1. Ng’atini copo winjere nenedi ka ng’atu m’emaru uweko cokiri?

 NYO jukoyo ng’atu moko m’imaru kud i cokiri? Lembuno copo turo cwinyi! Nyamego moko ma nyinge Hilda * uyero kumae: “Kinde ma won ot para tho ma nwang’u wadaru timo kude oro 41 i gamiri, agam aparu nia eno ubino lembe ma rac magwei m’utimere i kwo para. Re saa ma woda uweko cokiri, dhaku pare kud awiya pare, anwang’u nia karaman m’i wang’e ca de fodi; meno lund ubino rac m’usagu!”

2-3. Nimakere ku Zaburi 78:40, 41, Yehova bewinjere nenedi ka jurutic pare giweke?

² Kepar kite ma cwiny Yehova ugam utur ko kinde ma jumalaika pare moko ma gibino i kind juruot pare giloko ng’eygi ire! (Yuda 6) Kepar bende pi can m’umondo i iye saa ma nyithindho mir Israel ma gibino dhanu pare m’emaru gijai ire wang’ udul. (Som Zaburi 78:40, 41.) Ng’ey m’umbe jiji nia Wegwa mi polo winjere bende rac ka ng’atu moko m’imaru uweke. Eng’eyo can m’ibenweng’iri ko. Ku kisa mandha ebitielo cwinyi man ebikonyi.

³ I thiwiwec maeni, wabineno gin ma waromo timo pi ninwang’u kony i bang’ Yehova ka ng’atu ma wamaru uweke. Wabineno bende kite ma dhanu mange mi cokiri copo konyo ko juruot pa ng’atu ma jukoyo. Ento mi kwong’o, wakenen paru ma rac ma wacikara niuro.

4. Junyodo ma dupa giwinjiri nenedi ka nyaku migi kunoke wodgi uweko Yehova?

⁴ Wang’ ma pol ka jukoyo nyathin ma nyaku kunoke ma nico, junyodo pare gicaku penjiri nia gitimo ngo ang’o m’uketho nyathin ne uweko lemandha. Umego moko ma nyinge Luke uyero wec ma e, i ng’ei ma jukoyo wode: “Aparu nia eca zoo ubino kosa para. Agam aleko kadok lek ma rac de pi lembene. Saa moko acaku wak man cwinya kwong’o dhongo.” Nyamego Elizabeth ma en de jugam jukoyo wode kud i cokiri ubed upenjere wang’ ma pol kumae: “Eni abed atimo ang’o ma rac ma nwang’u an a mego acikara ngo nitimo? E anwang’u nia niponjo lemandha iwi Yehova ni woda uvoya.”

5. Ka ng’atini uweko Yehova, eca tie kosa pa ng’a?

⁵ Ukwayu ngo wiwa uwil nia Yehova umiyo bedagonya mi timo ng’iyong’ic ni ng’atuman. Eno nyutho nia waromo ng’iyo wan giwa ka nyo wabiwore kunoke ngo. Awiya moko junyodo migi ubino lapor ma cuu ngo, re ging’iyo nitimo ni Yehova man gigwoko bedoleng’ migi ire. Awiya mange lundo junyodo migi utimo kero i ayi moko ci pi niponjogi kara gimar Yehova, re saa ma gidongo, giloko ng’eygi ni lemandha. Pieno, ng’atuman m’i kindwa ucikere ning’iyo en gire ka nyo ebitimo ni Yehova kunoke ngo. (Yoc. 24:15) Dong’ wun wu junyodo ma can ubenegowu pir awiya mwu ma jukoyo no, kud wupar nia jukoyogi pi kosa mwu!

6. Nyathin copo winjere nenedi ka janyodo pare uweko Mungu?

⁶ Saa moko wego kunoke mego re ma weko lemandha man ewenjo kadok juruot pare. (Zab. 27:10) Ecopo bedo lembe mi can ma lee dit ni awiya m’uyiyo junyodo migi lee. Nyamego Esther ma jukoyo won kud i cokiri uwacu kumae: “Abed awak wang’ ma pol, man anwang’u nia eweko lemandha aweka kende ngo. Ento eng’iyo mi tek tek niweko Yehova. Amaru baba, eno uketho kinde ma jukoye, cwinya bed upido nia etie nenedi. Saa moko ke cwinya ubed upodho gblik.”

7. Yehova winjere nenedi pir aradu ma jukoyo janyodo pare?

⁷ Aradu, ka jukoyo wuru kunoke meru kud i cokiri, ng’ey nia wan de cwinywa uberemo lee dit piri! Wakweyi, cwinyi bed tek nia Yehova de ung’eyo litho m’ibewinjo. Emeri man anyong’a ubenege pilembe ibetimo ire ku bedopwe. Wan umego ku nyimego peri mi cokiri de watie kud anyong’a piri. Poy bende nia in ungo re m’itelo wi yub pa janyodo peri. Calu ma walar waneno, Yehova umiyo bedagonya mi timo ng’iyong’ic ni ng’atuman. Pieno, ng’atu m’udaru thierere ni Mungu man ulimo batizo ci “biyeyo ter pare gire.”​—Gal. 6:5, korolembe m’i there.

8. Juruot pa ng’atu ma jukoyo gicopo timo ang’o kinde ma gibekuro nia edwog i bang’ Yehova? (Nen bende sanduku ma thiwiye tie, “ Dwog i bang’ Yehova.”)

⁸ Tek ng’atu m’imaru lee uweko Yehova, iromo bedo ku genogen nia nindo moko ebidwogo i bang’e. I kind nindo maeno icopo timo ang’o? Iromo timo lembe ceke pi nigwoko thenge mi tipo peri ubed tek. Kan ibetimo kumeno, ibibedo lapor ma ber ni juruot mange, man saa moko ni ng’atu ma jukoyone de. Ibinwang’u bende tego mi ciro litho  m’ibewinjo i cwinyi. Wakenen lembe moko m’icopo timo.

9. Icopo gamu kero i bang’ Yehova nenedi? (Nen bende sanduku ma thiwiye tie, “ Giragora ma copo juko cwinyi ka ng’atu m’imaru uweko Yehova.”)

⁹ Tim kero kud iwek lembe mi tipo. Pire tie tek nia imediri nitieliri giri man itiel bende juruot peri mange. Ibitimo lembuno nenedi? Gam kero i bang’ Yehova: Som Biblia kubang’ nindo man nyam i lembe m’isomone, bed icidh bende i coko ceke mi Jukristu. Nyamego Joanna ma won ku nyamin giweko lemandha ukoro kumae: “Anwang’u nia cwinya kwiyo kan aai asomo lembe iwi dhanu ma Biblia uweco pigi ma calu ve Abigail, Esther, Yob, Yosefu man Yesu. Lapor migi tielo cwinya man konya nibedo ku paru ma beco ma kwiyo wi litho para. Wer mwa ma segi de juko cwinya dit.”

10. Zaburi 32:6-8 konyowa nenedi niciro can m’umondo i cwinywa?

¹⁰ Konj adieng’acwiny peri i wang’ Yehova. Kinde ma can umondo i cwinyi, kud iwek nirwo i bang’e. Kway Mungu mwa ma jamer ukonyi niparu lembe i ayi m’ebemito, ‘edwoki riek man eponji ku yo m’ibiwotho i ie.’ (Som Zaburi 32:6-8.) Ku lemandha, ecopo bedo lith dit kan ibekoro ni Yehova ayi m’ibewinjiri ko i andha. Ento Yehova ubenyang’ cuu i kite m’ibenwang’u ko litho i adundeni. Emeri akeca man ebekweyi ikonj adundeni i wang’e.​—Ai 34:6; Zab. 62:7, 8.

11. Nimakere ku Juebrania 12:11, pirang’o wacikara nigeno twiny mi mer pa Yehova? (Nen bende sanduku ma thiwiye tie, “ Koyo ng’atini kud i cokiri tie twiny ma nyutho mer pa Yehova.”)

¹¹ Dik cingi i kum yub ma judong cokiri umaku. Koyo ng’atini kud i cokiri utie acel m’i kind twiny pa Yehova. Twiny maeno m’ebed emiyo  ku mer utie yo ma ber mi konyo ng’atu ma jukoyo, man jumange bende. (Som Juebrania 12:11.) Ka jukoyo ng’atini, jumoko mi cokiri gicopo wacu nia judong cokiri umaku yub ma rac. Re wang’ ma pol giweco ngo nyanok de pi racu ma ng’atune utimo. Wan wang’eyo ngo lembe zoo m’ukadhu. Pieno etie lembe mi rieko nia wagen yub mi judong cokiri ma gibino i komite mi pokolembe, kum gitimo kero migi ceke nilubo cik mir ukungu mi Biblia, man gipoko lembe “pi Yehova.”​—2 Kei. 19:6.

12. Jumoko gigam ginwang’u bero ma kani kinde ma gidiko cing’gi i kum twiny pa Yehova?

¹² Kan ibediko cingi i kum yub mi judong cokiri ma gikoyo ko ng’atu m’imaru, lembuno bikonye andha nidwogo i bang’ Yehova. Nyamego Elizabeth ma wadaru weco pire uyero kumae: “Ebino lembe ma tek dit iwa nia kud wadikara karacelo ku wodwa ma dong’ udongo.” Emedo kumae: “Kinde m’edwogo i bang’ Yehova, eyero nia jutimo ber ma jukoye kud i cokiri. I ng’eye, ewacu nia lembene umiyo ire ponji dupa ma beco. Eca kan afoneno andha valer mi twiny pa Yehova.” Mark ma won ot pare de umedo kumae: “Nindo dupa i ng’eye, wodwa uyero ira nia egam emito edwogi pilembe watimo tap gin m’umaku watim. Anyong’a ubenega lee dit kum Yehova ukonyowa nibedo wor.”

13. Ang’o ma copo konyi niciro litho m’ibenwang’u i cwinyi?

¹³ Kor kite m’ebewinjiri ko ni jurimbi ma gicopo nyang’ kudi. Bed inwang’ bende saa mi bedo ku Jukristu ma giteng’ini i tipo, man ma giromo konyi kara imediri nibedo ku nen ma ber. (Rie. 12:25; 17:17) Joanna ma wadaru weco pire uyero kumae: “Yor i iya, abed anwang’ara nia an’i kenda. Re kinde m’akoro lembe para ni jurimba m’ageno, lembuno ukonya lee dit.” Dong’ iromo timo ang’o ka ng’atu moko mi cokiri uyero wec m’ucobo cwinyi?

14. Pirang’o ukwayu wamedara ‘nicirara i kindwa, man wawek lembe yot yoti’?

¹⁴ Cir umego ku nyimego peri. I andha re, kud wagen nia dhanu zoo biweco ber. (Yak. 3:2) Wan ceke watie dhanu ma waleng’ ungo, pieno kud izungi ka ng’atu moko usayu kpe lem m’eyer, kunoke eyero lembe m’unyayu can i ii, kadok eyere akakaka ngo de. Poy i kum juk ma e ma jakwenda Paulo umiyo: “Wumeduru niciruru i kindwu ng’atuman ucir wadi man ucir wadi, man wuwek lembe m’i kindwu yot yot kadok nwang’u ng’atu moko utie ku lembe i iye i kum wadi de.” (Kol. 3:13) Nyamego moko ma jukoyo wat pare kud i cokiri ukoro kumae: “Yehova ukonya niweko lembe ni umego ma ginyayu can i iya ma ke nwang’u gibemito gitiel cwinya.” Dong’ dhanu mi cokiri giromo timo ang’o pi nikonyo juruot pa ng’atu ma jukoyo?

15. Wacopo timo ang’o pi nikonyo juruot pa ng’atu ma fodi juai jukoyo akoya?

¹⁵ Jol ju ma jukoyo wat migi ku yaw yaw. Nyamego moko ma nyinge Miriam uyero nia i ng’ei ma jukoyo umin, lworo bed unege nicidho i coko. Ekoro kumae: “Lworo bed  unega pi lembe ma dhanu biyero. Ento umego ku nyimego ma dupa gibino bende ku can pi lembuno, man giweco ngo rac pir umira ma jukoyo. Ka nwang’u gimbe, ang’eyo ngo nia nwang’u wacicoko dhu can para ku ng’a.” Nyamego mange ubepoy kumae: “I ng’ei ma jukoyo wodwa, jurimbwa gibin gitielo cwinywa. Jumoko giwacu iwa nia gikoso gin ma giyer. Jukurucel gibino wawak kugi, jumange ke gikiewo ira barua. Lembe ma gitimo ukonya mi tuko ngo!”

16. Cokiri copo medere nenedi nitielo juruot pa ng’atu ma jukoyo?

¹⁶ Mediri nitielo juruot peri ma gigwoko bedoleng’ migi. I saa maeno gitie ku yeny mi mer man mi tielocwiny peri nisagu m’i wang’e zoo. (Ebr. 10:24, 25) Saa moko, juruot pa ng’atu ma jukoyo gineno nia jumoko mi cokiri ujigo niweco i bang’gi, ve nia gin de jukoyogi. Wabemito ngo lembe ma kumeno utimere! Asagane ukwayu wabed wafoy aradu ma junyodo migi uweko lemandha, man watiel cwinygi. Nyamego Maria ma jukoyo won ot pare man won otne uwekogi ukoro kumae: “Jurimba moko gigam gibino yo para, gitedo cam man waponjo kud awiya para wakugi. Gineno can para man wawak kugi. Gicero bang’a kinde ma jubeyero nyinga ma rac. Gitielo cwinya andhandha!”​—Rum. 12:13, 15.

17. Judong cokiri gicopo timo ang’o pi nitielo cwiny ju ma gibenwang’iri ku cani?

¹⁷ Judong cokiri, wutii ku kaka ceke m’unen pi nitielo juruot pa ng’atu ma jukoyo kud i cokiri. Wutie ku tic ma segi mi juko cwiny ju ma wedi migi ma gimaru uweko Yehova. (1 Thes. 5:14) Wec kugi i wang’ coko man i ng’eye de pi nitielo cwinygi. Cidh iliewgi i bang’gi, man rwo kugi. Rwey lembanyong’a karacelo kugi, man saa moko bed ilwong’gi i thier mwu mi juruot de. Ubekwayu judong cokiri gidieng’ lee pi ju ma gibenwang’iri ku can, gibed ku kisa i kumgi man ginyuth igi mer.​—1 Thes. 2:7, 8.

18. Nimakere ku 2 Pethro 3:9, Yehova ubemito nia ju ma giweke gitim ang’o?

¹⁸ Yehova ‘ubeyenyo ngo nia ng’atu moko acel de unyothere, enre ebeyenyo dhanu ceke  gilok cwinygi.’ (Som 2 Pethro 3:9.) Kadok ng’atini utimo dubo ma pek de, re pi kwo pare tie tek asu i wang’ Mungu. Kepar pi cul ma lee ma Yehova uculo; ethiero kwo pa Wode m’emaru ni jamgony pi kwo pa ng’atuman m’i kindwa. Yehova ubeii ku mer nikonyo ju ceke ma giweke kara gidwog i bang’e. Etie ku genogen nia gibidwogo, calu ma Yesu unyutho i lapor pa wod m’urwinyo. (Luka 15:11-32) Ju ma pol ma gigam giweko lemandha, i ng’eye gidok gidwogo i bang’ Weggi mi polo ma jamer. Man dhanu mi cokiri ujologi ku cing’gi apar. Elizabeth ma judaru weco pire ubino kud anyong’a mi tuko ngo saa ma judwoko wode i cokiri. Kinde m’ebepoy pi lembe m’ukadhu, eyero kumae: “Afoyo dit ju m’utielo cwinywa nia wabed asu ku genogen.”

19. Pirang’o wacopo medara nijengara iwi Yehova?

¹⁹ Wacopo jengara iwi Yehova saa ceke. Ebed emiyo ngo juk ma timowa rac. Etie Wego ma jabero man ma jakisa; ju ceke ma gimare man ma gibetimo ire emarugi lee akeca. Ng’ey nia Yehova biwenji ngo nyanok de i saa m’ibenweng’iri kud adieng’acwiny. (Ebr. 13:5, 6) Mark ma walar waweco pire uwacu kumae: “Yehova ukunowa ngo nyanok de. Ebibedo bor ungo kudwa kinde ma wabekadhu kud i peko.” Eyo, Yehova bimedere nimiyo iri “tego m’usagu ceke.” (2 Kor. 4:7) Andha, icopo mediri nigwoko bedoleng’ peri man nibedo ku genogen kadok kinde ma ng’atu m’imaru uweko Yehova.