1. Wacopo lwong’o Yehova ng’a?

 I KIND juruot pa Yehova ma gibetimo ire, junwang’u Yesu ma tie “kayu mi giracwiya ceke,” man udul jumalaika. (Kol. 1:15; Zab. 103:20) Kinde ma Yesu ubino iwi ng’om, ekonyo dhanu ninyang’ nia gicopo lwong’o Yehova nia Weggi. Saa m’ebeweco ku julubne, ewacu igi nia Yehova tie “Vwa man . . . Wegwu.” (Yoh. 20:17) Wan bende ka wadaru thierara ni Yehova man walimo batizo, wamondo i kind umego ku nyimego ma gitie juruot pare ma gimer i kindgi.​—Mark. 10:29, 30.

2. I thiwiwec maeni wabineno lembang’o?

² Jumoko ginwang’u nia etie lembe ma tek dit nineno Yehova calu Wego ma jamer. Jumange ke gicopo ng’eyo ngo kite ma ginyuth ko mer ni umego ku nyimego migi. I thiwiwec maeni, wabineno kite ma Yesu ukonyo kowa nineno Yehova calu Wegwa ma jamer, ma waromo coro ceng’ini i vute. Wabineno bende lembe ma waromo timo pi nikwanyu lapor pa Yehova i ayi ma wabekwo ko kud umego ku nyimego mwa.

3. Rwo mi lapor ketho wacoro ceng’ini ku Yehova nenedi?

³ Yehova tie Wego ma jamer. Yesu ubemito wabed ku nen m’urombo ku pare iwi Yehova, niwacu wanene calu janyodo ma ber man ma jamer, ma waromo weco i bang’e saa moko ci; ento ungo ve ng’atu ma mer de mbe i iye ma bemiyo pare kwa cik. Wang’eyo lembuno nikum gin ma Yesu uponjo ni julubne  gibed giyer saa ma giberwo. Ecaku rwo mi lapor ku wec ma e: “Wegwa.” (Mat. 6:9) Nwang’u Yesu copo lwong’o Yehova nia “Jategokpo,” ‘Jacwic,’ kunoke “Ubimo ma rondo ku rondo;” de nwang’u cibedo rac ungo pilembe Biblia de ulwong’o Yehova ku nying’ mi dito maeno. (Tha. 49:25; Isa. 40:28; 1 Tim. 1:17) Ento Yesu uyero walwong’ Yehova nia “Wegwa.”

4. Wang’eyo nenedi nia Yehova ubemito wacor ceng’ini kude

⁴ Nyo etie lembe ma tek iri nineno Yehova calu Wego ma jameri? Ni jumoko m’i kindwa etie tek. Ka wegwa m’unyolowa ugam unyutho ngo iwa mer, eromo bedo iwa lembe ma tek niparu nia wego moko nuti m’umaruwa. Ento wacopo nwang’u tielocwiny pilembe Yehova ung’eyo cuu dit kite ma wabewinjara ko, man thelembe m’uketho wabewinjara kumeca! Ebemito ebed i vutwa. Biblia ma Lembe pare ubekwayuwa kumae: “Wucor ceng’ini i vut Mungu, man en de ebicoro ceng’ini i vutwu.” (Yak. 4:8) Yehova umaruwa, man eng’olo nia ebibedo iwa Wego ma kaporne de mbe.

5. Nimakere ku Luka 10:22, Yesu romo konyowa nenedi nicoro i vut Yehova?

⁵ Yesu romo konyowa kara wacor ceng’ini ku Yehova. Eng’eyo Yehova cuu mandha man enyutho kite pare tap tap. Pieno eyero kumae: “Ng’atu m’uneno an nwang’u eneno Wego bende.” (Yoh. 14:9) Calu nyathin ma jadit, Yesu uponjowa ku kite m’ukwayu wawor ko Wegwa, kite ma waromo uro ko lembe ma nyayu can i iye, man kite ma wacopo nwang’u ko bero i wang’e. Re asagane kit kwo pare iwi ng’om unyutho kamaleng’ nia Yehova tie Mungu ma ber man ma jamer. (Som Luka 10:22.) Wakenen lapor moko.

6. Kemii lapor m’ubenyutho nia Yehova uwinjo rwo pa Yesu.

⁶ Yehova bewinjo awiya pare. Wakenen kite m’egam ewinjo ko Wode ma kayu. Andha, Yehova uwinjo rwo ma pol ma Wode ubed urwo kinde m’ebino iwi ng’om. (Luka 5:16) Ewinjo rwo ma Yesu urwo i wang’ nimaku yub ma  dongo, calu ve kinde m’ebecing’iyo jukwenda pare 12. (Luka 6:12, 13) Yehova uwinjo bende Yesu saa ma cwinye ung’abere lee. Tap kinde ma Yuda ubecicibe, erwo ku cwinye zoo i bang’ Won iwi lembe m’ebecikadhu kud i iye. Yehova uwinjo Yesu awinja kende ngo, ento eoro bende malaika ucidh utiel Wode maeno m’emaru lee.​—Luka 22:41-44.

7. Iwinjiri nenedi ning’eyo nia Yehova winjo rwo mi jutic pare?

⁷ Tin de Yehova ubemedere niwinjo rwo mi jutic pare, man edwoko wang’ rwone i saa ma ber man i ayi ma cuu mandha. (Zab. 116:1, 2) Nyamego moko mi ng’om mi India uneno kamaleng’ kite ma Yehova udwoko ko wang’ rwo pare. Ebino twoyo nikum adieng’acwiny ma lee m’ubesende, man erwo i bang’ Yehova ku cwinye ceke iwi lembene. Ekiewo kumae: “Program mi Televizio JW mi dwi mir 5, oro 2019 utundo tap i saane, pilembe eweco iwi kite ma jucopo nyego ko ku lworo man adieng’acwiny. Ebino tap wang’ rwo para.”

8. Yehova unyutho mer ni Yesu i yo ma kani?

⁸ Yehova umaruwa man edieng’ piwa tap calu m’egam emaru ko Yesu man edieng’ pire kinde m’ebetimo tic pare iwi ng’om. (Yoh. 5:20) Epong’o yeny pa Yesu i thenge mi tipo, etielo cwinye saa ma cwinye ubepido, man epong’o yeny pare mi kum bende. M’umedo maeno, Yehova unyutho ni Wode nia emare man anyong’a nege i kume. (Mat. 3:16, 17) Yesu ng’eyo nia Won mi polo utie kude saa ceke man ebikonye, eno uketho egam enwang’u ngo wang’ acel de nia etie kende.​—Yoh. 8:16.

9. Wang’eyo nenedi nia Yehova umaruwa?

⁹ Calu Yesu, wan de Yehova udaru nyutho iwa mer pare i kite dupa. Kepar nyanok: Yehova utelowa i bang’e man emiyo iwa umego ku nyimego dupa ma gimaruwa, ma ginyayu mutoro i iwa man ma gitielo cwinywa ka watie kud adieng’acwiny. (Yoh. 6:44) Yehova bemiyo iwa bende cam mi tipo ma dwoko yiyoyic mwa tek. Ekonyowa bende kubang’ ceng’ ninwang’u gin ma watie ku yenyne i thenge mi kum. (Mat. 6:31, 32) Ka wabeparu pi mer ma Yehova ubenyutho iwa, mer ma wamare ko medere ameda.

10. Waromo nyutho mer ni umego ku nyimego mwa calu Yehova nenedi?

¹⁰ Yehova umaru umego ku nyimego mwa. Ento saa moko ecopo bedo iwa lembe ma tek nimarugi man ninyutho igi merne. Saa moko ebedo tek pilembe suru mwa man ayi ma wadongo ko ukoc. Bende, wan ceke watimo kosa ma ton i jumange man ma kierogi. Re asu wacikara nitimo kero kara mer mi juruot mwa mi tipo umedere nibedo tek. Nenedi? Nwang’u wabenyutho mer ni umego ku nyimego mwa calu ma Wegwa benyutho ko. (Efe. 5:1, 2; 1 Yoh. 4:19) Wakenen ponji ma waromo nwang’u i lapor pa Yehova.

11. Yesu unyutho “kisa ma dit” pa Yehova nenedi?

¹¹ Yehova tie won “kisa ma dit.” (Luka 1:78) Ng’atu ma won kisa, can nego adundene kinde m’ebeneno dhanu ubesendiri, pieno esayu yore mi konyogi man etielogi. Ayi ma Yesu ugam udieng’ ko pi dhanu unyutho kamaleng’ kite ma Yehova dieng’ ko pigi. (Yoh. 5:19) Nindo moko kinde m’eneno udul dhanu, “kisa nege i kumgi, kum jusendogi man juwenjogi calu rombe ma jakwac migi mbe.” (Mat. 9:36) Yesu ujik ungo kende kende nimarugi yor i iye; ento etimo lembe moko pi nikonyogi. Ekeyo kum jurutwoyo man eyomo kor ju ma ‘giol man ma ter ma pek ubenurogi.’​—Mat. 11:28-30; 14:14.

12. Kemii lapor moko iwi kite ma waromo nyutho ko kisa.

 ¹² Kara wanyuth kisa cuu ni umego ku nyimego mwa, ubekwayu walar wapar pi peko ma gibekadhu kud i iye. Ku lapor, nyamego moko romo bedo ku remokum ma pek. Ewagere ngo pi remone, re mutoro copo nege lee ka ng’atu moko ukonye. Nyo ubecopere ngo ire nipong’o yeny mi kum mi juruot pare? Nyo waromo konye ngo ku tedo cam kadi ke ku weyo kunoke ku lwoko ot pare? Kunoke nyo tic uweko umego moko. Nyo wacopo diyo ngo sente moko i the cinge m’umbe niyero nia wamiyo wan, kara uwoth konye ma nwang’u ebesayu ko tic mange?

13-14. Waromo nyutho kit berocwiny pa Yehova nenedi?

¹³ Yehova tie jabero. (Mat. 5:45) Eketho ceng’ rieny i wiwa kubang’ nindo ma nwang’u wakwaye de ngo! Lietho ceng’ne konyo dhanu zoo, kadok ju ma foyo foc ungo bende. Calu Yehova, wacikara ngo nikuro nia umego ku nyimego mwa gikegikway kony akwaya i bang’wa ka wanyuth igi kisa. Waromo timo lembe moko pi nikonyogi ma nwang’u fodi gikwayuwa ngo akwaya. Nyo ibeneno ngo nia yeny mwa ma Yehova bepong’o ubenyutho nia emaruwa? Wamaru Yehova dit pilembe etie Mungu ma dieng’ piwa man e jabero!

¹⁴ Umego ku nyimego mwa ma dupa de gibenyutho berocwiny calu Weggi mi polo. Ku lapor, i oro 2013, avuvu ma tek ma julwong’o Haiyan ukoto i ng’om mi Philippines man ukelo nyoth ma lee dit. Udi ku piny mir umego ku nyimego ma dupa unyothere. Ento umego migi mi wang’ ng’om ceke gitero kony igi pio pio. Jumoko ujoko sente, jumange ke gidikiri i tic mi giedo; pi oro ma tundo acel de ngo ci, jugiero man juyiko udi m’unyothere ma romo 750! I saa mi thong’om mi Korona de, Jumulembe pa Yehova gitimo tic ma tek pi nikonyo umego ku nyimego migi. Ka wabetimo pio pio pi nikonyo juruot mwa mi tipo, nwang’u wabenyutho nia wamarugi.

15-16. Nimakere ku Luka 6:36, wacikara nitimo ang’o pi nilubo lapor pa Wegwa mi polo?

¹⁵ Yehova tie jakisa man eweko kier. (Som Luka 6:36.) Kubang’ ceng’, Wegwa mi polo timo iwa kisa. (Zab. 103:10-14) Julub pa Yesu  gibino dhanu ma leng’ ungo; re Yesu ubed utimo igi kisa man eweko kier migi. Ebino kadok ayika nithiero kwo pare kara dubo mwa uwekere. (1 Yoh. 2:1, 2) Nyo kisa ma Yehova giku Yesu gibetimo iri, man dubo peri ma gibeweko uketho ibenwang’u ngo nia icoro ceng’ini kugi?

¹⁶ Mer m’i kindwa ku juruot mwa mi tipo doko tek ka wabeweko “lembe yot yot.” (Efe. 4:32) Saa moko, ebedo iwa yot ungo niweko lembe ni jumange, pieno ubekwayu waii i kum ng’ico maeno. Nyamego moko usomo thiwiwec m’uyero, “Watim kisa yot yot ni jumange” i Otkur ma Wiw, man ewacu nia thiwiwecne ukonye lee niweko lembe. * Ekiewo kumae: “Kinde m’asomo thiwiwec maeno, anyang’ nia kan abetimo kisa ni jumange, an re m’abinwang’u konyne. Thiwiwecne ukoro nia niweko lembe ni jumange nyutho ngo nia imaru racu ma gitimo kunoke nia lembene uton ungo i ii. En ke kan iweko lembe ni ng’atini, dong’ ng’eicwiny benegi ngo i kume, man cwinyi de kwiyo.” Ka wabeweko lembe ni umego ku nyimego mwa yot yot, nyutho nia wamarugi man wabelubo lapor pa Yehova, Wegwa mi polo.

17. Nimakere ku Matayo 5:16, waromo yungo Wegwa mi polo nenedi?

¹⁷ Etie iwa rwom ma dit nibedo i kind umego ku nyimego mi ng’om zoo, ma gitie juruot m’umer i kindgi. Wabemito dhanu mange dupa gibin gidikiri kudwa kara watim ni Mungu mwa wakugi. Pieno, wacikara ngo nitimo kadok gin acel de ma romo ketho dhanu gipar paru ma rac iwi Yehova kunoke iwi Jumulembe pare. Ento ukwayu waii saa ceke nibedo ku kura ma ber ma romo telo dhanu niwinjo lembanyong’a.​—Som Matayo 5:16.

18. Lembang’o ma romo konyowa nirweyo ku tegocwinywa?

¹⁸ Dhanu moko giromo cayuwa kunoke ginyayu kadok ragedo i kumwa pilembe wabeworo Wegwa mi polo. Dong’ wacopo timo ang’o ka lworo ubenegowa niweco pi yiyoyic  mwa ni jumange? Mito wajengara iwi Yehova man iwi Wode, kum gin re ma gibikonyowa. Yesu utielo cwiny julubne nia kud gidieng’ pi lembe ma gibiyero man kite ma gibiyere ko. Pirang’o? Ekoro kumae: “Lembe ma wubiyero bimiyere iwu saa nica; kum wubiweco wun kendwu ngo, ento tipo pa Wegwu re ma biweco nikadhu kud i beng’wu.”​—Mat. 10:19, 20.

19. Kemii lapor pa ng’atu moko m’umiyo lembatuca ku tegocwinye.

¹⁹ Kenen lapor p’umego Robert. Kinde ma fodi ecaku ponjo Biblia acaka man eng’eyo de ngo lembe hai iwi Biblia, ugam ukwayu nia ecidh ekor i wang’ otpido mir Afrika ma yo piny nia pirang’o ekwero nimondo i tic mir askari. Ku tegocwinye, ekoro nia ebemito ngo emond i tic maeno pilembe emaru umego pare ma gi Jukristu. Emaru rwom pare m’etie ko acel m’i kind jupagi mi tipo! E rek kumeni, juji acel upenje kumae: “Umego peri tie jukani?” Robert ular uparu ngo nia jubipenje kumeno; e ndhundhu giragora mi nindo maeca utundo i wiye. Giragorane ubino Matayo 12:50 m’uwacu kumae: “Ng’atu m’ubetimo yeny pa Vwa m’i polo re ma tie umira, nyamira man maa.” Kadok Robert ubino japonj Biblia ma nyen de, re tipo pa Yehova ukonye nidwoko wang’ penji maeno ku mange de dupa ma juwok jupenje ko rek. Ma jiji mbe, anyong’a unego Yehova lee i kum Robert! Wan bende anyong’a nege i kumwa ka wabejengara i wiye pi nimiyo lembatuca ku tegocwinywa saa ma wan’i lembe ma tek.

20. Wacikara nibedo ku lembakeca mi timo ang’o? (Yohana 17:11, 15)

²⁰ Anyong’a ubenegowa lee pilembe watie i kind juruot mwa mi tipo ma gimer lee i kindgi. Wegwa tie Wego ma ber m’usagu zoo, man watie kud umego ku nyimego ma gimaruwa. Mito wabed wanyuth foyofoc mwa saa ceke pi lembe maeno. Sitani ku jupare ma reco gibemito wapar nia Wegwa mi polo umaruwa ngo, man gibeii kara gilal bedo i acel mwa. Ento Yesu urwo piwa, ekwayu nia Wegwa unen wiwa kara bedo i acel mi juruot mwa kud ulal. (Som Yohana 17:11, 15.) Tin Yehova ubedwoko wang’ rwo maeca. Calu Yesu, dong’ wabed m’umbe jiji nia Wegwa mi polo umaruwa man ebikonyowa; man wan ceke wabedu ku lembakeca mi coro ceng’ini magwei ku juruot mwa mi tipo.