I NG’OM zoo, judong cokiri gimaru nitimo tic ma gitie ko i kind dhanu pa Mungu. Gitie iwa mugisa ma lee dit! Re i kind nindo m’ukadhu ceng’ini eni, alokaloka moko utimere. Jukwayu nia judong cokiri m’utii giwek tic moko ma pek ma gibino timo i kor judong cokiri m’aradu. Lembene utimere nenedi?

Nimakere ku yub ma nyen, ukwayu nia juliew mi twodiri, man umego ma gitelo wi somo ma tung’ tung’ mi theokrasi, calu ve somo mi judong cokiri, giwek tic maeno ma segi ka oro migi utuc 70. Bende, ukwayu judong cokiri ma oro migi tundo 80 giwek tic ma tung’ tung’ ma gibino timo i kor judong cokiri m’aradu, calu ve nibedo jatel wi tic mi Komite mi filial, kunoke nibedo jatel wi tic mi guriri mi judong cokiri. Judong cokiri m’utii gijolo alokaloka maeno nenedi? Ginyutho gwoko bedoleng’ migi ni Yehova man ni dilo pare.

Umego Ken m’ubino jatel wi tic mi Komite mi filial pi oro 49 uyero kumae: “Ayio yub maeno ku cwinya ceke. I nindo ma junyutho ira lembene, nwang’u kugweno alar arwo i bang’ Yehova nia ukwayu umego moko m’aradu re m’udok jatel wi tic.” I wang’ ng’om zoo, judong cokiri m’utii, gibino ku nen ma rom ku p’umego Ken. Re jumoko yubne ukeuturo cwinygi pilembe gimaru nikonyo umego migi.

 Umego Esperandio m’ubino jatel wi tic mi guriri mi judong cokiri uyero kumae: “Lembene ukeutima rac.” Ento yor i ng’eye edok ewacu kumae: “Abino ku yeny mi saa ma lee pi nidieng’ pira gira, pilembe tego para bino jwik.” Umego Esperandio ubemedere nitimo ni Yehova man nigwoko bedoleng’ pare, man bende etie mugisa ma yawe mbe ni cokiri m’eni ie.

Ka dong’ ju ma gibino juliew mi twodiri pi oro ma dupa, ma kawoni dong’ gibetimo kit tic mange ke? Umego Allan m’ubino jaliew mi twodiri pi oro 38 uyero kumae: “Kinde m’awinjo lembe maeno, anwang’ara rac mandha.” Re enwang’u nia nitendo umego m’aradu i tic utie ku bero lee dit, man ebemedere nitimo ni Yehova ku bedopwe.

Umego Russell, m’ubino jaliew mi twodiri man bende jatel wi somo mi theokrasi pi oro 40 uyero nia, lembene ukeuturo cwinygi giku dhaku pare, ekoro kumae: “Wamaru rwom ma wabino ko lee mandha, man wabino nwang’u nia watie ku kero mi medara ku tic.” Kawoni, umego Russell ku dhaku pare gibetio ku formasio ma ginwang’u man lembe ma ging’eyo pi nikonyo cokiri ma gini ie, eno ubemio mutoro ma lee ni jurwei mi cokirine.

Kadok inweng’iri ngo ku lembe m’umego ma waai waweco pigi ginwang’iri ko de, re lembe moko ma jukoro i 2 Samwil copo konyi ninyang’ ku dhanu ma gidaru nwang’iri ku lembe ma kumeno.

Wakepoi pi lembe m’ukadhu kinde ma Absalom ma wod Ubimo Daudi ugam ujai ire. Daudi uringo niai i Yerusalem nitundo i Mahanaim, yo nyangu mi kulo Yordan. Kuca en ku dhanu pare gibino ku yeny mi piny ma copo konyogi. Nyo ibepoi i kum lembe m’ugam utimere?

Jumaco moko adek ma kuca gikelo kavuto, kit cam ma tung’ tung’, jamtedo man bende sani. Ng’atu acel m’i kindgi ubino Barzilai. (2 Sam. 17:27-29) Kinde ma jai pa Absalom ujik, Daudi unwang’u nia ukwayu edok i Yerusalem. E Barzilai ulwoke nitundo i kulo Yordan. Daudi ukwaye nia gidok gikude i Yerusalem man eng’olo nia en re m’ebitunge ku cam. Barzilai ubino “ng’atu ma dwong’ apila,” man i andha ebino mbe ku yeny ma nia Daudi umii ire cam. (2 Sam. 19:31-33) Ecicopere nia Daudi umito gibed karacelo ku Barzilai i Yerusalem kara ebed enwang’ juk ma beco i bang’e, pilembe oro pare lee man eng’eyo lembe dupa. Nwang’u eno ubecibedo rwom ma lee mandha ni Barzilai nikwo man nitimo tic i lelagang’ p’ubimo!

Calu ma Barzilai ung’eyo mupaka pare, enyutho kamaleng’ nia oro pare tie 80. I ng’eye eyero kumae: “Acopo ng’io gin ma ber ku gin ma raci?” (2 Sam. 19:35) Emito yero ang’o? Barzilai ukwo pi oro ma dupa;  pieno ebino ku rieko ma lee. Man asu ebino ku kaka mi mio juk ma beco, calu ma “dhanu m’uti” gidok gimio ni Ubimo Rehoboam. (1 Ub. 12:6, 7; Zab. 92:12-14; Rie. 16:31) Pieno kinde ma Barzilai uwacu nia eromo ng’io ngo gin ma ber ku gin ma rac, ebino weco iwi kite ma tio udaru ko copo pare. Enyutho kamaleng’ nia dong’ tio unyotho midodhoge man uketho dong’ ewinjo lembe cuu ngo. (Ekl. 12:4, 5) Pieno Barzilai umio Kimham ma ve nia utie wode re ma Daudi udok kude i Yerusalem pilembe etie aradu.​—2 Sam. 19:36-40.

Alokaloka ma waweco pire, ma dilo utimo pi oro mir umego urombo ku lembe ma Barzilai unyutho. Tung’ ku Barzilai, pi nitimo alokaloka maeno, jugam juneno ngo lembe kunoke copo pa ng’atu acel kende. Ugam ukwayere nia junen cuu mandha bero mi judong cokiri ma gibetimo i ng’om ngung’.

Copere nia Jukristu maeno ma ging’eyo mupaka migi gilar gineno nia dilo pa Yehova copo yikere ma ber pi mediri mi nindo m’ubino, ka gidwoko rwom mi tic ma gibino ko pi oro ma dupa i kor aradu. Wang’ ma pol, umego ma gitii re ma gibed gitendo aradu ku tic, calu ma ve Barzilai utendo ko wode, man calu ma jakwenda Paulo utendo ko Timoteo. (1 Kor. 4:17; Flp. 2:20-22) Nikadhu kud i tic ma gibetimo, umego m’aradu ginyutho nia gitie ‘giramia ma dhanu,’ man gikonyo pi “gomo kum [Kristu].”​—Ef. 4:8-12; nen Wel 11:16, 17, 29.

I cokiri pa Mungu i wang’ ng’om ngung’, umego ma pol ma giweko rwom mi tic ma gibino ko ni aradu, gitie ku kaka mange mi timo ni Yehova.

Umego Marco m’ubino jaliew mi twodiri pi oro 19 uyero kumae: “Nyimego moko mi cokiri mwa gitie ku weg udi ma juyic ungo; kawoni atie ku kaka mi konyo weg udi migi.”

Geraldo m’ubino jaliew mi twodiri pi oro 28 uyero kumae: “Lembakeca ma nyen ma watie ko utie nikonyo ju m’ukwio i thenge mi tipo man nitelo wi ponji mi Biblia lee akeca.” Ekoro nia giku dhaku pare gibetelo wi ponji mi Biblia mi dhanu 15, man dhanu ma pol ma nwang’u gikwio i thenge mi tipo gicaku becidho i coko.

Allan ma wadaru weco pire ukoro kumae: “Kawoni watie ku saa ma wadikara ko lee i ayi ma tung’ tung’ mi rweyo lembanyong’a. Warweyo i kaka ma dhanu bepong’ i ie, kaka mi kuloka, man bende ni judhugula mwa; judhugola mwa ario gidaru bino i coko i Ot Ker.”

Kan itie umego m’utii ma re itie ku copo man ibegwoko bedoleng’ peri, ma kawoni ibetimo kit tic mange i dilo pa Mungu, ayi ma segi utie m’icopo konyo ko. Pi nitielo tic pa Yehova, icopo ponjo aradu i cokiri ku lembe dupa m’ing’eyo. Umego Russell, ma waweco pire i wang’e uyero kumae: “Yehova ubeponjo aradu ma gitie ku bodho man ebetio kugi. Umego ku nyimego mi ng’om zoo gibenwang’u bero i kum ponji man liew mi kwac m’umego m’aradu gibetimo ku kero.”​—Nen sanduku ma thiwie tie, “ Kony umego m’aradu kara gitii lee ku copo migi.”

Ka nindo m’ukadhu eni icaku nitimo kit tic ma nyen, mediri nibedo ku nen ma ber. Tic m’itimo kud adundeni ceke udaru konyo dhanu ma pol man icopo medo asu nikonyo jumange. Ng’ei nia jumeri lee man jubimediri nimeri.

M’usagu zoo, idaru nyayu anyong’a ma bithum ungo i adunde Yehova. Biblia uyero nia wie biwil ungo i “kum tic mu man mer ma wunyutho kum nyinge, kum wutimo ni jumaleng’, man wubetimo asu.” (Ebr. 6:10) Giragora  maeno ma Mungu yuyo i wie ubeketho cwinywa nia bero m’eng’olo iwa utie ngo kende kende pi tic ma wadaru timo ire. Piri tie tek lee dit i wang’ Yehova, man ecopo wil ungo nyanok de pi tic m’itimo ire con, man pi kero m’ibemediri nitimo pi ninyayu anyong’a i ie.

Dong’ kan alokaloka ma waai waweco pire no umulo kumi ngo ke? Asu lembe maeni copo mio iri bero moko. Nenedi?

Kan ing’eyo umego moko m’utii ma kawoni ubetimo kit tic mange, ecopo konyi lee dit pilembe eteng’ini i thenge mi tipo man eng’eyo lembe dupa. Penj juk i bang’e man kwai emii iri telowic. Bed inen kite m’ebetio ko ku lembe m’eng’eyo i tic m’ebetimo kawoni.

Kadok itie ng’atu m’utii m’ubetimo kit tic mange, kunoke itie umego kunoke nyamego ma copo nwang’u kony i bang’e, ng’ei nia Yehova neno gwoko bedoleng’ mi dhanu ma gitimo ire pi nindo dupa, man ma gibemediri asu nitimo ire ni gin ma pire tek.