i kindgi i wang’ ma fodi ging’eyiri ngo cuu.

Lembrieko 22:3 uyero: “Ng’atu ma won pidoic neno dubo, man epondo; Ento ju ma cobo kadhu, man gisendri pire.” Tiyo ku kusika mir Internet pi ninwang’u ng’atu ma jugamiri kude copo bedo kud ariti ma kani? Lembe ma rac utie nia jumoko ma gicaku mer mi gamiri ku dhanu ma ging’eyo ngo iwi yamu, gidok ginwang’iri ku peko i ng’eye. Bende dhanu moko m’atira ngo gitiyo ku nying’gi mi vupo pi niciko jumange i uwic kara gikwal sente migi. Saa moko dhanu maeno ma reco giloko nia gitie Jumulembe pa Yehova.

Wakewec iwi ariti mange. Kusika mir Internet moko tiyo ku program mi ordinater ma juparu nia copo ketho ng’atini nwang’u jadhoge m’uromo kude tap. Re gin moko mbe acel de m’unyutho nia lembuno rombo andha. Nyo etie lembe mi rieko niketho genogen iwi gin ma dhanu uthungo athunga nia copo konyi nimaku yub ma pire tek calu ve nwang’u jadhogi mi gamiri? Jucopo poro ngo nyanok de program mi ordinater ku cik mir ukungu mi Biblia.​—Rie. 1:7; 3:5-7.

Cik mir ukungu ma nwang’ere i Lembrieko 14:15 uwacu kumae: “Ng’atu ma cobo yio lembe ceke kubang’e kubang’e; ento won pidoic neno i woth pare cu.” I wang’ niyiyo nia ng’atu  moko copo bedo jadhogi ma cuu mi gamiri, mito ilar ing’eye cuu. Nirombo ku ng’atini iwi yamu copo ketho ebedo tek ning’eyo ng’atune cuu. Kadok icopo ng’eyo lembe m’ekiewo i wiye iwi yamu, man kadok wubetimo saa ma lee pi niweco kude iwi yamu, nyo eno copo ketho iwacu nia ing’eye cuu? Jumoko ma gigam giparu nia gidaru nwang’u judhoggi mandha mi gamiri, i ng’eye cwinygi udok utur pi lembe ma gidok ging’eyo iwi judhoggine kinde ma girombo kugi wang’ ku wang’.

Jagor Zaburi uyero kumae: “Abedo karacelo ku dhanu mi ndra ngo; kadok weg abombi de abimondo karacelo kugi ngo.” (Zab. 26:4) Ju ma dupa ginwang’u nia etie rac ungo nicwayu ndra i wigi i Profil migi saa ma gibesayu judhogi mi gamiri, kara gitel nen mi jumange. Gicopo kanu kura migi ma reco, man kurane copo nen ungo kinde ma gibenyuthiri ni jumange iwi yamu. Dong’ pire tie tek lee nia inwang’ dwokowang’ penji ma e: Ng’atu m’ubenyuthere ira nia etie Jamulembe pa Yehova e, nyo andha elimo batizo? Nyo eteng’ini i thenge mi tipo? Nyo etie ku winjiri ma ceng’ini ku Yehova? Nyo etie dhanu ma jugeno i cokiri? Nyo etie ngo ng’atu ma jakasegu kunoke ng’atu ‘ma pire raci’? (1 Kor. 15:33; 2 Tim. 2:20, 21) Nyo etie agonya nigamere nimakere ku Lembagora? Ukwayu inwang’ dwokowang’ penji maeno, re etie lembe ma tek ninwang’u dwokowang’ penjine ka fodi iweco ngo ku Jumulembe m’ung’eyo ng’atune cuu. (Rie. 15:22) Jaratic pa Yehova m’ubegwoko bedoleng’ pare copo maru ngo nyanok de nia ‘etwiyere karacelo’ ku ju ma juyic ungo.​—2 Kor. 6:14; 1 Kor. 7:39.

Calu nitiyo ku kusika mir Internet pi ninwang’u jadhogi mi gamiri utie ariti, yo ma ber utie m’icopo nwang’u ko jadhogi mi gamiri man ma ketho wubedo ku winjiri ma ber ma terowu i gamiri m’utie ku yung. Icopo nwang’u ng’atu ma ber m’igemiri kude nenedi? Kan ecopere iwa nia wacokara karacelo, Jamulembe pa Yehova copo ng’eyo wang’ ku wang’ ng’atu m’egamere kude kinde m’ecidho i coko, i coko ma dongo mi twodiri, mir adhura, man i lembe mange ma coko dhu dhanu.

Calu ma thong’om mi Korona fodi uketho nidikiri karacelo utie iwa tek, eno uketho watiyo ku jamtic mir elektronik pi nitimo coko, man i cokone junwang’u yo ma jung’eyiri ko ku jumusuma mange. I coko maeno, icopo winjo kite ma gibemiyo ko korolembe man kite ma gibedwoko ko wang’ penji pi ninyutho yiyoyic migi. (1 Tim. 6:11, 12) Wucopo weco bende i kindwu i ng’ei coko i salle secondaire tekene cokiri mwu tiyo ku jamtic mir elektronik pi nitimo coko. M’umedo maeno, kinde ma wubenambu ku Jumulembe mange nikadhu kud i jamtic mir elektronik, icopo neno kite ma ng’atu m’adundeni upodho i wiye ubeweco ko ku jumange. Eno copo ketho ineno nia ng’atune tie kit dhanu ma nenedi. (1 Pet. 3:4) Nok nok, kinde m’ibeng’eye cuu, icopo nwang’u ka nyo wutie ku lembakeca m’urombo man ka nyo wun ario zoo wiwu copo rombo ma ber i gamiri mwu.

Ka jumusuma gibesayu judhoggi mi gamiri nimakere ku cik mir ukungu mi Biblia, gicopo bedo kud anyong’a i gamiri migi calu ma lembrieko ma e uwacu: “Ng’atu ma tek unwang’u dhaku [kunoke nico] nwang’u enwang’u gin ma ber, man egamu bero ba Yehova.”​—Rie. 18:22.