1-2. Wec ma nwang’ere i Eklizia 11:6, utie ku winjiri ma kani ku tic mi rweyo lembanyong’a mi Ker?

I NG’OM moko ka dhanu giwinjo lembanyong’a mi Ker, gimito ging’ei lembene lee. Dok bedo ve nang’ gibino kuro lembene akura! I ng’om mange ke, dhanu ma pol gimaru ngo Mungu kunoke Biblia. Kaka m’ikwo i ie ke dhanu bejolo lembanyong’a nenedi? Kadok jumoko jolo kunoke ngo de, re gin ma Yehova ubemito utie nia warwei lembanyong’a nitundo m’ebiyero en nia dong’ eromo.

² Yehova udaru ketho nindo ma rweyo lembanyong’a bijik i ie, e i ng’eye “kajik bilund wok.” (Mat. 24:14, 36) Ento pi kawoni, wacopo nyutho nenedi nia wabeworo lembe m’eyero nia “kud icer cingi”? *​—Som Eklizia 11:6.

3. Wabiweco iwi lembang’o i thiwiwec maeni?

³ I thiwiwec m’ukadhu waweco iwi lembe ang’wen ma wacikara nitimo pi nidoko ‘judwar dhanu.’ (Mat. 4:19) I thiwiwec maeni ke, wabiweco iwi yo adek ma copo konyowa nirweyo lembanyong’a kud amora kadok wabenwang’ara ku lembang’o de. Wabiponjo nia pire tie tek nia (1) waketh tic mi lembanyong’a ubed ni gin ma kwong’a i kwo mwa, (2) wabed weg cirocir, man (3) wabed ku yioyic ma tek.

4. Pirang’o ukwayu waketh wiwa i kum tic ma Yehova umio iwa?

⁴ Yesu ular unyutho lembe ma bitimere i nindo mi kajik ceng’. Lembene copo wingo bende wi julub pare i kum tic mi rweyo lembanyong’a. Ewacu igi kumae: “wuki.” (Mat. 24:42)  Tin wan bende wabenwang’ara ku lembe ma rom ku m’ugam ucero dhanu mi rundi pa Noa niketho wigi i kum lembe ma Noa ubino twong’o. (Mat. 24:37-39; 2 Pet. 2:5) Pieno, ukwayu waketh wiwa i kum tic ma Yehova umio iwa.

5. Tic mi Jukwenda 1:6-8 ukoro nia tic mi rweyo lembanyong’a bitimere i kadhiri ma rukani?

⁵ Tic mi rweyo lembanyong’a ucikere nibedo ni tic ma kwong’a i kwo mwa. Yesu ular uwacu nia i ng’ei tho pare, julubne gibitimo tic maeno nisagu m’elar etimo. (Yoh. 14:12) I ng’ei tho pare, julubne moko gidok kendo i ba tic migi mi dwaru nam. Kinde m’ecer, etimo udu moko m’uketho julub pare ginego rec lee. Etimo lembe maeno kara julubne ginen nia tic migi mi dwaru dhanu re ma pire tek nisagu tic mange ceke. (Yoh. 21:15-17) I wang’ nidok i polo, ewacu ni julub pare nia tic mi rweyo lembanyong’a m’ecaku there, bimedere nitundo i ng’om mi thek mange bende. (Som Tic mi Jukwenda 1:6-8.) Oro moko i ng’eye, Yesu uketho jakwenda Yohana uneno i gin ma wok i wang’, lembe ma bitimere i nindo mi “ceng’ pa Rwoth.” * Acel m’i kind gin ma wang’u ijo ma Yohana uneno ubino “malaika ma won lembanyong’a ma nja,” m’ubeyero lembanyong’a ni “thek ceke ku suru ku dhok man dhanu.” (Nyu. 1:10; 14:6) Eno ubenyutho kamaleng’ nia, Yehova ubemito watim tic maeno mi rweyo lembanyong’a i wang’ ng’om zoo nitundo ma tije bijik ko.

6. Wacopo ketho tic mi rweyo lembanyong’a ubed ni gin ma kwong’a i kwo mwa nenedi?

⁶ Ka wabeparu pi kony ma Yehova ubemio iwa, eno cwaluwa niketho tic mi lembanyong’a ni gin ma kwong’a i kwo mwa. Ku lapor, ebemio iwa cam mi tipo i ayi ma tung’ tung’, calu ve girasoma ma juwodho i wi karatasi, girasoma mir elektronik, ma  jumaku mir awinja man video, ku program mi Televizio JW. Kepar bende pi kusika mwa mir Internet, junwang’u lembe dupa i ie i dhok ma kadhu 1 000! (Mat. 24:45-47) Tin lembgamba, dini, man can ku lonyo uketho kind dhanu upokere i ng’om. Ento jurutic pa Mungu ma kadhu milioni 8, gitie i acel i wang’ ng’om zoo. Ku lapor, ceng’ kas’abic nindo 19, mi dwi mir 4, oro 2019, Jumulembe pa Yehova i wang’ ng’om zoo gidikiri pi nineno video m’unyamu i giragora ma kubang’ ceng’. Uthieno ma cing’ nica, udul dhanu 20 919 041 gicokiri i Poi pi tho pa Yesu. Ka waparu pi rwom ma watie ko, ma wabeneno ko udu maeno m’ubetimere i rundi mwa, ma wan de wabedikara i lembene, eno cwaluwa niketho tic mi lembanyong’a ni gin ma kwong’a i kwo mwa.

7. Lapor pa Yesu ubekonyowa nenedi niketho tic mi lembanyong’a ni gin ma kwong’a i kwo mwa?

⁷ Yo mange ma konyowa niketho tic mi rweyo lembanyong’a ni gin ma kwong’a i kwo mwa utie nilubo lapor pa Yesu. Yesu uweko ngo nyanok de nia gin moko unyoth wie i kum tic mi rweyo lembanyong’a. (Yoh. 18:37) Epodho ngo i abidhe kinde ma Sitani umio ire “ker ceke m’i ng’om, ku dwong’ne.” Bende, eyio ngo kinde ma dhanu mito gikethe ebed ubimo. (Mat. 4:8, 9; Yoh. 6:15) Awanya mi bedo ku lonyo umondo ngo i ie, man eweko ngo jai kunoke ragedo ma lake tek unyai lworo i ie. (Lk. 9:58; Yoh. 8:59) Kinde ma yioyic mwa ubenwang’ere i amulaic, juk ma jakwenda Paulo umio ni Jukristu wadi bikonyowa niketho tic mi lembanyong’a ni gin ma kwong’a i kwo mwa. Ewacu igi nia gilub lapor pa Yesu ‘kara kud giol man kud givoci’!​—Ebr. 12:3.

8. Cirocir utie ang’o, man pirang’o pire tie tek asagane i nindo ma tin?

⁸ Cirocir utie kite ma jukuro ko lembe moko ma kumjo ukwio nitundo ma lembene biyikere ko. Watie ku yeny mi nyutho cirocir kinde ma wabekuro peko mwa moko uthum, kunoke kinde ma wakuro lembe moko ma ber ma bitimere. Jabila Habakuk ubino mito nia timo ma reco m’ubino i ng’om mi Yuda uthum. (Hab. 1:2) Julub pa Yesu de gibino geno nia Ker pa Mungu “binyuthre pio” man nia ebigonyogi kud i the bimobim mi Roma. (Lk. 19:11) Wan bende wabekuro kud ava nindo ma Ker pa Mungu bikabu ie lembe ma reco cen, man ebiketho ng’om ma nyen ma weg bedopwe bibedo i ie. (2 Pet. 3:13) Re umito wabed ku cirocir pi nikuro nindo ma Yehova uketho, m’ebitimo ie lembe maeno. Wakenen yo moko ma Yehova ubeponjo kowa pi nibedo weg cirocir.

9. Lembang’o m’unyutho nia Yehova utie won cirocir?

⁹ Yehova unyutho iwa lapor maber mi cirocir. Emio nindo ma lee ma Noa ugier ko avur man m’erwei ko rwonglembe “mi bedopwe.” (2 Pet. 2:5; 1 Pet. 3:20) Yehova uwinjo Abraham ku cirocir kinde ma Abraham upenje ku penji dupa iwi yub m’emaku m’ebecinyotho ko dhanu ma reco mir adhura mi Sodoma ku Gomora. (Tha. 18:20-33) Pi oro ma dupa Yehova unyutho cirocir ma lee ni nyithindho mir Israel pi koso gwoko bedoleng’ migi. (Neh. 9:30, 31) Tin cirocir pa Yehova ubenen kamaleng’ pilembe emio kaka ma dhanu “gitund [ko] ba lokocwiny.” (2 Pet. 3:9; Yoh. 6:44; 1 Tim. 2:3, 4) Lapor pa Yehova ubemio iwa thelembe m’ukwayu wan bende wanyuth ko cirocir  kinde ma waberweyo lembanyong’a man waponjo dhanu. Ebeponjowa bende ninyutho cirocir ni kadhu kud i lapor m’eketho jukiewo i Biblia.

10. Lapor pa jarafur ma jukiewo pire i Yakobo 5:7, 8, ubemio iwa ponji ma kani?

¹⁰ Som Yakobo 5:7, 8. Lapor pa jarafur m’ekuro ko nindo ma kodhi pare m’epidho bicek i ie, ubeponjowa ninyutho cirocir. Kodhi moko dongo pio pio, ento kodhine mange, asagane ma cegonyinge, giting’o nindo ma lee pi niteng’ini. I ng’om mir Israel, cam ubed uteng’ini pi dwi abusiel ka jukaye. Jurufur ubed upidho kodhi migi i ng’ei koth ma kwong’a ma cwii (ma kawoni jucopo pore ku diere mi dwi mir apar), man gidok gikaye i ng’ei koth ma tokcen ma cwii (ma kawoni jucopo pore ku diere mi dwi mir ang’wen). (Mk. 4:28) Ebibedo iwa ni lembe mi rieko tek wabelubo lapor mi cirocir pa jarafur. Re ecopo bedo lembe ma yot ungo.

11. Cirocir konyowa nenedi i tic mi rweyo lembanyong’a?

¹¹ Wa dhanu wamito nang’ wanwang’ adwogi mi lembe ma watimo pio pio. Ka wamito cam ma wapidho i podho ucek ma ber, watim’ang’o? Wafuro kakare, wapidhe, wagiero there man wakwoyo pii i wie. Tic mi ketho dhanu udok julub bende kumeno, ukwayu watim kero ma lee. Nikonyo ng’atu ma waponjo kude Biblia ufudh ulag akoyakoya cen kud i ie, utie lembe ma ting’o nindo. Cirocir mwa bikonyowa kara kudi cwinywa tur kinde ma dhanu gibewinjowa ngo. Re kadok dhanu moko ubewinjowa man gimito giponj lembe lee de, asu wacikara ninyutho cirocir. Wacopo dio ngo japonj Biblia adia nia etim mediri i thenge mi tipo. Saa moko kadok julub pa Yesu de gigam ginyang’ ungo i lembe moko ma Yesu uponjo. (Yoh. 14:9) Poi nia wacopo rweyo lembanyong’a ni dhanu man waponjogi;  ento Yehova re ma konyogi kara gitim mediri.​—1 Kor. 3:6.

12. Wacopo nyutho cirocir nenedi kinde ma waberweyo lembanyong’a ni wedi mwa?

¹² Saa ma nyutho cirocir copo bedo iwa tek i ie, utie kinde ma waberweyo lembanyong’a ni wedi mwa. Cik mir ukungu ma nwang’ere i Eklizia 3:1, 7 copo konyowa; ewacu kumae: “Gin ceke bedo ku nindone, . . . nindo mi bedo ling’, man nindo mi weco.” Kura mwa ma ber copo mio lembatuca ma ling’ ling’ ni ng’atini, re eno nyutho ngo nia dong’ wawek kaka mi rweyo lembanyong’a. (1 Pet. 3:1, 2) Ukwayu warwei lembanyong’a kud amora man ku cirocir ni dhanu ceke, uketho i ie wedi mwa bende.

13-14. Kenyuth lapor moko mi cirocir mi dhanu ma con ku ma kawoni ma wacopo lubo.

¹³ Lapor mi weg yioyic ma jukiewo pigi i Biblia ku mi rundi mwa eni, copo konyowa ninyutho cirocir. Habakuk unyutho cirocir kinde m’ebino kuro nindo ma timo ma rac bithum i ie. Ewacu kumae: “Abicungo wi kur para man abikethara wi odkur.” (Hab. 2:1) Jakwenda Paulo uyero nia ebino kud ava mi ‘daru’ tic m’umiyere ire. Ento ku cirocir, emedere asu nimio ‘lembatuca mi lembanyong’a.’​—Tic. 20:24.

¹⁴ Wakewec iwi lapor p’umego moko ku min ot pare. Kinde ma gidaru somo mi Gilead, juorogi i ng’om ma wend Jumulembe pa Yehova utie nok i ie, man ma dhanu mapol m’i ie utie ngo i dini mi Jukristu. Kuca, dhanu m’umaru ponjo Biblia wendgi nok. Juwadi mange ma gisomo kugi somo mi Gilead, ma juorogi i ng’om mange, ubed unyutho igi thirithiri pir adwogi ma ber ma gibenwang’u, man pi ponji mi Biblia ma gibetelo wie kuca. Kadok mediri tie nok kaka ma juorogi i ie de, re umego maeno ku min ot pare, ginyutho cirocir ma gimediri ko asu nirweyo lembanyong’a. Kinde ma girweyo lembanyong’a pi oro abora i kaka maeno ma mediri tie nok i ie, gidok ginwang’u anyong’a lee kinde ma ng’at’acel m’i kind ju ma gibino ponjo kugi Biblia ulimo batizo. Lapor mi dhanu ma con ku ma kawoni ma ginyutho cirocir, ubemio iwa ponji ma pire tek. Giweko ngo amora migi ujwiki, gimediri asu nirweyo lembanyong’a man Yehova umio igi mugisa pi cirocir migi. Dong’ wabed “jupor mi jucam pacu mi lembang’ola nikum yioyic ku twiocwiny.”​—Ebr. 6:10-12.

15. Kenyuth yo ma yioyic ubecwalu kowa nirweyo lembanyong’a.

¹⁵ Wayio lembe ma waberweyo, uketho watie kud ava mi nyutho lembene ni dhanu mange dupa. Wayio nia lembang’ola pa Mungu ma nwang’ere i Biblia bitimere. (Zab. 119:42; Isa. 40:8) Wabeneno kite ma lembila mi Biblia ubepong’o ko tin. Wabeneno bende alokaloka m’ubetimere i kwo mi dhanu ma gibetio ku juk mi Biblia. Lembe maeno ceke ubenyutho kamaleng’ nia ukwayu jurwei lembanyong’a mi Ker ni dhanu ceke.

16. Nimakere ku Zaburi 46:1-3, yioyic ma watie ko i Yehova man i Yesu ubecwaluwa nenedi nirweyo lembanyong’a?

¹⁶ Watie ku yioyic i Yehova, pilembe lembanyong’a ma waberweyo uai i bang’e. Watie bende ku yioyic i Yesu m’eketho ubed ubimo mi Ker pare. (Yoh. 14:1) Kadok wanwang’ara ku lembang’o de, wang’eyo nia Yehova bibedo iwa ni kapondo man tego mwa saa ceke. (Som Zaburi 46:1-3.) M’umedo maeno, wang’eyo nia kud i polo, Yesu ubetio ku copo man dito ma Yehova  umio ire pi nitelo wi tic mi rweyo lembanyong’a iwi ng’om.​—Mat. 28:18-20.

17. Kemii lapor moko m’unyutho nia ukwayu wamedara asu nirweyo lembanyong’a.

¹⁷ Yioyic ketho wabedo ku genogen nia Yehova bimio iwa mugisa pi tego ma wabetimo. Saa moko emio mugisane i ayi ma nwang’u waparu ngo apara de. (Ekl. 11:6) Ku lapor, kubang’ ceng’, dhanu elufu ma lee gibed gineno girasoma mwa ma waketho iwi prezantwar. Nyo ayi maeno mi rweyo lembanyong’a ubemio adwogi ma ber? Eyo! Tic Mwa mi Ker mi dwi mir 11, 2014 ukoro pi nyaku moko ma somo i Iniversite m’umito ekor lembe i wang’ dhanu iwi Jumulembe pa Yehova. Ninwang’u kaka ma Ot Ker ni ie ubino tek ire, re edok enwang’u girasoma mwa iwi jamtic ma jukpero buku i wie, man enwang’u bende girasoma mwa m’uweco iwi lembe m’ebino sayu pi korolembe pare. I ng’eye, edoko Jamulembe pa Yehova man kawoni etie jayab yo ma nja. Lembe maeno ubemio amora mi rweyo lembanyong’a i kumwa, pilembe fodi dhanu tie dupa m’utie ku yeny mi winjo lembanyong’a mi Ker.

18. Pirang’o wayio m’umbe jiji nia tic mi rweyo lembanyong’a bijik tap i nindo ma Yehova umito?

¹⁸ Wang’eyo nia nindo moko nuti ma tic mi rweyo lembanyong’a mi Ker bijik i ie. Wakewec iwi lembe m’utimere i rundi pa Noa. Yehova unyutho kamaleng’ nia etie Mungu ma woro nindo m’eketho. Oro ma romo 120 i wang’e, elar eketho nindo ma tap ma pii madit bicoro ie ng’om. Oro ma dupa i ng’eye, Yehova udok uyero ni Noa nia egier avur. Cicopere nia Noa umedere asu nitimo tic ku tego pi oro 40 kunoke 50 ma fodi piine ucoro ngo ng’om. Kadok dhanu ubed uwinjo ngo rwonglembe m’ebeyero de, re emedere asu nipoyogi nitundo ma Yehova uwacu ko ire nia nindo romo m’eroy ko lei i avur. I ng’eye, “Yehova ciko [dhugola]” mir avur tap i saa m’eketho.​—Tha. 6:3; 7:1, 2, 16.

19. Wabinwang’u mugisa ma kani tek wacero ngo cingwa?

¹⁹ Ceng’ini eni, Yehova bijigo dhu tic mi rweyo lembanyong’a, ebiciko dhugola, niwacu ebinyotho ng’om ma rac pa Sitani, man ebiketho ng’om ma nyen ma bipong’ ku weg bedopwe i ie. Ento pi kawoni, ukwayu walub lapor pa Noa, pa Habakuk man mi dhanu mange ma gicero ngo cing’gi, ginyutho cirocir, man ginyutho yioyic ma tek i Yehova man i lembang’ola pare.