Wakesom giragorane: “Tek ineno send ma jusendo ko jacan, man jurop ma kabu pokolembe ku lembe ma pwe i ng’om moko, ii kud uwang’ lii kum lembene: kum ng’atu ma malu ma sagu ju ma malu eneno; man ju ma ni malu nuti ma sagu gin.”​—Ekl. 5:8.

Saa moko wiwa copo cidho wang’acel nia verse maeni ubeweco pi judongo pa gavmenti mi ng’om kende. Re ka wang’io i giragorane cuu, wanwang’u nia ebenyutho iwa bende lemandha moko iwi Yehova, man lembene copo mio iwa jukocwiny ku genogen.

Eklizia 5:8 uweco pi jubim moko ma gibesendo jucan man ma gibepoko lembe migi cuu ngo. Jubim maeno umaku gipoi nia ng’atu moko nuti m’utie ku dito m’usagu migi m’ubenenogi. Saa moko nyo jumange de nuti m’utie ku dito ma lee m’usagu migi. Lembe ma rac utie nia, jubim ceke mi gavmenti mi ng’om, gicopo timo lembe ma cuu ngo man timo migine copo mio peko ni lwak dhanu ma gibetelo wigi.

Kadok ecopo nen nia ve genogen umbe de, re lembe m’ujukocwinywa utie nia Yehova ubeneno kadok jutela ma dongo mi gavmenti mi ng’om. Pieno, wacopo kwayu kony i bang’e man waredho adieng’a cwiny mwa i wie. (Zab. 55:22; Flp. 4:6, 7) Wang’eyo nia “wang’ Yehova uberingo kun ku kun i ng’om ngung’ . . . kara enyuthre gire tek ni ju m’adundegi bedo ndhu cu yor i bang’e.”​—2 Kei. 16:9.

Pieno, Eklizia 5:8 uketho wabenyang’ i kum lembe m’ubetimere i the bimobim mi dhanu, nia ng’atu moko nuti ma dito pare usagu mi jumange ceke. Lembe ma pire tek nisagu utie nia, giragora maeni ubekonyowa ninyang’ nia Yehova utie ku dito ma dit; eyo, Madit m’usagu mange ceke. Kawoni ebebimo nikadhu kud i ba Wode Yesu Kristu ma tie ubimo mi Ker pare. Mungu ma Jategokpo ma wang’e neno lembe ceke, utie Mungu ma pwe, man Wode ma Yesu Kristu bende tie pwe.