1. Nimakere ku Juebrania 12:1, ukwayu watim ang’o kara watund i ajiki mi kwaya mwa pi ninwang’u kwo?

 BIBLIA uporo kwo mwa mi Jukristu ku kwaya mi ng’wec. Ju ma biringo kwayane ma ber nitundo i ajiki, gibinwang’u sukulia mi kwo ma rondo ku rondo. (2 Tim. 4:7, 8) Ukwayu waii ku kero mwa ceke kara wamedara niringo, asagane pilembe wadhingo tundo i ajiki mi kwayane. Jakwenda Paulo m’ugam udaru ma ber ng’wec pare mi kwo, unyutho gin ma bikonyowa pi niloyo. Ekwayuwa nia “wawany gin moko ci ma pek man . . . waringu ku cirocir kwaya ma juketho i wang’wa.”​—Som Juebrania 12:1.

2. ‘Niwanyu gin moko ci ma pek,’ thelembene tie ang’o?

² Kinde ma Paulo ukiewo nia wacikara ‘niwanyu gin moko ci ma pek,’ nyo emito nyutho nia ukwayu ngo Jakristu uyey ter moko ci? Ungo. Ento, emito yero nia wawek niyeyo ter ma tijgi mbe. Ter ma kumeno romo jwigo ng’wec mwa man ketho waol. Kara wamedara niringo, wacikara ning’iyo man nikabu gin moko ci ma pek ma tije mbe m’umbe galu. Re i saa ma rom eno, ukwayu ngo wakab ter ma wacikara niyeyo. Kan ungo, wabimedara ngo ku kwayane. (2 Tim. 2:5) Wacikara niyeyo ter ma kanigi?

3. (a) Nimakere ku Jugalatia 6:5, wacikara niyeyo ang’o? (b) Wabineno ang’o i thiwiwec maeni man pirang’o?

³ Som Jugalatia 6:5. Paulo unyutho piny moko ma  wacikara niyeyo. Ekiewo nia “ng’atuman biyeyo ter pare gire.” Kakeni Paulo uweco iwi gin ma Mungu ubekwayu jatic pareman utim, m’etie gin ma ng’atuman time gire. I thiwiwec maeni, wabineno nia ‘ter mwa’ uketho i iye ang’o man kite ma wacopo yeye ko. Bende, wabing’iyo piny ma pek ma tijgi mbe ma re copere nia kawoni wabeyeyo man wabineno kite ma waromo kabu kogi. Niyeyo ter mwa giwa man nikabu piny ma pek ma tijgi mbe bikonyowa niringo ma ber kwaya mi kwo ma n’i wang’wa.

4. Pirang’o lembang’ola mwa mi timo ni Yehova pek ungo? (Nen bende cal.)

⁴ Lembang’ola mwa mi timo ni Yehova. Saa ma wathiero kwo mwa ni Yehova, wang’olo nia wabiwore man wabitimo yeny pare. Wacikara nipong’o lembang’olane. Nikwo nimakere ku lembang’olane utie rwom ma lee, re epek ungo, pilembe Yehova ucwiyowa pi nitimo yeny pare. (Nyu. 4:11) Ecwiyowa ku yeny mi thenge mi tipo man i ayi pare. Eno uketho ecopere iwa nicoro ceng’ini  kude man ninwang’u anyong’a i kum timo yeny parene. (Zab. 40:8) M’usagu zoo, ka wabetimo yeny pare man wabelubo tok Wode, ‘wanwang’u yom.’​—Mat. 11:28-30.

5. Ang’o ma copo konyi nipong’o lembang’ola peri? (1 Yohana 5:3)

⁵ Icopo yeyo ter maeno nenedi? Lembe ario ma copo konyi ni e: Mi kwong’o, mediri niketho mer peri ku Yehova udok tek. Pi nitimo kumeno, bed inyam i lembe iwi bero ceke m’etimo iri man iwi mugisa m’egwoko piri. Kinde ma mer m’imaru ko Mungu ubemedere, ebibedo iri bende yot niwore. E ibinyang’ nia cik pare utie ter ma pek ungo. (Som 1 Yohana 5:3.) Mir ario, lub lapor pa Yesu. Etuc nitimo yeny pa Mungu pilembe erwo i bang’ Yehova pi nikwayu kony man eketho wiye i kum sukulia m’ebinwang’u. (Ebr. 5:7; 12:2) Calu Yesu, bed ikway tego i bang’ Yehova man kud ibay genogen mi kwo ma rondo ku rondo. Kinde ma mer m’imaru ko Yehova ubemedere man kan ibelubo lapor pa Wode, ebicopere iri nipong’o lembang’ola peri.

6. Pirang’o wacikara nipong’o rwom ma watie ko i kind juruot mwa? (Nen bende cal.)

⁶ Rwom ma watie ko i kind juruot mwa. I kwaya mwa mi kwo, wacikara nimaru Yehova giku Yesu nisagu wedi mwa. (Mat. 10:37) Re eno ubenyutho ngo nia wacopo wenjo rwom ma watie ko i kind juruot mwa, ve nia rwomne ubecerowa ninyayu anyong’a i Mungu man i Kristu. Ento kara Mungu giku Kristu gijolwa, ukwayu wapong’ rwom maeno. (1 Tim. 5:4, 8) Tek watimo kumeno, wabibedo kud anyong’a. I andha, Yehova uketho nia lembe biwotho ma ber i kind juruot nwang’u nico ku dhaku gibenyutho mer man woro i kindgi, nwang’u junyodo gimaru man gibeponjo awiya migi, man nwang’u awiya gibeworo junyodo migi.​—Efe. 5:33; 6:1, 4.

7. Iromo pong’o rwom peri m’itie ko i kind juruot nenedi?

⁷ Icopo yeyo ter maeno nenedi? Kadok nwang’u itie ku rwom ma kani i kind juruot de, re mito ijengiri iwi rieko ma nwang’ere i Biblia kakare nijengiri iwi kite m’ibewinjiri ko, iwi suru, kunoke iwi paru mi jururieko mi ng’om maeni. (Rie. 24:3, 4) Tii ma ber ku girasoma mwa m’ujengere iwi Biblia. I igi jukoro kite ma wacopo tiyo ko ku cik mir ukungu mi Biblia. Ku lapor, nyathibuku Juruot peri copo bedo kud anyong’a man ponji mi 49 ku mi 50 mi buku Icopo kwo kud anyong’a rondo ku rondo! uweco iwi cik mir ukungu ma copo konyo ju m’ugamiri, junyodo, man aradu. b Bed ku lembakeca mi tiyo ku gin ma Biblia ubeyero, kadok nwang’u wedi peri mange gibetimo ngo kumeno de. Tek itimo kumeno, jupewu gibinwang’u berone man Yehova bimiyo iri mugisa.​—1 Pet. 3:1, 2.

8. Yub mwa copo bedo ku matoke ma kani i wiwa?

⁸ Nijolo adwogi mi yub mwa. Yehova umiyo iwa bedagonya mi maku yub man ebemito wanwang’ bero i kum yub ma beco ma wamaku. Re egoyo ngo gang’ i kumwa ka wabenwang’ara ku matoke  mi yub ma rac. (Gal. 6:7, 8) Pi thelembe maeno, wajolo matoke mi ng’iyong’ic, mi wec man mi timo mwa ma rac. Nikum lembe ma watimo, pidocwiny mwa copo sendowa lee. Ento ka wang’eyo nia wacikara nijolo matoke mi yub mwa, eno copo cwaluwa nituco dubo mwa, niyiko kosa ma watimo man niuro nitimo kosa ma rom kendo. Nitimo lembe maeno copo konyowa nimedara ku kwaya mi kwo.

9. Icopo timo ang’o kan igam imaku yub ma raci? (Nen bende cal.)

⁹ Icopo yeyo ter maeno nenedi? Tek igam imaku yub ma rac, icopo timo ang’o? Poy nia icopo wilo ngo lembe m’udaru kadhu. Kud inyoth saa man tego peri m’icer ko beng’i kunoke m’idwok ko kosa iwi jumange. Ento yii kosa peri man tim lembe m’icopo kawoni. Tek pidocwiny peri ubesendi pi kosa m’itimo, jwigiri man rwo i bang’ Yehova, yii kosa perine man kwaye ewek iri. (Zab. 25:11; 51:3, 4) Kway kisa i bang’ ju m’itimo rac man kan ukwayere, kway kony i bang’ judong cokiri. (Yak. 5:14, 15) Nwang’ ponji i kum kosa peri, man ii kara kud ipodh i iye kendo. Kan itimo kumeno, cwinyi bed tek nia Yehova bitimo iri kisa man ebimiyo iri kony m’itie ku yenyne.​—Zab. 103:8-13.

10. Pirang’o nigeno gin ma copere ngo utie ter ma peki? (Jugalatia 6:4)

¹⁰ Nigeno gin ma copere ngo. Wacopo weko ter maeno unurwa nwang’u wabeporara ku jumange. (Som Jugalatia 6:4.) Tek saa zoo waporara ku jumange, kumira man alaralara romo mondo i iwa. (Gal. 5:26) Ka wabeii nitimo gin ma jumange gitimo ma ke wacopo ngo, waromo kadhu mupaka mwa man wanyayu ret i kumwa mananu. Tek “genogen ma galu remo adunde,” dong’ adundewa copo remo rukani ka waketho wiwa i kum gin ma wacopo timo ngo? (Rie. 13:12) Nitimo kumeno copo daru tego mwa man jwigo ng’wec mwa mi kwaya mi kwo.​—Rie. 24:10.

11. Ang’o ma copo konyi kara kud igen gin m’icopo timo ngo?

¹¹ Icopo kabu ter maeno nenedi? Kud ipar nia mito itim lembe m’usagu ma Yehova ubekwayu i beng’i. Ekwayu ngo imii ire gin m’imbe ko. (2 Kor. 8:12) Cwinyi bed tek nia Yehova ubeporo ngo gin m’ibetimo ku ma jumange ubetimo. (Mat. 25:20-23) Eneno tic m’ibetimo ku ng’eyong’ec peri ceke, ku gwoko bedoleng’ peri, man ku cirocir peri ni gin ma pire tek. Ku jwigiri, yii nia oro peri, yotkum peri man lembe m’ibenweng’iri i iye copo ceri nitimo lembe moko kawoni. Dong’ calu Barzilai, bed ayika nikwero rwom kinde ma yotkum peri ubeceri. (2 Sam. 19:35, 36) Calu Musa ke, yii kony man mii theng tic moko ni jumange ka copere. (Ai 18:21, 22) Jwigiri bikonyi kara kud iketh wii i kum gin m’icopo timo ngo man ma copo oli kinde m’iberingo kwaya mi kwo.

12. Nyo wacikara nidwoko kosa mi yub ma rac mi jumange i wiwa? Kekor.

¹² Nidwoko kosa mi yub ma rac mi jumange i wiwa. Wacopo maku ngo yub kaka jumange; wacopo goyo de ngo gang’ i kumgi kinde ma gibenwang’iri ku matoke mi yub ma rac ma gimaku. Ku lapor, nyathin moko ma nyaku kunoke ma co romo ng’iyo niweko timo ni Yehova. Yub maeno copo nyayu can lee dit i  junyodo. Re junyodo ma gibeparu nia gin re ma giketho nyathin migi umaku yub ma rac, gibeyeyo ter ma pek. Eno utie ngo ter ma Yehova ubemito giyey.​—Rum. 14:12.

13. Janyodo copo timo ang’o ka nyathin pare umaku yub ma raci?

¹³ Icopo kabu ter maeno nenedi? Poy nia Yehova umiyo bedagonya ni ng’atuman m’i kindwa. Eweko ng’atuman umak yub pare gire; eno ke kadok yub mi timo ire. Yehova ung’eyo nia itie janyodo m’utie ku dubalaga; ebemito kende kende nia itim gin m’icopo. Yub ma nyathin peri umaku utie lembe pare, peri ngo. (Rie. 20:11) Re asu cwinyi copo dieng’ pilembe itimo ngo gin moko ma nwang’u ukwayu itim. Tek kumeno, nyuth kite m’ibewinjiri kone ni Yehova man kwaye etim iri kisa. Eng’eyo nia icopo dok ungo ku ng’eyi pi niwilo lembe m’udaru timere. Bende, ebekwayu ngo nia icer bang’ nyathin peri kara kud ekay gin m’ecoyo. Ng’ey nia ka nyathin peri ubetimo kero pi nidwogo i bang’ Yehova, ebijole kud ava ma lee.​—Luka 15:18-20.

14. Pirang’o nidieng’ akeca pi dubo ma con utie ter m’ukwayu wakabi?

¹⁴ Nidieng’ akeca pi dubo ma con. Ka watimo dubo, etie lembe ma winjere nia cwinywa upidi. Ento nidieng’ akeca pi dubo mwa ma con utie ter ma Yehova ubemito ngo wayey. Etie ter ma wacikara nikabu. Dong’ ka wabedieng’ akeca ke? Tek wayewo dubo mwa, waloko cwinywa man wamaku yub ma kara kud wapodh kendo i iye, wacopo bedo ku genogen nia Yehova utimo iwa kisa. (Tic. 3:19) I ng’ey ma watimo lembe maeno, Yehova ubemito ngo nia wamedara nidieng’ akeca. Eng’eyo nia nidieng’ akeca romo timowa rac lee. (Zab. 31:10) Tek waweko ang’abacwiny unurowa nikadhu  mukero, waromo weko niringo kwaya mi kwo.​—2 Kor. 2:7.

15. Ang’o ma copo konyi kan ibedieng’ akeca pi dubo ma coni? (1 Yohana 3:19, 20) (Nen bende cal.)

¹⁵ Icopo kabu ter maeno nenedi? Tek ibemediri nidieng’ akeca pi dubo ma con, keth wii i kum “wekodubo” pa Mungu. (Zab. 130:4) Yehova ung’olo ni ju m’uloko cwinygi i andha man m’eweko dubo migi, ewacu kumae: “Abipoi kendo ngo pi dubo migi.” (Yer. 31:34) Eno ubenyutho nia ka Yehova utimo iri kisa, ekwanu ngo dubone kendo i wii. Pieno, kud ipar nia matoke mi dubo peri ubenyutho nia etimo ngo iri kisa. Bende, cwinyi kud utur pilembe kosa peri ma con uketho ecopere ngo iri nitimo lee i tic pa Mungu. Yehova ubemedere ngo niparu pi dubo peri, man ukwayu in de kud ipar pire.​—Som 1 Yohana 3:19, 20.

16. Wa juring ng’wec, wacikara ning’eyo lembang’o?

¹⁶ Kinde ma waberingo kwaya mi kwo, wacikara ‘niringe i ayi ma wacopo nwang’u ko [sukulia].’ (1 Kor. 9:24) Wabiringo ma ber ka wang’eyo tung’ tung’ m’utie i kind ter ma wacikara niyeyo ku ma wacikara nikabu. I thiwiwec maeni, waweco iwi lapor ma nok kende mi gin ma wacikara niyeyo ku ma wacikara nikabu. Re mange de nuti. Yesu uyero nia “camu m’akeca ku meth m’ukadhu mukero man adieng’acwiny mi kwo” de romo ‘nurowa.’ (Luka 21:34) Giragora maeni ku mange de, copo konyi nineno alokaloka m’ukwayu itim kara iring kwaya mi kwo ma ber.

17. Pirang’o cwinywa copo bedo tek nia wabiloyo kwaya mi ng’wec mi kwo?

¹⁷ Cwinywa copo bedo tek nia wabiloyo kwaya mi ng’wec mi kwo pilembe Yehova bimiyo iwa tego ma watie ku yenyne. (Isa. 40:29-31) Pieno, kud ivoci! Lub lapor pa jakwenda Paulo m’uketho wiye zoo i kum sukulia ma ni wang’e. (Filip. 3:13, 14) Ng’atu moko mbe ma copo ringo kwayane kakeri, re ku kony pa Yehova icopo loyo. Yehova romo konyi kara iyey ter peri man ikab cen ter ma tijgi mbe. (Zab. 68:19) Ku Yehova i ng’eti, icopo ringo kwayane ku cirocir man iloye!