Penji mi jusom
Thiwiwec m’uwacu: “Nyingi bed leng’” m’uwok i Otkur ma Wiw mi dwi mir 6, 2020, umiyo lero ma kani iwi yiyoyic mwa m’ugwaku kum nying’ Yehova man dito pare ma malu ngbiri?
I thiwiwec maeno, waponjo nia lembe utie acel kende ma pire tek nisagu zoo i kwo mi giracwiya ceke ma riek (dhanu ku jumalaika). Lembene utie nidwoko nying’ Yehova ma dwong’ udok leng’. Lembe m’umulo kum dito ma malu ngbir pa Yehova ma nia kite m’ebimo ko utie ber nisagu zoo, utie thenge acel mi dwoko nyingene udok leng’. Rom rom kumeno, gwoko bedoleng’ mi dhanu utie thengene m’ucelo.
Dong’ ke pirang’o kawoni wabeketho nwoc nia lembe ma pire tek nisagu zoo ujengere iwi nying’ Yehova man nidwoko nyingene udok leng’i? Wakeng’iyu thelembene adek.
Sitani ucido nying’ Mungu niai m’ejai i podho mir Eden
Mi kwong’o, Sitani ukelo adote iwi nying’ Yehova i podho mir Eden. Penji mi rieko ma Sitani ugam upenjo ko Eva upondo ku paru ma nia Yehova utie Mungu ma jakec man nia cik m’emiyo ni Adamu giku Eva umaku piny ungo. I ng’eye, Sitani uloko the leb Yehova, m’eyero ko nia Mungu tie jandra. I ayi maeno re m’ecido nying’ Yehova, e edoko “Wonabali,” wec ma thelembene tie “jayernying’.” (Yoh. 8:44) Calu ma Eva uyiyo vupo pa Sitani, eworo ngo Mungu, niwacu ejai i kum dito pare ma malu ngbir. (Tha. 3:1-6) Nitundo tin de Sitani ubemedere nicido nying’ Mungu, m’ebemewo ko vupo iwi Yehova. Dhanu ma yiyo vupo parene gijai ni Yehova yot yot mandha. Pieno ni dhanu pa Mungu, nicido nying’ Yehova ma leng’ utie turocik ma rac dit. Etie ulag peko man lembe ma reco ceke mi ng’om.
Mir ario, kara giracwiya ceke ma riek unwang’ bero, Yehova biculo kwor pi nyinge, niwacu ebikabu acidi ceke kud i kume. Eno utie lembe ma pire tek nisagu zoo ni Yehova; uketho eyero kumae: “Abidwoko nyinga ma dwong’ leng’.” (Eze. 36:23) Kinde ma Yesu uyero nia “nyingi bed leng’,” enyutho kamaleng’ gin ma pire tek nisagu zoo m’ukwayu jutic ma pwe pa Yehova ceke giroy i rwo migi. (Mat. 6:9) Biblia uketho nwoc wang’ dupa dit nia pire tie tek lee nimiyo dwong’ ni nying’ Yehova. Laporne moko ni e: “Wumi ni Yehova dwong’ m’uromo ku nyinge.” (1 Kei. 16:29; Zab. 96:8) “Wuwer pi dwong’ mi nyinge.” (Zab. 66:2) “Abiyungo nyingi mi nja.” (Zab. 86:12) Yehova uweco wang’ dupa niai kud i polo. Kud i kind wecne, moko ubino i hekalu mi Yeruzalem, kaka ma Yesu uyero kumae: “Vwa, yung nyingi.” Yehova ulund udwoko ire kumae: “Adaru yunge man abiyunge kendo.”—Yoh. 12:28. a
Mir adek, lembakeca pa Yehova ceke utie ku winjiri ku nyinge. Kepar lembe ma e: I ng’ey amulaic ma tokcen ma biwok i ajiki mi Bimobim mi oro elufu acel pa Kristu, ang’o ma bitimere? Nyo thiwiwec ma dit mi dwoko nying’ Yehova udok leng’, bimedere nipoko kind giracwiya ma rieki? Kara wanwang’ dwokowang’ penji maeno, wakedok iwi theng lembe ario m’ugwaku kum thiwiwec maeno, niwacu gwoko bedoleng’ mi dhanu man dito ma malu ngbir pa Yehova. Nyo dhanu ma gidaru nyutho nia gi pwe, gibimediri ninwang’iri ku peko ma biketho gwoko bedoleng’ migi i amulaici? Ungo. Gibibedo leng’ m’umbe dubo man binwang’u dong’ gikadhu kud i amulaic ceke. Bende, binwang’u dong’ gicaku kwo ma rondo ku rondo. Nyo dito ma malu ngbir pa Yehova bimedere nipoko kind giracwiya pare ma rieki? Ungo. I saa maeca, binwang’u dong’ giracwiya ceke udiko cing’gi man uyiyo nia Yehova re m’ubim wigi. Dong’ wacopo yero ang’o i kum nying’ Yehova ke? I saa maeca, nying’ Yehova bibedo leng’ m’umbe acidi moko acel de i kume.
Ento, ebimedere nitelo nen mi weg bedopwe ceke m’i polo ku mi ng’om zoo. Pirang’o? Pilembe gibineno piny ma wang’u ijo ma Yehova ubemedere nitimo. Kepar nyanok: Calu ma Yesu bijwigere pi nidwoko bimobim ceke i cing’ Yehova, Mungu bibedo “Jabim mi piny ceke.” (1 Kor. 15:28) I ng’ey lembe maeno, dhanu m’iwi ng’om gibinwang’u “bedagonya mi dwong’ mi nyithindho pa Mungu.” (Rum. 8:21) E Yehova bipong’o lembakeca pare mi nindo dupa mi ketho giracwiya ma riek m’i polo ku mi ng’om zoo ubed ni juruot ma dit ma gitie i acel.—Efe. 1:10.
Lembe maeno zoo bibedo kud adwogi ma kani iwi juruot pa Yehova m’i polo ku mi ng’omi? M’umbe jiji, wabibedo asu kud ava ma dit mi paku nying’ Yehova ma leng’. Ku tego mi tipo ma leng’, jagor Zaburi ma Daudi ukiewo kumae: “Mugisa ni Yehova Mungu . . . Mugisa mak nyinge mi dwong’ mi nja.” (Zab. 72:18, 19) Pi naka ku naka, wabimedara ninwang’u thelembe ma nyen man ma miyo anyong’a pi nipaku nying’ Yehova.
I andha, nying’ Yehova nyutho nia etie Mungu ma nenedi. Ento m’usagu zoo, nyinge bepoyo wiwa i kum mer pare. (1 Yoh. 4:8) Wabibepoy saa ceke nia mer re m’ucwale nicwiyowa, nimiyo iwa jamgony man nibimo ku bedopwe. Re wabimedara nineno kite ma Yehova ubekonjo ko mer iwi giracwiya pare. Pi nja ku nja, wabimedara nicoro ceng’ini ku Wegwa ma Yehova man wabiwero wer mi pak pi nyinge ma dwong’.—Zab. 73:28.
