IBED itimang’o kan imito ing’ei saa? Saa moko nyo ineno saa m’ikendo i cingi, kunoke m’i kor ot. Kinde m’ineno, nyo inwang’u nia tie saa 7 ku nusu mi dieceng’. Dong’ icopo dwoko nenedi ka ng’atu moko upenji nia “saa adi?”

Ibidwoko ire nimakere ku kabedo ma wuni ie. Ku lapor, icopo yero ire nia “saa 7 ku nusu” kunoke “saa 13:30.” I kabedo mange, icopo dwoko nia, “saa 8 udong’ nusu,” niwacu dakika udong’ 30 pi niromo saa 8.

Dong’ i rundi ma con, dhanu ubed ung’eyo saa nenedi? Gin bende gibino ku yore dupa. I Lembagora mi Juebrania, jutio ku wec ma calu ve “kugweno” “dieceng’,” man “uthieno.” (Tha. 8:11; 19:27; Poi. 28:29; 1 Ub. 18:26) Re saa moko Biblia utio ku wec ma tap tap pi ninyutho saa.

I Israel ma con, jukur ubed ukoso ngo, asagane diewor. Pieno nyithindho mir Israel gipoko i diewor ni adek, man gilwong’e “kur.” (Zab. 63:6) I rundi ma Yesu unyolere i ie, Juyahudi gipoko i diewor ni kur ang’wen, calu ma Jugiriki ku Juroma de gigam gitimo.

Buku mir Injili uweco pi kur mi diewor wang’ dupa. Ku lapor, ewacu nia Yesu uwotho ku wi nam nitundo i bang’ julubne ma gibino i yei, “i kur mir ang’wende mi diewor.” (Mat. 14:25) Bende i lapor moko, Yesu uyero kumae: “Dok won ot ung’eyo ka kur ma jakwo bino i ie, kuno di ekuro, kuno di eyio ngo ya jutur ot pare.”​—Mat. 24:43.

Yesu uweco iwi kur ang’wen zoo kinde m’eyero ni julubne nia gikii, pilembe ‘ging’eyo ngo kabino pa rwoth ma won ot, tek en e uthieno, kadi diewor ma ling’, kadi i kok pa gweno, kadi [pir] kugweno.’ (Mk. 13:35) Kurne ma kwong’a, niwacu “uthieno,” ubed ucaku niai i mwony pa ceng’, nitundo i kum saa 3 mir uthieno. Kur mir ario, ma tie “diewor ma ling’” ubed ucaku i kum saa 3 mir uthieno, nitundo i kum piny mi saa 6 mi diewor. Kur mir adek, niwacu “kok pa gweno” ubed ucaku i kum piny mi saa 6 mi diewor, nitundo i kum saa 9 mi diewor. I diewor ma jumaku i ie Yesu, ecicopere nia i saa mi kur maeno re ma kulok ugam ukok. (Mk. 14:72.) Kur mir ang’wen, niwacu “[pir] kugweno,” ubed umaku niai i kum saa 9 mi diewor nitundo i wok pa ceng’.

Pieno, kadok con dhanu ubino mbe ku saa mi cing’ kunoke mi kor ot calu ma watie ko tin eni de, re asu gibino ku yore ma gibed ging’eyo ko nia saa udoko adi.