Kinde ma wabesomo Biblia, wacopo tiyo ku jamtic ma tung’ tung’ mi timo sayusac kara wanyang’ cuu i gin ma wabesomone. Re ukwayu ngo watim sayusac pi ning’eyo lembe ang’eya kende. Mito wayeny lonyo mi tipo iwi kite pa Yehova, ma biketho mer ma wamare ko umedere. Pi nitimo kumeno, wacopo kepenjara kumae: ‘Kpawa maeni mi Biblia ubeponja ku lembang’o iwi Yehova?’

Wacopo sayu gin m’ubenyutho ayi ma Yehova unyutho ko kite pare ma dongo ma tie mer, rieko, bedopwe man tego. Re Yehova utie ku kite mange dupa ma beco m’iromo ponjo lembe i wigi. Dong’ icopo nwang’u lembe lee ma jukoro iwi kite parene kakani?

Say kite mange pa Yehova ma kadhu 50 ma nwang’ere i Index des publications des Témoins de Jéhovah, i the thiwiwec “Jéhovah” man i the nyathi thiwiwec “Qualités par nom.” Yeny kitene m’urombo ku kpawa mi Biblia m’ibesomo. (Tek itie ku copo mi somo kende kende Buku mi timo sayusac mi Jumulembe pa Yehova, nen i thiwiwec “Jéhovah Dieu” man i the nyathi thiwiwec “Qualités de Jéhovah.”)