1. Juponji ku lembang’o iwi Jacwic mwa?

KAN idongo i ot mi Jumulembe pa Yehova, copere iponjo lembe iwi Yehova niai ma fodi i nyathin. Juponji nia etie Jacwic, etie ku kite dupa ma beco, man nia etie ku lembakeca ma ber mandha pi dhanu.​—Tha. 1:1; Tic. 17:24-27.

2. Dhanu moko gitie ku paru ma nenedi iwi ju m’uyiyo nia Jacwic unuti?

² Ento dhanu dupa giyiyo ngo nia Mungu nuti kunoke nia etie Jacwic. Giyiyo migi nia kwo uwok mbwang’ kumeni; i ng’eye, piny ma thindho thindho magwei ma kwo n’i igi ucaku nyay nok nok nitundo gilokiri gidoko ni piny ma dongo ma kwo. Dhanu moko ma giyiyo lembuno gisomo lee mandha. Giwacu ya sians unyutho nia Biblia ucwayu ndra man nia dhanu ma giyiyo ya Jacwic unuti gitie dhanu m’usomo ngo, ma gi riek de ngo man ma juwondogi nyaswaswa.

3. Pirang’o pire tie tek nia wateng’ yiyoyic mwa giwa?

³ Nyo lembe ma dhanu m’usomo lee gibeyero copo royo jiji i iwa nia Yehova tie ngo Jacwic man nia etie ngo jameri? Pi nidwoko wang’ penji maeno, ukwayu wang’ey cuu thelembe m’uketho wayiyo nia Yehova tie Jacwic. Nyo juyero iwa nia wayii lembuno kumeno, kunoke nyo wating’o saa pi ning’iyo wan giwa gin m’unyutho nia Yehova tie Jacwic? (1 Kor. 3:12-15) Kadok nwang’u watie Jumulembe pa Yehova niai i oro ma kani de, re ubekwayu wan ceke wamedara niteng’o yiyoyic mwa. Tek wabetimo kumeno, wabiweko ngo dhanu uwondwa ku wec ma nia Biblia cwayu ndra, kum eno tie “rieko mi dhanu man awonde ma iye nanu.” (Kol. 2:8; Ebr. 11:6) Thiwiwec maeni bikonyowa ning’eyo (1) nia pirang’o dhanu ma dupa giyiyo ngo nia Jacwic utie, (2) lembe m’icopo timo pi niteng’o yiyoyic m’itie ko i Yehova ma Jacwic peri, man (3) kite m’icopo mediri ko niketho yiyoyic peri ubed tek.

4. Nimakere ku Juebrania 11:1, yiyoyic mandha ujengere iwi lembang’o?

⁴ Dhanu moko beparu nia nibedo ku yiyoyic utie niyiyo lembe moko swa kumeni. Re nimakere ku Biblia, eno tie yiyoyic mandha ngo. (Som Juebrania 11:1.) Biblia ukoro nia yiyoyic ukungune nuti. Ku lapor, wacopo neno ngo Yehova, Yesu, man Ker mi polo, re watie ku lembe dupa m’ubenyutho nia gitie andha. (Ebr. 11:3) Jararieko moko m’udoko Jamulembe pa Yehova uyero kumae: “Jumulembe pa Yehova gitie kud ukungu mi lembe ma giyiyo. Bende gicayu ngo lemandha ma sians ubeyero.”

5. Pirang’o dhanu ma dupa giyiyo ngo nia Mungu ucwiyo piny ceke?

⁵ Ka watie ku lembe dupa m’unyutho nia Jacwic unuti andha, dong’ pirang’o ke dhanu dupa giyiyo ngo nia Mungu ucwiyo piny ceke ma kwo n’i igi? Dwokowang’ lembe ma yot utie nia dhanu moko fodi giting’o ngo saa mi ng’iyo gin gigi kadok nyanok de i lembe m’unyutho nia Mungu ucwiyo piny ceke. Robert ma kawoni tie Jamulembe uyero kumae: “Jugam juweco ngo iwa pi cwic nyanok de i somo, e aparu nia lembcwic utie lemandha ngo. Adongo ku paru maeno. Kinde m’adoko ku oro 22 kan agam aweco ku Jumulembe pa Yehova, e awinjo kite ma Biblia ukoro ko cuu nia Mungu ucwiyo piny ceke.” *​—Nen sanduku ma thiwiye tie, “ Lembe ma jubekwayu i bang’ junyodo.”

6. Pirang’o dhanu moko giyiyo nia Jacwic umbe?

⁶ Jumoko giyiyo nia Jacwic umbe pilembe giyero nia gin giyiyo gin ma kume nen. Ento piny moko nuti ma kume nen ungo ma re  giyiyo, calu ve yamu; giyiye pilembe gin moko tie m’ubenyutho nia enuti andha. Kit yiyoyic ma juweco pire i Biblia de ujengere iwi lembe m’unuti andha, ma re utie “gin ma fodi juneno ngo.” (Ebr. 11:1) Kara wang’ey nia Jacwic unuti, ubekwayu wan giwa wakoy saa man watim kero pi niponjo lembe m’unyutho nia Jacwicne unuti andha. Dhanu ma dupa ke gimaru ngo lembe ma kwayu nia jutim kero. Pieno, ng’atu m’ubesayu ngo ning’eyo lembe en gire copo paru nia Mungu mbe.

7. Nyo ju m’usomo ceke gikwero nia Jacwic umbe? Kekor.

⁷ I ng’ei ma jururieko moko gitimo sayusac cuu iwi lembe m’unyutho nia Jacwic unuti, ginwang’u andha nia Mungu ucwiyo piny ceke. * Calu Robert ma wadaru weco pire, jumoko giyiyo  ngo nia Jacwic utie pilembe juponjo ngo igi nyathuthuthu de i iniversite nia Mungu tie. Re kadok kumeno de, jururieko dupa gituc ning’eyo Yehova man gimare. Calu ma jururieko maeno gitimo, wan de mito wateng’ yiyoyic mwa i Mungu kadok nwang’u wasomo lee kunoke ngo de. Ng’atu mange mbe ma copo timo lembuno kakawa.

8-9. (a) Kawoni wabidwoko wang’ penji ma kani? (b) Bero ma kani m’ibinwang’u tek ibeponjo lembe iwi giracwiya?

⁸ Icopo teng’o yiyoyic peri i Jacwic nenedi? Wakenen lembe ang’wen m’iromo timo.

⁹ Ponj lembe iwi giracwiya. Icopo teng’o yiyoyic peri i Jacwic nwang’u ibeneno cuu lei, yen, man nyikaluku. (Zab. 19:1; Isa. 40:26) Kinde m’ibemediri niponjo lembe iwi giracwiya, yiyoyic peri bidoko tek nia Yehova tie andha Jawic. Girasoma mwa ma dupa utie ku thiwiwec ma tung’ tung’ m’ukoro lembe iwi cwic. Kud iwek nisomo girasoma maeno kadok ibenwang’u nia nyang’ i igi cuu tie tek de. Miyiri zoo i kadhiri m’icopo. Bende, nen video ma beco m’uweco iwi cwic, ma waneno i coko ma dongo mir adhura i kind oro m’ubed ukadhu; ginwang’iri i kusika mwa mir Internet jw.org.

10. Kemii lapor moko m’ubenyutho nia Jacwic unuti. (Jurumi 1:20)

¹⁰ Kinde m’ibeponjo lembe iwi giracwiya, nen cuu ponji m’iromo nwang’u iwi Jacwic i lembe m’ibeponjone. (Som Jurumi 1:20.) Ku lapor, ceng’ miyo lietho man der ma pire tek pi giracwiya ma kwo iwi ng’om. Ento kit lietho ceng’ne moko copo timojo rac, ma wan wa dhanu mito jugwokwa i kume. De andha watie agwoka. Nenedi? Yamu moko nuti m’udhoko ng’om ma gwokowa kara lietho maeno kud utimwa rac. Ka lietho ceng’ ma timojo racne ubemedere, e yamu ma gwokowa bende medere kumeca. Nyo nitundo kawoni de fodi iyiyo ngo nia ng’atu moko nuti m’ubetimo lembuno, ma en e Jacwic ma jamer man ma rieki?

11. Icopo nwang’u lembe ma teng’o yiyoyic peri iwi Jacwic kakani? (Nen sanduku ma thiwiye tie, “ Jamtic ma biteng’o yiyoyic peri i Jacwic.”)

¹¹ Kan itimo sayusac i Index des publications des Témoins de Jéhovah man i jw.org, iromo nwang’u lembe dupa ma teng’o yiyoyic iwi cwic. Icopo caku sayu lembe iwi thiwiwec man i video ma tung’ tung’ ma nwang’ere i the thiwiwec “Hasard ou conception ?” (Nyo gin maeni uwok gire?) I iye, junwang’u lemandha ma jukoro i adundo, re ma wang’u ijo iwi lei man iwi giracwiya mange. Bende, junwang’u lapor mi jururieko ma gibed gipimo niporo bang’ gin ma Mungu ucwiyo.

12. Kinde ma wabeponjo Biblia, lembang’o m’ukwayu waketh wiwa cuu i kume?

¹² Ponj Biblia. Jararieko ma waweco pire i udukuwec mir ang’wen ular uyiyo ngo nia Jacwic utie. Ento i ng’eye edog enwang’u nia karaman Jacwic utie. Eyero kumae: “Yiyoyic para ujengere ngo kende kende iwi lembe m’aponjo i sians. Ento ejengere bende iwi lembe m’aponjo i Biblia.” Saa moko nyo dong’ itie ku ng’eyong’ec ma tap iwi gin ma Biblia ubeponjo. Kadok kumeno de, ukwayu imediri niponjo Lembe pa Mungu kara iteng’ yiyoyic peri i Jacwic. (Yoc. 1:8; Zab. 119:97) Ku lapor, par pi lembe m’ubed utimere con ma Biblia uweco pigi. Keth wii cuu i kum lembila m’i iye m’ubed upong’o man kite ma lembe m’i Bibliane urombo ko. Kan ibetimo kumeno, yiyoyic peri bidoko tek i Jacwic mwa ma jamer, ma riek man m’uketho jukiewo Biblia. *​—2 Tim. 3:14; 2 Pet. 1:21.

13. Juk ma kani mi rieko ma nwang’ere i Lembe pa Mungu?

 ¹³ Kinde m’ibeponjo Lembe pa Mungu, kenen kite ma juk m’i iye utie ko ku kony. Ku lapor, Biblia ular umiyo cimowang’ nia mer ma jumaru ko sente akeca tie rac man ekelo “peko dupa.” (1 Tim. 6:9, 10; Rie. 28:20; Mat. 6:24) Nyo cimowang’ maeno fodi tin de pire tek asu? Buku moko (The Narcissism Epidemic) uyero kumae: “I andha, dhanu ma gimaru piny mi kum gimbe ku mutoro, man saa ceke cwinygi kwiyo ngo. Kadok ju ma gibemito ginwang’ sente lee de gimbe ku mutoro, man ginwang’iri ku peko dupa mi remokum.” Pieno cimowang’ ma Biblia umiyo iwi mer ma jumaru ko sente tie juk ma ber akeca. Nyo ibepoy i kum juk moko mange mi Biblia m’udaru konyi? Ka wabeparu pi juk ceke ma beco ma nwang’ere i Biblia, wabineno nia kara Jacwic ung’eyo gin ma pire tek piwa, e saa ceke wabijengara i wiye. (Yak. 1:5) I ng’eye, wabikwo ma ber ku mutoro.​—Isa. 48:17, 18.

14. Kinde m’ibeponjo Biblia, ibinwang’u lembang’o iwi Yehova?

¹⁴ Kinde m’ibeponjo Biblia, bed ku lembakeca mi ng’eyo Yehova cuu mandha. (Yoh. 17:3) Kan ibetimo kumeno, ibinwang’u lembe dupa iwi Yehova man iwi kite pare ma tung’ tung’. Ibineno nia gitie kite ma rom m’igam inwang’u saa m’ibeponjo lembe iwi giracwiya. Niponjo lembe iwi kite ma tung’ tung’ pa Yehova ketho wang’eyo nia enuti andha. (Ai 34:6, 7; Zab. 145:8, 9) Kinde m’ibeponjo ning’eyo Yehova cuu mandha, yiyoyic peri m’itie ko i iye bidoko tek, mer m’imare ko bimedere ameda, man kindwu kude bidoko ceng’ini mandha.

15. Kan ibekoro pi yiyoyic peri ni jumange, ibinwang’u bero ma kani?

¹⁵ Kor pi yiyoyic peri m’itie ko i Mungu ni jumange. Kan ibetimo kumeno, yiyoyic peri giri bidoko tek. Dong’ ka ng’atu moko m’irweyo ire upenji ka nyo Mungu utie andha, icopo timo ang’o kan ing’eyo ngo lembe m’idwok ire? Kepim nisayu giragora moko m’udwoko wang’ penjine i girasoma mwa, man wuwec i wiye kude. (1 Pet. 3:15) Bende, icopo kwayu kony i bang’ Jamulembe mange m’uteng’ini. Kadok ng’atune uyiyo lembe m’idwoko ire kunoke ngo de, in ibinwang’u bero lee kum itimo sayusac. Yiyoyic peri bidoko tek. I ng’eye, ibiyiyo ngo wec mi dhanu ma giyero nia gi riek kunoke gisomo lee, ma ke giyero nia Jacwic umbe.

16. Lembang’o ma copo nwang’uwa tek wabemedara ngo niketho yiyoyic mwa udok teki?

¹⁶ Kadok nwang’u wadaru timo ni Yehova pi oro ma rukani de, ukwayu wamedara niteng’o yiyoyic mwa man niketho edok tek. Pirang’o? Pilembe ka wabedo ngo ku riekowang’, yiyoyic mwane copo kwiyo. Calu ma wadaru neno, yiyoyic utie gin ma fodi juneno ngo. Pieno, wiwa copo wil nyaswaswa i kum gin ma waneno ngo. Eno uketho Paulo ulwong’o koso yiyoyic nia “dubo ma moko i kumwa yot yot.” (Ebr. 12:1) Dong’ wacopo uro uwic maeno nenedi?​—2 Thes. 1:3.

17. Ang’o ma romo konyowa kara wamedara niketho yiyoyic mwa udok teki?

¹⁷ Mi kwong’o, kway Yehova umii iri tipo pare ma leng’, man bed itim kumeno wang’ ma pol. Pirang’o? Pilembe yiyoyic utie thenge acel mi nying’ tipo. (Gal. 5:22, 23) Pieno m’umbe kony mi tipo ma leng’, wacopo ngo niteng’o yiyoyic mwa i Jacwic. Tek wabemedara nikwayu Yehova umii iwa tipo pare ma leng’, ebimiye iwa. (Luka 11:13) Wacopo kwaye kadok kumae: “Med yiyoyic mwa.”​—Luka 17:5.

18. Nimakere ku Zaburi 1:2, 3, watie ku giramiya ma kani tin eni?

¹⁸ Mir ario, bed isom Lembe pa Mungu nja.  (Som Zaburi 1:2, 3.) Saa ma jubekiewo zaburi maeni, nwang’u Juisrael ma wendgi nok kende re ma gibino ku buku mi Cik pa Mungu. Ento jubim man julam gibino ku yore mi nwang’u buku maeno, man yub ugam umakere kara kubang’ oro abiro, “co ku mon man nyithindho,” kud umondo bende giwinj Cik pa Mungu ma jubesomo. (Poi. 31:10-12) I rundi pa Yesu, kithabu m’adola mi Lembagora ubed unwang’ere i bang’ dhanu ma wendgi nok, man i sinagog kende. Ento tin, Biblia ma zoo kunoke thenge moko nwang’ere i cing dhanu ma pol. Eno tie giramiya ma lee mandha! Dong’ wacopo nyutho foyofoc mwa nenedi pi giramiya maeno ma watie ko?

19. Ukwayu watim ang’o kara yiyoyic mwa umedere nibedo teki?

¹⁹ Wacopo nyutho nia wafoyo giramiya ma watie ko ma en e Biblia nwang’u wabesome kubang’ ceng’. Ukwayu wapang saa mi somo Biblia man mi ponje, re wacikara ngo nitimo lembe maeno pilembe nia wang’wa udong’ thwolo. Ento ka waketho program mwa mi ponjo Biblia ubed nja kubang’ ceng’, yiyoyic mwa bimedere nibedo tek.

20. Ukwayu wabed ku lembakeca mi timo ang’o?

²⁰ Tung’ ku “weg ng’eyong’ec ku ju ma riek” mi ng’om maeni, wan watie ku yiyoyic ma tek m’ujengere iwi Lembe pa Mungu. (Mat. 11:25, 26) Tek wabesomo buku ma leng’ maeno, wabing’eyo thelembe m’uketho ng’om maeni ubedoko rac magwei man lembe ma Yehova bitimo pi ng’ombe. Dong’ waketh lembakeca mi teng’o yiyoyic mwa man mi konyo dhanu dupa gibed ku yiyoyic i Jacwic. (1 Tim. 2:3, 4) Man wamedara nikuro nindo ma giracwiya ceke ma kwo iwi ng’om gibiripo dwandgi pi nipaku Yehova ku wec ma nwang’ere i Lembanyutha 4:11 m’uwacu kumae: “Eromo kudi, Yehova Mungu mwa, ya jumii iri dwong’ . . . pilembe icwiyo piny ceke.”