1. Rwom ma kani ma dit ma watie ko?

ETIE rwom ma dit mandha iwa nibedo i cokiri pa Yehova! Tin wabekwo i paradiso mi tipo ma i ie dhanu bekwo kud anyong’a man ku kwiocwiny. Tic peri tie ang’o i cokiri?

2. Jakwenda Paulo utio ku lapor ma kani i waraga pare ma tung’ tung’ m’ekiewo ku kony mi tipo ma leng’?

² Pi ninyang’ nia ng’atuman m’i kindwa pire tie tek i cokiri, wakewec iwi lembe moko ma jakwenda Paulo ukiewo i waraga pare ku kony mi tipo ma leng’. I waragane ceke, eporo cokiri ku kum. Ng’atuman mi cokiri ke eporo ku wathkum.​—Rum. 12:4-8; 1 Kor. 12:12-27; Ef. 4:16.

3. Wabiweco iwi lembe adek ma kani i thiwiwec maeni?

³ Ng’atuman m’i kindwa pire tie tek i cokiri pa Yehova. Wan ceke wacopo tielo cokiri. Man wan ceke piwa tie tek kadok nwang’u watie dhanu mi rangi ma tung’ tung’, suru, thek, man kadok jam cingwa kunoke somo ma wasomo ubed ukoc de. I thiwiwec maeni, wabiweco iwi ponji adek ma pigi tek ma wacopo nwang’u i lapor ma jakwenda Paulo ukiewo.  Mi kwong’o, wabiponjo nia ng’atuman m’i kindwa pire tie tek i cokiri pa Yehova. Mir ario, wabiweco iwi gin ma wacopo timo tek wabenwang’u nia ve piwa tie tek ungo i cokiri. Man mir adek, wabiweco bende nia pirang’o ukwayu ng’atuman utim kero nitimo tic m’umiyere i kore i cokiri.

4. Jurumi 12:4, 5 ubemio iwa ponji ma kani?

⁴ Ponji ma kwong’a ma wacopo nwang’u i lapor ma jakwenda Paulo ukiewo pire, utie nia ng’atuman m’i kindwa pire tek lee i dilo pa Yehova. Paulo ucaku wec mi laporne kumae: “Kum cil calu wabedo ku wathkum dupa i kum acel, man wathkum ceke tic migi acel ungo: kumeni wan, ma wa dupa, wa kum acel i Kristu, man wan ceke wa wathkum ng’atuman pa wadi man pa wadi.” (Rum. 12:4, 5) Eno Paulo umito yero ng’o? Emito yero nia, kadok wan ceke watie ku tic ma tung’ tung’ i cokiri de, re ng’atuman pire tie tek.

5. Yehova umio “giramia” ma kani ni cokiri pare?

⁵ Ka jubeweco pi ju ma pigi tek i cokiri, saa moko nyo wii cidho wang’ acel i kum jutelwic. (1 Tes. 5:12; Ebr. 13:17) Eno tie rac ungo, Yehova de nikadhu kud i bang’ Kristu, umio “giramia [ma] dhanu” ni cokiri pare. (Ef. 4:8) “Giramia” maeno uketho i ie Guriri m’utelo wic, jukony mi Guriri m’utelo wic, umego mi Komite mi filial, juliew mi twodiri, Juponji mi somo ma tung’ tung’ mi dilo pa Yehova, judong cokiri, man jukony tic mi cokiri. Umego maeno ceke tipo ma leng’ re m’ung’iogi kara gigwok rombe pa Yehova man gitiel cokiri pare.​—1 Pet. 5:2, 3.

6. Nimakere ku 1 Jutesaloniki 2:6-8, umego ma tipo ma leng’ ung’io gibetimo tic ma kani?

⁶ Umego ma tipo ma leng’ ung’io gitie ku tic dupa ma gibetimo. Tap calu wathkum ma tung’ tung’ ma calu ve cing’ man tielo gitimo tic pi nikonyo kum zoo, kumeno bende, umego ma tipo ma leng’ ung’io, gibetimo tic ma tek pi nikonyo cokiri. Gisayu ngo nia ginwang’ yung. Ento giteng’o umego ku nyimego man gitielo cwinygi. (Som 1 Jutesaloniki 2:6-8.) Wabedwoko foyofoc lee ni Yehova pir umego maeno ma gibedieng’ pi yeny mi jumange, nisagu migi!

7. Dhanu ma gibetimo tic mi saa ceke, gibenwang’u anyong’a ma kani?

⁷ I cokiri, jumoko gibetimo calu misioner, juyab yo ma segi kunoke juyab yo ma nja. M’umedo maeno, umego ku nyimego mwa mi ng’om zoo, giketho tic mi rweyo lembanyong’a ku mi ketho dhanu udok julub, udoko ni tic migi ma pire tek. Tic maeno uketho gibekonyo dhanu dupa nidoko julub pa Kristu. Kadok dhanu maeno gitie dhanu ma jamcing’gi mbe akeca de, re Yehova umio igi mugisa dupa. (Mk. 10:29, 30) Wamaru umego ku nyimego maeno lee, man watie kud anyong’a pilembe gitie i cokiri!

8. Pirang’o pi jurwei lembanyong’a ceke tie tek i Yehova?

⁸ Nyo umego ma tipo ma leng’ ung’io ku m’ubetimo tic mi saa ceke re ma pigi tie tek i cokiri? Ungo! Jurwei lembanyong’a ceke pigi tie tek i i Yehova man i cokiri pare bende. (Rum. 10:15; 1 Kor. 3:6-9) Pilembe kud i kind tic ma pigi tek akeca i cokiri, acel utie niketho dhanu dok julub pa Rwoth mwa Yesu Kristu. (Mat. 28:19, 20; 1 Tim. 2:4) Pieno, jurwei lembanyong’a ceke mi cokiri, nik ebed m’ulimo batizo ku m’ulimo ngo de, gin ceke giketho tic maeno ni gin ma pire tek i kwo migi.​—Mat. 24:14.

9. Pirang’o pi nyimego mwa tie tek?

 ⁹ Yehova umio tic ma pire tek ni nyimego bende, pilembe pigi tie tek lee i cokiri. Eneno mon, mego, mon ma coggi tho, man nyimego ma jumusuma, ma gibetimo ire ku gwoko bedoleng’, ni gin ma pire tek i wang’e. Biblia uweco pi nyimego dupa ma gitimo lembe m’unyayu anyong’a i Mungu. Giweko lapor ma ber, ma ginyutho ko rieko, yioyic, amora, tegocwiny, berocwiny, man tic ma beco. (Lk. 8:2, 3; Tic. 16:14, 15; Rum. 16:3, 6; Flp. 4:3; Ebr. 11:11, 31, 35) Wabedwoko foyofoc lee ni Yehova pilembe tin bende watie ku nyimego m’ubenyutho kite ma rom eno i cokiri mwa!

10. Pirang’o pi ju m’utii tie tek lee?

¹⁰ Anyong’a benegowa lee pilembe watie bende ku ju m’utii i cokiri. Cokiri moko utie kud umego ku nyimego m’utii, ma gitimo ni Yehova ku gwoko bedoleng’ i kwo migi ceke. Ju m’utiine moko fodi ging’eyo lemandha nindo ma ceng’ini eni. Kadok ging’ei lemandha con kunoke ngo de, re gin ceke gibenwang’iri ku peko ma tung’ tung’ ma tio ukelo i kumgi. Peko maeno romo jwigo copo migi mi timo lee i cokiri kunoke i tic mi lembanyong’a. Re asu gibetimo kero migi ceke pi nidikiri i tic mi lembanyong’a, niketho cwiny jumange man niponjogi! Wabenwang’u bero lee i kum ng’eyong’ec migi. Andha pigi tie tek i i Yehova man i iwa bende.​—Rie. 16:31.

11-12. Aradu mi cokiri peri ubetielo cwinyi nenedi?

¹¹ Wakewec kawoni iwi aradu. Aradu gibenwang’iri ku peko dupa pilembe gibedongo i ng’om ma rac maeni ma Sitani Wonabali re m’ubebimo wie ku vupo pare ma rac. (1 Yoh. 5:19) Re ka wabeneno gibedwoko wang’ penji i coko, gibedikiri i tic mi lembanyong’a, man gibecero ba yioyic migi ku tego cwinygi, lembuno tielo cwinywa lee. Aradu, wung’ei nia piwu tie tek i cokiri pa Yehova!​—Zab. 8:2.

¹² Umego ku nyimego moko lundo, giparu  nia pigi tie tek ungo i cokiri. Dong’ lembang’o ma copo konyowa ning’eyo nia wan ceke piwa tie tek i cokiri? Wakenen lembenegi.

13-14. Pirang’o jumoko paru nia pigi tie tek ungo i cokiri?

¹³ Wakewec kawoni iwi ponji mir ario ma wacopo nwang’u i lapor ma jakwenda Paulo ukiewo pire. Laporne ubekonyowa ninyang’ i kum paru ma dhanu dupa gitie ko tin: nia gin pigi tie tek ungo i cokiri. Paulo ukiewo kumae: “Tek tielo biwacu kumae, Kum an a cing’ ungo, an a mi kum ungo; kum kumeno en e mi kum ungo ngo. Man tek ith uwacu kumae, Kum an a wang’ ungo, an a mi kum ungo; kum kumeno embe i kum ungo.” (1 Kor. 12:15, 16) Paulo umito wanwang’ ponji ma kani i lembe maeno?

¹⁴ Kan ibed iporiri ku jumange i cokiri, eno copo ketho saa moko icaku paru nia piri tie tek ungo. I cokiri, jumoko copo bedo ku bodho mi ponji, mi pangu lembe uwoth ma ber kunoke mi tio ku giragora pi nijuko man nitielo cwiny jumange. Saa moko nyo ibeparu nia in itimo ngo calu gin. Eno ubenyutho kamaleng’ nia itie ng’atu ma jwigere man ing’eyo nia jumange tie dit nisegi. (Flp. 2:3) Re bed ku weng’i, pilembe kan icukubeporiri ku jumange, cwinyi bitur mananu. Calu ma Paulo ukiewo, icopo caku paru nia tiji mbe i cokiri. Dong’ ang’o ma copo konyi ninyego ku paru ma kumeno?

15. Nimakere ku 1 Jukorinto 12:4-11, ukwayu wabed ku nen ma kani iwi copo kunoke bodho ma watie ko?

¹⁵ Kepoi pi lembe ma e: Yehova ugam umio giramia mi timo udu ni Jukristu moko mi rundi ma kwong’a, ento gin ceke ginwang’u ngo giramia ma rom. (Som 1 Jukorinto 12:4-11.) Yehova umio igi giramia man copo m’ubed ukoc ng’atuman ku pawadi, re gin ceke pigi bino tek. Wan tin tipo ma leng’ umio iwa ngo giramia mi timo udu. Ento ng’atuman m’i kindwa utie ku bodho moko kokoro. Kadok bodhone ubed ukoc de, re wan ceke piwa tek i i Yehova.

16. Juk ma kani ma jakwenda Paulo umio, m’ukwayu watii ko ?

 ¹⁶ Kakare nibeporiri ku Jukristu mange, ukwayu watii ku juk ma e ma jakwenda Paulo ukiewo ku kony mi tipo ma leng’: “Dong’ ng’atuman ukor i tic pare [gire], e kulula bilund nege i kume gire kende, man kum wadi re ngo.”​—Gal. 6:4.

17. Tek waworo juk ma jakwenda Paulo ukiewo, wabinwang’u bero ma kani?

¹⁷ Ka waworo juk maeno ma Paulo ukiewo ku kony mi tipo ma leng’, man ka wabeng’io i tic mwa giwa, wabinwang’u nia karaman wan de watie ku giramia man ku copo moko. Ku lapor, jadit cokiri moko copo bedo mbe ku bodho mi mio korolembe iwi bop, re nwang’u lundo etek lee i tic mi ketho dhanu udok julub. Kunoke etie ng’atu ma nipangu lembe uwoth kakare kakare calu judong cokiri wagi mange bevoye; ento nwang’u lundo etie jakwac ma ber ma jurwei lembanyong’a bino i bang’e yot yot pi nikwayu kony. Kunoke nyo en re ma jung’eye nia etie ng’atu ma ber ma jolo welo. (Ebr. 13:2, 16) Ka wanwang’u nia karaman wan de watie ku thenge moko ma ber ma watek i ie, eno biketho wabedo kud anyong’a pi gin ma wacopo timo i cokiri. Man ebikonyowa kara kud wabed ku pidoic mi kumira i kum jumange m’utie ku bodho m’ukoc ku mwa.

18. Wacopo medo bodho mwa mi ponji nenedi?

¹⁸ Kadok watie ku rwom i cokiri kunoke ngo de, re wan ceke watie ku yeny mi timo mediri i tic m’umiyere i korwa man mi medo bodho mwa. Yehova ubeponjowa nikadhu kud i dilo pare kara watim alokaloka. Ku lapor, i coko m’i kind yenga, wanwang’u ponji iwi kite ma wacopo medo ko bodho mwa i tic mi lembanyong’a. Nyo ibetimo kero nitio ku ponji m’ibenwang’u i cokone?

19. Icopo timo ang’o kara idikiri i Somo mi jurwei Injili mi Ker?

¹⁹ Somo mi jurwei Injili mi Ker mio iwa ponji mange ma segi. Dhanu ma copo dikiri i somo maeno utie umego ku nyimego ma gin’i tic mi saa ceke, ma oro migi ucaku niai i 23 nitundo 65. Icopo nwang’u nia ve nidikiri i somo maeno copere ngo iri. Kakare nirieyo lembe ma copo ceri nidikiri i somone, riey lembe m’uketho imito idikiri i ie. I ng’eye, pang lembe ma copo konyi kara ipong’ yeny m’ukwayere pi nidikiri i somone. Ku kony pa Yehova, man ku kero ma in bende ibetimo, gin ma nwang’u ineno nia copo timere ngo iri, bidoko ni gin ma timere.

20. Ponji ma kani ma wacopo nwang’u i buku mi Jurumi 12:6-8?

²⁰ Ponji mir adek ma wacopo nwang’u i kum lapor ma jakwenda Paulo ukiewo pire, nwang’ere i Jurumi 12:6-8. (Som.) I giragora maeni bende, Paulo unyutho nia ng’atuman utie ku giramia m’ukoc ku pa wadi i cokiri. Ento eketho nwoc nia kadok watie ku giramiane ma nenedi de, re ukwayu watii kude pi niteng’o cokiri.

21-22. Lapor p’umego Robert giku Felice, ubemio iwa ponji ma kani?

²¹ Wakewec iwi lapor p’umego moko ma nyinge Robert. Kinde m’ebino timo tic i ng’om mange, julwong’e nia edok etim tic i Bethel mi ng’om ma thugi. Kadok junyutho ire nia tic uvoye ngo avoya m’uketho juwilo tic pare de, re ewacu kumae: “Pi dwi ma dupa abed abedo ku can pilembe paru para zoo ubino nia tic re m’uvoya. Saa moko paru ubed umondo i ia nia mito awok cen kud i Bethel.” Robert udok unwang’u anyong’a kendo nenedi? Jadit cokiri wadi moko uyero  ire nia, kubang’ tic ceke ma wadaru timo, utie yo ma Yehova uponjo kowa kara watim tic ma kawoni emio i korwa. Robert unwang’u nia ukwayu ewek niketho wie i kum lembe m’udaru kadhu, ento mito eketh wie akeca iwi tic m’ebetimo kawoni.

²² Umego Felice Episcopo de unwang’ere ku peko ma rom. Ku min ot pare, gisomo somo mi Gilead i oro 1956 man gitimo tic pa jaliew mi twodiri i ng’om mi Bolivia. I oro 1964, ginyolo nyathin ma nico. Umego Felice ukoro kumae: “Ebino iwa lembe ma tek niweko tic mwa ma wamaru. Pi oro acel zoo, abedo ma cwinya tur. Ento ku kony pa Yehova, aloko paru para man aketho wiya i kum rwom para ma nyen m’atie ko janyodo.” Nyo in de ibewinjiri calu ma Robert giku Felice giwinjiri ko? Nyo cwinyi tur pilembe kawoni imbe ku rwom ma rom ku m’ilar ibino ko i wang’e? Ka eyo, ibibedo kud anyong’a tek iwilo nen peri man iketho wii i kum tic m’ibetimo kawoni ni Yehova man ni umego ku nyimego peri. Kud idol cingi, tii ku giramia peri man copo m’itie ko pi nikonyo jumange, e ibinwang’u anyong’a pileme ibetielo cokiri.

23. (a) Ukwayu wabed wanwang’ saa mi timo ang’o? (b) I thiwiwec m’ulubo wabiweco iwi lembang’o?

²³ Wan ceke piwa tie tek i i Yehova. Emito wabed i dilo pare. Dong’ wanweng’u saa ma wabed wapar ko pi gin ma wacopo timo pi niteng’o umego ku nyimego mwa. Ka watimo kero ninyutho lembene ku timo, wabipodho ngo nyaswaswa i paru ma nia piwa tie tek ungo i cokiri! Dong’ ukwayu wabed ku nen ma nenedi iwi jumange mi cokiri? wacopo nyutho nenedi nia wamarugi man pigi tek i iwa? I thiwiwec m’ulubo, wabiweco iwi lembe maeno.